Read South Giziga 2SA 16 Bible Online

2SA 16 - South Giziga bible

2SA 16

¹Davite, ti naŋ mutuwuɗa wuzla muwã neˀ na, Siba, gawla ngi Mefibaˀal a ndilawa, a ji di hirnga. Naŋ ti zunguhoy cuw, gwatay kaˀ kaˀ a duba taŋ: Peŋ skat skat cuw, yi ngi gudubun, muˀulo naŋ doc doc skat, yi ngi uruf skat waɗ mbaazla kwenekwene purla.

²Buy a ɓa Siba tuwa: «Ki so di i mike?» Siba a mbiɗaŋ di: «Buy, zunguhoyo, ɓa mizli ngi hay ɗikey a jiɗam ar taŋ. Peŋ ati yi ngi widisey na kwana, ɓa gawlahay a sa zumakaŋ, yo mbaazla, wuzlaɓuh mikirɗak kirɗak masa tika gidaŋ ngi mizli na, ɓa a sakaŋ.»

³Buy a ɓaŋ na: «Na, Mefibaˀal, dideˀ ngi buy ɗik Sawul vuna, naŋ amaka?» Siba a mbiɗa da buyo: «Naŋ kanah gisiŋ, naŋ a ndiro le a Zeruzalem, asi a ɓi a kwacay naŋ na: ‹Dana, Israyeley a sa makaŋ ti zumabuy ngi cine a muŋ.›»

⁴Buy a ɓa Siba njah: «Zlili ngi Mefibaˀal gar na, wurenna i ngi ɗiki.» Siba a ɓa buyo: «Y'ani dilak a mbuŋ ɗike. Buy, kumani ɗu, ka giy mezle ɗike si.»

⁵Buy Davite, naŋ mindil a Bahurim na, mbur ada, a bawa. A zilaka mbur nah vuna Simey, mangal ngi Gera. I muy ngi mizli ngi hay Sawuloy vuna. Naŋ mabo tir walahaya na, bal ti nisa Daviti.

⁶A hiziga Davit ati gawla naŋhaya gar ti ɗugur. Mizli gar ati soje gambara naŋhaya, t'ada a ciki naŋ akẽh tir vay tika tika ngbaŋ.

⁷Simey a ɓaŋ ˀay paɗ a muŋ: «Aru nga kẽh, kesef lambaˀ, mikiɗa hirnga.

⁸Sawul, ka micifi buy na ar li naŋ, mizli ngi hay naŋhay gar ka mipa pumbus taŋ na, Bumbulvuŋ a pula zayɓi taŋ ar ka. Bumbulvuŋ a vula zuma buyo le a haŋ mangal ɗik Absalom, ani ka wurenna, ki ro ar bonoy asi ki mbur mikiɗa hirnga.»

⁹Abisay, mangal ngi Seruya, a ɓa buy Davite: «Buy, kumani, kiri maara hana, a zuw asi mike? Puliy i cuh, i ra bukoŋ hirnga avra.»

¹⁰Buy a mbiɗaŋ di: «Mangal ngi Seruya, mizlira ndra ati ka i mike? Naŋ manisiy na, da i Bumbulvuŋ miɓaŋ ɓa a nisiy na, masa ɓaŋ: ‹Ki ga kanah ngi mike na, i waka?›»

¹¹Davit a ɓa Abisay ati gawla naŋhaya gar: «Mangal ɗu mubo tivi ya, da ara wuɗ ziza hutuŋ ɗu na, sokkota mbur Benjameŋ hana jak kwa? Da i Bumbulvuŋ miɓaŋ na, pulakaŋ, anja a nisiy.

¹²Asinta Bumbulvuŋ a sa pura bonoy ɗu. Ar deɗe ngi nis, naŋ misi dana na, a sa ɗuwuliy mi kwani.»

¹³Davite, ara ram a jiviɗ ati mizli naŋhaya. Simeye kwana, naŋ ara ru a ciki muwã, ɓaˀ a ciki Davite, bal ti nisaŋ waɗ a hizigaŋ ti ɗuguroy. A hilaŋ lagwada nga muŋ turliŋ turliŋ.

¹⁴Buy ati mizli naŋhaya gar, ara ndilam na, a giram le kupuyah kupuyah wãˀ. Joˀ a musukam vu a diga.

¹⁵Absalom ati zigiduw Israyel gar a ndilam le a Zeruzaleme, Ahitofele taŋ bummoˀ ati Absalomo.

¹⁶Husay, mbur Arkit, ngama ngi Davite, ti naŋ mindil avu Absalom na, a ɓa Absalomo: «Anja Bumbulvuŋ a vuluw siifa, buy! Anja Bumbulvuŋ a vuluw siifa.»

¹⁷Absalom a cufuɗa Husay tuwa: «hang teŋteŋ ɗik ka maga avu ngama ɗik Davite zleˀe na ta kwa? Ki ru asi ngama ɗike ta vur mike?»

¹⁸Husay a mbiɗa da Absalomo: «Ĩˀĩ. Mbur misenna, Bumbulvuŋ muwunaŋ, yo mizli Israyeley gar muwunakaŋ na, yi sa ndir ava.

¹⁹Na zle, yi sa gi gawla ngi waka? I sa gi gawla ngi mangal ngi ngama ɗu takwa. Ya migi gawla ngi bunuk zleˀe na, yi sa gi gawla ɗik rak rak kanah ya.»

²⁰Absalom a ɓa Ahitofele: «Da i sa gam mbrike na, ngilam wuy ar wala kumo so.»

²¹Ahitofel a mbiɗa da Absalomo: «Ngwas mangasl, bunuk mupula taŋ ngi kutuko hay na, ci ara hin ti taŋ so. Kanah na, Israyeley gar a sa sinaka, ki gi di i gwat malambaˀ wãˀ avu bunuko. Yo mizli ɗikey gar na, ɓi nah a sa vula taŋ gidaŋ.»

²²A ɗiyaka guɗuk da Absalomo jirngasl a hirnga ngi Davit midika ti dik na. Joˀ Absalom a ci, ara hin ti ngwas mangasl ngi cine naŋhaya, a mihiri ngi Israyeley gar.

²³Ngilawuy ngi Ahitofel miɓa le ti di nah gar na, a puraka kaɓa i ngilawuy ngi Buymisemuŋ. Avu ti Davit ati Absalom gar na, taŋ anta ziriɗaka ngilawuy ngi Ahitofele ta.