Read South Giziga 2SA 14 Bible Online

2SA 14 - South Giziga bible

2SA 14

¹Zoˀap, mangal ngi Seruya, a si na le, buy Davit a ro ti Absalom a kwacay.

²Ngwas ada a Tekoˀa, i ngwas misi sin teˀe, Zoˀap a slin ara ziloko di. Zoˀap a ɓaŋ na: «Gi kaɓa ki wudiga. Ki zana ngi vagay. Ki pi urdi avu vu ta ɓula. Wãˀ naŋ na, gi kaɓa ki ngwas muro zlezle ar vagay ngi mburu.

³A dirba nah, kisa ru ng'avu Buyo, kisa ɓaŋ ɓi ya mawuɗ i ɓuw di ani na.» Ɓi, ngwas masa ɓa da buy tuwa na, Zoˀap a ɓaŋ di ɗaˀ ɗaˀ le.

⁴Ngwas ngir li mazilaka Tekoˀa tuwa, aru nga ɓa buyo. A girdaˀam girdeˀ girdeˀ nga mbuŋ buyo, waɗ a huruk huruk a ruwuy, a ɓa buyo: «Aw buy ɗu nga ya, i wuɗ ɓa ki jiniy ta kwa!»

⁵Buy a cufuɗaŋ: «Ki wuɗ mike?» Ngwas a mbiɗaŋ di: «Aw kumani, yi ngwas wudiga. Zil ɗu a muc le zlezle.

⁶Ya ngwas beke ɗike, ya zleˀe ti ziri mizilehey cuw. Taŋ cuw taŋ, a tiram a ɓuh. Mbur anta avu taŋ ɓa a wuɗuka taŋ ta. Mbur mekelem a kiɗa sukum naŋ vagay.

⁷Ani muy naŋhay gar ara girikiy, a ɓikiy ɓa i ba taŋ ti mangal mikiɗa sukum naŋ na, ɓa a kiɗaka ngi pula cuwal ngi sukum naŋ, naŋ mikiɗa na, ɓa a kiɗaka hilfa ngi muzuma haya wãˀ ma.» Misliŋ vu mindiriy vezze na, a wuɗam ɓa a mucaka kanah so. Mbak slimiɗ ngi zil ɗu, yo yi ngi kwacay naŋ anta sa ndir asi ruwuyo mata.»

⁸Buy a ɓa ngwas tuwa: «Mi ngi hay ɗiki. I sa ɗuv ɓi vur ɓi ɗike.»

⁹Ngwas Tekoˀa a mbiɗa da buyo: «Buy, kumani ɗu, anja malambaˀ a diɗo ng'ar ya, waɗ ng'ar mizli ngi hay ɗuwoy vuna si. Ka ati buy ka mazuma gar na, ko ɓi anta avu ka ta.»

¹⁰Buy a mbiɗaŋ di: «Mbur masa supuw ti mi na, kisa siy di ng'aka. Ko mbri, naŋ anta sa zluw ti ɓi ngi guw ngaˀa mata wãˀ.»

¹¹Ngwas a mbiɗa da buyo ma: «Buy, kumani ɗu, hudum ti slimiɗ ngi Bumbulvuŋ, Buymisemuŋ ɗik na, ɓa mbur mupul cuwala, a kiɗaka mekelem bac ng'ar hirnga ngi mangal mikiɗa na mata, yo anja ɓa a zizikiy mangal mindir na wãˀ mata ma.» Buy a ɓaŋ: «Hadam ti slimiɗ ngi Buymisemuŋ misi ti siifa na, ko ngwic hirnga ngi mangal ɗike masa diɗ pal a ruwuy anta.»

¹²Ngwas a mbiɗaŋ di: «Buy, kumani ɗu, puliy jiviɗ da ya ngwas beke ɗike, ɓa i ɓuw ɓi neˀ ta kwa.» Buy a mbiɗaŋ di: «Ka ɓi.»

¹³Ngwas a ɓaŋ: «Ki ga malambaˀ kahana da mizli ngi Bumbulvuŋhaya vur mike? Ki pula jiviɗ da mangal ɗik Absalomo, ɓa a mo tir li naŋ mikil ng'ara na ta. Na, da i waka le weˀ avu mingiɓi ɗik ka miɓa ani na, ki ja hirnga ɗike le ti kiita.

¹⁴Naŋ kanah, pas purla na, ndra gar i sa micam gisiŋ ɓula. Ndra rak rak kaɓa yam mimbiɗi le a ruwuy na, anta nuw mata. Amma Bumbulvuŋ anta wuɗ zizi ngi mburo ta. A ɗiya jiviɗ nah kanah na, anja ɓa mbur mihiziga fuk avra na, a ndir kileŋ avu naŋ Bumbulvuŋ ta.

¹⁵Mobor, ya muso ɓuw ɓi ya muɓuw di ani gar hana na, asi mizli a gikiy zluwun le. Ya ngwas beke ɗike, yi ɓi a kwacay ɗu na: I sa ra ɓuw ka buyo. Ɓi, ya ngwas beke masa ɓuw di na, asinta, kisa ga ɓi nah kwani.

¹⁶Mbur mawuɗ ziziy jom ati mangal ɗu pas purla ti wuzla mizli ngi Bumbulvuŋhay na, ka buyo, kisa tiɓiy, kisa lihiy ti haŋ mbur nah.

¹⁷Asi, ya ngwas beke ɗike, yi ɓi a kwacay ɗu na: Mi ɗik ka buy ɗu masa ɓa na, a tisl mevel. Asi mike na, ka buy ɗu, kakaɓa wala ngi mezle ati malambaˀa. Anja Bumbulvuŋ Buymisemuŋ ɗike, a ndir ati ka.»

¹⁸Buy a mbiɗa da ngwasa: «Da i ra cufuɗuw na, ki ɗumiy ɓi neˀ ta.» Ngwas a mbiɗaŋ di: «Buy, kumani ɗu, anjaka ɓi si.»

¹⁹Buy a cufuɗaŋ: «Mubuguw ɓi hana gar na, i Zoˀap ɓula si?» Ngwas a mbiɗaŋ di: «Buy, kumani ɗu, kaɓa ka misi ti siifa gisiŋ na buy, naŋ kanah ya, ɓi ka buy, kumani ɗu miɓa le gar na, naŋ anta ngizli ti mburo sluloh ti ka sluloh ti ka ta. Haˀaw, ɓi ya ngwas beke ɗik miɓa gar na, muɗuviy ɓi nah, yo miɓiy kisa ɓakahana, kanaha gar na, i gawla ɗik Zoˀap gwaɗ naŋ.

²⁰Gawla ɗik Zoˀap a ga kanah na, ɓa ɓi a mbiɗi. Amma na, buy ɗu, ka ti sinmijileŋ, ka ti sinmijileŋ kaɓa modro ngi Bumbulvuŋ. Ɓi macuh asi ruwuy gar na, ki si na le.»

²¹Buy a ɓa Zoˀapa: «Wurenna, ɓi a ɗiyi le. Aru, ara mo ti gawla ɗik Absalomo.»

²²Zoˀap tuwa, a huruk huruk, a ɗuwula mi da buyo. Zoˀap a ɓi: «Dana, ya gawla ɗike, buy, kumani ɗu, yi si na le, ki giy mezle le, asi gwat gawla ɗik muɓuw di na, ki ga le, buy ɗu.»

²³Zoˀap a zuɓa jiviɗe, aru nga Gesur. A mo ti Absalomo nga Zeruzaleme.

²⁴Buy a ɓi: «Anja a mi ngi hay naŋ. Anja a so a mbuŋ ɗu ɓa i puraŋ ta.» Dar Absalom a mi ngi hay naŋ. Aru a mbuŋ buyo, a puraŋ keɗ le ta.

²⁵Asi hirwuy Israyel gar na, mbur mukuy, yo hiri a ɗuv ava takaɓa Absalom na anta. Zle a duba sar, hã sesẽŋ a hirnga na, ko hereweɗ neˀ ava anta.

²⁶Ar kiɗa mi ngi vi gar, da ngwic hirnga ara gaŋ ziɓir ziɓir haɗa na, a hica hac le hac le avra. Da naŋ mihica hirnga le na, a waka dudok ngi ngwice weˀ na: a ji kilo cuw ar kilo ngi buyo.

²⁷Absalom a yi ziri mizilehey makir waɗ zuŋ mongoso purla, a zilaka Tamar. Tamar i ngwas mukuy haɗa teˀe.

²⁸Absalom a cifi a Zeruzaleme vi cuw manja aru ndol le a mbuŋ buyo.

²⁹Absalom a slin nga zilakaŋ Zoˀapa, ɓa a slinaŋ ng'avu buy, amma Zoˀap a ngum so ngi hay Absalomo ta. A slin ngi sar mucuw naŋ ma, amma a ngum ru ta na si.

³⁰Akẽh na, Absalom a ɓa gawla naŋhaya: «Guva ngi daw galaŋ ngi Zoˀap misi a ciki nga ya na, kum ada puraka ta kwa? A ram, ara ɗuvakaŋ vu.» Dar gawla ngi Absalomoy a ram, ara ɗuvaka vu da guva tuwa.

³¹Akẽh na, Zoˀap a ru, ara luuma Absalom a hay naŋ, a ɓaŋ: «Gawla ɗikey a ram, a ɗuvaka vu da guva ɗu vur mike?»

³²Absalom a mbiɗa da Zoˀapa: «I slin ng'avu ka, ɓa ki sawa, i slinuw, ɓa ki ra ɓa buyo: ‹Ya mumo ti Gesur na ngi mike? Avi ya na, zuwen ya misi a diga aruŋ zleˀe. Wurenna yi wuɗ ɓa i ra pura mihiri ngi buyo muduba. Yo da ɓi malambaˀ ada avu ya na, anja a kiɗiy vagay si!›»

³³Zoˀap aru ng'avu buyo, ara slufaŋ ɓi nah. Akẽh na, buy a slin, ara ziloko Absalomo, a so nga ciki buyo. Absalom a huruk huruk, midibiɗ dir a ruwuy, waɗ dilak a mbuŋ buyo. Dar buy a ja Absalom tuwa kuɓuy.