Read South Giziga 1KI 15 Bible Online

1KI 15 - South Giziga bible

1KI 15

¹Zeroboˀam, mangal ngi Nebata, angi vi mukuruˀ nga dangafaɗ ngi zumabuy naŋ ar hirwuy Israyel na, Abiyam a tiri buy ar hirwuy Zuda.

²A zum buy a Zeruzaleme vi makir. Slimiɗ ngi mumuŋ naŋ Maˀaka, i zuŋ ngi Abisalom.

³Abiyama, mungra ngi cine naŋ miga taŋ dumbuŋ angi naŋ na, naŋ kwana, a gi di i mungra misi purla tayna ya. Amma Abiyama, a wuɗa Bumbulvuŋ, Buymisemuŋ naŋ ti mevel purla kaɓa dideˀ naŋ Davite ta.

⁴Abiyama, Bumbulvuŋ, Buymisemuŋ naŋ, a vulaŋ mangal mizile, ɓa a sa zuɓa li naŋ na, vur ɓa hilfa ngi buy a kiɗ ta, yo ɓa Zeruzaleme, n'ada ndir ndrehhe i li hirnga ngi cifi ngi buyoy. Bumbulvuŋ miga hana gar na, tisi Daviti.

⁵Vur Davite, a gi di i gwat mikaslsla a mihiri ngi Bumbulvuŋ, yo ɓi Bumbulvuŋ muɗuvaŋ di angi hin ngi siifa naŋ gar na, ko a ngil purla le ta, sey ɓi ngi Uri, mbur Hiti na tewle.

⁶Roboˀama, angi hin ngi siifa naŋ gar na, ara gam vurum ar walataŋ ati Zeroboˀama.

⁷Is ngi ɓi ngi slra ati slra mekelemey, Abiyam miga taŋ gar na, i mutoho taŋ le ar ɗerewol mazilaka ‹Ɓi ngi buy Zudahay.› Abiyama kwana, a gam vurum ar wala taŋ ati Zeroboˀama.

⁸Abiyam a mucu, a dikaka ar walahay ngi Daviti. Mangal naŋ A sa a zuɓa li naŋ.

⁹Asa mitiri buy ngi Zuda na, naɓa Zeroboˀama naŋ angi vi mizli ngir cuw naŋ ngi zumabuy naŋ a Israyele.

¹⁰Asa a zum buyo vi kukur mufaɗ ngaŋ purla a Zeruzaleme. Slimiɗ ngi dideˀ naŋ mongoso, Maˀaka, zuŋ ngi Abisalom.

¹¹Asa a gi gwat mikaslsla a mihiri ngi Bumbulvuŋ kaɓa dideˀ naŋ Daviti.

¹²Ziley ati ngwasay magam sulome ar slimiɗ ngi kulihey, yo kuli dideˀ taŋhay muvuɗaka taŋ gar na, a susuymo taŋ avra.

¹³Maˀaka, dideˀ mongoso ngi Asa, slimiɗ naŋ ‹Maˀay Madiɗa› na, Asa a muɗaŋ di avra, asi Maˀaka a ɗiyi deŋ ngi kuli ngwas mukuyta wãˀ mazilaka Asera. Asa a ɓa mizli, a ngurfoko kuli mukuy ta nah, ara zlizliraka ar zlazlar Sedroŋ.

¹⁴Asa, angi hin ngi siifa naŋ gar na, a wuɗ Bumbulvuŋ le ti mevel purla ngbaŋ. Amma ti nah gar na, li miɗingir ɗingir ngi gi mikulihey ar taŋ na, a susuymom avra ta.

¹⁵Gwatay, cine naŋ muvula taŋ zleˀe da Bumbulvuŋ ati misi naŋ vuna muvulaŋ taŋ ya na, Asa a ɓa mizli, joˀ soko taŋ ng'ar hay ngi Bumbulvuŋ: i ɓiri bara, ɓiri tapasl tapasl ati gazlangahay wal wal.

¹⁶Asa, buy ngi Zuda ati Basa, buy ngi Israyele, angi hin ngi siifa taŋ gar na, vurum ara gi ar wala taŋ.

¹⁷Ngi hin mekelem na, Basa, buy Israyel ara zli kiɗa vu ati hirwuy Zuda. Basa a zla guno walahay Rama gun ti mohol, ɓa ngi disla jiviɗ a mbuŋ Asa, buy Zuda.

¹⁸Akẽh na, ɓiri bara ati ɓiri tapasl tapasl, zlili mindir ngir hay ngi Bumbulvuŋ waɗ zlili ngi hay buyo gar na, Asa a hila, a vula da gawla naŋhay. A slina taŋ, ɓa a ram di da Ben-Hadat, mangal ngi Tabrimoŋ, dideˀ mukutur ti kutur ngi Heziyoŋ, buy ngi Siri, li cifi naŋ ti haya a Damas. Asa a slina taŋ ti mingiɓi ani aseˀeŋ:

¹⁹«Ndirukum ti jumoˀay ar wala ndra, kaɓa cine ndrahay zleˀe na ya. I slinuw ɓiri bara ati ɓiri tapasl tapasl anihĩ ngataraŋ. Aru, ki ra puska jumoˀay ɗik ati Basa, buy Israyele, ɓa a so gi vurum ti ya mata.»

²⁰Ben-Hadata, a tiɓa mi ngi Asa le. A slina madiɗa ngi soje naŋhaya nga kiɗa vu ati walahay Israyeleye. Sojehey a tiɓaka walahay Yoŋ, Daŋ, Abel-Bet- Maˀaka ati hirwuy vay Kineret waɗ hirwuy Neftali mindir mindir gar.

²¹Basa micina labara nah cin na, a pula guno walahay Rama ti moholo, ara cifi a Tirsa.

²²Akẽh na, buy Asa a zila mizli Yudeheye cek ceke, ko mbur loŋ mindir anta. Ɗugur ati dumoy, Basa mukuso ngi ndira mohol ngi walahay Rama zleˀe tuwa na, a jijiraka ceke. Joˀ buy Asa a ndir di mohol ngi walahay Geba-ngi-Benjameŋ ati Mispa.

²³Is ngi slra mekelemey Asa miga taŋ, gwat madiɗahay ati gwat mekelemey naŋ miga taŋ gar, waɗ walahay naŋ muguno taŋ ti mohol gar na, i mutoho le angi ɗerewol mazilaka ‹Ɓi ngi buy Zudahay.› Sey ar midigila naŋ na, a lum jiji le avu saraya ɓula.

²⁴Asa, ti naŋ mumuc na, a dikaka a ciki dideˀ naŋhay ar walahay ngi cine naŋ Daviti. Joˀ mangal naŋ Zozafat a zuɓa li naŋ.

²⁵Nadap, mangal ngi Zeroboˀam mitiri buy Israyel na, naɓa Asa a ɓul di i vi mucuw naŋ angi zumabuy naŋ a Zuda.

²⁶Nadap a gi gwat micira hiri da Bumbulvuŋ ta. A sipi sar ngi cine naŋ mihizigiɗa Israyeley ɓa a gam mungra na.

²⁷Akẽh na, Basa, mangal ngi Ahiya, angi sukwi ngi Isakara, a gi gidiɓi ar Nadap tuwa. Basa a kiɗa buy Nadapa vagay, hirak ti Nadap ati sojehey mindahaka walahay Gibetoŋ na.

²⁸Basa mikiɗa Nadap na, naɓa Asa a ɓul di i vi mimakir a ngi zumabuy naŋ a Zuda. Joˀ Basa a zuɓa li ngi Nadapa.

²⁹Basa micifi buy madiɗa kulaˀ si na, a kiɗa mizli ngi hay Zeroboˀamaya vagay vagay cek, ko a pul mbur ti siifa loŋ ta. A gi le kaɓa mingiɓi ngi Bumbulvuŋ mubo ti balam gawla naŋ Ahiya ngi Silo tuwa.

³⁰Mingiɓi nah vur mungra ngi Zerboˀam miga ati misi naŋ mihizigiɗa Israyeley ɓa a gam mungra ngi slikiɗa himaˀ ngi Bumbulvuŋ, Buymisemuŋ ngi Israyel na.

³¹Ɓi ngi Nadap mindir ati slra mekelemey naŋ miga taŋ gar na, i mutoho taŋ le ar ɗerewol «Ɓi ngi buy Israyeley.»

³²Asa ati Basa, angi hin ngi siifa taŋ gar na, ara gam vurum ar wala taŋ.

³³Basa, mangal ngi Ahiya, mitiri buy ngisi ruwuy Israyel gar na, naɓa Asa a ɓul di i vi mimakir naŋ ar zumabuy naŋ a Zuda. Basa a zum buy a Tirsa, a gi di vi kukur cuw nga mufaɗa.

³⁴Basa a gi gwat micira hiri ta da Bumbulvuŋ. A sipi di i sar ngi Zeroboˀam, yo a gi di i mungra misi purla, naŋ mihizigiɗ di Israyeley ɓa a gaka na.