Read South Giziga 2SA 4 Bible Online

2SA 4 - South Giziga bible

2SA 4

¹Isebaˀal, mangal ngi Sawul na a cine na, Abner a muc le a Hebroŋ. Mevel a slaŋ, yo mizli Israyeley gar, a ga taŋ gigisl teˀ.

²Buy mijigina Isebaˀal ada cuw taŋ a hay mangal ngi Sawul Isebaˀala, naŋ da ti madiɗa ngi sojehey cuw. A zilaka mekeleme Baˀana, yo numuŋ kwana Rekap. I ziri ngi mbur ada, a zilaka Rimoŋ, mbur Benjameŋ ngir li mazilaka Beˀerot, asi Beˀeroto, a slufaka tir hirwuy Benjameŋ.

³Mizli ngi Beˀerotoy mikilam nga Gitayim na, a cifam a diga hã dideˀ taŋhaya t'ada dana aruŋ.

⁴Zonataŋ mangal ngi Sawulo, mangal naŋ ada, a zilaka Mefibaˀal, i kilbeɗe, saraya hilaɓ hilaɓ cuw taŋ. Ti di labara ngi muc ngi Sawul ati ngi Zonataŋ mindilo ti Zisreyel na, naɓa Mefibaˀala naŋ ti vi zlum. Ngwas migil naŋ, ti di naŋ muzuɓa ɓa a kil di na, ara wus vu haɗa. Mbak mangal a diɗi, a sa ndir kilbeɗe.

⁵Rekap ati Baˀana, ziri ngi Rimoŋ mbur Beˀerot tuwa, a ram ngi hay Isebaˀala. A ra ndilam hirak ngi pas mazlum cãˀcãˀcãˀ, Isebaˀal a hin le tup a hay naŋ ngi wuzla papasa, ara hinje.

⁶Akẽh na, a cam nga hur viŋ mimbaf ti alkamari, a lumaka Isebaˀal mutup ar arngawo naŋ, a zligakaŋ bav avu kwacaya. Joˀ Rekap ati sukum naŋ Baˀana, a kilam.

⁷Taŋ micam ngi hay naŋ, taŋ mulumaka tup ar arngawo naŋ, taŋ mikiɗaka vagay tuwa na, a bukoko hirnga. Akẽh na, a zuɓaka hirnga tuwa, a zuɓam jiviɗ tir sozo ngi Zurdeŋ, kap ngi duvuɗo ar li ru.

⁸A ram ti hirnga ngi Isebaˀal tuwa da Davit a Hebroŋ, a ɓaka buyo: «Isebaˀal, mangal ngi Sawul, mesene ɗik, mawuɗ ziza hirnga ɗik tuwa, hirnga naŋ anihĩ. Angi hin hana, buy kumani ɗu, Buymisemuŋ a pula cuwal ɗike le kuy kuy wãˀ ar Sawul waɗ ar dideˀ naŋ.»

⁹Rekap ati sukum naŋ Baˀana, ziri ngi Rimoŋhoy, mbur Beˀeroto, Davit a mbiɗa taŋ di: «Kaɓa Buymisemuŋ misi ti siifa gisiŋ na, milihiy avu mendere gar.

¹⁰Mbur a so le ɗaˀ zleˀe, ti labara ngi muc ngi Sawul. Naŋ a wa zleˀe kaɓa i mbur misiy ti ɓi mezle le. Amma i ɓi ɓa a jakaŋ, ɓa a kiɗakaŋ a Siklaka. Yi wurkaŋ asi ɓi mezle naŋ na kahana.

¹¹Mbur migi gwat ta, mitup ar arngawo naŋ, mizli migi gwat malambaˀhay a kiɗaka le vagay. Wurenna i kutukum ti bonoy asi kiɗa hirnga kum na ta mbri jak ka! Yo i sa susuymukum asi ruwuyo.»

¹²Akẽh na, Davit a vula jiviɗ da soje naŋhaya, a kiɗaka Rekap ati Baˀana, waɗ a bukoko taŋ haŋhay ati saraya, a luwaka taŋ gweˀ avu futuŋ a Hebroŋ. Hirnga ngi Isebaˀal tuwa, a zuɓaka, aka ka ar zivi ngi Abner a Hebroŋ.