Read South Giziga 1KI 14 Bible Online

1KI 14 - South Giziga bible

1KI 14

¹Kasl ti di nah na, Abiya, mangal ngi Zeroboˀam a ki jiji.

²Akẽh na, Zeroboˀam a ɓa ngwas naŋ: «Slikiɗ, mbiɗa zanahaya, ɓa mizli a sinukuw ki ngwas nga ya Zeroboˀam ta, ɓa ki ru nga Silo. Mijiviɗ ngi Bumbulvuŋ mazilaka Ahiya naŋ a diga. I naŋ miɓiy i sa zum buy ar sukwi srayele.

³Hil ɗafahay kuruˀ a haŋ, gato waɗ malalaw ngi mam, ɓa ki ra lamaŋ. Naŋ a sa ɓuw ɓi ngi gwat masa gi avu mangala.»

⁴Ngwas ngi Zeroboˀam a ga le kanah, a slikiɗ, aru nga Silo, ara ndil a hay Ahiya. Naɓa Ahiya anta pur mata, hiri ngirimme, asi a gi gal le haɗa.

⁵Amma, Bumbulvuŋ a ɓa Ahiya le zleˀe dumbuŋ si: «Ngwas ngi Zeroboˀama n'ani ra sawa a jiviɗi, ɓa a sa cufuɗ ɓi avu ka vur mangal naŋ misi jiji. Naŋ mindilo le na, a sa ga vu naŋ kaɓa i naŋ ngwas ngi Zeroboˀam ta, amma ka, kisa mbiɗaŋ di ani ti jiviɗ kahana kahana.»

⁶Ngwas tuwa, a ndilawa avu miviŋ, amma Ahiya micina sar naŋ curok curok si na, a ɓaŋ: «Ka ngwas ngi Zeroboˀam, cawa, ki gi kaɓa ki ngwas mekelem pal vur mike? A slinikiy le ng'avu ka, ɓa i ɓuw ɓi ngi labara mukuyta wãˀ.

⁷Mi, ara ɓa Zeroboˀama na: Bumbulvuŋ, Buymisemuŋ ngi Israyel a ɓuw ani: ‹Ka mbur ngatara zleˀe lambaˀ, amma yi muɗuw le ceɗ a wuzla mizli, joˀ yi cifi ti ka buy ngi sukwi Israyel, mizli ɗuwoy.

⁸Yi tiɓa buyo le avu mizli ngi hay Daviteye, i vuluw di le da ka. Amma ka, ki ga gwataya kaɓa Davit ta. Gawla ɗu Davite, mingiɓimuɗuvahay gar na, a ja taŋ le a hirnga, a sipiy le ti mevel purla, yo a gi di i gwat mikaslsla a mihiri ɗu.

⁹Ki gi malambaˀ le fineˀ mizli mudumbuŋhoy ar ka gar. Ki vuɗ gwatay le ar deɗe ngi ya Bumbulvuŋ, yo ki vuɗ kulihey ti ɓiri mipa ti pi ar vu ɓa ngi slikiɗiy mevel, waɗ ya vuna kwana, ki hizigiy le fuk murdirba.

¹⁰Vurˀe, yi sa so ti bonoy avu mizli ngi hay ɗikeye. Mizli mizile ngi hay ɗikey gar, bekehey ati dimuhoy misi asi ruwuy Israyel gar na, yi sa ngizla taŋ. I sa fuca mizli ngi hay ɗikeye fec fec leɗeɗ kaɓa mafucam li.

¹¹Mbur ngi hay ɗik, masa muc ar walahay gar na, i kirihey masa humbuɗakaŋ. Yo mbur ɗik gar masa muc a duba gala na, i ɗiyuw ngi ɓuhoy masa zumakaŋ, asi Bumbulvuŋ a ɓa le.»

¹²Amma kaha, «ngwas ngi Zeroboˀam, slikiɗ, mi ngi hay. Hirak ti ka masa ca sara kulaˀ ng'ar walahaya si na, mangal a sa mucu.

¹³Akẽh na, mizli Israyeley gar a sa tuwaka vagay naŋ, yo a sa dikakaŋ. Vur na, a wuzla mizli ngi hay Zeroboˀamay gar, masa dikam vagay naŋ ti dik na, inga naŋ pal naŋ. Yo ma na, a wuzla mizli ngi hayay gar na, Bumbulvuŋ, Buymisemuŋ ngi Israyele, a lum gwat mezle avu mbur mekelem mata, sey avu naŋ tewle.

¹⁴A dirba nah, Bumbulvuŋ a sa muɗ buy mekelem ceɗ da Israyeleye, ɓa i naŋ masa ngizla mizli ngi hay Zeroboˀamaya. Na zle, i gwat masa gi dana. Wurenna vuna si.

¹⁵A dirba nah, Bumbulvuŋ a sa kiɗa mizli Israyeleye, dar a sa jijikam kaɓa himiɗ mawusa lavaɗ a mimizaw. A sa muɗa taŋ avra tir hirwuy mezle, naŋ muvula da dideˀ taŋhay. Joˀ a sa zliɗa hirnga taŋ mber mber ti duba zaw Efrat. Gwat masa ndilawa avu taŋ i hana, asi taŋ miɗiyam kuli Asera ti dum. Naŋ kine, gwat miga ɓa Bumbulvuŋ a slikiɗ himaˀ na, i nah.

¹⁶Bumbulvuŋ masa pula Israyeley mbak na, asi Zeroboˀam migi mungra, yo asi naŋ miga ɓa Israyeley a gam mungra.»

¹⁷Akẽh na, ngwas ngi Zeroboˀam a slikiɗ, ara ndil a Tirsa. Hirak ti naŋ mawuɗ a tuwuɗa miviŋ ngi hay naŋ si na, mangal a mucu.

¹⁸Mizli a dikakaŋ, joˀ Israyeley gar a tuwaka vagay naŋ. A gi le kaɓa mingiɓi ngi Bumbulvuŋ mubo ti balam, mijiviɗ Ahiya, gawla naŋ tuwa.

¹⁹Mindir is ngi slra ngi Zeroboˀamaya i mutoho taŋ le angi ɗerewol mazilaka «Ɓi ngi buy Israyeley.» Ɗerewol nah na, a sluf ɓi ngi vurumoy naŋ miga taŋ, yo ɓi ngi naŋ muzum buy.

²⁰Zeroboˀam a zik ar zuma buyo vi kukur cuw nga cuw, a mucu. Mangal naŋ Nadap a zuɓa li naŋ.

²¹Roboˀam, mangal ngi Salomoŋ a zum buy ar mizli Zudahay. Ti Roboˀam mitiri buy na, naɓa naŋ ti vi kukur mufaɗ ngaŋ purla. A zum buyo vi kuruˀ nga tarnaˀ a Zeruzaleme, walahay ngi Bumbulvuŋ muwuna a wuzla sukwi Israyel gar, ɓa ngi biga naŋ da a wuzla mizli naŋhaya. A zilaka mumuŋ ngi Roboˀama Naˀama, i zuŋ Amoŋ.

²²Mizli ngir sukwi ngi Zuda a gam gwat micira hiri ta le da Bumbulvuŋ. A slikiɗaka himaˀ ngi Bumbulvuŋ ti mungra taŋ migaka na, hã fineˀ ngi dideˀ taŋhay migaka zleˀe na ma.

²³Taŋ ka dideˀ taŋhay tuwa ya, a ɗiyam li miɗingir ɗingir ngi gi mikulihey, a ngam ɗuguroy ati kuli miɗiya ti dum miciɗa ti ciɗey, ar muwãhay waɗ asi widis tukuzohoy gar.

²⁴Asi ruwuyo ziley ati ngwasay ada sek ngi gi sulome ar slimiɗ ngi kuli taŋhay [4]. Sukwi ngi mizli tayna a gam gwat malambaˀ mukuyta wãˀ. Bumbulvuŋ muɓula taŋ a mbuŋ sukwi Israyel na, ɓa a pulaka taŋ li, na sukwi Israyel tuwa, a sipa gi gwat taŋ malambaˀ nah tuwa ya ma.

²⁵Angi vi muzlum naŋ ngi zumabuy ngi Roboˀam na, Sisak, buy ngi Ezipte a so zla gi vurum ti Zeruzaleme.

²⁶Zlili ngir hay ngi Bumbulvuŋ ati zlili ngi hay buyo a hila taŋ. A hila gwataya slar slar gar si, ko mbaray ngi ɓiri tapasl tapaslay Salomon muvuɗa taŋ na kwana, a hila taŋ le.

²⁷Akẽh na, Roboˀam a vuɗ mbaray ngi ɓiri gazahay ar deɗe taŋ, waɗ a vula taŋ da madiɗa ngi sojehey majiginaka mizlingre ngi buyo.

²⁸Buyo tapas naŋ mira ru ng'ar hay ngi Bumbulvuŋ gar na, sojehey a hilaka mbarayay tuwa, a mam ti taŋ ng'ar viŋ ngi sojeheye.

²⁹Is ngi ɓi ngi slra ngi Roboˀam gar na, i mutoho taŋ le angi ɗerewol mazilaka ‹Ɓi ngi buy Zudahay.›

³⁰Roboˀam ati Zeroboˀama, a gam vurum ar wala taŋ, ko mbak le.

³¹Roboˀama, ti naŋ mumuc na, a dikaka angi zivi ngi dideˀ naŋhay ar Walahay ngi Daviti. Mumuŋ a zilaka Naˀama, i zuŋ Amoŋ. Muzum buy ar li ngi Roboˀama i mangal naŋ Abiyam.