Read South Giziga 2SA 7 Bible Online

2SA 7 - South Giziga bible

2SA 7

¹Davit a cifi le angi hay naŋ. Buymisemuŋ ara jiginaŋ avu mesene naŋhay mugun hirnga ngi zumabuy naŋ na.

²Ngi hin mekelem ada na, buy a ɓa Nataŋ, mijiviɗ ngi Bumbulvuŋ: «Ani, yi cifi le ar hay miɗiya ti dum ngi miter so. Amma akoti ngi Buymisemuŋ a ro taˀ ar hay ngi godo na mbrike?»

³Nataŋ a ɓa buyo: «Gwat ka mawuluk gi naŋ gar na, ara gaŋ, asi Buymisemuŋ n'ada ati ka.»

⁴Amma, ngi duvuɗ nah na, Buymisemuŋ a ɓa Nataŋ:

⁵«A ra ɓa gawla ɗu Davite na: Buymisemuŋ a ɓi anihĩ: ‹Masa ndiriy hay, ɓa yi sa cifi anga na, i ka kwa?

⁶Asi mike na, zle ti ya mubo ti Israyeley ti Ezipte, hã dana na, yi cifi joˀ le ar haya ta. Ya mikisa Israyeley na, ar deɗe ngi hay ɗu i guɗuku.

⁷Yi kisa Israyeleye le ko amaka gar. Yo yi cica sukwi ngi Israyeleye, ɓa a jiginaka Israyel, mizli ɗuwoyo. Ti hin nah gar na, ɓa yi ɓi sukwi purla asi taŋ: Ki ɗiyikiy hay ti dumo ta vur mike na, ko yi ɓi ta.›

⁸Wurenna so na, kisa ra ɓa gawla ɗu Davit anihĩ: ‹Buymisemuŋ misi gidaŋ wãˀ a ɓuw na: Muzuɓo ka ar li jigin asi tumuŋhoy i yaha, ɓa ki tiri buy ngi Israyel, mizli ɗuwoyo.

⁹Ko amaka gar ka maru na, y'ada ati ka: yi ngizla mesene ɗikeye le a mbuŋ ɗike. Yi ga le ɓa slimiɗ ɗik a zil haɗa kaɓa slimiɗ ngi buyoy mazilam haɗa ar duniya na ya.

¹⁰Israyel, mizli ɗuwoyo, yi sa vula taŋ li. I sa cifaŋ a diga ɓa a sa ndir anga. T'anta sa zluwun mata, yo migi gwat malambaˀhay anta sa guzuvurakaŋ kaɓa zleˀe mata,

¹¹kaɓa zlezle ti ya ɓi micica migi kiitahay ɓa a zumam buy ar Israyel, mizli ɗuwoy na. I sa wi vu ti ka avu mesene ɗikeye gar. Buymisemuŋ a ɓuw, ya Buymisemuŋ i sa vuluw dideˀhey.

¹²Ti hin ɗik misa ndila le ɓa kisa luuma dideˀ ɗikey na, yi sa wini a wuzla ziri ɗikey halla. Mazuɓa buy ar li ɗik i naŋ, yo yi sa cicaŋ zumabuy naŋ gidaŋ gidaŋ.

¹³Masa ndiriy hay ti slimiɗ ɗu i naŋ, yo yi sa cicaŋ zumabuy naŋ a ndir ngi sete.

¹⁴I sa tiri cine naŋ, yo naŋ a sa tiri mangal ɗu. Da ara gi malambaˀ na, yi sa kutaŋ kaɓa cine makuta zuŋ naŋ.

¹⁵Amma y'anta sa kiraha gi mezle ɗu ava, ka ya mikiraha avu Sawul, ya misa cuw ar li naŋ na ta.

¹⁶Hay ati zumabuy ɗik a sa ndir hã ngi samadin, yo i mbur ngi kwacay ɗik masa zumabuy ar li ɗike caˀa.›»

¹⁷Nataŋ, gwat Bumbulvuŋ mibigaŋ di, naŋ mupura gar na, a ɓa taŋ da Davite cineˀe.

¹⁸Dar Davit ara cici a mbuŋ Buymisemuŋ, ar guɗuk ngi Bumbulvuŋ, a ɓi: «Bumbulvuŋ Buymisemuŋ, ɗu, ya malla mizli ngi hay ɗuwoyo, gwat ka muvula hana gar na, i ndilaka ɓa i lumaka ta.

¹⁹Dambalaka, avu ka na, Buymisemuŋ, hana naŋ preˀ ɗagay. Ki ɓi le vur hay ngi gawla ɗike zlezlezleˀe ma. Haˀaw Buymisemuŋ, gwat masa gi na, ki bigiy di le da ya mbur ngatara ma.

²⁰Bumbulvuŋ, Buymisemuŋ, ya gawla ɗik Davite, i sa ɓuw mbri maka, asi mike, ki siniy le si.

²¹Slra madiɗaka miga hana, ka mibiga da gawla ɗik na, asi mingiɓi ɗiki, yo asi ki wuɗ le a mevel ɗike.

²²Yo ma na, Bumbulvuŋ, Buymisemuŋ, ka madiɗaŋ, misi kaɓa ka anta, yo Bumbulvuŋ mekelem anta, sey ka tewle, kaɓa ɓi gar ndra micinaka ti slimiɗ ndra na.

²³Yo ma na, a ruwuyo sukwi misi kaɓa Israyel mizli ɗikey anta ko pal ta. Israyel, i sukwi ka Bumbulvuŋ mumbuɗo hirnga taŋ ɓa ki tiri taŋ mizli ɗikey. Ki ga taŋ slra madiɗa ngi zluwuna vuhoy ɓa ngi cika hirnga da slimiɗ ɗike. Ki cuko taŋ le tir zeweɗ avu Ezipteheye. Sukwi mekelemey ati gwat taŋ mahuruk hurukam a mbuŋ taŋhaya, ki ɓula taŋ le a mbuŋ taŋ.

²⁴Yo Israyel, mizli ɗikeye, ki cica taŋ le ɓa a tiram mizli ɗikey wãˀ Buymisemuŋ, ka ki tiri Bumbulvuŋ taŋ le.

²⁵Bumbulvuŋ, Buymisemuŋ, wurenna, mingiɓi ɗik ka miɓa vur gawla ɗike, yo vur hay naŋ na, ja ɓi naŋ hã ngi sete, yo ga kaɓa ka miɓa.

²⁶Yo anja slimiɗ ɗik a zil ko ti vunaka gar, yo anja mizli a ɓam: «Bumbulvuŋ misi gidaŋ wãˀa, i Buymisemuŋ ngi Israyel.» Yo anja hay ngi gawla ɗik Davit a ndir gidaŋ gidaŋ a mbuŋ ɗike.

²⁷Naŋ kine, Bumbulvuŋ, misi gidaŋ wãˀ, Buymisemuŋ ngi Israyel, ka vuna, ki ɓa gawla ɗike le ɗaˀ ɗaˀ dumbuŋ ani: «I sa ndiruw hay.» Gawla ɗik mulum gidaŋ ɓa a tumbuluw na, vurˀeŋ.

²⁸Na, wurenna na, Bumbulvuŋ Buymisemuŋ, Buymisemuŋ i kaha. Mingiɓi ɗikeye taŋ kaslsla, yo ɓi mundum hana ki ɓa le da gawla ɗike.

²⁹Wurenna, ambuh, ɗuwula mi da gawla ɗike, ɓa naŋ da ndrehhe a mihiri ɗike. Asi mike na, Bumbulvuŋ, Buymisemuŋ, miɓi i kaha. Anja ɗuwula mi ɗike, a ndir ndrehhe ar hay ngi gawla ɗike.»