Read South Giziga 2SA 22 Bible Online

2SA 22 - South Giziga bible

2SA 22

¹Davit a ɓa mingiɓi ngir dimis hana da Buymisemuŋ tapas Buymisemuŋ milahaŋ ti haŋ mesene naŋhay, waɗ ti haŋ sawul.

²Davit a ɓi: Bumbulvuŋ i mandazlay muwã ɗu, i walahay ɗu ngi pula vu, yo naŋ i mupul ɗu tir zeweɗe.

³Buymisemuŋ i gidigil muwã ɗu, ya maɗum aseˀeŋ. I mbaray ɗu, gwat ngi vurum ɗu, ya malum di bugawla, yo i li ɗum ɗu, i gala ɗu mugun gun ar ya, i milih ɗu, a lihiy ti haŋ misi moˀoreheye.

⁴Hunumaka Bumbulvuŋ. Ya mizilaŋ na, dar yi cif bugawla ar mesene ɗuwoyo.

⁵Diɓel ngi yam makiɗ vagay a suriy le, mekepel mahiryi gwatay a dungufiy le.

⁶Li cifi ngi mizli mumucahaya, a jiy le ar dangay. Mazaɓ ngi muco i mingahay le kaˀ kaˀ a mbuŋ ɗu.

⁷Angi bonoy ɗu, yi zila Bumbulvuŋ le. Yo yi zila Buymisemuŋ ɗu le. A cino ˀay ɗu le baɗ ti ngi hay naŋ. Widi ɗu a ndil le sesẽŋ a slimiɗ naŋ.

⁸Buymisemuŋ, naŋ mizla a ji mevel na, dar a wusa hirwuyo hiɓik hiɓik, a jijika ngbir ngbir, virzi ngi muŋ a wus kikit kikit, takay takay, yo a hurum ngbir ngbir ngbir.

⁹Cunju a bo turliŋ turliŋ ti hutuŋ Buymisemuŋ, vu mihilɓiɓ mazum li, a bo ti balama ti zayvu mihilɓiɓ.

¹⁰Buymisemuŋ a hinjiko muŋ hanjak, a po sar, gazlavay miɗak ɗak hindiˀille asi sara.

¹¹A slikiɗ kifilihhe nga muŋ ti mota ngi vurum ngi kerubeŋhey. A bugo vu a muŋ, ar kirpasl ngi himiɗi.

¹²A tir ti luvuŋ i hay naŋ, i yam muɗuyoŋɗuyoŋ, titiraŋ, gazlavay miɗak ɗak ngbulum araŋ.

¹³Li miciɗak ciɗak misi a mbuŋ naŋ na, a bo ti vu njilim njilim.

¹⁴Bumbulvuŋ a ga tuwuy ngi vuŋ a muŋ, Buymisemuŋ Mimadiɗa wãˀa, a til mi.

¹⁵A mula luvutoyo fat fat, a waha mesene naŋhaya pal pal, a hiziga wucuɗ ngi vuŋ, a zliɗa hirnga ngi mesene naŋhaya mber mber.

¹⁶Buymisemuŋ mika buc ɓar ɓar na, virzi ngi mubuliy a bugoko vu ngbay ar li babaraŋ, yo naŋ mamusuwun fir fir ti hutuŋ naŋ tuwa na, a bugoko vu ngbay ar li babaraŋ.

¹⁷A tilo haŋ paɗ ti muŋ, a zuɓiy, yo a sulmo ya tir yam madiɗa.

¹⁸A lihiy ti haŋ mesene ɗu migidaŋ haɗa, ti haŋ mizli mazliram ti ya tahay, migidaŋ fineˀ yahaya.

¹⁹Tapas ya mihĩhĩy le na, mesene ɗuwoy a so lumukiy kpis, amma, Buymisemuŋ a jihiy jah gidaŋ gidaŋ.

²⁰A bo ti ya le, yo a vuliy luuma hirnga ɗu le, a lihiy na, asi naŋ mawuɗ ya.

²¹Bumbulvuŋ a gi ti ya weˀe avu jeŋŋe ɗu, a gi ti ya weˀe avu haŋ ɗu mici ar dili ta na.

²²Asi, yi sipa jiviɗ ngi Bumbulvuŋ le, ko yi zluɓ ɓi avu Buymisemuŋ ɗu ta.

²³Ɓimujuwa naŋhay gar na, yi ra ja taŋ a hirnga, yo ɓimuɗuva naŋhay gar na, y'anta kirih tir taŋ ta.

²⁴Yi cifi le kaslsla a mbuŋ naŋ, yo gwat malambaˀhay gar na, yi jigina vu ɗu le avu taŋ.

²⁵Dar Bumbulvuŋ a wurkiy weˀe avu jeŋŋe ɗu a mbuŋ naŋ, weˀe avu ya mici ar dili ta, naŋ mupura ti hiri naŋ.

²⁶Buymisemuŋ, ka teŋteŋ avu mbur miteŋteŋ avu ka, mbur maɗuv hirnga nwaˀ na, ki ɗuvaŋ hirnga nwaˀ aya.

²⁷Avu mbur misi ti dili ta, k'anta ti dili ta. Amma mbur masipa ɓi ɗik ta na, ki ga ɓa a singiram angaŋ.

²⁸Mizli misi a tikaka taŋ ˀay le na, ki tiri ti taŋ bugawlahay, amma mizli mahuhumom vu taŋ na, ki hirsa taŋ.

²⁹Bumbulvuŋ, lampe ɗu minjahha i kaha, ya misi ar luvuŋ na, ki ra ciɗikiy li.

³⁰Ya matuwuɗa vigiɗ na, ya ati ka, ya matuwuɗa hirnga ngi mohol na, mbele Buymisemuŋ ɗu.

³¹Jiviɗ ngi Buymisemuŋ hana, naŋ kaslsla, mingiɓi ngi Bumbulvuŋ i gisiŋ. I mbaray ngi mizli maɗumom ava gar.

³²Buymisemuŋ, sey i Bumbulvuŋ ta na, i wa zleˀe maka? Yo gidigil muwã, mbak Buymisemuŋ ndra le na, i wa maka?

³³Li ɗu migidaŋ gidaŋ i Buymisemuŋ hana, aru ti ya ar jiviɗ miɗalla.

³⁴A tir ti sar ɗuwoyo rak rak ka sar ngi muunihey, a ciciy deŋ ti deŋ ar li miɗingir.

³⁵A sirkiy haŋ ngi gi vurum, yo a jiniy ar li hila lek ngi ɓiri gaza.

³⁶Mbaray ɗik ngi lum di bugawla na, ki vuliy di le, yo ki ra jiniy ndrehhe, yo ki tiri ti ya mbur madiɗa.

³⁷Ki ra murɗiy sara, ɓa yi kil kutum kutum, yo hiri sar ɗuwoy a roko gidaŋ gidaŋ.

³⁸Yi gidiɗa mesene ɗuwoyo, yi kiɗa mi taŋ le, yi sa mawa na, sey da yi kiɗa mi taŋ le far.

³⁹Yi kiɗa mi taŋ le, i ngizla taŋ le, taŋ anta slikiɗam gu mata. Taŋ ada baɗ baɗ asi sar ɗu.

⁴⁰Ki vuliy gidaŋ ɓa ngi kiɗa vu, mizli mapikiy hiri na, ki musla taŋ masl masl asi sar ɗu.

⁴¹Ki ga ɓa mesene ɗuwoy a kilam ti ya, mizli mazliram ti ya tahaya, yi ngizla taŋ le kap kap.

⁴²A wudam, amma makilo widi taŋ anta. A wudam ng'avu Bumbulvuŋ, amma naŋ anta mbiɗa taŋ di ta.

⁴³Yi tiri ti taŋ lagwada, yi slirta taŋ, yo yi kurpa taŋ asi sar kaɓa ndileɓ ar jiviɗ madiɗahay.

⁴⁴Ki lihiy le avu slikiɗa ɓi ngi mizli ɗuwoyo, ki cifi ti ya buy le ar sukwi ngi mizli, mizli, ya misina taŋ ta, a sa gam gawla ɗuwoy.

⁴⁵Mulakay a sa ɓikiy ɓi mideɗek, ya miɓi le ɗaˀ purla si na, a cinikiy mi si.

⁴⁶Mizli mulakay a sa vusom, a sa bam ti jijik kpar kpar ng'avra tir walahay taŋhaya.

⁴⁷Bumbulvuŋ naŋ da. Sise da gidigil muwã ɗu. Gidigil muwã ɗu, ya malum di bugawla na, anja a cifi bugawla.

⁴⁸Buymisemuŋ hana, a vuliy gidaŋ ngi pula cuwal, yo a ga ɓa mizli a gam cunuˀcunuˀ a mbuŋ ɗu.

⁴⁹Ki kilo ti ya le avu mesene ɗuwoyo, mizli mapikiy hiri na, ki cifi ti ya bugawla le ar taŋ, yo ki lihiy le avu misi moˀoreheye.

⁵⁰Haˀaw Bumbulvuŋ, yi guw sise a wuzla sukwi ngi mizli. Yi zli dimis ti slimiɗ ɗike, ɓa ngi hunumuw.

⁵¹Buymisemuŋ a vula gi bugawla le haɗa da buy naŋ madiɗa, ara ga mezle haɗa da mbur naŋ muwunaŋ na, yo a ga mezle da Davit waɗ da tizer naŋ, hã ngi sete.