Read South Giziga 2SA 21 Bible Online

2SA 21 - South Giziga bible

2SA 21

¹Ti di Davit mazum buy na, may a gi, a zik hã vi makir. Davit a cufuɗa Bumbulvuŋ, joˀ Bumbulvuŋ a ɓaŋ: «Hana a gi asi Sawul ati mizli ngi hay naŋhay mikiɗam hirnga haɗa. Asi na, Sawul a kiɗ Gabaˀoŋhoyo le vagay vagay.»

²Buy a zila Gabaˀoŋhoyo, a ɓa taŋ. Gabaˀoŋhoy i Israyeley ta. Amma i Amorihey mindiram ar siifa. Israyeley a ɓaka taŋ le zleˀe ɗaˀ le ti hudum. Na, gar ti nah kwana, Sawul a ro ti may haɗa haɗa ngi wa Israyel ati Zudahaya, a pur jiviɗ le ɓa a ngizla taŋ zleˀe na si.

³Dar Davit a cufuɗa Gabaˀoŋhoy tuwa so: «Anja ɓa ki ɗuwulaka mi da mizli ati hirwuy ngi Buymisemuŋ na, ani i gukum mi ska? Yo i ɗiyaka ɓi nah mbri mbrike?»

⁴Gabaˀoŋhoy a mbiɗakaŋ di: «Gwat ndra mawuɗam avu Sawul waɗ avu mizli ngi hay naŋhaya na, i ɓi ngi dala malla ɓi ngi ɓiri tapasl tapasl ta. Ndr'anta ti may ngi kiɗa mbur vagay angi hirwuy Israyele ta.» Davit a mbiɗa: «Da ko ki ɓam mbri gar na, yi sa ga si.»

⁵A ɓaka buyo: «Sawul a wuɗ le zleˀe ɓa a ziza ndra, yo ɓa a ngizla ndra kuɗup asi hirwuy Israyele.

⁶Wurenna, anja a vulam ndra mizli tarnaˀ asi dideˀ naŋhaya, ɓa i luwaka taŋ a muŋ, a mihiri ngi Bumbulvuŋ, a Gibeya, walahay ngi Sawul, mbur Bumbulvuŋ muwunaŋ.» Buy a mbiɗa taŋ di: «I sa vulukum taŋ.»

⁷Amma Mefibaˀal, mangal ngi Zonataŋ, dideˀ ngi Sawul na, buy a pulaŋ le. Asi Davit ati Zonataŋ, mangal ngi Sawulo, a jumom mi le ar slimiɗ ngi Bumbulvuŋ ar wala taŋ.

⁸Rispa, zuŋ ngi Aya, a yi ziri mizilehey le cuw da Sawulo, i Armoni ati Mefiboser, waɗ ziri ngi Mikalay zlum, ziri mizilehey, naŋ miya taŋ da Adriyel, mangal ngi Barzilay, mbur ngi Abel-Mehola, buy a hila taŋ,

⁹waɗ a vula taŋ asi haŋ ngi Gabaˀoŋhoyo, ara luwaka taŋ a muŋ a muwã, a mihiri ngi Bumbulvuŋ. Taŋ tarnaˀ taŋ gar a micam ar li purla. A kiɗaka taŋ angi hin mudumbuŋ ngi sifi ngi alkamari.

¹⁰Rispa, zuŋ ngi Aya tuwa, a zuɓ zana ngi vagay, a njira njar angi mandazlay muwã, naŋ da akẽh, zle avu zli virzi ngi sifi hã a ndila vuŋ munduvun migi ar vagay taŋhaya. Ti papasa, a pula ɓa ɗiyuwoy a pam sar ar taŋ ta, yo ti duvuɗo kwana, ɓa gwat misãmi ngi ɓuhoy a humbuɗaka taŋ ta.

¹¹Rispa, zuŋ ngi Aya, ngwas mangasl ngi Sawulo, gwat naŋ miga na, mizli a soko faka ɓi nah da Davite.

¹²Filistiheye, tapas taŋ mikiɗaka Sawul vagay a Gilboˀa na, a luwaka vagay naŋ ati mangal naŋ Zonataŋ law law ar li mizli makusom a Bet-Seyaŋ. Mizli madiɗa ngir walahay Yabes, angi hirwuy Galaˀat a soko, a huloko vagay ngi Sawul ati ngi Zonataŋ a Bet-Seyaŋ tuwa. Dar Davit ara tuɓo tesl taŋhay avu mizli tayna so.

¹³Tesl ngi Sawul ati ngi mangal naŋ Zonataŋ, Davit a so ti taŋ, waɗ a guɗumaka tesl ngi mizli mitarnaˀ muluwahay tuwa.

¹⁴Tesl ngi ti sawul ati mangal naŋ Zonataŋ tuwa, a dikaka taŋ a Sela, angi hirwuy Benjameŋ, angi zivi ngi cine naŋ Kis. Gwat, buy muvula ɓi naŋ ngi gi ngi gi gar na, a gaka le. A dirba nah so na, Bumbulvuŋ a vulo zuy asi ruwuyo.

¹⁵Filistihey ati Israyeleye, kiɗa vu a gi le ar wala taŋ ma. Davit ati gawla naŋhay a ram, ara kiɗaka Filistiheye. Davite, gidaŋ naŋ a tiki le.

¹⁶Mbur ada, i Isebi-Benop, mbur ngir tizer ngi Harafa, a ɓi ɓa a kiɗaka Davite vagay. Naŋ kaˀ kaˀ vu ti ziwit nawayaŋ. Dudok ngi ziwit a ji kilo makir ti mi naŋ, i ziwit ngi ɓiri gaza. Yo naŋ ti maslalam nawaya naŋ kine aruŋ law avu kanda.

¹⁷Amma, Abisay, mangal ngi Seruya, a so nga jina Davite. Abisay a kiɗa mbur Filisti tuwa vagay. Vurˀe, mizli ngi Davitey a ɓakaŋ: «K'anta sa bi asi ndra ng'ar vurumo mata, ɓaka misi kaɓa lampe matiɓi vu angi hirwuy Israyel na, ki muc ta.»

¹⁸A dirba nah, a gam kiɗa vu ati Filistihey a Gop ma. Siɓkay ngir walahay Husa, a kiɗa Saf, mbur ngir tizer ngi Harafa.

¹⁹A gam kiɗa vu ati Filistihey a Gop tuwa ma. Alanaŋ, mangal ngi Yari ar walahay Betelyem, a kiɗa Goliyata vagay, Goliyat vuna, dum ngi ziwit naŋ gbisl kaɓa munduɓuk ngi caka.

²⁰A gam kiɗa vu a Gat tuwa, ava ma ni. Bugawla ada na, muzuŋ haŋ naŋhaya merkeɗ merkeɗ, yo muzuŋ saraya kwana, merkeɗ merkeɗ. Jom gar na, kukur cuw ngaŋ mufaɗa. Naŋ vuna kwana, naŋ angi tizer ngi Harafa.

²¹Mbur bugawla tuwa, a za Israyeleye. Akẽh na, Zonataŋ, mangal ngi Samma yo i sukum ngi Davit, sukum naŋ ngi jamba, a kiɗa mbur bugawla tuwa vagay.

²²Mizli mufaɗ mikiɗa hanayna, taŋ angi tizer ngi Harafa, a Gat. Mikiɗaka taŋ vagay vagaya, i Davit ati gawla naŋhay.