Read South Giziga 2SA 15 Bible Online

2SA 15 - South Giziga bible

2SA 15

¹A dirba nah na, Absalom a lum mota ngi vurumoy, pilisey waɗ mizli ziley kukur zlum makilam a mbuŋ naŋ.

²Ti miprik prik na, Absalom a slikiɗ, ara cici deŋ a ciki jiviɗ ngi walahaya. Mbur gar mira ru ti ɓi ngi widi ng'avu buyo, ɓa a gaŋ kiita nah na, Absalom a zilaŋ, a ɓaŋ: «Ki mbur ngir walahay wanaka?» Mbur a mbiɗaŋ di: «Ya gawla ɗike, yi mbur ngisi sukwi purla a wuzla Israyeleye.»

³Dar Absalom a ɓa mburo: «Ani, ɓi ɗik i mezle, yo naŋ jeŋŋe, amma mbur loŋ anta ti vu buyo ngi cinuw ɓi naŋ ta.»

⁴Joˀ Absalom a ɓi: «Kay! Da yi migi kiita angi hirwuy hana zleˀe na mbrike? Mizli gar misi ti ɓi ngi widihey na, anja ara soko ng'avi ya, yo yi ga taŋ kiita nah le ta kwa!»

⁵Da mbur mikiroho le ɓa a huruk huruk a mbuŋ naŋ na, Absalom a vulaŋ haŋ waɗ a jaŋ gizliliw.

⁶Israyeley gar maram ng'avu buy ti ɓi ngi kiita na, Absalom a gi avu taŋ kanah kanah. Absalom a ga gilaw da Israyeleye ti wer kanah.

⁷Angi kiɗa mi ngi vi mizli ngir mufaɗ naŋ na, Absalom a ɓa buyo: «Puliy jiviɗ i ru nga Hebroŋ, ɓa i ra ga gwat ya miɓa ɗaˀ ɗaˀ le, i sa ga da Bumbulvuŋ zleˀe na.

⁸Asi mike na, ya gawla ɗike, ti ya micifi a Gesur, hirwuy Siri zleˀe na, yi ɓa Bumbulvuŋ le ɗaˀ ɗaˀ le, yi sa gaŋ gwata. Yi ɓi le zleˀe: Da Bumbulvuŋ a mo ti ya le gisiŋ nga Zeruzaleme na, yi sa gaŋ slra naŋ.»

⁹Buy a ɓaŋ: «Aru zuy zuy.» Dar Absalom a zuɓa jiviɗ aru nga Hebroŋ.

¹⁰Absalom a slin mizli naŋhay yaŋ yaŋ nga wuzla sukwi Israyeley gar, a ɓa taŋ: «Da kum micinam tulum le cin si na, kisa ɓam: ‹Absalom a tiri buy le a Hebroŋ.›»

¹¹Mizli mizilehey skat skat cuw a Zeruzalem, Absalom mizila taŋ, mizila taŋ gar na, a kisakaŋ. A ram le, taŋ cimak ar ɓi misenna, ko taŋ a sinam ɓi neˀ ta.

¹²Absalomo, ti naŋ mira ga mikuli na, a slin nga zilo Ahitofel ar walahay naŋ a Gilo. Ahitofel i mbur makuta buy Davite. Naŋ kine, ara gam gidiɓi ti gidaŋ nga mbuŋ na si, yo mizli ngisi Absalomoy ara sikam ti gidaŋ haɗa haɗa.

¹³Akẽh na, mbur a so fa ɓi da Davite, a ɓaŋ: «Mizli Israyeley a mbiɗam hiri le ng'avi Absalom.»

¹⁴Davite, gawla naŋhay misi ati naŋ a Zeruzalem gar na, a ɓa taŋ: «Slikiɗam, kulukum le. Asi ndr'anta sa laham avu Absalomo ta. Kulukum le kutum, vur naŋ mawuso vu nga ja ndra is. A sa ga ndra malambaˀ, yo a sa kiɗa mizli ngir walahaya vagay vagay ti maslalam.»

¹⁵Gawla ngi buyoy tuwa, a mbiɗakaŋ di: «Buy, da ki wuɗ ka wanaka gar a mevel ɗike na, ndra gawla ɗikeye, ndr'anihĩ.»

¹⁶Joˀ buy ati mizli ngi hay naŋhaya gar, a bam a ram ti sar. Amma a pul ngwas mangasl naŋhay kuruˀ, ɓa ngi jigina haya.

¹⁷Buy ati mizli naŋhay mubam ti sar tuwa na, ara cicam avu hay mikiɗ mi ngi dirba wãˀ.

¹⁸Davite, soje naŋhaya gar ara cohom tulɓoŋ tulɓoŋ a ciki naŋ: mizli Kretey ati peletihey gar. Mizli Gatay skat skat merkeɗ aseˀeŋ, ara cohom a mbuŋ buyo.

¹⁹Buy a ɓa Itay, mbur Gata: «Ka ki wuɗ so ati ndra ya vur mike? Mi, ara cifi avu buy nawaya na, asi ki mbur mulaka, yo ma na, ki kilo vuna ti kil ti hirwuy ɗike.

²⁰Ki ndilo ani ngi dambu ngi dambu si na, ɓa i sirkuw asi ndra dana dana si mbrike! Ya vuna, yi ru na, nga maka na, yi si na ta. Kay, kanah ta! Mi ng'ar walahay, yo mam jom ati sukum ɗikeye. Asi ki biga le, ki mbur miteŋteŋ, ki mbur mikaslsla.»

²¹Itay a mbiɗa da buyo: «Hadam ti slimiɗ ngi Bumbulvuŋ misi ti siifa, yo ti slimiɗ ɗik, buy kumani ɗu misi ar siifa wurenna hana: ka buy, kumani ɗu, li ka masa ru na, da ko a bi ngi muc malla ngi cifi ti siifa kwana, ya gawla ɗike, y'ada a diga ya.»

²²Davit a mbiɗa da Itaya: «So cuhu.» Itay, mbur Gat tuwa, a cohom ati mizli naŋhaya gar waɗ ziri naŋhaya gar.

²³Mizli gar ara tuwam, ara wudam cǝruw cǝruw, yo ara cohom. Buyo, naŋ a tuwuɗa mizaw Sedroŋ, yo mizli gar na, ara cohom, hiri taˀ ng'ar jiviɗ miki ɓaˀ nga wuzlaɓuh mikirɗak kirɗak.

²⁴Mizli Levihey majijiraka akoti ngi jumoˀay ngi Buymisemuŋ na, masay Sadok, naŋ da avu taŋ akẽh ya. Levihey a ɗuvaka akoti ngi jumoˀay ngi Buymisemuŋ a ruwuy. Abiyatar ara ga mikuli, hã mizli ngir walahaya gar a boko, a cohom, a kiɗam mi.

²⁵Buy Davit a ɓa Sodoko: «Mi ti akoti ngi jumoˀay ngi Buymisemuŋ ng'ar walahay a muŋ. Da Bumbulvuŋ a giy mezle le na, a sa mi ti ya, yo a sa puliy jiviɗ, i sa pura akoti ati hay naŋ a muŋ.

²⁶Amma, da Buymisemuŋ a ɓi le: ‹Yi wuɗ ka mata na, zuy. Anja a giy gwat naŋ mahĩyãŋ.›»

²⁷Buy a ɓi ma: «Sadok, ka masay, ki cine le kwa? Mi ti zuy ng'ar walahaya. Ka ati mangal ɗik Ahimas waɗ Abiyatar ati mangal naŋ Zonataŋ.

²⁸Ani ya na, yi ra zik neˀ a ciki wuzlaɓuh mikirɗak kirɗaka gweˀ avu li tuwuɗ ngi mizaw Zurdeŋ, sey da ya mulum mingiɓi le ti vu kumo.»

²⁹Sadok ati Abiyatar a mam ti akoti ngi Buymisemuŋ nga Zeruzaleme. Taŋ a cifam wãˀ a diga.

³⁰Akẽh na, Davit a jiɗ nga muwã tumbur, bal ti tuwuy. Aru sar ɓaˀ kine waɗ zana sirit a hirnga. Mizli makisakaŋ gar na, a sirtaka hirngahaya sirit sirit. A ra jiɗam, ara jiɗam nga muwã bal ti tuwuy.

³¹Davit a cine na «Ahitofele naŋ da a wuzla mizli migi gidiɓihey misi avu Absalom na.» Dar Davit a ɓi ti ˀay paɗ a muŋ: «Bumbulvuŋ, ambuh, mi ngi kuti ngi Ahitofel na, tiri di ɓi ngi gilaway lambaˀ.»

³²Davit a ndil a hirnga muwã, ar li huruk huruk a mbuŋ Buymisemuŋ. Keɗ na, Husay, mbur Arkit, mukuti naŋ ara so nga ji di hirnga, zana mingira le yaraɓ yaraɓ, yo hirnga limbrim ti muyuŋ.

³³Davit a ɓaŋ: «Daka avu ya aka na, kisa vuliy gir ngataraŋ.

³⁴Amma, mi ng'ar walahaya, kisa ɓa Absalomo: «Haˀaw buy, yi sa tiri gawla ɗiki. Zleˀe na, yi gawla ngi bunuku. Wurenna so na, yi gawla ɗik muduba.» Kanah na, naɓa kisa mbiɗa kuti ngi Ahitofele tisi ya.

³⁵Yo ma na, Sadok ati Abiyatar, migi mikuli da Bumbulvuŋ, t'ada a diga, a sa jinikuw ta kwa? Ɓi ka masa cine a hay buy gar na, kisa so ti ɓi nah da masayay, Sadok ati Abiyatara.

³⁶Taŋ ada ti ziri taŋhay cuw a ciki taŋ a diga: Ahimas, mangal ngi Sadok waɗ Zonataŋ, mangal ngi Abiyatar. Ɓi maɓaka, kum masa cinaka gar na, kisa slinoko taŋ ɓa a sa ɓikiy di.»

³⁷Husay, ngama ngi Davit a mi, ara ndil ar walahayakasl, naɓa Absalom ara ci nga Zeruzaleme.