Read South Giziga 2SA 9 Bible Online

2SA 9 - South Giziga bible

2SA 9

¹Ngi hin mekelem ada na, Davit a cufuɗ mizli, a ɓi: «Mbur ngi hay Sawul misi ar siifa ada aruŋ kwa mbrike? Anja ɓa i gaŋ mezle asi Zonataŋ.»

²Gawla ngi hay Sawul ada zleˀe, a zilaka Siba. A zilaka ngi hay Davite, joˀ buy a ɓaŋ: «I ka Siba kwa?» Siba a mbiɗaŋ di: «I ya gawla ɗik, buy.»

³Buy a ɓaŋ: «Mbur ngi hay Sawul anta mata kwa? Anja ɓa i gaŋ mezle ngi Bumbulvuŋ.» Siba a mbiɗa da buyo: «Mangal ngi Zonat'ada pal, a ndir le, i misi ble, saraya cuw cuw taŋ i mezlehey ta.»

⁴Buy a ɓaŋ na: «Naŋ amaka?» Siba a mbiɗa da buyo: «N'ada a hay Makir, mangal ngi Amiyel a Lo-Dabar.»

⁵Dar buy Davit a slin ɓa ara supoko di a hay Makir, mangal ngi Amiyel a Lo-Dabara.

⁶Mefibaˀal, mangal ngi Zonataŋ, Zonataŋ mangal ngi Sawulo, ti Mefibaˀal mindilo a ciki Davite na, a guɓ midibiɗ durus a mbuŋ naŋ a ruwuy. Davit a cufuɗaŋ: «I ka Mefibaˀal kwa?» Mefibaˀal a mbiɗaŋ di: «I ya gawla ɗik, buy.»

⁷Davit a ɓaŋ: «Ki zluwun ko neˀ ta. I wuɗ ɓa i guw mezleŋ tisi bunuk Zonataŋ. Guva ngi dideˀ ɗik Sawul gar na, yi sa muw taŋ ceke, yo ka ti hirnga ɗike, hin gar na, i sa zumam ɗaf ar sikiɗ purla.»

⁸Mefibaˀal a huruk huruk, a ɓa Davite: «Ya gawla ɗik, maara ngi kiri hana, yi wa, ɓa hã ki ɗuv hiri ng'ar ya naka?»

⁹Ar nah na, buy a ɓi ɓa a ɓaka Siba a sawa. Siba i gawla ngi sawul zleˀe, joˀ buy a ɓaŋ: «Gwat ngi Sawuloy gar, yo ngi mizli ngi hay naŋhay gar na, yi ra vula da mangal ngi buy ɗike.

¹⁰Ka, ziri ɗikey ati gawla ɗikey gar na, kisa huvaka guvahaya da mangal ngi buy ɗike, ɓa a sa ngir ti naŋ. Amma Mefibaˀal, mangal ngi buy ɗike, hin gar na, a sa zum ɗafa a hay ɗu.» Siba, naŋ ti ziri mizilehey kuruˀ nga zlum waɗ gawlahay kukur cuw.

¹¹Siba a ɓa buyo: «Ya gawla ɗike, gwat, ka buy, kumani ɗu miɓiy di le gar na, yi sa gaŋ. Amma Mefibaˀal a zum ar sikiɗ purla ati yakaɓa mangal ngisi ziri buyoy vuna si.»

¹²Mefibaˀala naŋ da ti mangal gawla, a zilaka Mika. Yo mizli misi a hay Sibahay gar na, a gam slra da Mefibaˀal.

¹³Mefibaˀala, naŋ misi ble, saraya cuw taŋ i mezlehey ta tuwa na, a cifi ti haya a Zeruzalem, ɓa hin gar na, zliv ara zum ɗaf a hay buyo.