Read South Giziga 2SA 5 Bible Online

2SA 5 - South Giziga bible

2SA 5

¹Sukwi Israyel gar a soko lumaka Davit a Hebroŋ, a ɓakaŋ: «Ndrˀani, ndr'i muy ɗikey, ndr'i ngi wazlaray ɗikey.

²Zlezle zleˀe, ti di Sawul misi i buy ndra na, mabi ti soje Israyeley ng'ar vurumo i ka, yo mamo ti taŋ i ka. Dambalaka Buymisemuŋ a ɓuw le zleˀe si: ‹Masa jigina Israyel, mizli ɗuwoy i kaha, yo masa tiri buy ngi Israyeley i ka.›»

³Mizli micawwa ngi Israyeley gar a soko lumaka buy a Hebroŋ. Davit a jumˀay ati taŋ a Hebroŋ a mbuŋ Buymisemuŋ, a caka Davit i buy ngi Israyel.

⁴Davit mitiri buy na, naɓa naŋ ti vi kukur makir.

⁵A zum buy ar Zudahaya, vi tarnaˀ ti kiya merkeɗe. A Zeruzaleme, a zum buy ar Israyeley gar ati Zudahaya, vi kukur makir nga makir.

⁶Buy ati mizli naŋhay a cam ti gidaŋ nga Zeruzaleme. Ti di nah na, misi asi ruwuyo i mizli Zebusihey. A ɓaka Davite: «K'anta co ng'ar walahay ndra ta. Ko dangaray ati jegwerey kwana, a ndilaka le ngi ɓul ɗike.» Mingiɓi hana, a mbiɗeˀ avra: ‹Davit anta sa co, ɓa a zuɓa walahaya ta ndiɗaˀ.›

⁷Walahay Siyoŋ muguno ti moholo, Davit a ci, a tiɓa le ngbaŋ. Ar nah na, a zilaka walahay madiɗa ngi Davit.

⁸Tapasa na, Davit a ɓa mizli naŋhaya le zleˀe: «Da mbur muwuɗ le ɓa a kiɗa Zebusiheye na, sey a ci tir vigiɗ ngi yam milaka ti ruwuy ɓa yam a ɓul ti raˀa na, ɓa ara luuma taŋ. Amma dangaray ati jegwereye na, Davit a hirsa taŋ le.» Vurˀe, mizli a ɓam: «Dangaray ati jegwerey a cam ng'ar hay ngi Buymisemuŋ ta.»

⁹Davit a cifi ar walahay muguno ti moholo, a zilaka «Walahay madiɗa ngi Davit.» Akẽh na, Davit a ndir gwat mekelem gun hirnga ngi hay naŋ tuwa, zle avu li mazilaka Milo sesẽŋ nga huroˀo.

¹⁰Davit ara tiri madiɗa ti gidaŋ, yo Bumbulvuŋ Buymisemuŋ, misi gidaŋ wãˀa, naŋ da ati naŋ.

¹¹Hiram, buy ngi Tir a slino mizli ng'avu Davite ti dum ngi miter, ti mikiɗa hayay, ti misina puɗka ɗugur ngi ndira mohol, a ndiraka hay da Davite.

¹²Akẽh na, Davit a si na le, Buymisemuŋ a cifaŋ le i Buy ngi Israyel, yo a gaŋ zumabuy naŋ le puɗaw asi Israyel mizli naŋhaya.

¹³Davite, a dirba naŋ mupulo Hebroŋ na, a zuɓ ngwasay ati mangasl mekelemey le ma. Ngwas tayna, a yam ziri mizile ati mongoso mekelemey le da Davite ma.

¹⁴Ziri miyaka taŋ a Zeruzalem na, slimiɗ taŋhay anihĩ: Samiwa, Sobap, Nataŋ, Salomoŋ,

¹⁵Ibar, Elisuwa, Nefek, Yafiya,

¹⁶Elisama, Eliyada waɗ Elifelet.

¹⁷Filistihey a cinaka na, Davite, a cakaŋ le i buy ngi Israyel. Akẽh na, Filistihey gar a zlaka sipi Davite ɓa a jakaŋ. Davit micina ɓi nah na, a ci ng'ar li mbur mandil ng'ara ti tuwaˀa.

¹⁸Filistihey a soko, a nahaka sozo ngi Refayaya.

¹⁹Davit a cufuɗa Buymisemuŋ: «Ani i ra kiɗam vu ati Filistihey na kwa? Ki sa vuliy taŋ asi haŋ ɗu kwa?» Buymisemuŋ a ɓa Davite: «Haˀaw, a ru, i sa vuluw Filistihey asi haŋ ɗik.»

²⁰Davit a ndil a Baˀal-Perasim, joˀ Davit a kiɗa Filistihey a diga.» Dar Davit tuwa, a ɓi: «Buymisemuŋ a wuniy jiviɗ le ng'ar mesene ɗuwoyo, kaɓa yam mangira baray naŋ.» A zilaka li nah Baˀal-Perasim na vurˀeŋ, mbiɗeˀvra: Buy mawun li mifiliw ti wun.

²¹Filistihey mikilam na, a pulaka kuli taŋhay a diga, dar Davit ati mizli naŋhay a hilaka taŋ.

²²Filistihey tuwa, a bam ma, ara nahaka sozo ngi Refayaya.

²³Davit a cufuɗa Buymisemuŋ ma, Buymisemuŋ a ɓaŋ: «Ki zla taŋ ti ka ta, amma mbiɗi ti dirba taŋ, ɓa ki so ng'ar taŋ kini tisi biizi na.

²⁴Da ki cin wus ngi sar le avu kalaf ngi biizi na, wus vu kutum so. Ya Buymisemuŋ masa bi a mbuŋ ɗike ngi kiɗa soje Filistihey na, hirak ti nah so.»

²⁵Davit a ga kaɓa Buymisemuŋ muɗuvaŋ ɓi nah, a kiɗa Filistiheye, zle a Geba hã sesẽŋ ar li ci nga Gezer.