Read South Giziga 1KI 12 Bible Online

1KI 12 - South Giziga bible

1KI 12

¹Roboˀam aru nga Sikem, asi Israyel gar miram ɓa ngi caŋ buy na a diga.

²Ti di nah, Zeroboˀam, mangal ngi Nebat a ro a Ezipte aruŋ, asi a kil le zleˀe nga ɗum a diga kileŋ avu Salomoŋ. Naŋ micina maɓaka ɓi ngi kus ngi Sikem tuwa na, a ndir a Ezipte.

³Akẽh na, a slinam mizli ɓa ara ziloko Zeroboˀama, dar a mawa. Ar nah so na, Zeroboˀam ati jum ngi Israyeley jom gar taŋ, a ɓaka Roboˀam na:

⁴«Bunuko zleˀe na, a guzuvura ndra le wãˀ kaɓa bekehey. Ani ka, wurenna so na, jijir migindiɗ asi ˀay ndra kaɓa galalaŋ na, da ki ga ndra di le kefek na, naɓa i sa gukuw gwat ka mawuɗo.»

⁵Roboˀam a mbiɗa taŋ di: «A ram, mbak i wuluk kwaɗay, gam hin makir, ɓa kisa moko lumikiy.» Joˀ mizli a cohom.

⁶Akẽh na, buy Roboˀama, ara ngil wuy avu mizli micawwahay magam slra ngi cine naŋ Salomoŋ zleˀe ti naŋ misi ar siifa aruŋ na. A ɓa taŋ: «Vulikiy mi ngi kuti, mizli hanayna mucufuɗikiy na, i sa mbiɗa taŋ di mbrike?»

⁷Mizli micawwahay a ɓakaŋ na: «Wurenna, da ki ra biga ki gawla ngi mizli misenna, da taŋ mucufuɗukuw le gar, ki ra mbiɗa taŋ di ti mi mezle na, naɓa t'ada ndrehhe i gawla ɗikey.»

⁸Amma, Roboˀam a ziriɗa mi ngi kuti ngi mizli micawwahay miɓakaŋ di tuwa, a cufuɗ mi ngi kuti avu ziri gawla mendele naŋhay, muroko angi slra naŋ.

⁹A ɓa taŋ na: «Mizli a cufuɗikiy ani: ‹Jijir migindiɗ ar ˀay ndra kaɓa galalaŋ, bunuk migindiɗa ndra di na, anja ɓa ki ga ndra di kefeke.› Kumo, vulikiy mi ngi kuti takwa. Taŋ mucufuɗikiy na, i sa mbiɗaka taŋ di mbrike?»

¹⁰Zir gawla mendele naŋhay tuwa, a mbiɗakaŋ di ani: «Mizli a ɓukuw, bunuk a gi ti taŋ le kaɓa beke, yo a cufuɗukuw ɓa ki ga taŋ jijir taŋ na kefeke. Amma kisa mbiɗa taŋ di ka hana: ‹Muzuŋ haŋ ɗu meciɗeke, naŋ ɓiɓir fineˀ mitikinjaˀ ngi baha.

¹¹Baha a ɗuvukum jijir mududok dudok le gindiɗ asi ˀaya kaɓa galalaŋ, amma ya, yi sa ɗuvukum jijir mududok gindiɗ asi ˀaya fineˀ nah. Baha a kutukum zleˀe ti laway, amma ya, yi sa kutukum ti laway dal misi ɓiri ameˀe.›»

¹²Angi hin mimakir naŋ na, Zeroboˀam ati mizli Israyele gar a moko lumaka Roboˀama kaɓa naŋ miɓa taŋ zleˀe: «Ki sa moko lumikiy ar hin mimakir naŋ» tuwa.

¹³Buyo a mbiɗa mi da sukwi Israyele ti himaˀ. A ziriɗa mi ngi kuti ngi mizli micawwahay miɓakaŋ di na jaka.

¹⁴Mi ngi kuti ngi mendele naŋhay miɓakaŋ di tuwa na, a ɓi di i nah da mizli Israyele: «Baha a ɗuvukum jijir mudodok le gindiɗ asi ˀaya kaɓa galalaŋ, amma ya, yi sa ɗuvukum jijir mududok gindiɗ asi ˀaya fineˀ nah. Baha a kutukum zleˀe ti laway, amma ya i sa kutukum ti laway dal misi ɓiri a meˀeŋ.»

¹⁵Naŋ kine, buy a tiɓa mi ngi mizli ta. Nah na, i jiviɗ Bumbulvuŋ miɗiya kanah, ɓa mingiɓi naŋ miɓa ɗaˀ le da Zeroboˀam, mangal ngi Nebat na, a gi muduba, mingiɓi naŋ, mubo ti balam mijiviɗ Ahiya ngir walahay Silo tuwa.

¹⁶Israyel gar, micinaka buy a tiɓa mi taŋ ta na, mizli Israyeley a mbiɗakaŋ di: «Na zle lum ndr'i mi avu mizli ngi hay Daviteye ka? Ko gwat mujumo ndra ati mangal ngi Zese hana, anta. Mizli Israyeley, mukum le ngi hay ndrahay. Wurenna, ka so na, dideˀ ngi Daviti, ka gi welele ti zumabuy ɗike.» Dar Israyeley a mam ngi hay taŋhay.

¹⁷Amma Roboˀama, ara zum buy naŋ ar Israyeley micifam ar walahayay misi angi hirwuy Zuda.

¹⁸Akẽh na, buy Roboˀam a slina Adoram, madiɗa ngi migi slrahay mitakˀaya, nga avu Israyeley, amma Israyeley gar a kuypakaŋ ti ɗugur. Buy Roboˀam vuna, a lih lihiriɓ kwic ngi jiɗ ŋgˀar pilis naŋ. A kil nga Zeruzaleme.

¹⁹Vurˀe, hã dana, Israyeley anta wuɗam ɓi ngi zum buy ngi mizli ngi hay Daviteye ta.

²⁰Israyeley gar micinaka, Zeroboˀam a mo le na, a slinam, a ziloko di ng'ar kus taŋ, a cakaŋ i buy ngi Israyeley cek ceke. Sey mindir ar zumabuy ngi mizli ngi hay Daviteye, i sukwi ngi Zuda pal naŋ tewle.

²¹Roboˀam mindil ndil a Zeruzalem na, a kus soje hirnga hirngahay durmuk skat ti kukur dangafaɗ, ar sukwi ngi Zuda ati sukwi ngi Benjameŋ, nga kiɗa vu ati zumabuy ngi Israyele. A wuɗ ɓa zumabuy a mi ng'asi haŋ naŋ, naŋ mangal ngi Salomoŋ.

²²Amma Bumbulvuŋ a ɓa mingiɓi naŋ le da mijiviɗ Semaya. A ɓaŋ na:

²³«Roboˀam, mangal ngi Salomoŋ, buy ngi Zuda, mizli ngi hay Zudahay ati ngi hay Benjameŋhey gar, waɗ is ngi mizli Israyeley gar na, ɓa t'ani:

²⁴Bumbulvuŋ a ɓukum na: ‹Israyeleye, i sukum kumoy, anja ki ram nga kiɗa vu ati taŋ ta, anja mbur gar a mi nga hay naŋ, asi mislikiɗo ɓi misenna i yaha.›» Taŋ micinaka mingiɓi ngi Bumbulvuŋ tuwa na, a cinam mi, a mam nga hay taŋhay.

²⁵Zeroboˀam a ndir walahay Sikem, angi muwã Efrayim, a pi ti hay a diga. A dirba nah, a bi naŋ ara ndir walahay Penuwel ma.

²⁶Ar nah na, Zeroboˀam a zla a ɓi ti kwacay naŋ: «Gwatay mira gam kahana na, zliv zuma buyo a mi nga avu mizli ngi hay Daviteye gu.

²⁷Asi mike na, sukwi ngi mizli misennahay na, a sliram le slar ngi ru nga Zeruzalem a gi mikuli ar hay ngi Bumbulvuŋ na, a sa vulaka mevel taŋ da Roboˀam, buy ngi Zuda, buy taŋ magala na a muŋ. A sa kiɗikiy ya vagay, a sa hinam hirnga a mbuŋ Roboˀama.»

²⁸Zeroboˀama, a dirba naŋ muwuluk kanah na, a vuɗ ziri slahay cuw ti ɓiri tapasl tapasl, dar a ɓa sukwi Israyele: «Ani ki ndiram ar li ru nga Zeruzaleme. Israyeley, Bumbulvuŋ kum anihĩ muduba, naŋ mubo ti kum baɗ ti ruwuy Ezipte tuwa.»

²⁹Zeroboˀama, zuŋ sla ngi ɓiri tapasl tapasl tuwa, pal mekeleme, a ɗuva a Betel, waɗ pal numuŋ kwana, a ɗuva a Daŋ.

³⁰Zeroboˀam mica mizli ɓa a gam mungra na, kana. Sukwi Israyele, a ki saka zuŋ sla ngi ɓiri tapasl tapasl mupurla mekeleme, sesẽŋ a Daŋ.

³¹Zeroboˀam a ɓi ɓa a ndirakaŋ li ngi gi mikulihey ar li miɗingir ɗingirey ngi mikuli, yo a hil masayay a wuzla sukwi Israyele hõ gar si, mizli misi taŋ i dideˀ ngi Levihey ta.

³²Ŋhoyyo na, a gaka muguzlum a Zuda angi hin mukuruˀ nga zlum ngi kiya midangafaɗ naŋ. Zerorboˀam tuwa, a ɗuva hin ngi muguzlumo kanah ya, a jiɗ ng'ar li gi mikuli, a ga mikuliheye ti haŋ naŋ. A Betele, a ga mikuli da ziri sla ngi ɓiri tapasl tapaslay, naŋ muvuɗa taŋ tuwa, waɗ a cufa migi sedeheye ar li miɗingir ɗingirey ngi mikuli, naŋ muɗuva taŋ ngi gi mikulihey tuwa.

³³Hin mukuruˀ nga zlum ngi kiya midangafaɗ naŋ na, i hin ngi Zeroboˀ am, naŋ muɗuva ti wuluk nga naŋ. Tapasa, a jiɗ ng'ar li gi mikuli, naŋ minga a Betel tuwa. A gi muguzlum da sukwi Israyele, a jiɗ ng'ar li gi mikuli, ɓa a wura urdi.