Read South Giziga 2SA 18 Bible Online

2SA 18 - South Giziga bible

2SA 18

¹Davit a cuh ti wuzla mizli ngi vaˀahaya, a slufa taŋ, a cifi boyoy ar wala taŋ, buy ngi mizli durmuk durmuk, yo ngi mizli skat skata.

²Akẽh Davit a pula jiviɗ da mizli ɓa a ram. Mizli mingac ngac taˀ taˀ makir na, mingac purla, a vula da Zoˀap mangal ngi Seruya, mingac numuŋ, a vula da Abisay, sukum ngi Zoˀap, yo waɗ mingac mekeleme, a vula da Itay, mbur Gat. Buy tuwa, a ɓa mizli na: «Ya vuna i wuɗ i bam vurum bummoˀ ati kum aya.»

³Mizli a ɓakaŋ na: «Ka, k'anta bi ta. Asi mike na, da i ra kilam na, anta sa kam slimiɗ ar ndra ta. Ko da reta ngi mizli ar wala ndra cah a micam le tekeɗe kwana, anta sa kam slimiɗ ar ndra ta. Amma wurenna, ka mupuɗaw kaɓa mizli durmuk kuruˀ ka ndra misi ani na. Zuwen ka masa slina ndra jini ɗike ti slin zle tir walahay vuna si.»

⁴Buy a mbiɗa taŋ di: «I sa ga gwat kum mawuɗama.» Mizli, ti taŋ mira bam, mizli skat skat, mizli durmuk durmuk na, naɓa buyo naŋ da deŋ gweˀ a mizlingre ngi walahaya.

⁵Zoˀap ati Abisay waɗ Itaya, buy a ɗuva taŋ mingiɓi, a ɓa taŋ: «Ambuh kum takwa, ki gaka malambaˀ da Absalomo ta.» Buy miɓa mingiɓi naŋ ɗaˀ le da buy ngi mizli vur Absalom na, naɓa mizli gar ara cinakaŋ.

⁶Mizli a bam nga zlir ti Israyeley a ɓuh. Kiɗavu a gi a wuzla widis mingiriɗ a Efrayim.

⁷Gawla ngi Daviteye, a kiɗaka mizli Israyeleye sunok sunok. Ar hin nah na, vagay a ki le haɗa, mizli durmuk kukur cuw.

⁸Kiɗavu a ndih zlar hirwuy gar. Ar hin nah na, si widis mingiriɗe, a zizi mizli le haɗa fineˀ mikiɗahay ti maslalama.

⁹Neˀ na, Absalomo naŋ a mihiri ngi gawla ngi Daviteye. Absalomo, naŋ gilaˀ zleˀe ar zungu. Widis madidiɗa ada, mihaŋ naŋhaya slikac slikac arleˀe, waɗ zungu tuwa, ara ci ti Absalomo koh ti seˀeŋ. Akẽh na, hirnga ngi Absalom a ci kik a wuzla mihaŋ ngi widis madidiɗa tuwa, mbak Absalomo a ndir tindraŋ a muŋ. Amma zungu ngisi virizi naŋ, a cuh gwaɗ naŋ.

¹⁰Mbur ada, a pura Absalom milaw a muŋ na le, a so ɓa ɓi nah da Zoˀap: «Yi pura Absalomo le, naŋ da law a muŋ asi widis madidiɗaŋ.»

¹¹Zoˀap a ɓa mbur muso faŋ ɓi nah tuwa: «Ki pura le? Na, ki kiɗa vagay daˀ arleˀe ta vur mike? Anja ani i sa vuluw suloy kuruˀ waɗ kanda purla zleˀe takwa!»

¹²Mbur tuwa, a mbiɗa da Zoˀapa: «Ko da wurenna, haŋ ɗu naŋ zuɓur ti dala moyom gabal tekeɗe kwana, y'anta sa zuɓa haŋ ngi kiɗa mangal ngi buyo ta. Buy miɓi ɗaˀ le: ‹Jam lesl, anja mbur a ja haŋ avu mangal ɗu Absalom ta.› Ka, Zoˀap, Abisay waɗ Itaya, buy muɓukum mingiɓi naŋ ɗaˀ le kahana na, naɓa slimiɗ ndra gar ara cine ta kwa?

¹³Na zle, da i kiɗa le vagaya zleˀe na, kite i ngila ɓi nah le, buy a sa sina. Yo ka vuna ma na, kisa ɓi i si na ta, joˀ kisa bi njiraŋ, deŋ a diga.»

¹⁴Zoˀap tuwa, a ɓi: «Y'anta wuɗ ɓa i mur a mbuŋ ɗik aka mata.» Ganday misi mihey puyoŋ puyoŋ, a hil makir a haŋ, waɗ ara zliga Absalomo a megeɗek ti taŋ dar dar, naɓa naŋ da ti siifa aruŋ ɗagay a wuzla widis madidiɗahay tuwa.

¹⁵Akẽh na, gawlahay kuruˀ, yo mizli majijiraka gwat ngi vurum ngi Zoˀapaya, a ndahaka hirnga ngi Absalomo ndah, a kiɗakaŋ vagay.

¹⁶Akẽh na, Zoˀap a fi tulum ngi tika vurumo, joˀ mizli a pulaka sipa Israyeleye.

¹⁷A zuɓaka vagay ngi Absalomo, ara hizigaka ng'asi widis mingiriɗ ar vigiɗ madiɗaŋ, waɗ a kusom ɗugur kos kos zikitiŋ a hirnga naŋ. Ar nah na, Israyeley gar a kilam, ko wa gar na, ngi hay naŋ nga hay naŋ.

¹⁸Absalomo, zle ti naŋ misi ar siifa aruŋ na, ɗugur mukuso kos kos ar sozo mazilaka sozo ngi buy na, i naŋ mukusoŋ. Asi a ɓi zleˀe ti kwacay naŋ na: «Y'anta ti mangal ɓa a sa zilaka slimiɗ ɗu ti naŋ ta.» Vurˀe, ɗugur mukuso kos kos tuwa, Absalom a zila ti slimiɗ naŋ. Hã dana aruŋ kwana, a zilaka ɗugur mukuso kos kos ngi Absalom.

¹⁹Akẽh na, Ahimas, mangal ngi Sadok a ɓa Zoˀapa na: «Inga puliy jiviɗ i kil, i ru ti ɓi mezle da buyo, Bumbulvuŋ migaŋ kiita naŋ, a lahaŋ ti haŋ mesene naŋhay na.»

²⁰Zoˀap a mbiɗaŋ di: «Angi hin dana, anta slinikuw ngi ru ti ɓi mezle da buyo t'aruŋ. Ki sa raŋ di tapas mekeleme aruŋ. Amma dana, k'anta ru ti ɓi mezle ta, asi mike na, i ɓi ngi muc ngi mangal ngi buy.»

²¹Mbur ada, i mbur beke. Zoˀap a ɓaŋ: «Gwat ka mupura gar na, ara fa ɓi nah da buyo.» Mbur beke tuwa, a huruk huruk a mbuŋ Zoˀapa, a slikiɗ a kil ti kil.

²²Ahimas, mangal ngi Sadok tuwa, a ɓa Zoˀapa ma: «Ko da mbri gar na, puliy ɓa ya kwana, i kil ɓaˀ a dirba mbur beke na ya.» Zoˀap a mbiɗaŋ di: «Mangal ɗu, ka ki wuɗ ki kila ya na, vur mike, i ɓi mezle ngi suw ti migir ta ngbaŋ.»

²³Ahimas a mbiɗaŋ di: «Ko da mbri gar na, zuy si, i kil i ru.» Ar nah na, Zoˀap a mbiɗaŋ di: «Kil, aru so.» Ahimas a zuɓ jiviɗ ngi ˀay zaw Zurdeŋ, ti kil ti kil, a funa mbur beke tuwa le ti kile.

²⁴Davite naŋ da ar wala ngi mizlingre ngi vra ati ngi huroˀo, ngi walahaya. Mbur mijigina li a jiɗ, a cifi le a hirngi hay ngi mizlingre misi ar moholo. A ra pur hiri, keɗ na, mbur ara kilawa pal naŋ.

²⁵Mbur mijigina li tuwa, a til mi ɓa a ɓa ɓi nah da buyo. Akẽh na, buy tuwa, a ɓi: «Da mbur nah, naŋ pal naŋ na, naɓa a so di i ɓi mezleŋ.» Mbur tuwa mira ndilawa gweˀ na,

²⁶mbur mijigina li a pur mbur mekelem, ara kilawa ma. A tila mi da mbur mijigina mizlingre ngi buyo: «Mbur ani a diga, ara kilawa pal naŋ.» Buy tuwa, a ɓi ma: «Mbur nah kwana, a so di i ɓi mezleŋ ma.»

²⁷Mijigina li a ɓi: «Mbur mudumbuŋ na, i si na le avu kil naŋ, i Ahimas, mangal ngi Sadok.» Buy a mbiɗaŋ di: «naŋ i mbur mezleŋ. Naŋ a so di i ɓi mimezleŋ.»

²⁸Ahimas a til mi, a ɓa buyo: «Zuy zuy, ko ɓi anta.» Akẽh na, a huruk huruk a mbuŋ buyo, a ɓaŋ: «Sise da Bumbulvuŋ, Buymisemuŋ ɗike. Mizli mislikiɗam ɓi avu ka na buy, kumani, a vula taŋ le asi haŋ ɗiki.»

²⁹Buy a mbiɗaŋ di: «Absalomo naŋ da ti vu naŋ zuy zuy kwa?» Ahimas a mbiɗaŋ di: «Zoˀapa, ti naŋ mislino ndra, ndra gawla ɗikey na buy, yi pura le, mizli ara wusam haɓar haɓar haɗa ɓula, na vur mike na, yi si na ta.»

³⁰Buy a mbiɗaŋ di: «Kirih, ka cici deŋ akẽh.» Mbur tuwa, a kirih, a cici deŋ akẽh.

³¹Dar mbur beke tuwa, a ndilawa. A ɓa buyo: «Buy kumani, ɓi mezle ani, cinaŋ: Bumbulvuŋ a sluw kiita ɗike le dana, ti naŋ mutuɓo ka ti haŋ mesene ɗikey gar na.»

³²Buy a mbiɗa da mbur Etiyopi: «Absalomo, naŋ da ti vu naŋ zuy zuy kwa!» Mbur beke tuwa, a mbiɗaŋ di: «Mesene ɗikey ati mizli mislikiɗam ɓihey avu ka gar na, buy, kumani, gwat mindilo avu taŋ na, i gwat mindilo avu mangal ɗik Absalom na ya.»