Read South Giziga 2SA 23 Bible Online

2SA 23 - South Giziga bible

2SA 23

¹Davite, mingiɓi naŋ ngi dirba wãˀ ani: cinaka mingiɓi ngi Davit, mangal ngi Zese, mingiɓi ngi mbur, Buymisemuŋ mucufaŋ le ɗongor, mbur, Buymisemuŋ ngi zakop muwunaŋ le, mbur, Israyeley macinam ndum ngi hunumaŋ ti dimis.

²ˀUf ngi Bumbulvuŋ ara ɓi ɓi ti balam ɗu, a ca mingiɓi naŋ le a balam ɗu.

³Buymisemuŋ ngi Israyel a ɓa le, yo Gidigil muwã ngi Israyel a njikiy di le, a ɓi: Mbur mazum buy ti cika hirnga da Buymisemuŋ na, kite, ara zum buy ar mizli ti jiviɗ naŋ jeŋŋe.

⁴A bam vu le ati li minjahha ngi pas mabawa ti mipriki, kaɓa muŋ migi le kwalla ti mipriki, kaɓa sar ngi pas mapuso giziŋ titra tep tep a dirba vuŋ muwuyuh le.

⁵Mizli ngi hay ɗuwoyo, Bumbulvuŋ a gi ti taŋ ava na, kaɓa misi ani vuna: asi a jumˀay le ati ya hã ngi sete. Jumoˀay miɗiya ɓi nah le ar gwat gar, miweˀ di vu le, kuy kuy. Angi mike gar na, ara ga ɓa yi cifi bugawla, yo ar gwat ya misi ti may naŋ gar na, ara ga ɓa yi lumaŋ.

⁶Amma, mizli kesef lambaˀhaya, taŋ kaɓa hadaw mizliɗahay le avra, mbur a ja haŋ avu taŋ kine gu ta.

⁷Da mbur a wuɗ le ɓa a ja haŋ avu taŋ na, sey migira gira ngi ɓiri malla dum ngi ziwit kaw le a haŋ, a wura taŋ daˀ arleˀeŋ.

⁸Davite, bugawla ngi vurum naŋhay miwirwire, slimiɗ taŋhay ani: Isebaˀal, mbur Hakmoni, i madiɗa ngi soje misi libitihey. Ar li kiɗa vu purla na, naŋ a kiɗ mizli skat skat dangafaɗ asi mesene taŋhaya ti ziwit.

⁹Miɓaˀ aseˀe i Elazar, mangal ngi Dodo, yo dideˀ meciɗek ngi mbur ada ar li mazilaka Ahoˀa. Filistihey a kusom ada ngi kiɗa vu, bugawlahay makir a ki saka Davite, a singiram ar Filistihey tuwa na, Elazara naŋ da a wuzla taŋ. Israyeley ara mam nga dirba.

¹⁰Amma Elazar a cici gidaŋ gidaŋ, a kiɗ mizli a wuzla Filistiheye hã haŋ a gir, a ngbuˀ ngbaˀ avu maslalama. Bumbulvuŋ a gaŋ a lum bugawla haɗa tapasa. Israyeley a moko ngaseˀe na, sey ɓa ngi hila zlili ngi mizli mumucahay na tewle.

¹¹Miɓaˀ aseˀe i Samma, mangal ngi Age, mbur Harar. Filistihey a kusom a Lehi. Ar li nah na, i guva ngi sukwi ngi haɗiuŋ ada. Dar Israyeley a kilam ti Filistiheye.

¹²Amma sama, naŋ a cici a wuzla guva tuwa, a laha guva le, a kiɗa Filistiheye finiˀ finiˀ, Bumbulvuŋ, a gaŋ, a lum bugawla haɗa.

¹³Hirak ngi sifi ada na, mizli makir a wuzla gawla ngi Davitey mizli ngir makire, a poko sar ti muwã, a ndilam ng'avu Davit ar butum a Adulam. Asi soje Filistihey a pam sar le ng'ar wala muwã ngi Refayihey.

¹⁴Ti di nah na, Davite naŋ da ɗum kuy kuy, yo Filistiheye, t'ada vurum taŋ taˀ a Betelyem.

¹⁵Davit a ɓa ɓi ngi gwat naŋ mawuɗ ani: «Yam ngir futuŋ ngi mizlingre ngi ci nga Betelyem na, masa vuliy ɓa yi si i waka?»

¹⁶Bugawla mimakirey tuwa, a cam ti gidaŋ ng'ar li soje Filistihey mipam sar anga tuwa, a nuwoko yam ngir futuŋ misi a mizlingre ngi Betelyeme, a soko di, a vulaka da Davite. Amma, Davit a ngum sa yam tuwa ta. Dar a pusla ruwuyo a mbuŋ Bumbulvuŋ ti yam nah tuwa.

¹⁷Davit a ɓi: «Da yi sa yam hana le na, anja Bumbulvuŋ a puliy jiviɗ nah ta. Mizli miram nga diga na, taŋ taˀ hiri avu mucu. Yam hana, kite i pumbus taŋ ma na, ɓa yi sa na a gi kwa?» Davit a ngum ngi sa yama ta. Gwat, bugawla mimakirey migaka na, naŋ kahana.

¹⁸Abisay, sukum ngi Zoˀap, mangal ngi Seruya, i madiɗa ngi misi libitihey. Mikiɗa mizli skat skat makir vagay vagay ti ziwit na, i naŋ. Yo slimiɗ naŋ a zil le a wuzla bugawla mimakirey na.

¹⁹Haˀaw ɓula, Abisay a lum dudok le fineˀ bugawla mimakirey na. Naŋ a cifi madiɗa taŋ le, amma gar ti nah kwana, a ndila bugawla mimakirey na ta.

²⁰Benaya, mbur Kapseyele, a gi slra madiɗahay le haɗa. Naŋ i mangal ngi Yoyada, dideˀ meciɗek ngi mbur soje gurom. Benaya, mikiɗa manja sin ngi Moˀapay mucuw na i naŋ. Ngi pas mekelem ada na, yam a po buk buk haɗa, Benaya a ci nga kiɗa mobor ar futuŋ.

²¹Mbur ada, i mbur gambara, naŋ zliɓ zliɓ, i mbur Ezipte. Benaya a kiɗa le vagay. Mbur gambara Ezipte nah, naŋ ti ziwit kaw a haŋ. Benaya a kirih ng'avaŋ, naŋ kaw ti ganday tewle. A moho ziwit ngi haŋ mbur Ezipte tuwa moh, dar a kiɗa vagay ti naŋ tehhe a muŋ.

²²Benaya, mangal ngi Yoyada, gwat, naŋ miga i hana. Slimiɗ naŋ a zil le ka ngi bugawla mimakirey na.

²³Benaya a lum dudok le fineˀ bugawla mizli ngir makirey na, amma a ndila bugawla mimakirey na ta. Davit a mbiɗa, aru di ɓa a cifi madiɗa ngi mijigin nga naŋhay.

²⁴Asayel sukum ngi Zoˀapa, naŋ da a wuzla mizli gambara mizli ngir makirey na. Mizli taŋ mujom bummoˀhoyo, t'ani: Elanaŋ, mangal ngi Dodo a Betelyem.

²⁵Sama, Elika, mizli Harodoy.

²⁶Heles, mbur Pelet, Ira, Mangal ngi Ikes, mbur Tekoˀa.

²⁷Abiyezer, mbur Anatot, Mebunay, mbur Husa.

²⁸Salomoŋ, mbur Ahoˀa, Maray, mbur Netofa.

²⁹Helep, mangal ngi Baˀana, mbur Netofa. Itay, mangal ngi Ribay, mbur Gibeya angi hirwuy Benjameŋ.

³⁰Benaya, mbur Piratoŋ, Hiday, mbur ngi mizaw Gaˀas.

³¹Abiyalboŋ, mbur Bet-Araba, Asmavet, mbur Bahurim.

³²Eliyaba, mbur Salboŋ, Yonataŋ, mangal ngi wuzla ziri ngi Yaseŋhey

³³Samma, mbur Harar, Ahinam, mangal ngi Sarar mbur Harar.

³⁴Elifelet, mangal ngi Abasay, yo i dideˀ meciɗek ngi mbur ada a Maˀaka, Eliyam, mangal ngi Ahitofel, mbur Gilo.

³⁵Hesray, mbur Karmel, Paˀaray, mbur Arap,

³⁶Igal, mangal ngi Nataŋ, mbur Soba, Bani, mbur ngir sukwi ngi Gat.

³⁷Selek, mbur Amoŋ, Naray, mbur Beˀerot, mbur mijijira gwat ngi vurum ngi Zoˀap, mangal ngi Seruya.

³⁸Ira ati Garep, mizli ngi hay Yeretey,

³⁹waɗ Uri, mbur Hiti. Taŋ jom gar taŋ kukur makir nga tarnaˀa.