Read South Giziga 2SA 8 Bible Online

2SA 8 - South Giziga bible

2SA 8

¹A dirba ɓi nah na, Davit a kiɗa Filistiheye, yo a gi ti taŋ a hinam hirnga a mbuŋ naŋ. Davit a pula taŋ haŋ njoŋ ngatara avu zumabuy taŋ ar li tayna.

²A kiɗa Moˀapaya, a hina taŋ tup tup a ruwuy, a wa taŋ ti zeweɗ ngi wi gwatay. A wa taŋ ti zeweɗe weˀweˀ makir, miweˀ weˀ cuw mudumbuŋhoy i ngi kiɗ vagay vagay, amma miweˀ mimakir na, a pula taŋ ti siifa. Zle ar nah na, Moˀopay a tiram avu Davite i beke naŋhay, a wurkakaŋ buutu.

³Hadadezer, mangal ngi Rehop i buy madiɗa ngi Soba. A wuɗ zleˀe ɓa ara zuɓa hirwuy mizaw Efrata da naŋ a muŋ. Dar Davit a kiɗa ma.

⁴Mizli naŋhay misi ar piliseye, taŋ durmuk purla ti skat skat tarnaˀ, waɗ misi saraya taŋ durmuk kukur cuw. Davit a ja taŋ pay da naŋ. Davit a buko zlambar ngi pilisey maɗiɗaka motahaya cek, waɗ a pul da naŋ i pilis miɗiɗa motahaya skata.

⁵Mizli A ramay a soko ti Damas ngi so jina Hadadezer buy ngi Soba. Davit a kiɗ mizli a wuzla Aramaya durmuk kukur cuw nga cuw.

⁶Dar akẽh na, Davit a cifi buyoy muwam lihey mbeˀ mbeˀ ar mizli A ram ngi Damasaya. Zle ti nah na, mizli Aramay a tiram bekehey ngi wurka buutu da Daviti. Davite, ar li naŋ maru gar na, Bumbulvuŋ ara cifaŋ bugawla.

⁷Gulum ngi ɓiri tapasl tapaslay misi avu gawla ngi Hadadezerey gar na, Davit a tiɓa taŋ gomgom cek da naŋ. Joˀ aru ti taŋ nga Zeruzalem.

⁸Beta ati Berotay i walahay ngi buy Hadadezerey. Buy Davit a hil ɓiri gazahay haɗa ar walahay tayna.

⁹Akẽh na, Toˀu, buy ngi Hamat, a cine na, buy Davit a kiɗa soje ngi Hadadezereye le gar.

¹⁰Dar Toˀu a slina mangal naŋ Yoram ng'avu buy Davite, ɓa ara jaŋ haŋ, yo ɓa a gaŋ sise, asi naŋ migi vurum ti Hadadezer, yo waɗ naŋ mitikaŋ ˀay ma na. Asi mike na, Hadadezer i mesene ngi Toˀu zleˀe. Gwatay, Toram muru ti taŋ a haŋ da Davite i ɓiri baraŋ, ɓiri tapasl tapasl waɗ ɓiri gaza.

¹¹Gwat tayna, buy Davit a vula taŋ ɓa a ndiram da Bumbulvuŋ, jom ng'avu ɓiri bara ati ɓiri tapasl tapasl naŋ muvulaŋ taŋ zleˀe na ma. I gwatay naŋ mutuɓo taŋ ti vu sukwi naŋ muzumo taŋ gar anihĩ:

¹²Edomoy, Moˀapay, Amoŋhoy, Filistihey ati Amalekey, waɗ zlili ngi vurum naŋ mutuɓo di gar avu Hadadezer, mangal ngi Rehop, buy ngi Soba.

¹³Davit a kiɗ mizli Aramaya durmuk kuruˀ nga dangafaɗa ar sozo mandaŋ. Ti naŋ mamo tir gi vurum ati taŋ na, slimiɗ naŋ a zil haɗa ma.

¹⁴Dar buy Davit a cifi buyoy muwam lihey mbeˀ mbeˀ ar hirwuy Edomo. A cifa taŋ ar hirwuy Edom zlar gar, hã mizli Edomoy a tiram gawla ngi Davitey. Davite muru le ko amaka gar na, Buymisemuŋ ara cifaŋ bugawla.

¹⁵Davit a zum buy ar hirwuy Israyel gar. A ga kiitakasl kasl da mizli naŋhaya gar.

¹⁶Zoˀap, mangal ngi Seruya i madiɗa ngi sojehey. Yosofat, mangal ngi Ahilut, i mijiviɗ ngi buy.

¹⁷Sadok, mangal ngi Ahitup, yo Ahimelek, mangal ngi Abiyatar i masayay. Sereya i mutoho gwat.

¹⁸Benaya, mangal ngi Yoyada miwa mizli Kretey ati Peletey i naŋ. Yo ziri mizilehey ngi Davit i masayay.