Read South Giziga 1KI 10 Bible Online

1KI 10 - South Giziga bible

1KI 10

¹Maˀay ngi ruwuy Saba, a cine slimiɗ ngi Salomoŋ mazil mbele Bumbulvuŋ na le. Vurˀe, a so ɓa a ci a kwacay naŋ ti cufuɗ mutuwaˀ tuwaˀhay, ɓa a si na zliv naŋ ti sin gisiŋ kwana.

²Maˀay tuwa, a ndilawa a Zeruzaleme ti mizli haɗa aseˀeŋ. Zlogomohoy a jijiroko urdi ati ɓiri tapasl tapasl haɗa teˀe waɗ ɗugur mupuɗaw puɗaway. Naŋ mindilo a hay Salomoŋ na, a cufuɗaŋ ar ɓi, naŋ mujuwo di a kwacay naŋ tuwa gar.

³Salomoŋ a mbiɗaŋ ɓi ngi cufuɗ naŋhay na le gar. Ɓa cufuɗ misi Salomoŋ a mbiɗaŋ di kuy kuy gu ta na, anta ko pal ta.

⁴Mingiɓi ngi sinmijileŋ ngi Salomoŋ na, maˀãy ngi ruwuy Saba a cine taŋ le gar. Hay ngi Salomoŋ mindira na, a pura keɗ keɗ,

⁵ɗaf naŋ ngi zum maɗuvakaŋ di ar li zum, hay ngi gawla naŋhay, mizli naŋhay, naŋ micifa taŋ ar slra taŋhay, zana ngi ki ngi gawla naŋhay ati ngi mizli mavulakaŋ gwat ngi zum ati gwat ngi siheye, waɗ mikuli mizlam zlam wãˀ, Salomoŋ maga ar hay ngi Bumbulvuŋ na, a pura taŋ ma. Naŋ mupura gwat hanayna gar kahana na, hã a gaŋ ngirkik.

⁶Akẽh na, a ɓa buyo: «Ya micina, taŋ maɓaka ɓi ngi mingiɓi ɗik ati ɓi ngi sin ɗik mijileŋ ar hirwuy ɗu na, naŋ kaslsla gisiŋ.

⁷Dumbuŋ ti ya muso ta, yo ya mupura ti hiri ɗu t'aruŋ na, y'anta tiɓa ɓi nah zleˀe ta. Dambalaka, taŋ miɓikiy di na, ko a ndila reta naŋ vuna ta ma! Zlili ɗik ati sin ɗik mijileŋ gar na, a funa misi ya micina, taŋ maɓaka ti mi vuna le ma.

⁸Ngwas ɗikey ati mizli ngi hay ɗikeye, kayya, hana i jiŋ madiɗa avu taŋ. Taŋ misi ndrehhe a mbuŋ ɗik na, ara cinaka mingiɓi ɗik mavul sinmijileŋ haɗa na.

⁹Bumbulvuŋ, Buymisemuŋ ɗik, muwunuw ɓa ki zum buy ar Israyeley na, sey i gakaŋ sise. Bumbulvuŋ mucufuw ki buy, ɓa ki zum buy ti jiviɗ mikaslsla, jeŋŋe na, asi ara wuɗ Israyeleye, hã ti vunaka gar.»

¹⁰A dirba nah na, maˀãy ngi ruwuy Saba a vul gwatay da Salomoŋ. I ɓiri tapasl tapasl, gwat ngi ton makir ti reta, urdi haɗa teˀe, waɗ ɗugur mupuɗaw puɗaway. Zle ti hin nah na, urdi ma soko di da Salomoŋ, mihaɗa kaɓa ngi maˀãy ngi ruwuy Saba muvulaŋ di na, a puram ɗaˀ a ruwuy Israyele mata wãˀ.

¹¹Palalam madiɗa ngi yamay ngi buy Hiram miram nga Ofir na, a sa jijiroko ɓiri tapasl tapasl le ati dum ngi saŋtal haɗa waɗ ɗugur mupuɗaw puɗaway haɗa ma.

¹²Dum ngi saŋtal tayna tuwa na, buy Salomoŋ a gi taŋ ɓamtal angi hay ngi Bumbulvuŋ waɗ ngi hay nga naŋ buyo. Yo a ɗiyi taŋ garayahay ati gujuvuroy da mizli mazlam dimisey. Angi hirwuy Israyele, mizli a puram dum ngi saŋtal haɗakanah ɗaˀ mata, hã dana.

¹³Buy Salomoŋ kwana, gwat, maˀãy ngi ruwuy Saba mihĩya le ati naŋ mucufuɗ le ava gar na, a vulaŋ di, jom ng'avi gwat naŋ buyo muvulaŋ di ti wuluk naŋ na ma. A dirba nah, maˀãy ngi ruwuy Saba ati mizli ngi seˀeheye, a mam nga hirwuy taŋ a muŋ.

¹⁴Angi vi purla na, Salomoŋ a pura ɓiri tapasl tapasl misakaŋ di, jom gar na, ton kukur cuw,

¹⁵manja a slufaka maso ti vu mulakay, tivi migi tererehey, tivu buyoy gar misi kini tisi pas ngi pastaˀ, waɗ maso ti vu buy miwi li ngisi ruwuy naŋhaya.

¹⁶Buy Salomoŋ a ɓa mizli, a vuɗakaŋ mbaray madiɗa madiɗahay skat skat cuw ti ɓiri tapasl tapasl. Mbaray gar na, a zuɓ ɓiri tapasl tapasl kilo merkeɗe.

¹⁷Yo a vuɗakaŋ mbaray meciɗekey skat skat makir ti ɓiri misi purla, mbaray gar na, a zuɓ ɓiri tapasl tapasl kilo pal ti reta. A ɓa mizli, a paka mbaray tayna ar hay mazilaka ‹Ɓuh ngi Libaŋ.›

¹⁸Yo ma na, buy a ɓa mizli, a ɗiyakaŋ janga ngi buy, ti sliŋ ngi begene, janga madiɗaŋ, waɗ a puyakaŋ ɓiri tapasl tapasl pal naŋ, kor kor sirit.

¹⁹Janga ngi buy nah na, naŋ ti li jiɗ ava giɗak giɗak merkeɗe, yo hirnga naŋ ti dirba, naŋ ligidaˀa, li haŋhay ava tika tika, mobor miciɗa ti ciɗey cuw, deŋ tir vay gula waɗ deŋ tir vay hazum ngi janga ngi buyo

²⁰waɗ mobor mekelemey kuruˀ nga cuw ar li jiɗey tuwa, merkeɗ ti ka, merkeɗ ti ka. A gam gwat kanah ar zumabuy mekeleme ɗaˀ ta.

²¹Sikiɗ ngisi gwat ngi buy Salomoŋhoyo gar na, i miga taŋ ti ɓiri tapasl tapasl, yo gwatay misi ar hay mazilaka ‹Ɓuh ngi Libaŋ› na kwana, i miga taŋ ti ɓiri tapasl tapasl mileɗeɗe. Ko a gam gwat neˀ le ti ɓiri bara ta, asi ti hin ngi Salomoŋ na, ɓiri bara, anta puraka i gwat mupuɗaw ta.

²²Asi buyo naŋ da ti palalam ngi ruwuy Tarsisey mazuɓam mulak kileŋ angi mubuliye, jom ati ngi buy Hiramaya. Vi makir migi le gar na, palalamay a moko ti gwatay mbaf mbaf ar taŋ: ɓiri tapasl tapasl ati ɓiri bara, sliŋ ngi begenehey, virihey waɗ ɗiyuw teekuhoy.

²³Buy Salomoŋ, a tiri naŋ ti zlili ati sinmijileŋ haɗi, fineˀ buy mekelem ngisi ruwuyoyo gar.

²⁴Hirwuy gar ara so ng'avi Salomoŋ, ɓa ngi cine mingiɓi ngi sinmijileŋ, Bumbulvuŋ muvulaŋ di a mevele naŋ na.

²⁵Vur vi gar na, mizli ara sakaŋ ti gwat ngi vul taŋhaya: i gwat ngi ɓiri barahay ati gwat ngi ɓiri tapasl tapasl, zanahay, gwat ngi vurumoy, urdihey, pilisey waɗ zungu-pilisey.

²⁶Salomoŋ a cikila mota ngi vurumoy ati piliseye cikal cikal. Naŋ ti mota ngi vurumoyo durmuk ti skat skat mufaɗa, waɗ piliseye durmuk kuruˀ nga cuw. A pa mekelemeye ar li naŋ mawi taŋ vu ar walahay madiɗahay, waɗ numuŋhoyo a ciki naŋ a Zeruzalem.

²⁷Buy Salomoŋ a ga hã a Zeruzaleme, ɓiri bara a gi haɗa kaɓa ɗugur, yo dum ngi mitere kwana, a gi haɗa kaɓa bazlawar angi hirwuy ngi ciki mubuliy Meditarane.

²⁸Pilis ngi Salomoŋhoyo a sakaŋ taŋ ti Ezipte waɗ ti Silisi. I migi terere ngi buyoy mara hiɗikoko taŋ a Silisi a diga da buyo.

²⁹Mota ngi vurum purla musoko di le ti Ezipte gar na, cikili naŋ suloy bara skat merkeɗe, yo pilis purla gar na, suloy skat ti kukur zlum. Migi terere tayna, maram taŋ da buy ngi Hitihey ati buy Siriheye i taŋ vuna ma. A hiɗikoko taŋ ti slimiɗ taŋ.