Read South Giziga 2SA 19 Bible Online

2SA 19 - South Giziga bible

2SA 19

¹Akẽh na, buy a jijik kpar kpar. A jiɗ ng'ar viŋ misi a hirnga mizlingre tuwa, dar a zla tuwuy. Aru bal ti ɓi: «Aw mangal ɗu, mangal ɗu Absalom. Aw mangal ɗu Absalom! Anja i ya vuna mumuc ar deɗe ɗike ta vur mike! Aw mangal ɗu Absalom.»

²Mizli a soko faka ɓi nah da Zoˀapa, a ɓakaŋ: «Ani buy ara tuwuy, ara kuɗma tuwuy asi mangal naŋ Absalomo.»

³Tapas nah, avu mizli gar na, luuma bugawla taŋ na, a tiri i tuwuy ngi vagay. Asi mizli a cinaka na: «Buyo, ɓi ngi mangal naŋ na, a vulaŋ gir le haɗa.»

⁴Tapas nah, mizli a mam ng'ar walahaya sulup sulup, kaɓa mizli mikiloko le ti kil tir vurum, mipaka taŋ mesem le.

⁵Buyo naŋ a sirit zana a hirnga. Dar buy a widi haɗa haɗa: «Aw mangal ɗu Absalom! Aw Absalom mangal ɗu!»

⁶Zoˀap a so luuma buy a haya. A ɓaŋ: «Gawla ɗikey gar muluhukuw hutuŋ ɗik dana na, ki ra pa taŋ mesem. Yo ziri ɗik mizilehey, mongosohoy, ngwas meketeŋ ɗikey ati mangasl ɗikeye gar na, ki ra pa taŋ mesem.

⁷Mihiris ɗikeye, ki wuɗ di i taŋ, yo muwuɗ ɗikeye jak na, ki hiris di i taŋ. Buy ngi vurum ɗikey ati gawla ɗikeye, kite ki biga le dana, taŋ i mizli avu ka ta kini so tuwa ɗi, gisiŋ, dana i si na le wãˀ, da kaɓa Absalomo naŋ da ti siifa, mumicam na, i ndra gar dana na, anja ki pura kuy so.

⁸Wurenna, slikiɗ, ara ɓa mi ngi vula gidaŋ da gawla ɗikeye. Asi da ki ru ta na, hadam ti slimiɗ ngi Buymisemuŋ, mbur mahin ti duvuɗ dana avu ka anta. Naɓa i ɓi mutuwaˀ masa ndiluw, fineˀ ɓi mutuwaˀ tuwaˀhay mindiloko zleˀe avu ka, zle ti gawla ɗik, hã wurenna.»

⁹Akẽh na, buy a slikiɗ, waɗ a so, a cifi a mizlingre, joˀ mizli a tilaka mi da mizli gar «Buyo n'ani a mizlingre!» Dar mizli gar a soko nga mbuŋ buyo. Israyeleye, taŋ a kilam le, mbur gar ngi hay naŋ nga hay naŋ.

¹⁰A wuzla sukwi Israyeley gar na, mizli gar ara mbiɗam hirnga ar wala taŋ. A ɓam: «Buy Davite mutuɓo ndra ti haŋ mesene ndrahay i naŋ, yo muloho ndra ti haŋ Filistihey i naŋ. Wurenna so na, hã a kil ti mangal naŋ Absalomo, a pula hirwuyo.

¹¹Absalom, ndra muwunakaŋ i buy ndra na ma na, naŋ a kiɗaka le ar vurum. Wurenna, i moko ti buyo si, i kutukom mi aruŋ maka?»

¹²Vurˀe, buy Davit a slin ɓa ara ɓaka ti Sadok ati masay Abiyataraya na: «Ɓa a ɓaka micawwa ngi Zudaha ani: ‹Ɓa ngi mi ti buyo ngi hay naŋ a muŋ na, kumo ki wulkam a dirba wãˀ vur mike? Na ɓi ngi Israyeley maɓaka gar na, a diɗoko le a slimiɗ buyo.

¹³Kum i sukum ɗuwoy ta kwa? Kum i muy naŋhay mikasl ngi vaˀahay ta kwa? Ɓa ngi mo ti ya ngi hay ɗu a muŋ na, kum ki wulkam a dirba wãˀ vur mike?›

¹⁴Yo kisa ɓaka Amasa ma na: Ki muy ɗu mikasl ngi vi ya takwa? Zoˀap i madiɗa ngi soje ɗuwoy. Da i vuluw li naŋ na dana da ka wãˀ ta na, Bumbulvuŋ a kutiy ti bonoy mukuyta wãˀ.»

¹⁵Davit a mbiɗa wuluk ngi Zudahaya cek, a tiri kaɓa wuluk ngi mbur purla. Taŋ gar a slinam ng'avu buyo, a ɓakaŋ: «Mawa, ka ati gawla ɗikeye gar.»

¹⁶Dar buy a zuɓa jiviɗ, ara ndil a mizaw Zurdeŋ. Mizli Zudahay a soko le zleˀe a Gilgala, nga ji hirnga ti buyo, ɓa a jinakaŋ ngi tuwuɗa mizaw Zurdeŋ.

¹⁷Simey, mangal ngi Gera, mbur Benjameŋ ngi Bahurime, a wus vu ɓa a ram ati mizli ngi Zudahaya nga ji hirnga ti buy Davite.

¹⁸Mizli Benjameŋhey aseˀe durmuk purla waɗ Siba, gawla ngi mizli ngi hay Sawuloy. Siba, naŋ ati ziri naŋhay mukuruˀ nga zlum waɗ gawla naŋhay kukur cuw. Anja zleˀe a wusam vu nga mbuŋ buy a mizaw Zurdeŋ.

¹⁹Ɓa a tuwuɗam ti mizli ngi hay buyoyo ti palalama, yo ɓa a gaka gwat buy miɓa le gar. Hirak ti buyo mira tuwuɗa mizaw Zurdeŋ na, Simey, mangal ngi Gera a huruk huruk asi sar ngi buyo.

²⁰Joˀ a ɓa buyo: «Buy ɗu, anja ki slufa ɓi ngi malambaˀ ɗu na ta. Buy kumani ɗu, mungra ɗu ya miga tapas ka mibi ti Zeruzalem na, anja ki wulka ɓi nah keŋ mata. Anja ki ja ɓi nah a kwacay mata buy.

²¹Asi ya gawla ɗike, i si na le, yi gi mungra le. Amma dana na, yi so dumbuŋ angi mizli Israyele vay ngi muŋhoyo gar, ɓa ngi so ji hirnga ti ka buy, kumani ɗu.»

²²Abisay, mangal ngi Seruya a ɓi: «Mbur, Bumbulvuŋ muwuna na, Simey a zaŋ le, mi naŋ maɓa hana, a tikaŋ ɓa ngi kiɗ naŋ vagaya mata sukwa?»

²³Amma Davit a ɓi: «Ziri ngi Seruyahay, mucukum ar ɓi hana i mi, ɓa ki gam avu yakaɓa kum i mesene ɗuwoy naka? Ko anta kiɗam mbur Israyel pal vagay dana ta. I si na le, dana gisiŋ, i sa cifi buy Israyele.»

²⁴Buy a ɓa Simey tuwa: «Anta sa kiɗukuw vagaya ta.» Dar buy a hudumoŋ.

²⁵Mefibaˀal, dideˀ meciɗek ngi Sawul, aru nga ji hirnga ti buyo. Zle ti hin ngi buy mucuh hã a ndila hin buy mamo ti jam na, ko a buna saraya ɗaˀ ta, a hica mazlamaya ɗaˀ ta. Zanahaya, a buna taŋ ɗaˀ ta.

²⁶Amma ti naŋ mindilo a Zeruzalem nga ji hirnga ti buyo na, buy a cufuɗaŋ: «Mefibaˀal, ka, ki ru asi ya ta vur mike?»

²⁷Mefibaˀal a mbiɗa da buyo: «Buy, kumani ɗu, gawla ɗu a giy gilaw le. Asi mike na, ya gawla ɗike, yi ɓi le ti kwacay ɗu: ‹I sa juwa madiya zungu ɗu, i sa jiɗ anga ɓa i ru asi ka zleˀe buy› Asi ya gawla ɗike, yi jegwer.

²⁸Amma gawla ɗu tuwa, a ru, ara jiy ɓi da ya gawla ɗik a mbuŋ ɗike. Amma ka, buy, kumani, kakaɓa modro ngi Bumbulvuŋ. Gwat ka mupura le kuy avu ka na, ka ga si.

²⁹Naŋ kine, buy kumani ɗu, mizli ngi hay cine ɗuwoyo gar na, avu ka, a ndilaka le ngi kiɗ taŋ vagay vagay zleˀe. Amma ti nah gar na, ki tiɓiy ya gawla ɗike le a wuzla mizli kum mazumam ɗaf jom ar skiɗ purla. Jiviɗ anta avu ya ɓa i cufuɗ gi mezle mekelem avu ka mata buy.»

³⁰Buy a mbiɗaŋ di: «Ki ɓi mi koloŋ koloŋ ngi mi aruŋ maka? Yira ɓuw di njah: ‹Ka ati Siba, kisa wuɗkaka guvahaya ar wala kum cuw kumo.›»

³¹Mefibaˀal a mbiɗa da buyo: «Anja Siba a zuɓa taŋ wãˀ da naŋ kwana zuy. Ka mindilo zuy zuy a hay ɗik na, naŋ kuy si, buy, kumani ɗu.»

³²Barzilay i mbur Rogelim ngi ruwuy Galaˀat. A tuwuɗaka mizaw Zurdeŋ ati buyo, a mbiɗa mi da buyo a mi mizaw Zurdeŋ.

³³Barzilaya, a gi midigila le haɗa teˀe. Naŋ ti vi kukur dangafaɗa. Ti di buyo mupula li, naŋ muru nga Mahanayim na, muvulaŋ gwat ngi zum i naŋ, asi Barzilay i mbur mugop zleˀe.

³⁴Buy a ɓa Barzilaya: «Ka, ndra a kum bummoˀ, i sa juw haŋ ɗik a Zeruzaleme.»

³⁵Barzilay a mbiɗa da buyo: «Ar siifa ɗu, a ndiriy vi kite aruŋ ka? Ɓa hã i ram bummoˀ nga Zeruzaleme na?

³⁶Dana, ya ti vi kukur dangafaɗa. Gwat mezle ati malambaˀa, i sla wala taŋ gu aruŋ kwa? Gwat ya mazuma ati gwat ya masa na, yi si na ndum naŋ aruŋ kwa? Ngwas mizli dimisey ati zil mizli dimiseye, yi cine ˀay taŋ gu aruŋ kwa? Ya gawla ɗike, ɓa hã yi vuluw gir ngi gi mi aruŋ maka buy, kumani ɗu.

³⁷Ya gawla ɗike, i wuɗ i tuwuɗaka mizaw Zurdeŋ tuwaɗ si na tew si buy. Ki giy mezle hana vur mike buy?

³⁸Puliy jiviɗ ɓa ya gawla ɗike, yi mi le, ɓa yi ra muc ar walahay ɗu, a ciki zivi ngi baha ati maha. Amma, mangal ɗu Kimham, gawla ɗik ani: Anja naŋ aru asi ka, buy, kumani ɗu, yo gwat misa cǝruw hiri le gar na, ka gaŋ di.»

³⁹Buy a mbiɗaŋ di: «Anja Kimham aru asi ya so, yo gwat masa cǝruw hiri gar na, yi sa gaŋ di. Gwat ka misa wuɗ cufuɗ le avu ya gar na, yi sa guw di si.»

⁴⁰Mizli gar, a tuwuɗaka mizaw Zurdeŋ, waɗ buyo kwana, a tuwuɗu. Buy a ja Barzilay tuwa kuɓuy, a ɗuwulaŋ mi. Barzilay a mi ngi hay naŋ.

⁴¹Buy aru kini ngir ti Gilgal, joˀ Kimham aru aseˀeŋ.

⁴²Mizli Zudahay cek cek waɗ mizli Israyeley cah, a ki saka buyo. Israyeleye musoko a ciki buyo na, a cufuɗaka buyo: «Sukum ndra Zudahay a soko zuɓukuw gurjik, ka ati mizli ngi hay ɗikeye, a tuwuɗam ti kum mizaw Zurdeŋ vur mike? Naɓa mizli ɗikeye gar t'ada a ciki ɗik aka ngbaŋ.»

⁴³Mizli Zudahaya gar a mbiɗaka da Israyeleye: «Asi ndr'i muy mikasl ngi vaˀahay migweˀ fineˀ kumo. Ki jam mevel asi ndra musoko di na vur mike? Ndr'i cifam le ɗaˀ joˀ vur buyo kwa? Malla buy a vula ndra gwat le ngatara ɗaˀ kwa?»

⁴⁴Mizli Israyeley a mbiɗaka da Zudahaya: «Buy i ngi ndra fineˀ kumo makaw kuruˀ, yo ko avu Davit kwana, lum ndra ava naŋ fineˀ ngi kumo na si. Kum magam ti ndra hiris le na vur mike? Yo miɓam dumbuŋ ngi mo ti buyo na, i ndra takwa?» Amma mingiɓi ngi Zudahaya, naŋ kutuɗak haɗa fineˀ mingiɓi ngi Israyeleye.