Read South Giziga 2SA 24 Bible Online

2SA 24 - South Giziga bible

2SA 24

¹Ti di numuŋ ada na, Bumbulvuŋ a ji mevel ar Israyeleye ma. Joˀ a pa mi da Davite ɓa a gi gwat taŋ mawuɗam ta. A ɓaŋ: «Aru, slufa Israyeley ati Zudahaya.»

²Zoˀap, madiɗa ngi soje ngi buyoyo, taŋ mucuwa ati buyo, buy a ɓaŋ: «Liˀi, bula hirwuy ngi sukwi Israyeleye gar, zle a Daŋ, hã a Berseba. Slufa mizli, ɓa yi si na taˀ taŋ.»

³Zoˀap a ɓa buyo: «Bumbulvuŋ Buymisemuŋ ɗik, anja a ska mizli hã makaw skata. Yo anja ɓaka buy, kumani ɗu, ki pura ti hiri ɗiki. Amma ki wuɗ ki ga gwat kahana vur mike, buy kumani ɗu?»

⁴Amma, mingiɓi ngi buy miɓa ɗaˀ na, a gi le i tikaˀay avu Zoˀap ati madiɗa ngi soje ngi buyoyo, ɓa ara slufaka mizli Israyeleye.

⁵A tuwuɗaka mizaw Zurdeŋ, a pam sar nga Aroˀer, walahay vay ngi ruwuy mekelem ada ar sozo, a slikiɗam baɗ ti kẽh. A tuwuɗaka mizaw nga hirwuy Gat, a ram ngir ti Yazer.

⁶A ndilam a Galaˀat waɗ ar hirwuy ngir mukutik a Hodsi. A cohom sesẽŋ nga Daŋ-Yaˀaŋ, ati purok naŋhay waɗ a Sidoŋ.

⁷A cam ar walahay migidaŋ angi hirwuy Tir, waɗ ar walahay ngi Hivihey ati ngi Kanaˀanay gar. Akẽh na, a ram nga Berseba, kini tir vay ngi ruwuy Zuda.

⁸A bulaka hirwuy cek kanah. Akẽh na, angi kiɗa mi ngi kiya mungoltir naŋ, ti hin kukur cuw na, a ndiloko a Zeruzaleme.

⁹Taˀ ngi mizli muslufahaya, Zoˀap a ɓa ɓi nah da buy anihĩ: «Israyeleye, mizli zliv makiɗam vu gu ti maslalama, taŋ durmuk skat skat dangafaɗa. Yo Zudahaya, taŋ durmuk skat skat zlum.

¹⁰Davite, a dirba naŋ muslufa mizli na, a cin didak ara muɗaŋ gbir gbir gbir. Dar Davit a ɓa Bumbulvuŋ: «Mungra ya miga na, naŋ haɗa wãˀ. Amma so na, Bumbulvuŋ, ya gawla ɗike, malambaˀɗu na, pula ɓi nah avra, asi gwat ya miga na, i ga kaɓa mbur mibirnga gisiŋ.

¹¹Li naŋ muwuno, Davit a slikiɗi. Naɓa Bumbulvuŋ a ɓa mijiviɗ Gata le, mbur misi kleŋ ngi Davit. Bumbulvuŋ a ɓaŋ:

¹²«Aru, ara ɓa Davite» na, Bumbulvuŋ a ɓi ani: «Yi wuɗ i ɗuvuw bonoyoy ani wal wal makir. Ki wini purla ar wala taŋ, ɓa yi gaŋ.»

¹³Gat a ru, ara luuma Davite, a faŋ ɓi nah. A ɓaŋ: «Ki wuɗ si bonoy vi tarnaˀ ti may angi hirwuy ɗike kwa? Malla kiya makir ar li kil a mbuŋ mesene ɗikey kwa? Malla ko hin makir ti jiji mangizl vu sunok sunok angi hirwuy ɗike kwa? Wurenna so na, wuluk ɓa ki ziliy mi, ɓa ya kwana, yi sa ra mbiɗa da mbur mislino ya na ya.»

¹⁴Davit a ɓa Gat tuwa na: «Wurenna yi ro lik haɗa haɗa. Zuwen ya madiɗ asi haŋ ngi Bumbulvuŋ, a funa ya madiɗ asi haŋ ngi mizli titiraˀahaya le, asi pura ircece ngi Buymisemuŋ naŋ haɗa.»

¹⁵Joˀ Bumbulvuŋ a slino jiji doflo asi hirwuy Israyele so, zle ngi miprik nah, hã avu hin naŋ muɗuva. Zle a Daŋ hã sesẽŋ a Berseba, mizli mumicam a wuzla taŋ, durmuk kukur tarnaˀa.

¹⁶Modro ngi Buymisemuŋ a ska haŋ ng'ar Zeruzaleme ɓa a ngizla mizli. Amma Bumbulvuŋ, a pula, a ɓa modro mingizla mizli: «Muku! Wurenna, ka haŋ nga ruwuy.» Ti nah na, naɓa modro ngi Bumbulvuŋ naŋ a ciki məlaŋ ngi Aravna, mbur Zebusi.

¹⁷Davit mupura modro mangizla mizli na, a ɓa Bumbulvuŋ: «Migi mungra i ya, yo migi malambaˀa i ya. Amma mizli migeˀ ircece hanayna, taŋ a gam gwat mike? Zuwen kiɗ di i ya ati mizli ngi hay ɗuwoy si.»

¹⁸Tapas nah vuna si na, Gat aru nga luuma Davite, a ɓaŋ: «Aru nga məlaŋ ngi Aravna, mbur Zebusi, ɓa kisa ɗiya li gi mikuli a diga da Bumbulvuŋ.»

¹⁹Davit aru kaɓa Bumbulvuŋ miɓa ɗaˀ le, Gat muru, mira ɓaŋ di tuwa.

²⁰Akẽh na, Aravna a pur hiri, keɗ na buy Davit ati gawla naŋhay ara soko ng'avaŋ. Aravna a bi, a huruk huruk a mbuŋ Davite, midibiɗ dir a ruwuy.

²¹Aravna a cufuɗaŋ: «Buy kumani ɗu, ki so ngi hay ɗu, ya gawla ɗike vur mike?» Davit a mbiɗaŋ di: «Ɓa yi hiɗika məlaŋ ɗik na, ngi ɗiya li gi mikuli da Bumbulvuŋ, ɓa anja jiji ngi waˀa na a kiɗ mi avu mizli.»

²²Aravna a mbiɗa da Davite: «Buy ɗu, gwat ka mawuɗ ka mawuɗ gar na, ka tiɓa taŋ ngi gi mikuli mizlam zlam wãˀa. Sla ɗuwoy ani ngi sa gi mikuli mizlam zlama, yo mota ngi slahay, gwat ngi slra ngi juw avu slahay ati gwat ngi ɗiɗi naŋ ngi siˀay ngi slahay gar na, ar deɗe ngi dum.»

²³Gwat tayna gar na, buy Aravna a vula taŋ da buy Davite. Joˀ Aravna a ɓa buy Davit tuwa: «Anja Bumbulvuŋ Buymisemuŋ ɗik, a tuɓuw mikuli nah.»

²⁴Amma, buy a ɓa Aravna: «Kanah ta, yi wuɗ i hiɗika ti hiɗik avu ka, ka cikili naŋ kaslsla. Gwat muvula ti vul na, y'anta wuɗ i gi di mikuli mizlam zlam da Bumbulvuŋ Buymisemuŋ ɗu ta.» Mǝlaŋ ati slahaya, Davit a hiɗika taŋ suloy kukur zlum.

²⁵Davit a ndira li gi mikuli a diga da Bumbulvuŋ. Dar a gi mikuli mizlam zlam waɗ mikuli ngi vula zuy. Akẽh na, Bumbulvuŋ a ga mezle da mizli a ruwuyo muduba, dar jiji a kiɗ mi wãˀ avu ruwy Israyele.