Read South Giziga 2SA 20 Bible Online

2SA 20 - South Giziga bible

2SA 20

¹A Gilgal a diga na, mbur ada, mbur kesef lambaˀ, a zilaka Seba, mangal ngi Bikri, mbur Benjameŋ. Seba a zla, a fi tulum, a ɓi: lum ndr'anta neˀ avu Davite ta, ko gwat mujumo ndra neˀ ati mangal ngi Zese nah anta. Israyel, anja mbur gar a mi ngi hay naŋ.

²Mizli Israyeley gar a mam, a pulaka Davite, a sipaka Seba, mangal ngi Bikri tuwaŋ. Amma Zudahaya, taŋ a ndiram avu buy taŋ Davite. A kisakaŋ, zle a mizaw Zurdeŋ, hã sesẽŋ a Zeruzaleme.

³Davite, a mo le ngi hay naŋ a Zeruzalem. Akẽh na, ngwas mangasl naŋhay mukuruˀ, naŋ mupula taŋ ɓa ngi jigina hay zleˀe tuwa na, a hila taŋ, a pa taŋ guc pal ar hay mekelem, weˀ vu ti taŋ kuy kuy. A ki slimiɗ ar taŋ ɓula, amma naŋ anta ru ng'avu taŋ, ɓa a gi ti taŋ ngwas ta. Taŋ ada guc, giceˀ hã avu muc taŋ, taŋ kaɓa ngwas wudigahay misi zil taŋ naŋ da ar siifa aruŋ.

⁴Akẽh na, buy Davit a ɓa Amasa: «Ziliy mizli Zudahaya cek cek ar hin makir, waɗ ka vuna, ki sawa deŋ avu taŋ a mbuŋ ɗu aka.»

⁵Dar Amasa aru nga zilo Zudahaya. Amma angi hin makir, buy miwaŋ haŋ tuwa na, a ndilo ta.

⁶Ar nah na, Davit a ɓa Abisaya: «Ani wurenna, Seba, mangal ngi Bikri na, a wuɗ a zluɓa avu ndra fineˀ zluɓ ngi Absalomo ma. Ka vuna, hila soje ɗuwoy mimezlehey, nga ya buy ɗike. Aru, ara sipo Seba, vur naŋ masa lum li ar walahay mugunohoy le ti moholoy, a ɗum avu ndra.»

⁷Mizli ngi Zoˀapay, Kretey ati Peletey waɗ soje gambara gambarahay gar, a bam, a ram asi Abisaya. A bam ti Zeruzaleme, nga supo Seba, mangal ngi Bikri.

⁸Ti Amasa ma ndilawa a mbuŋ taŋ na, naɓa taŋ, taŋ gweˀ avu ɗugur madiɗa ada a Gabaˀoŋ. Zoˀapa, naŋ ti zana ngi sojehey ɓaˀ avu vu. Kandakaˀ a dingiriŋ waɗ maslalam ti hay naŋ law avu kanda tuwa. Ti Zoˀap mabi na, maslalam a diɗ a ruwuy.

⁹Zoˀap a ɓa da Amasa tuwaŋ: «Sukum ɗu, k'ada zuy zuy takwa?» Zoˀap a ja Amasa avu mazlamay ti haŋ hazum, ɓa a jam vu kuɓuy.

¹⁰Amasa a ki slimiɗ ar maslalam milaw avu Zoˀap na zleˀe ta. Zoˀap a zligaŋ ti naŋ avu kwacaya, tanday curɗoɗ a ruwuy. Amasa a muc, ko Zoˀap a maŋ maslalama sar cuw ta. Akẽh na, Zoˀap ati sukum naŋ Abisaya, a zlaka sipa Seba, mangal ngi Bikri tuwaŋ.

¹¹Mbur purla a wuzla soje ngi Zoˀapaya, a ndir a ciki vagay ngi Amasa. Joˀ a ɓi: «Mizli ngi Zoˀapay ati mizli ngisi Davitey gar na, anja a sipaka Zoˀapa.»

¹²Amma, Amasa a ro ɓaˀ ar pumbus naŋ a jiviɗe. Mbur soje tuwa, a pura na, mizli macohom gar na, a cicam deŋ le deŋ le. A ɗiɗa vagay ngi Amasa tuwa gborro ti jiviɗe, fuk ng'ar guva ada akẽh, waɗ sirit zana nga hirnga naŋ.

¹³Naŋ mikiraha baˀ avu jiviɗ tuwa na, mizli a cohom deŋŋe, ɓaˀ asi Zoˀapa, nga sipo Seba, mangal ngi Bikri.

¹⁴Zoˀapa, a liˀi bal bal a wuzla sukwi Israyeleye gar, sesẽŋ a Abel-Bet- Maˀaka, kini ngir ti vu mizli Beritey gar. Joˀ Beritey tuwa kwana, a kusom, dar a sipaka jom bummoˀ.

¹⁵A ram a ndahaka hirnga ngi walahay Abel-Bet- Maˀaka, asi Seba naŋ da angaŋ. A hiloko hirwuy, zih zih, a ciki mohol ngi vra, a ja giw. Mizli misi ati Zoˀapay tuwa gar, a zlaka a paka haŋ da moholo nga huroˀo, ɓa a mbizlakaŋ.

¹⁶Ngwas ada, i ngwas misi lesle, a tilo mi tir walahaya, a ɓi: «Haya, kum mizli, cinam. Ambuh, ɓaka Zoˀapa, anja ɓa a kiroho ng'avi ya. I wuɗ ɓa yi ɓaŋ.»

¹⁷Dar Zoˀap a kirih ng'ava so. Joˀ ngwas tuwa, a ɓaŋ: «Zoˀap na, i ka kwa?» Zoˀap a mbiɗaŋ di: «I yaha.» Ngwas tuwa, a ɓaŋ ma: «Ya ngwas beke ɗike, ciniy mingiɓi ɗu ani takwa.» Zoˀap a mbiɗaŋ di: «Ɓa, i ra cinaŋ.»

¹⁸Ngwas tuwa, a sipaŋ ɓi, ani: «Zlezle na, mizli ndrahay a ɓam: ‹Cufuɗam mi ngi kuti a Abel-Bet- Maˀaka sini, ɓa ɓi gar a ɗiyi›

¹⁹Angi hirwuy Israyele, walahay ndr'i walahay ngi zuy, yo i walahay mikaslsla ma. Walahay hirnga angi hirwuy Israyele na, ka, ki wuɗ di i hiryi naŋ mbrike? Hirwuy mi ngi Bumbulvuŋ ma na, ka ki wuɗ di i zizi naŋ mbri maka?»

²⁰Zoˀap a mbiɗa da ngwas tuwa: «Kay, ziza walahaya, yo hirya walahaya na, naŋ kileŋ avu ya.

²¹I naŋ ta jaka. Amma, mbur ada, mbur ngi muwã Efrayim, a zilaka Seba, i mangal ngi Bikri. Seba a slikiɗ ɓi avu buy Davite. Vuloko ndra di, naŋ pal naŋ si, ɓa gi vurum ti walahaya, a kiɗ mi le.» Ngwas a mbiɗa da Zoˀapa: «Kay, mbak i sa hizigukuw hirnga naŋ tir hirnga mohol.»

²²Ngwas a ɓa mi naŋ ngi lesl na da mizli naŋhaya gar. Dar a bukoko hirnga ngi Seba, mangal ngi Bikri, waɗ a hizigaka fuk da Zoˀapa. Akẽh na, Zoˀap a fi tulum, a pulaka gi vurum ti walahaya, joˀ mizli a waham, mbur gar ngi hay naŋ ngi hay naŋ. Zoˀapa, naŋ a mo nga Zeruzalem avu buyo.

²³Mawa soje Israyeley gar i Zoˀap. Beneya, mangal ngi Yoyada, a wi Kretey ati Peletey, mizli mijigina buyoy.

²⁴Adoram i buy ngi slra mitakˀay, Yosafat, mangal ngi Ahilut i mijiviɗ ngi buy.

²⁵Seva i mutoho gwat. Sadok ati Abiyatar i masayay.

²⁶Ira, mbur Yahire kwana, i masay ar slra ngi Davit.