Read South Giziga 1KI 11 Bible Online

1KI 11 - South Giziga bible

1KI 11

¹Buy Salomoŋ, mbak naŋ muzuɓa zuŋ ngi buy Ezipte tuwa le ma na, a zuɓ ngwas mulak mekelemey le haɗa ma. A zuɓ ziri Moˀapay, ziri Amoŋhoy, Edomoy ati ziri Sidonihey waɗ ziri Hitihey.

²Sukwi manja sipi Bumbulvuŋ tayna vuna, Bumbulvuŋ a ɓa Israyeleye le vur ɓi taŋ ngbaŋ, a ɓa taŋ na: «Ki jumom ati taŋ ta, yo taŋ kwana a jumom ati kumo ta ya, asi mike na, a sa sirkukum ngi huruk huruk a mbuŋ kuli taŋhay.» Na ma na, Salomoŋ a gumbuˀ nga naŋ ng'avu ngwas mulak ngir sukwi tayna jak ma, asi may wuɗa ngwas naŋ.

³A zuɓ ngwas skat skat tarnaˀ ngisi sukwi ngi buyoy, waɗ ngwas ngisi sukwi mizlewey skat skat makir. Ngwas tayna a mbiɗakaŋ avu jiviɗ naŋ ngi sipi.

⁴Naŋ kine, ti Salomoŋ migi gal na, ngwas naŋhay a sirkakaŋ, a huruk huruk a mbuŋ kulihey, mbak Salomoŋ, mevele anta kaslsla avu Bumbulvuŋ, Buymisemuŋ naŋ mata, nga naŋ pal avu ngi cine naŋ Davit zleˀe.

⁵Salomoŋ a huruk huruk avu Astarte, kuli mongoso ngi Sidoŋhoy, waɗ avu Milkoŋ, kuli mukuyta wãˀ ngi Amuŋhoy.

⁶Salomoŋ a gi gwat malambaˀ le avu Bumbulvuŋ, naŋ anta sipa Bumbulvuŋ ti mevel purla wãˀ kaɓa cine naŋ Davit zleˀe ta.

⁷Vurˀe, ti nah na, ar muwã misi hiri dac ar Zeruzalem na, Salomoŋ a ɗiyi li miɗingir ngi gi mikuli a diga da Kemos, kuli mukuyta wãˀ ngi Moˀapay, waɗ da Milkom, kuli mukuyta wãˀ ngi Amoŋhoy.

⁸Ngwas naŋhay mulak mulak gar na, a ɗiya taŋ li gi mikuli da kuli taŋhaya tiɗeˀe, dar ngwasay tuwa, a wuram urdihey, yo a gam mikulihey da kuli taŋhaya.

⁹Salomoŋ, Bumbulvuŋ, Buymisemuŋ ngi Israyele, a bigaŋ vu le sar cuw, amma Bumbulvuŋ a ji mevel angaŋ, asi naŋ masipa jiviɗ naŋ mata na.

¹⁰Bumbulvuŋ a ɓaŋ le ɗaˀ ɗaˀ le ngbaŋ, ɓa a huruk huruk avu kuliheye ta, amma Salomoŋ, ɓi Bumbulvuŋ muɗuvaŋ di gar na, ko a ja a hirnga ta.

¹¹Bumbulvuŋ a ɓa Salomoŋ: «Ani ki sipa jiviɗ ɗu ta, yo jumoˀay ɗu ati ka, waɗ ɓimuɗuva ɗuwoy, ya muɗuvuw taŋ na kwana, ki ja taŋ a hirnga ta ma. Vurˀe, yi sa tiɓa zumabuy ɗike, yi sa vula da mbur pal a wuzla gawla ɗikey.

¹²Na so na, ti ka misi ada angi siifa aruŋ ɗagay na, tisi cine ɗik Davit na, y'anta sa ga kanah t'aruŋ. Amma yi sa tiɓa tisi haŋ ngi mangal ɗiki.

¹³Na zle, y'anta i sa tiɓa buy vuna gar tisi haŋ naŋ ta, amma tisi gawla ɗu Davit, yo tisi Zeruzalem, walahay ya muwunaˀ na, yi sa pulaŋ muy purla.»

¹⁴Ar nah na, Bumbulvuŋ a ga ɓa mbur a gi mesene ti Salomoŋ, i Hadat, mbur Edom, angi tizer ngi buy Edom.

¹⁵Zleˀe ada na, Davit a kiɗam vu ati Edomoy angi vurum. Zoˀap, madiɗa ngi soje ngi Davitey aru nga dika vagay ngi soje Israyeleye gar a Edomo, waɗ a kiɗa ziri mizile ngi Edomoyo gar.

¹⁶Zoˀap ati soje naŋhay a cifam, hã kiya merkeɗ a Edomo, ɓa a ngizlaka ziri mizile ngi Edomoyo cek.

¹⁷Ti di nah na, naɓa Hadat i zuŋ aruŋ, a lum jiviɗ, a kilam ati gawla ngi cinehey zleˀe, ara ɗumom a Ezipte.

¹⁸A slikiɗam baɗ angi hirwuy Madiyana, a tuwuɗaka wuzlaɓuh mikirɗak kirɗak ngi Parana, a ram ti mizli ngi Paran mekelemey asi taŋ, a ndilam a Ezipte, avu buy madiɗa ngi Ezipte. Buy Ezipte a vula hay da Hadata, a vulaŋ li, waɗ gwat ngi zumo ma gar.

¹⁹Hadata, naŋ kuy haɗa a mihiri ngi buy Ezipte, vurˀe, a zuɓaŋ ngi ngwasa i hazeˀe naŋ, sukum ngi maˀãy Tapenes.

²⁰Sukum ngi Tapenes a ya mangal mizile da Hadata, a zilaka Genubat. Maˀay Tapeses a gila mangal tuwa, a wuzlaray buy madiɗa ngi Ezipte. Genubat a ndir a hay buy madiɗa ngi Ezipte a wuzla ziri buyoyo.

²¹Ti Hadat misi a Ezipte, a cine na, Davit a muc le, yo Zoˀap, madiɗa ngi sojehey kwana, a muc le ma. Akẽh na, Hadat a ɓa buy madiɗa ngi Ezipte: «Puliy i mi le ng'asi ruwuy ɗu.»

²²Buy madiɗa ngi Ezipte a cufuɗaŋ: «Ki pur jiviɗ gurjik kine ɓa ki mi le ng'asi ruwuy ɗik na, ka misi avu ya aka na, gwat mukicuw ada kwa mbrike?» Genubat a ɓaŋ: «Ko gwat mikiciy neˀ anta, amma puliy i mi le ng'asi ruwuy ɗu si.»

²³Bumbulvuŋ a ga ɓa mbur mekelem a gi mesene ti Salomoŋ ma, i Rezoŋ, mangal ngi Eliyada. Rezoŋ a kil ti kil zleˀe ta hay buy naŋ Hadadezer, buy ngi Soba.

²⁴Ti di Davit mingizla soje ngi Hadadezerey na, Rezoŋ a kus mizli aseˀe, joˀ naŋ a tiri madiɗa taŋ. Davit mangizla taŋ tuwa na, taŋ a kilam nga Damas, joˀ Rezoŋ a zum buy a Damasa.

²⁵Ti Salomoŋ misi ada angi siifa aruŋ na, Rezoŋ anta zlir ti Israyeleye ta, kaɓa Hadat tuwa ya. Rezoŋ, angi hin naŋ micifi di i buy Siri gar na, a hirsa Israyeleye tuk wãˀ.

²⁶Zeroboˀam i mangal ngi Nebat, i mbur Efrayim a Sereda. Mumuŋ i wudiga, a zilaka Seruwa. Zerobaˀam i gawla ngi Salomoŋ, amma a zla a slikiɗ ɓi ti buyo.

²⁷Zeroboˀam mislikiɗ ɓi ti buy na, ɓi nah ani: ti di nah, Salomoŋ ara ndir li mazilaka Milo, yo ara disla mifiliw misi avu mohol ngi Walahay ngi Davite.

²⁸Zeroboˀam, mangal gawla nah na, naŋ wirwir, a ga slra gu. Salomoŋ a pura le ar li gi slra, vurˀe, a wunaŋ, ɓa i naŋ mapura slra mitakˀay le, sukwi muboko ti vu Zozef magaka na gar.

²⁹Ngi pas numuŋ ada na, Zeroboˀam a bi tir walahay Zeruzaleme na, mijiviɗ Ahiya ngi Silo a ji di hirnga a jiviɗi. Ahiya a sirta vu le sirit ti godo nawaya, t'ada cuw taŋ a duba gala.

³⁰Akẽh na, Ahiya a zuɓa godo nawaya misirit avu vu naŋ tuwa, waɗ a ngira cããt cããt wuzla kuru nga cuw.

³¹A dirba nah na, Ahiya tuwa, a ɓa Zeroboˀama: «Hil kuruˀ a wuzla kecekece hanayna, asi Bumbulvuŋ, Buymisemuŋ ngi Israyele, a ɓi na: ‹Y'ani, i sa tiɓa buyo tisi haŋ ngi Salomoŋ, yi sa vuluw sukwi kuruˀo da ka.

³²Amma sukwi purla masa ndiraŋ na, tisi gawla ɗu Daviti, waɗ tisi Zeruzalem, walahay ya muwunaŋ a wuzla hirwuy Israyel gar.

³³Ya masa ga kanah na, asi a pulikiy le, a hurukom huruk huruk a mbuŋ Astarte, kuli mongoso ngi Sidoŋhoy. A hurukom huruk huruk a mbuŋ Kemos, kuli ngi Moˀapay, waɗ a mbuŋ Molok, kuli ngi Amuŋhoy. A sipaka jiviɗ ɗu ya mibiga taŋ di na ta, yo t'anta gam gwat kaslslaka ya mawuɗo ta. Asi mike na, ɓimuɗuva ɗuwoy ati ɓi ngi sirikey ya miɓa taŋ di gar na, ko a jaka taŋ a hirnga kaɓa Davit, cine ngi Salomoŋ na ta.

³⁴Y'anta sa tiɓa buyo gar tisi haŋ ngi Salomoŋ ta, asi yi cifaŋ le i buy angi hin ngi siifa naŋ gar. Ya masa ga kanah ta na, tisi gawla ɗu Davit, ya muwunaŋ na. Ɓimuɗuva ɗuwoy ati ɓimujuwa ɗuwoyo Davit a ja taŋ le a hirnga.

³⁵Ya masa tiɓa buyo na, ti haŋ mangal naŋ, yo ka so na, yi sa vuluw sukwi kuruˀu.

³⁶Jom ti nah kwana, yi sa pul sukwi purla da mangal naŋ, ɓa gawla ɗu Davite naŋ da ti tizer naŋ ndrehhe mazum buy a Zeruzalem, walahay ya muwuna, ɓa i biga vu ɗu a wuzla kumo.

³⁷Ngi ɗike na Zeroboˀam, yi sa cuw buyo kisa zum buyo ko a maka gar kaɓa mevel ɗik muwuɗ le, yo kisa cifi buy ngi sukwi Israyel mukuruˀhoy na gar.

³⁸Ɓi ya maɗuvuw di gar na, da ki ra cinaŋ, da ki ra sipa jiviɗ ɗu, da ki ra gi gwat kaslsla avu ya, ɓimuɗuva ɗuwoy ati ɓimujuwa ɗuwoyo da ki ra ja taŋ a hirnga kaɓa gawla ɗu Davit zleˀe na, naɓa yi sa ndir ati ka, yi sa ga ɓa gidaŋ ngi zumabuy a ndir caˀa a hay ɗike, kaɓa ya miga da Davit na ya, yo yi sa vuluw sukwi ngi Israyel mukuruˀo.

³⁹Ya masa ma dideˀ ngi Davitey nga ruwuy na kahana, amma y'anta mataŋ nga ruwuyo ngi wãˀ ta ɓula.›»

⁴⁰Akẽh na, Salomoŋ a pur jiviɗ ngi kiɗa Zeroboˀama vagay. Amma Zeroboˀam a slikiɗ, a kil nga ɗum a Ezipte, avu Sisak, buy ngi ruwuy Ezipte. Zeroboˀam a cifi a diga hã Salomoŋ a mucu.

⁴¹Is ngi ɓi ngi slra ngi Salomoŋ, gwat naŋ miga taŋ ati sin naŋ mijileŋ gar na, a tohoko taŋ le angi ɗerewol ngi ɓi ngi Salomoŋ.

⁴²Salomoŋ muzum buy a Zeruzalem ar Israyeley gar na, a gi le vi kukur mufaɗa.

⁴³A dirba nah, Salomoŋ a mucu, a dikaka ar walahay ngi cine naŋ Davit. Joˀ mangal naŋ Roboˀam a zuɓa li naŋ.