Read South Giziga 1KI 13 Bible Online

1KI 13 - South Giziga bible

1KI 13

¹Mbur ada, i mijiviɗ ngi Bumbulvuŋ, Buymisemuŋ a ɓaŋ ɓa a slikiɗ baɗ a Zuda, aru nga Betel. A ndil a diga hirak ti Zerobaˀam mawura gwat ngi mikulihey ar li ngi gi mikuli.

²Mijiviɗ tuwa, a widi vur li gi mikuli, kaɓa Bumbulvuŋ miɓaŋ di: «Li gi mikuli! Li gi mikuli! Bumbulvuŋ a ɓi na: Pura, a sa yam mangal mizile a wazlaray Davite. A sa cakaŋ slimiɗe Zoziyas. Masayay misi ar li miɗingir ɗingirey ngi mikuli mawuram gwat ngi mikulihey ar ka na, naŋ a sa gi ti taŋ mikuli ar ka. Yo mizli a sa wuram tesl ngi mizli titrahay ar ka.»

³Kalla tapasa vuna si na, mijiviɗ ngi Bumbulvuŋ, a ɓa ɓi ngi gwat masa biga ɓi naŋ miɓa na. A ɓi: «Bumbulvuŋ a ɓi na: ‹Li gi mikuli a sa cir kpah, mal mungul ngi hirnga naŋhay na, a sa pam nga ruwuy.›»

⁴Mijiviɗ ngi Bumbulvuŋ miwidi vur li gi mikuli ngi Betel tuwa, buy Zeroboˀam micina widi nah cin si na, a ska haŋ sik tir li gi mikuli, a ɓi: «Joko di.» Amma haŋ naŋ misika ng'ar mijiviɗ ngi Bumbulvuŋ tuwa na, a muc sok, ko a muslo di ng'ava muŋ gu mata.

⁵Akẽh na, li gi mikuli a cir kpah, mal mungul ngi hirnga naŋhay na, a pam nga ruwuy. A gi le kaɓa mingiɓi ngi Bumbulvuŋ miɓa ɗaˀ le da mijiviɗ naŋ tuwa.

⁶Ar nah na, buy a ɓa mijiviɗ ngi Bumbulvuŋ tuwa: «Ambuh takwa, tumbulo Bumbulvuŋ, Buymisemuŋ ɗik na, ɓa a muca mevele, ɓa a ɗiyiy haŋ ɗu na a muŋ.» Mijiviɗ ngi Bumbulvuŋ, a tumbulo Bumbulvuŋ ɓa a muca mevele, joˀ haŋ ngi buy a ɗiyi nga naŋ nga naŋ a muŋ.

⁷Akẽh na, buy a ɓa mijiviɗ ngi Bumbulvuŋ: «Cukum nga hay ɗu ɓa ki zum gwat ngi vuluw gidaŋ, yo ɓa i sa vuluw gwat ngataraŋ.»

⁸Amma mijiviɗ ngi Bumbulvuŋ a mbiɗa da buyo: «Da ko ki vuliy cah avu hay ɗik na tekeɗe kwana, y'anta ci a hay ɗike ta. Ar li hana, y'anta zum ɗafa ta, yo y'anta si yam ngi ra ta ma.

⁹Asi mike na, Bumbulvuŋ a ɗuviy mingiɓi naŋ ani, a ɓiy na: ‹Ki zum ɗaf ta, ki si yam ta, yo jiviɗ ka muru zleˀe ti raˀa na, K'anta mi ti raˀa mata.»

¹⁰Joˀ a mi tir jiviɗ mekelem, amma jiviɗ naŋ muso ti raˀa zleˀe nga Betel na, aru ti raˀa mata.

¹¹Midigila mijiviɗ ngi Bumbulvuŋ ada a Betel. Gwat, mijiviɗ ngi Bumbulvuŋ miga gar a Betele, yo mingiɓi mijiviɗ miɓa da buy gar tapasa na, ziri naŋhay a soko a slufakaŋ taŋ ceke.

¹²Midigila mijiviɗ tuwa, a ɓa ziri naŋhaya: «Mijiviɗ nah vuna a mi tir jiviɗ wanaka?» Zir naŋhay a cufuɗam mizli, a bigaka taŋ jiviɗ mijiviɗ ngi Bumbulvuŋ muru ti ngaˀa na.

¹³A dirba nah, midigila mijiviɗ tuwa, a ɓa ziri naŋhaya: «Inga Juwikiy zungu!» Ziri a juwakaŋ zungu, a jiɗ ara.

¹⁴A zuɓa jiviɗ, dar a sipa mijiviɗ ngi Bumbulvuŋ tuwa, ara jaŋ is, naɓa a ro joˀ zleˀe asi widis madiɗa ada. Midigila mijiviɗ tuwa, a ɓaŋ na: «Mijiviɗ ngi Bumbulvuŋ muso ti Zuda na, i ka kwa?» Mijiviɗ mekelem a mbiɗaŋ di: «Hã, i yaha.»

¹⁵Akẽh na, a ɓaŋ ma: «Sawa, a kum nga hay ɗu, ɓa ki ra zum ɗafa.»

¹⁶Mijiviɗ ngi Bumbulvuŋ a mbiɗaŋ di: «Kay, y'anta mi asi ka ta. Yo ma na, ar li hana, ndr'anta zumam ɗaf ati ka ta, ko yam kwana, i sam ati ka ta.

¹⁷Asi mike na, Bumbulvuŋ a ɓiy: ‹Ki zum ɗaf ar li hana ta, ko yam ngi si ngir li hana, ki si ta, yo jiviɗ ka muru ti raˀa zleˀe nga diga na, ki mi ti raˀa mata.»

¹⁸Midigila mijiviɗe, a mbiɗaŋ di: «Ya, yi mijiviɗ kaɓa ka vuna ya, amma modro ngi Bumbulvuŋ, Buymisemuŋ a ɓiy le, a ɗuviy ɓi naŋ ani: ‹So di ngi hay ɗike, ɓa a zum ɗaf waɗ ɓa a si yam.›» Dambalaka na, a gaŋ i slir ti gi.

¹⁹Mijiviɗ ngi Bumbulvuŋ a mam ati mbur tuwa nga Betel a muŋ, a zum ɗaf waɗ a si yam a hay naŋ.

²⁰Akẽh na, ti taŋ mujojoˀ cuw taŋ ar li zum tuwa na, Bumbulvuŋ a ɓa midigila mijiviɗ mumo di tuwa.

²¹Midigila mijiviɗe, a zla zila mijiviɗ ngi Bumbulvuŋ muso baɗ ti Zuda tuwa, a ɓaŋ: «Bumbulvuŋ a ɓi na: Ki cine mi da Bumbulvuŋ ta, yo mingiɓi Bumbulvuŋ, Buymisemuŋ ɗik muɗuvuw di na, ki ja ɓi nah a hirnga ta.

²²Asi ki mo le, ki zum gwat le, yo ki si gwat le ar li misenna. Dambalaka Bumbulvuŋ a tikuw le vurˀe ngbaŋ, a ɓuw le: ‹Ki zum gwat ar li misenna ta, ko yam ngi si, ki si ta.› Ani wurenna, kisa mucu, anta sa kaka vagay ɗik ar zivi ngi dideˀ ɗikeye ta.»

²³Mijiviɗ ngi Bumbulvuŋ a zum ɗaf, yo a si yama, a dirba nah, midigila mijiviɗ ngi Bumbulvuŋ a juwaŋ zungu.

²⁴Mijiviɗ tuwa, a zuɓa jiviɗe, ara ru le. Akẽh na, mobor a zlir di a jiviɗe, a kiɗa mijiviɗ ngi Bumbulvuŋ tuwa vagay. Vagay naŋ a ndir ɓaˀ a jiviɗe, zungu deŋ murciki ti ka, waɗ moboro deŋ murciki numuŋ ma.

²⁵Vagay ngi mijiviɗ ngi Bumbulvuŋ miɓaˀ a jiviɗ ati mobor mideŋ murciki na, mizli macohomo, taŋ mupuraka taŋ keɗ na, a ram, ara ɓaka ɓi nah ar walahay ngi midigila mijiviɗ ngi Bumbulvuŋ misi anga tuwa.

²⁶Mijiviɗ mumo di nga dirba a muŋ tuwa micina maɓaka ɓi nah na, a ɓi: «Ey! I mijiviɗ ngi Bumbulvuŋ, mbur micin mi ta da Bumbulvuŋ tuwa. Bumbulvuŋ a vulaŋ le da mobor, a jaŋ, a kiɗa le vagay. A gi le kaslsla kaɓa mingiɓi ngi Bumbulvuŋ miɓa tuwa.»

²⁷A dirba nah na, midigila mijiviɗ a ɓa ziri naŋhaya: «Inga juwikiy zungu.» Ziriy a juwakaŋ zungu.

²⁸Joˀ a ru, ara luuma vagay ngi mijiviɗ ngi Bumbulvuŋ ɓaˀ a jiviɗe, amma zungu ati moboro, t'ada dedeŋ murciki. Ko mobor a humbuɗa vagay ngi mijiviɗ vuna ta, yo a ja zungu a humbuɗa ta ma.

²⁹Midigila mijiviɗ a zuɓa vagay ngi mijiviɗ mekelem tuwa lap ng'ar zungu naŋ, waɗ a mo di. A mo di ng'ar walahaya, ɓa a tuwaka vagay naŋ, yo ɓa a dikakaŋ.

³⁰A raka ar zivi nga naŋ, dar mizli a tuwaka vagay naŋ: «Aw gawlay, sukum ɗu a muc le!»

³¹Midigila mijiviɗe, a dirba naŋ midika mijiviɗ mekelem tuwa na, a ɓa ziri naŋhaya: «Da ya misa muc le na, kisa dikikiy ar zivi midika mijiviɗ misenna anga na ya. Ki sa kaka vagay ɗu a ciki vagay naŋ.

³²Asi mike na, Bumbulvuŋ a ɓaŋ, ɓa a widi vur li gi mikuli misi a Betel, yo vur hayay misi ar li miɗingir ɗingirey ngi gi mikuli magam mikulihey ar taŋ ar walahay Samari, a widi le. Gwat naŋ miwidi vurˀe na, a sa gi muduba.»

³³Gar ti nah kwana, Zeroboˀama, gi gwat naŋ malambaˀ na, ko a pula ta na si. Naŋ kine, a hil ngi gi mikulihey ar li miɗingir ɗingirey ngi gi mikuli, i mizli hõ gar a wuzla sukwi ngi Israyeleye si. Mbur muwuɗ slra ngi gi mikuli le na, a cakaŋ ar slra, ɓa a tiri masay ar li miɗingir ɗingirey ngi gi mikulie si.

³⁴Ɓi hana a gi hã hay ngi Zeroboˀam gar a ci ar mungra. Vurˀe, hay ngi Zeroboˀam a ngizl kuɗup, yo a susuyum leɗeɗ wãˀ asi ruwuyo.