Read South Giziga 2SA 17 Bible Online

2SA 17 - South Giziga bible

2SA 17

¹Akẽh na, Ahitofel a ɓa Absalomo na: «Puliy ɓa i wini mizli durmuk kuruˀ nga cuw, ɓa i ra sipa Davite ti duvuɗ hana vuna si.

²Naŋ migir le kupuyah wãˀ na, yi sara lumaŋ gurjik, yi sa gaŋ zluwun. Mizli naŋhay gar a sa kilam, buyo naŋ misa ndir le pal naŋ na, yi sa kiɗa vagay.

³Naɓa yi sa mo ti mizli gar ng'avu ka a muŋ. Mbur ka mira sipa nder ndere, da ka mijaŋ is le na, kite mizli gar a moko le. Mizli gar a sa ndiram zuy zuy.»

⁴Absalom ati micawwa ngi Israyeley gar na, a puraka ɓi ngi Ahitofele, naŋ jeŋŋe.

⁵Absalom a ɓi: «Husay, mbur Arkite, ziloko di ya, ɓa i cinaka mingiɓi naŋ ya so.»

⁶Akẽh na, Husay aru ng'avu Absalomo, joˀ Absalom a ɓaŋ: «Ahitofel a ɓi ani kahana kahana. Gwat naŋ miɓa na, i gaka kwa mbrike? Da kanah ta na, ka ɓa wuluk ɗike ya so.»

⁷Husay a mbiɗa da Absalomo: «Ngilawuy Ahitofel muvulo di hana na, i ngilawuy mezle mata ɓula.»

⁸A dirba nah, Husay a ɓaŋ: Ka vuna, ki si na bunuk ati mizli naŋhaya le ta kwa? Taŋ i mizli gambarahay, yo a slikiɗam himaˀ le wãˀ kaɓa mobor miziza zinga naŋ le a ɓuh. Bunuk i mbur ngi vurum, naŋ anta hin jom ati mizli gara ta.

⁹Wurenna, a ro na ɗum ar vigiɗ malla ar li mekelem pal. Ani, da vagay misa zla ki le a wuzla mizli ndraˀahaya na, mbur misa cine le na, a sa ɓi: ‹Vagay a ki le haɗa a wuzla mizli ngisi Absalomoyo!›

¹⁰10 Akẽh na, ko soje gambara misi mevel ka mobor misa cine le na, a sa hĩhĩy. Asi mizli Israyeley gar a sinaka bunuko le, i mbur gambara, yo mizli ngi seˀeheye gar i soje gambarahay.

¹¹Ya so na, ngilawuy ɗu ani: «Kuso Israyeley gar avu ka, zle a Daŋ hã a Berseba, ɓa a gam haɗa kaɓa muyuŋ a mi mizaw. Ka vuna, ki ru ɓaˀ asi taŋ ng'ar vurumo.

¹²I sara jaka is da Davite ar li naŋ misi anga. I sa ndilam a hirnga naŋ kaɓa wulngar mapo nga ruwuy. Naŋ vuna ati mizli ngi seˀeheye, ko mbur pal masa lih anta.

¹³Da a kil le, ara ci le ar walahay mekelem na, Israyeley gar a sa zuɓam zeweɗey, ara ndahaka walahay nah vuna gun, a ɗiɗakaŋ sesẽŋ a mizaw, ko ɗugur loŋ purla masa ndir ar li nah anta.»

¹⁴Absalom ati Israyeley gar a ɓam: «Ngilawuy ngi Husay, mbur Arkite, i ngilawuy mimezle, a funa ngilawuy ngi Ahitofele le.» Naŋ kine, ngilawuy mimezle ngi Ahitofel zleˀe masa so ti bonoy ar Absalom na, Buymisemuŋ a ga le, ɓa a gi ta.

¹⁵Sadok ati masay Abiyatara, Husay a ɓa taŋ: «Absalom ati micawwa ngi Israyeleye, Ahitofel a ngila taŋ wuy ani, yo ya kwana, ngilawuy nga ya ani:

¹⁶Ani wurenna so na, slinam kutum ng'avi Davite: Ɓakaŋ na: Ti duvuɗ hana, anja ki cici ar li micay a ciki mizaw vay ka. Da a gi vuna ma na, anja ki tuwuɗa mizaw. Da kanah ta na, ka buy ati mizli ngisi kahaya gar na, kisa ngizlam kuɗupu.»

¹⁷Zonataŋ mangal ngi Abiyatar ati Ahimas, mangal ngi Sadoko, taŋ a roko dedeŋ a En-Rogel a duba gala zleˀe, i ngwas beke mara taŋ ti ɓiheye, yo masa ra ɓaka da Davite kwana, i taŋ vuna. Asi da ara cam ng'ar walahaya na, taŋ anta wuɗam ɓa mizli a puraka taŋ ta.

¹⁸Amma mangal gawla a pura taŋ le, ara ɓa da Absalomo. Zonataŋ ati Ahimas tuwa cuw taŋ, a ram kutum, ara ndilam a hay mbur ada a Bahurim. Mbur nah vuna, vigiɗ ngi yam ada a wazlaraya, taŋ tuwa, a pam sar ng'ara.

¹⁹Mumuŋ ngi hay a zuɓo gwat ka zana, a njira njar a mi vigiɗ ngi yam tuwa, waɗ a njik daw njak ara, ko mbur anta pur gwat neˀ ta.

²⁰Gawla ngi Absalomoy a cam ngi hay ngwas tuwa, a cufuɗakaŋ: «Ahimas ati Zonataŋ na, taŋ amaka?» Ngwas a mbiɗa taŋ di: «A tuwuɗam yam, a cohom le.» Gawla ngi Absalomoy, a ram ti sipaka taŋ, gar gar, ko a lumaka taŋ ta, a mam nga Zeruzalem a muŋ.

²¹A dirba taŋ mucohom na, Ahimas ati Zonataŋ a boko tir vigiɗe ng'avra, a ram ti ɓi nah da buy Davite. A ɓaka Davite: «Slikiɗam, tuwuɗaka mizawa kutum. Dar a sipaka ngilawuy ngi Ahitofel tuwa da Absalom, dar a sipika: asi Ahitofel a ngila wuy le da Absalomo vur ɓi hana.»

²²Akẽh na, Davit ati mizli gar taŋ misi bummoˀ na, a slikiɗam, a tuwuɗaka mizaw Zurdeŋ.

²³Ahitofele, ti naŋ mupura, anta gam slra ti ngilawuy nga naŋ na ta na, a juwa zungu naŋ, a zuɓa jiviɗ, a cuh ngi hay, ar walahay naŋ. A ɓa ɓiheye ɗaˀ ɗaˀ le da mizli ngi hay naŋhaya, ara luwa vu naŋ. Naŋ mumuc na, a dikaka ar zivi ngi cine.

²⁴Davit a ndil a Mahanayime, naɓa Absalom ati mizli Israyele gar, ara tuwuɗaka mizaw Zurdeŋ ti tuwuɗ aruŋ.

²⁵Ar deɗe ngi Zoˀap, madiɗa ngi sojeheye, Absalom a ki di i Amasa. Dambalaka Amasa vuna i mangal ngi mbur mazilaka Yeter, mbur Israyel, muzuɓ ngwas mazilaka Abigal, zuŋ ngi Nahas. Abigal vuna i sukumuŋ mongoso ngi Seruya, mumuŋ ngi Zoˀap.

²⁶Absalom ati Israyeley a pam sar angi hirwuy Galaˀat.

²⁷Davite mindil ndil a Mahanayime na, musoko tiɓakaŋ i ti: Sobi, mangal ngi Nahas ngir hirwuy Rabba, walahay hirnga ngi Amoŋhoy, yo Makir, mangal ngi Amiyel ngir walahay Lo-Dabar, waɗ Barzilay, mbur Rogelim angi hirwuy Galaˀat.

²⁸A soko ti gwat ngi hiney, zana mija taŋ ti ngwicey, taasahay ati alkamari, daw galaŋ, hapa, daw musulo sol sol, haɗiuŋ, soza,

²⁹mam, wursla, ɗuwa mihindirka ngi sla ati ngi tumuŋhoy. A soko taŋ da Davit waɗ mizli ngi seˀeheye. Asi mike na, mizli a ɓam a kwacay taŋ na: «A wuzlaɓuh mikirɗak kirɗak na, mizli a sam bonoy le ti may, a giram le kupuyah kupuyah, yo madalyam a ga taŋ bonoy le.»