Read South Giziga 2SA 3 Bible Online

2SA 3 - South Giziga bible

2SA 3

¹Mizli ngi Sawuloy ati ngi Daviteye, a zikam ti gi vurumo le haɗa ar wala taŋ. Davit ara lum gidaŋ nga mbuŋ nga mbuŋ, amma mizli ngi Sawuloyo, ara hĩhĩyam ti hĩhĩy jaka.

²Davit a yi ziriy le haɗa a Hebroŋ. Mangal naŋ modogomo i Amnoŋ. A ya ti Ahinoˀam, zuŋ Zisreyel.

³Mucuw naŋ i Kilap, a ya ti Abigayel, ngwas ngi Nabal, mbur ngi ruwuy Karmel zleˀe, mimakir taŋ i Absalom, a ya ti Maˀaka, zuŋ ngi Talmay, buy ngi Gesur.

⁴Mumufaɗ taŋ i Adoniya, a ya ti Agit, muzlum taŋ i Sefatiya, a ya ti Abital.

⁵Mimerkeɗ taŋ i Itreˀam, a ya ti Egla. Egla kwana i ngwas ngi buy. Hanayna i ziri ngi Davitey miya taŋ a Hebroŋ.

⁶Ti di vurum mira gi ar wala ngi mizli ngi Sawuloy ati mizli ngi Davitey na, Abner ara vula gidaŋ nga naŋ tir vay ngi Sawul.

⁷Sawulo, ngwas naŋ mangasl ada zleˀe, a zilaka Rispa, i zuŋ ngi Aya, ngi hin numuŋ ada na, Isebaˀal a mbiɗa hirnga da Abnere, a ɓaŋ: «Ka mihin ti ngwas mangasl ngi baha na ngi mike?»

⁸Abner micina mingiɓi hana kahana, a ji mevel haɗa ar Isebaˀala, a ɓaŋ: «Ani yi kiri ngi mizli Zudahay sukwa? Hã dana, ya teŋteŋ avu hay ngi cine ɗik Sawulo. Ya teŋteŋ avu sukum naŋhay ati ngama naŋhaya. Yi puluw mbak ɓa ki ci asi haŋ ngi Davite ta. Ani wurenna, ki wuɗ ki mbiɗiy hirnga asi ɓi ngi ngwas misenna!

⁹Ya Abnere, gwat Buymisemuŋ miɓa da Davit ti hudum na, da yi ga ta na, anja Bumbulvuŋ a kutiy ti bonoy mukuyta wãˀ.

¹⁰A ɓaŋ a sa tiɓa buyo tivi mizli ngi hay Sawuloyo, a sa cifi ti Davite, i buy ngi Israyel, ngi Zuda, zle a Daŋ sesẽŋ a Berseba.»

¹¹Ko Isebaˀal a mbiɗaŋ mi pal gu ta, asi ara zluwun di haɗa.

¹²Akẽh na, Abner a slin mizli ng'avu Davite ar slimiɗ naŋ, ɓa a ɓakaŋ: «Hirwuy i ngi waka? Jumˀay ati ya, ɓa i jinuw ngi jumo hirwuy Israyele gar ng'avu ka.»

¹³Davit a mbiɗaŋ di: «Kuy! I sa jumˀay ati ka. Sey i cufuɗ gwat purla avu ka: Ɓa kisa so a mbuŋ ɗu na, siy ti ngwas ɗu Mikal na ndol le, Mikal, zuŋ ngi Sawul na. Da ki ga le kanah na, naɓa kisa so a mbuŋ ɗu far.»

¹⁴Davit a slin ng'avu Isebaˀal, mangal ngi Sawulo, ɓa ara ɓakaŋ: «Vuliy Mikal, ngwas ɗu, ya muzuɓa na, yi vul ar deɗe ngi zlile, i mbuŋ ngi Filistihey skat.»

¹⁵Isebaˀal a slin, ara zuɓoko Mikal a hay mangasl naŋ Paltiyel, mangal ngi Layise.

¹⁶Mikala, mangasl naŋ a kisa sesẽŋ a Bahurim, ti tuwuy aseˀeŋ. Abner a ɓaŋ a diga ɓa a mi ngi hay, a cinaŋ mi, a mi.

¹⁷Akẽh na, Abner a zlaka kiɗa slir ati micawwa ngi Israyeleye. A ɓa taŋ: «Zle zle vuna sina, ki ra wuɗam Davite ngi buy.

¹⁸Naŋ kine, hana i hin ngi gi naŋ muduba so. Asi mike na, Buymisemuŋ a ɓi ani vur Davite: ‹Israyel, mizli ɗuwoyo, i sa laha taŋ ti haŋ Filistiheye gar, yo ti haŋ mesene taŋhay gar na, mbele gawla ɗu Daviti.›»

¹⁹Abner a ɓam ati mizli Benjameŋheye ma. A dirba nah na, Abnere, ɓi naŋ muluma tivi mizli Benjameŋhey, yo waɗ tivi Israyeley gar na, ara ɓa da Davit a Hebroŋ.

²⁰Abnere, waɗ mizli aseˀe kukur cuw, a soko a lumaka Davit a Hebroŋ. Davit a ga gwat ngi zum da Abner ati mizli ngi seˀeheye.

²¹Abner a ɓa Davite: «Kumani ɗu, wurenna i juw vu le ngi kuso Israyeleye gar ng'avu ka, buy. A sa jumomˀay ati ka, yo kisa zum buy ar li gar ka muwuɗ le.» Davit a mbiɗa mi da Abnere, joˀ naŋ aru ti zuy gwaɗ naŋ.

²²Neˀ na, gawla ngi Davitey ati Zoˀap a moko tir li gi vurumo, a lumoko, zlili le haɗa a haŋ. Naɓa Abnere, naŋ anta a ciki Davit a Hebroŋ mata, asi Davit a pulaŋ a cuh le ti zuy.

²³Zoˀap ati soje naŋhaya gar mindiloko na, a soko, a ɓaka Zoˀapa, «Abner, mangal ngi Ner, a so le a hay buy aka, buy a pula le, a cuh le ti zuy.»

²⁴Zoˀap a so luuma buyo, a ɓaŋ: «Ki gi gwat mi hanaka? Pura, Abner a so le a hay ɗike! Ki pula a cuh kanah vur mike?

²⁵Abner, mangal ngi Ner na, ki si na le takwa: naŋ muso na, ɓa ngi guw gilaw, ɓa a si na gwat ka mawuɗ ngi gi ngi gi ar vurum waɗ slra ɗikey gar ta kwa?»

²⁶Zoˀap mibi ti hay buy na, a slin mizli ɓaˀa asi Abnere. Mizli ara moko di zle a mifutuŋ ngi Sira. Davit a si na ɓi nah ta.

²⁷Abnere, ti naŋ mindilo a Hebroŋ na, Zoˀap a ɗiɗa baˀ ng'avi mizlingre ngi walahaya, kaɓa a wuɗ ɓa a ɓaŋ ɓi ti miyaŋ yaŋ. Adiga, a zliga daˀ ar cakay a muc, ɓa ngi pula cuwal ngi sukum naŋ Asayel.

²⁸Davit micina ɓi nah cin na, a ɓi ti gidaŋ: «Vur pumbus ngi Abner, mangal ngi Ner na, ya ati zumabuy ɗu, ndra cimak a mbuŋ Buymisemuŋ.

²⁹Anja a mbiɗi nga hirnga Zoˀap ati mizli ngi hay naŋhay. A hay Zoˀapa, jiji ngi waˀa maɓul malla kukula, anja a tiki tikeˀ le avu mizli ngi hay naŋhaya ta, ziley a tiram migi slra ngi ngwasay, mizli mamicam muc migurjik malla may makiɗa taŋ ti kiɗi.»

³⁰Zoˀap ati sukum naŋ Abisay mikiɗaka Abner na, asi Abner mikiɗa sukum taŋ Asayele vagay ar kiɗa vu migi a Gabaˀoŋ na.

³¹Davit a ɓa Zoˀap ati mizli gar misi ati naŋ akẽh: «Ngiraka zana kumoyo, juwam zana ngi vagay, tuwaka vagay ngi Abnere daˀ a mbuŋ naŋ.» Joˀ buy Davite, naŋ aru ɓaˀ a dirba vagay ngi Abnere.

³²A dikaka Abner a Hebroŋ. Buy a hiziga tuwuy ar zivi ngi Abnere, dar mizli gar a tuwam aya.

³³Akẽh na, buy a zli dimis ngi tuwa Abnere. A ɓi ani: «Abner, ki muc di i muc ngi mbur gilaw vur mike?

³⁴A juwukuw haŋhaya ti celelu ta, a cukuw sesele a sara ta. Ki diɗ le kaɓa mbur madiɗ a haŋ mufuyvuhoy.» Joˀ mizli gar a tuwam ava ma.

³⁵Dar mizli a kirohoko ng'avu Davite, ɓa a vulakaŋ ɗaf a zum, amma Davit a ngum zuma ɗafa ta, naɓa i papasa aruŋ. Amma Davit a hudum a ɓi: «Pas midiɗ t'aruŋ, ɓa i titil ɗaf malla ko gwat wanaka gar na, anja Bumbulvuŋ a kutiy ti bonoy mukuyta wãˀ.»

³⁶Mizli keɗeɗe a sinaka le, yo a hĩyãka le. Naŋ kine, gwat buy maga gar na, mizli ara hĩyãkaŋ.

³⁷Tapasa mizli gar, yo Israyeley gar na, a sinaka le, muc ngi Abner, mangal ngi Ner na, i buy mupula jiviɗ naŋ ta.

³⁸Buy Davit a ɓa gawla naŋhaya: «Buy, yo mbur madiɗa a diɗ le dana ar hirwuy Israyel na, ki sinaka ta kwa?

³⁹Dana, ko ti taŋ micikiy yi buy kwana, y'anta gidaŋ t'aruŋ. Amma, mizli hanayna, ziri ngi Seruyahay na, taŋ tuwaˀ haɗa avu ya. Amma, anja Buymisemuŋ a wurka mbur misi moˀore weˀ avu moˀore naŋ.»