Read South Giziga 2SA 6 Bible Online

2SA 6 - South Giziga bible

2SA 6

¹Davit a kuso soje Israyeley ava ma, taŋ durmuk kukur makir.

²Davit ati taŋ gar, a ram baɗ a Baˀala, hirwuy Zuda, nga mo ti akoti ngi Buymisemuŋ, akoti nah na, slimiɗ naŋ, ‹Bumbulvuŋ misi gidaŋ wãˀ›, muangi Kerubeŋhey.

³Akoti vuna naŋ zleˀe a hay Abinadap ar li miɗingir. A zuɓaka ng'ar mota nawaya ngi vurum.

⁴A ram ti sarete ti hay Abinadap misi ar li miɗigire jom ati akoti ngi Buymisemuŋ. Ahiyo naŋ ɓaˀ a mbuŋ akoti.

⁵Davit ati Israyeley gar ara ɓurgam a mbuŋ Buymisemuŋ asi gwat ngi gi dungur misi ti sukwi wal wal: garaya, gujuvur, ti kiɗa gangaŋhay aseˀeŋ, cawalay ati jãwjãway.

⁶A ndilam a məlaŋ a Nakoŋ. Akoti ngi Bumbulvuŋ tuwa, Uzza a tila haŋ a jaŋ, asi slahay a wuɗ a hizigoko di tir mota ngi vurumo nga ruwuy zleˀe.

⁷Buymisemuŋ a slikiɗ himaˀ ar Uzza, a kiɗa vagay asi cin ta naŋ na. Uzza a muc daˀ a ciki akoti ngi Buymisemuŋ akẽh.

⁸A ga Davite welele asi Buymisemuŋ mikiɗa Uzza tuwakaɓa a wun li mifiliw ti wun. A zilaka li nah Peres-Uzza hã dana aruŋ.

⁹Tapasa, Davit a zluwun ti Buymisemuŋ, a ɓi: «Akoti ngi Buymisemuŋ, ɓa a soko di ngi hay ɗu na, a gi kwa?»

¹⁰Davit a ngum ru ti akoti ngi hay naŋ ta, ng'ar walahay naŋ ta. Joˀ a ka a hay Obed-Edom, mbur ngi ruwuy Gat.

¹¹Akoti ngi Buymisemuŋ a zik a hay Obed-Edom, a gi kiya makir. Buymisemuŋ a ɗuwula mi da Obed-Edom waɗ mizli ngi hay naŋhaya gar.

¹²Mizli a soko, a ɓaka Davite: «Buymisemuŋ a ɗuwula mi le da mizli ngi hay Obed-Edomoyo waɗ da gwat naŋhay gar, asi akoti ngi Buymisemuŋ na.» Dar Davit a ru, a ɓi ɓa a zuɓoko akoti ngi Buymisemuŋ ti hay Obed-Edomo, ng'ar walahay naŋ, a soko di hiɗim hiɗim ti mumul.

¹³Mizli mijijira akotiheye muɗuvam sar taˀtaˀ merkeɗ si na, Davit a kiɗ gusoŋ waɗ zuŋ sla muzlumbura, dar a gi taŋ mikuli da Buymisemuŋ.

¹⁴Davit a zla ara ɓuruk haɗa haɗa wãˀ ngi cika hirnga da Buymisemuŋ. A juw avu vu i zana ngi gabaga mislirkeɗ kaɓa jampa ngi masayay tewle.

¹⁵Naŋ kine, Davit ati mizli Israyeley gar, a ram ti akoti ngi Buymisemuŋ nga Zeruzaleme ti zluzluɓ, ti fi fugumoy.

¹⁶Hirak ti akoti ngi Buymisemuŋ mandil ng'ar walahay ngi Davite na, Mikal, zuŋ ngi Sawul a hilɗo di hileɗ tir fenetir. A pura Davit majiɗ, maɓuruk a mbuŋ Buymisemuŋ tuwa na, a gaŋ kuy ta a mevele, a hirsaŋ.

¹⁷A soko ti akoti tuwa, a hur guɗuk Davit miɗiya hĩˀĩ vurˀeŋ. Davit a ga mikuli da Buymisemuŋ, mikuli mizlam zlam wãˀ waɗ mikuli ngi jumoˀay.

¹⁸Davit mikiɗa mi ngi gi mikuli na, a ɗuwula mi da mizli ti slimiɗ ngi Bumbulvuŋ Buymisemuŋ, misi gidaŋ wãˀ.

¹⁹Israyeley misi a diga, ziley ati ngwasaya, ko wa gar na, Davit a vulaŋ milef, milef ngi dibinoji, waɗ ngi gudubun muˀulo. Akẽh na, mbur gar a mi ngi hay naŋ.

²⁰Davit a mi ngi hay naŋ, ɓa ara ɗuwula mi da hay naŋ. Mikal, zuŋ ngi Sawul tuwa, a bo nga mbuŋ Davite, a ɓaŋ: «Yawwa, ngadana, ka buy ngi Israyele, ki lum dudok le, ti ka mupula vu ɗik cah ti mi a mbuŋ ngwas beke ngi beke ɗikey, kaɓa ki mbur lambaˀ na!»

²¹Davit a mbiɗa da Mikal tuwa: «Ya miga kanah na, ngi ɗuva hirnga da Buymisemuŋ. Muwuniy i naŋ, yo i naŋ mihiyĩy fineˀ bunuk, yo fineˀ mizli ngi hay naŋhaya, ɓa a cifi ti ya buy ngi Israyel, mizli naŋhay. Yo i sa biga mumul ɗu a mbuŋ naŋ ava na si.

²²I sa ma hirnga ɗu nga ruwuy ti gidaŋ ava jak. I sa pura hirnga ɗu yi mbur meciɗek wãˀ. Kanah na, bekehey ka maɓa ɓi taŋ na, a sa cikikiy hirnga.»

²³Amma, Mikal, zuŋ ngi Sawul tuwa, a yi ta wãˀ hã avu muc naŋ.