Read South Giziga 1KI 1 Bible Online

1KI 1 - South Giziga bible

1KI 1

¹Davit buy madiɗa, a gi gal le haɗa wãˀ. Ko da a sirtakaŋ borgo le avu vu tekeɗe kwana, anta gaŋ gippe ta.

²Akẽh na, gawla ngi mamay naŋhay a ɓakaŋ na: «Sey i ram, i supukuw zuŋ diili mungbuˀo kine buy Kumani, ɓa a duw gwat ngi zum, a ki slimiɗ ar ka, a hin a duba ɗike, ɓa a juw gippe far.»

³Dar a bulaka hirwuy Israyele gar ngi sipi zuŋ diili mukuy teˀe so. A ra lumam zuŋ diili ada, angi walahay Sunem. A zilaka Abisak, a soko di da buyo.

⁴Zuŋ diili nah, kuy naŋ a zli ta wãˀ, a ki slimiɗ ar buyo, a daŋ gwat ngi zumo. Amma ko buy a sinaŋ ngi ngwasa ta ɓula.

⁵Hirak ti di nah na, mangal ngi Davit ada, a zilaka Adoniya, yo mumuŋ naŋ i Hagit. A huhumo vu naŋ ti slimiɗ naŋ yarma, a ɓi: «Masa zuma buyo i yaha.» A hil mota ngi vurumoy ati pilisey, waɗ mizli mizilehey kukur zlum, a zluzluɓam a mbuŋ naŋ.

⁶Dambalaka, zle angi gil naŋ vuna si na, ko cine a bucaŋ ɗaˀ ta wãˀ si, ɓa a ɓaŋ ki gi di i gwat mi nah ka na, ko a ɓaŋ ɗaˀ ta. Yo ma na, naŋ vuna, naŋ kuy haɗa teˀe, mumuŋ a yaŋ i mijingaˀ ngi Absalom.

⁷Adoniya a zla a wuɗ gi gidiɓi, joˀ Zoˀap, mangal ngi Seruya, waɗ masay Abiyatar, a jinakaŋ.

⁸Amma ko masay Sadok, Beneya, mangal ngi Yoyada, mijiviɗ Nataŋ ati Simey, yo Rey ati soje mihĩˀĩ ngi buy Daviteye, t'anta asi Adoniya ta.

⁹Ngi pas numuŋ ada na, Adoniya a gi mikuli ti tumuŋhoy, slahay, waɗ ziri sla muzlumburahay gweˀ avu‹ɗugur maslir ŋkekŋkek›, a ciki yam miviɗiviɗi a En-Rogel. Sukum naŋ, ziri buyoy ati mizli ngi hirwuy Zudahay gar, gawla ngi buyoy na, a zila taŋ ng'araŋ.

¹⁰Amma mijiviɗ Nataŋ, Beneya ati sojehey mihĩˀĩ ngi jigina buyo, waɗ Salomoŋ, sukum naŋ na, ko a zila taŋ ta ɓula.

¹¹Akẽh na, Nataŋ a so luuma Bat-Seba, mumuŋ ngi Salomoŋ, a ɓaŋ: «Adoniya, mangal ngi Hagit, magi kaɓa i buy, amma kumani Davit a si na neˀ le ta na, ki si na le ya?

¹²Y'ani i vuluw kuti, da ki sipa le na, naɓa ka vuna kisa laha hirnga ɗik ati ngi mangal ɗik Salomoŋ ma gar.

¹³Aru, ci ng'avu buy Davite, ɓa ki ɓaŋ: ‹Buy, kumani ɗu, miɓi ti hudum da ya ngwas migi slra ɗik na i ka ta kwa? Ki ɓiy zleˀe na, a dirba ɗike, masa zum buy, yo masa cifi ar janga ɗik ngi buyo, i mangal ɗu Salomoŋ kini takwa? Na, mitiri buy i Adoniya na mbri mbri maka?›»

¹⁴«Amma, hirak ti kum mira ɓam ati buyo na, ya vuna kwana, yi sa ci aya, i sa ɓa buyo, mingiɓi ɗik ka maɓa na, naŋ kaslsla gisiŋ.»

¹⁵Akẽh na, Bat-Seba, aru ng'avu buyo, a ci ng'ar viŋ, buy misi anga pal naŋ, asi naŋ migi gal haɗa tuwa. Abisak, zuŋ Sunem tuwa, naŋ da ava, ara gaŋ gwat ngi zumo.

¹⁶Bat-Seba a girdiˀ, hã huruk a mbuŋ buyo. Buy a cufuɗaŋ: «Ki wuɗ mike?»

¹⁷Bat-Seba a mbiɗaŋ di: «Kumani, ki ɓiy le zleˀe ti hudum da ya ngwas migi slra ɗike, ti slimiɗ ngi Bumbulvuŋ, Buymisemuŋ ɗike: ‹I mangal ɗu Salomoŋ masa zum buy a dirba ɗike, yo i naŋ masa cifi ar janga ɗik ngi buyo ma.›

¹⁸Ani wurenna, i Adoniya micifi buyo ngbaŋ, manja ka buy, kumani vuna, ki si na ɓi nah neˀ le.

¹⁹Asi mike na, Adoniya a kiɗ ginewey le haɗa teˀe, ngi gi mikuli: gusoŋhoy, ziri sla muzlumbrahay guɗur guɗur, waɗ tumuŋhoy haɗa ma. A zila yarmahaya le gar nga a diga, waɗ masay Abiyatar ati Zoˀap, madiɗa ngi sojeheye ma, amma a zila gawla ɗik Salomoŋ ta ɓula.

²⁰Kumani, wurenna, mbur masa cifi ar janga ɗik ngi buy a dirba ɗik i waka na, mizli Israyeley gar ara kutukoko ti yam ar gojogoɗ, ɓa ki biga slimiɗ naŋ njak a wuzla mizli gar.

²¹Da ki ga kanah ta na, kumani ɗu, naɓa ti ka masa so k'anta mata na, ya vuna ati mangal ɗu Salomoŋ, a sa gam ti ndra, ndr'i muzluɓa ɓihey wãˀ.»

²²Hirak ti Bat-Seba mira ɓam ati buy aruŋ na, mijiviɗ Nataŋ a ndilawa, a ci ngi hay buyo ya.

²³Mijiviɗ Nataŋ mindilo tuwa na, mizli a ɓaka ɓi nah da buyo: «Mijiviɗ Nataŋ n'ani» Nataŋ a ci ng'avu buyo, a huruk huruk a mbuŋ naŋ.

²⁴Dar a ɓa buyo: «Miɓi: ‹Adoniya a sa cifi buy a dirba ɗike, yo a sa cifi ar janga ɗik ngi buyo› na, i ka gisiŋ takwa, buy, kumani ɗu!

²⁵Asi mike na, Adoniya aru nga dana nga En-Rogel. A sli ˀay ngi ginewey le haɗa teˀe ngi gi mikuli: gusoŋhoy, ziri sla muzlumbra guɗur guɗur waɗ tumuŋhoy haɗa ma. Yo a zila yarmahaya le gar ng'araŋ, madiɗa ngi sojehey ati masay Abiyatar. Wurenna, a roko zumam, a roko sam a mbuŋ naŋ, a wudam: ‹Buy Adoniya, anja Bumbulvuŋ a vuluw siifa.›

²⁶Amma, a ziliy ya gawla ɗik vuna ta, ko masay Sadok na kwana, a zilaŋ ta. Ko Benaya, mangal ngi Yoyada, malla mangal ɗik Salomoŋ kwana, a zil pal le asi taŋ ta.

²⁷Kumani, ɓi hana migi gar na, i ka mupula jiviɗ nah kwa mbrike? Yo masa cifi ar janga ɗik ngi buyo i mana na, ki ɓiy di da ya gawla ɗike ta si mbrike?»

²⁸Akẽh na, buy Davit a ɓi ɓa a zilakaŋ Bat-Seba. Bat-Seba a ndilawa, a cifi a mbuŋ naŋ.

²⁹Buy tuwa, a hudum, a ɓaŋ: «Hadam ti slimiɗ ngi Bumbulvuŋ misi ti siifa, mucukiy tir gir ɗuwoy gar na,

³⁰gwat ya muɓuw di ti hudum a mbuŋ Bumbulvuŋ, Buymisemuŋ ngi Israyel na, yi wuɗ i ga dana dana muduba. Masa cifi buy a dirba ɗu, yo masa cifi ar janga ɗu, i mangal ɗik Salomoŋ.»

³¹Akẽh na, Bat-Seba a huruk huruk a mbuŋ naŋ, a ɓi: «Buy, kumani ɗu Daviti, anja Bumbulvuŋ a vuluw siifa ndrehhe.»

³²A dirba nah na, Davit a ɓi ɓa a zilakaŋ masay Sadok waɗ mijiviɗ Nataŋ ati Benaya, mangal ngi Yoyada. Taŋ mindiloko a mbuŋ naŋ na,

³³a ɓa taŋ: «Kusoko gawla ɗuwoyo gar, ɓa ki zuɓaka mangal ɗu Salomoŋ a duba zungu-pilis nga ya buy na, ɓa ki ram di nga mi yam miviɗiviɗi a Gihoŋ.

³⁴Adiga na, masay Sadok ati mijiviɗ Nataŋ, a sa pakaŋ mal ngi vula slra, ɓa a cakaŋ buy ngi sukwi Israyel. Joˀ kisa fam tulum, ki wudam: ‹Buy Salomoŋ, anja Bumbulvuŋ a juw hutuŋ subur.›

³⁵A dirba nah na, kisa moko ɓaˀ aseˀe ng'ar walahay a muŋ, ɓa Salomoŋ a sa cifi ar janga ɗu ngi buyo. Asi mike na, yi wini di i naŋ masa cifi buy ngi sukwi Israyel ati sukwi ngi Zuda ar li ɗu.»

³⁶Benaya mangal ngi Yoyada a mbiɗa da buyo: «Kumani, ki ɓa le kuy. Muɓo ti balam ɗik, ka kumani na, i Bumbulvuŋ Buymisemuŋ ɗik vuna si.

³⁷Anja Bumbulvuŋ a gi ti Salomoŋ, kaɓa naŋ migi ti ka zleˀe na ya, yo anja a tiri ti zumabuy ngi Salomoŋ madiɗa fineˀ ngi ɗik ka kumani ɗu Davite.»

³⁸Akẽh na, masay Sadok, mijiviɗ Nataŋ ati Benaya, mangal ngi Yoyada, Kretey waɗ Pelet soje mijigina buyo, a ram ng'avu buy Davite. A zuɓaka Salomoŋ, mangal ngi buy Davite ar zungu-pilis tuwa, dar a ram di nga Gihoŋ.

³⁹masay Sadok a zuɓo durum ngir guɗuk ngi Bumbulvuŋ, mbaf ti mal ngi vula slra, a pa a hirnga Salomoŋ, ngi caŋ ar buyo. Akẽh na, a faka tulumo, joˀ mizli misi akẽhey gar na, a wudam: «Buy Salomoŋ, anja Buymisemuŋ a juw hutuŋ subur.»

⁴⁰A dirba nah, mizli gar a moko ng'ar walahaya, hiɗim hiɗim a dirba Salomoŋ, a fam bozloro, a zluzluɓam, a wudam hã hirwuy a jijik ngbir ngbir.

⁴¹Adoniya ati gawla naŋhaya, taŋ mikiɗaka mi ngi zuma gwata si na, a cinam widi ngirzliŋŋe. Zoˀap micina tulum na, a ɓi: «ˀAy muwuwwo ar walahay na, i mi migi ka?»

⁴²Naŋ mira ɓi ti ɓi aruŋ si na, Yonataŋ, mangal ngi masay Abiyatar a ndilawa. Adoniya a ɓaŋ: «Yawwa! Sawa, ki mbur mupuɗaw, ko mbrike na, k'ada ti mingiɓi mezle ngi ɓa ndra di.»

⁴³Yonataŋ a mbiɗa da Adoniya: «Ama jak maka! Buy ndra, kumani Davite, a ca Salomoŋ le ar buy!

⁴⁴Masay Sadok, yo mijiviɗ Nataŋ ati Benaya, mangal ngi Yoyada, waɗ Kretey ati Pleteye, buy Davit a slina taŋ le ɓa a ki sakaŋ, yo a zuɓakaŋ le ar zungu-pilis ngi buyo.

⁴⁵Masay Sadok ati mijiviɗ Nataŋ a pakaŋ mal ngi caŋ buyo a Gihoŋ. A dirba nah, a moko ti diga bal ti mumul. Walahay gar ara zluzluɓ. Kum micinam na, i ˀay ngi mumul nah vuna so.

⁴⁶Yo ma na, Salomoŋ a cifi le ar janga ngi buyo si.

⁴⁷Waɗ ma na, buy ndra kumani Davite, gawla naŋhay a soko, a jakaŋ haŋ le si. A ɓakaŋ na: ‹Anja Buymisemuŋ ɗike, a ga ɓa slimiɗ ngi Salomoŋ a zil fineˀ ngi ɗike. Yo anja a tiri ti zumabuy naŋ i zumabuy madiɗa fineˀ ngi ɗike ma.› Akẽh na, buy Davit a huruk huruk ar arngawo naŋ,

⁴⁸dar a ɓi na: ‹Sise da Bumbulvuŋ Buymisemuŋ ngi Israyel, asi naŋ muvul mbur dana, ɓa a cifi ar janga ɗu ngi buyo, yo asi ya mapura ti hiri ɗu gu aruŋ na.›»

⁴⁹Ar nah na, mizli Adoniya muzulo taŋ gar na, a jijikam kirkir asi mingiɓi nah, joˀ mbur gar a sumuɗ ng'ar li naŋ ng'ar li naŋ.

⁵⁰Adoniya ara zluwun ti Salomoŋ, vurˀe, a slikiɗ, a ru, ara ja haŋ kaw avu durum [1] ngir li gi mikuli.

⁵¹Mizli a soko, a faka ɓi nah da Salomoŋ, a ɓakaŋ: «Adoniya, naŋ mazluwun ti ka na, a ro haŋ kaw avu durum ngir li gi mikuli, a ɓi na: ‹Anja buy Salomoŋ a hudum hidam le dana, ɓa a kiɗiy ya gawla naŋ na vagay ti maslalam ta.›»

⁵²Salomoŋ a mbiɗa taŋ di: «Da naŋ da teŋteŋ na, ko ngwic hirnga naŋ purla anta diɗ a ruwuyo ta. Amma, da a gi gwat malambaˀ le, ko neˀkini kwana, sey a muc cummo.»

⁵³Dar buy Salomoŋ a slin mizli, ɓa ara pam di sar tir li gi mikuli nga ruwuy. Adoniya a so huruk huruk ti miliwis a mbuŋ buy Salomoŋ. Akẽh na, Salomoŋ a ɓaŋ: «Mi ngi hay ɗiki!»