Read South Giziga 1KI 16 Bible Online

1KI 16 - South Giziga bible

1KI 16

¹Mijiviɗ Yehu, mangal ngi Hanaŋi, Bumbulvuŋ a ɓaŋ, ɓa a ɓa mingiɓi naŋ ani da Basa:

²«Ka mbur ngatara zleˀe lambaˀ, amma yi muɗuw le ceɗ a wuzla mizli, joˀ yi cifi ti ka buy ngi sukwi Israyel, mizli ɗuwoy. Na ma na, ki sipi di i sar ngi Zeroboˀam migi malambaˀ na, hã ki hizigiɗa Israyel, mizli ɗuwoyo ɓa a gam mungra ngi slikiɗiy mevel.

³Vurˀe, yi sa susuymuw ka ati mizli ngi hay ɗikeye cek. I sa tiri ti hay ɗike daŋ daŋ, rak rak kaɓa ya mitiri ti hay ngi Zeroboˀam, mangal ngi Nebat na ya.

⁴Ka Basa, mbur ngi hay ɗik masa muc ar walahay gar na, i kirihey masa humbuɗaka vagay naŋ. Yo mbur ngi hay ɗik masa muc a duba gala gar na, i ɗiyuw ngi ɓuhoy masa zumaka useˀ naŋ.»

⁵Is ngi ɓi ngi slra ngi Basa, gwat naŋ miga, gwat madiɗa madiɗa mekelemey naŋ miga taŋ gar na, i mutoho taŋ le ar ɗerewol mazilaka ‹Ɓi ngi buy Israyeley.›

⁶Basa a mucu, a dikaka a ciki dideˀ naŋhay a Tirsa. Mangal naŋ Ela a zuɓa li naŋ.

⁷Yo ma na, mijiviɗ Zehu, mangal ngi Hanani, Bumbulvuŋ miɓaŋ ɓa a ɓa Basa ati mizli ngi hay naŋhay na, asi ɓihey wal wal cuw: Dumbuŋ na, Basa ati mizli ngi hay naŋhay a gam gwat malambaˀ le avu Bumbulvuŋ. A slikiɗakaŋ mevel le ti gwat ngi gi taŋhay, hã a gam malambaˀ kaɓa Zeroboˀam ati mizli ngi hay naŋhay. Yo mucuw naŋ ma na, asi Basa mingizla mizli ngi hay Zeroboˀamay na ma.

⁸Ela, mangal ngi Basa mitiri buy Israyel na, naɓa Asa, buy ngi Zuda, a ɓul di i vi mizli ngir cuw nga merkeɗ angi zumabuy naŋ. Ela a zum buy a Tirsa vi cuw.

⁹Gawla naŋ Zimri, madiɗa ngi sojehey mawa cah ngi mota ngi vurum naŋhay, a gi gidiɓi ar Ela. Ti di numuŋ, buy Ela a ro a Tirsa, a hay Arsa, gawla ngi hay naŋ, a wi le a haya.

¹⁰Zimri a ci, ara kiɗa buy Ela tuwa vagay, joˀ naŋ a zuɓa li naŋ. Hana a gi na, naɓa Asa, buy Zuda a ɓul di i vi mizli ngir cuw nga tarnaˀ naŋ angi zuma buyo.

¹¹Zimri muzuɓa buyo paɗ si na, a ngizla hay ngi Basakap. A pulaŋ mbur loŋ le a haya ta, ko mbur mizile, ko muy naŋ malla ko ngama naŋ tekeɗe, a pulaŋ pal le ta.

¹²Zimri a ngizla hay ngi Basakap wãˀ. A gi le kaɓa mingiɓi ngi Bumbulvuŋ mubo ti balam mijiviɗ Zehu, miɓa a hirnga Basa tuwa.

¹³Mingiɓi nah vur mungra ngi Basa ati ngi mangal naŋ Ela migakaŋ, yo taŋ mihizigiɗaka Israyeley ɓa a gam mungra, hã mislikiɗa mevel ngi Bumbulvuŋ, Buymisemuŋ ngi Israyel ti kuli taŋ malambaˀhay na.

¹⁴Ɓi ngi Ela ati slra naŋ mekelemey naŋ miga taŋ gar na, i mutoho taŋ le ar ɗerewol mazilaka Ɓi ngi buy Israyeley.

¹⁵Zimri a tiri buy le ngi hin tarnaˀ a Tirsa, naɓa Asa, buy Zuda a ɓul di i vi mizli ngir cuw nga tarnaˀ naŋ angi zumabuy naŋ a Zuda. Naɓa ti di nah na, walahay Gibetoŋ ngi Filistiheye, soje Israyeley a ndahaka hirnga naŋ le ndah.

¹⁶Zimri a gi gidiɓi le ar buyo a kiɗa le vagay na, sojehey a cinaka labara nah le. Akẽh na, kalla tapasa si na, Israyeley gar ar li pi sar taŋ, a wunam Omri, ɓa a cifi buy Israyele. I madiɗa ngi sojehey.

¹⁷Dar Omri ati soje naŋhaya gar, a slikiɗam baɗ a Gibetoŋ, ara ndahaka hirnga ngi walahay Tirsa.

¹⁸Zimri, ti naŋ mupura sojehey a zuɓaka walahaya le na, a ci ng'ar mugum ngi buyo a ɗuva vu da haya, joˀ hay a wur ar naŋ vuna si.

¹⁹Hana gar a gi na, asi Zimri migi mungra, a gi gwat malambaˀhay le avu Bumbulvuŋ. A sipi di i sar ngi Zeroboˀam migi mungra, hã a hizigiɗa Israyeley ɓa a gam mungra vuna ya na.

²⁰Ɓi ngi slra mekelemey, Zimri miga taŋ ati ɓi ngi gidiɓi naŋhaya hizlek hizlek wãˀ na, i mutoho taŋ le ar ɗerewol ngi «Ɓi ngi buy Israyeley.»

²¹A dirba Zimri mumuc na, sukwi Israyel a wunuk a wuzla cuw: mizli micah mekelemeye, a wuɗam macifi buy i Tibini, mangal ngi Ginat. Yo micah numuŋhoyo kwana, a wuɗam di i Omri.

²²Tibini, mangal ngi Ginata, mizli ngisi Omrihey a funaka mizli ngi seˀeheye le. Akẽh na, Tibini a mucu, joˀ Omri a zuɓa buyo.

²³Asa, buy ngi Zuda, angi vi mizli ngir makir naŋ ngi zumabuy naŋ na, Omri a tiri buy Israyel, a zum buy a Israyele vi kuruˀ nga cuw. A zum buyo dumbuŋ zleˀe a Tirsa vi merkeɗe.

²⁴Akẽh na, ara luuma mbur ada, a zilaka Simer. A hiɗika li miɗingir ngi Samari ava suloy gabal merkeɗe. A ndir walahay ar muwã tuwa, a zila walahay nah Samari. Slimiɗ misenna a bo tivi slimiɗ Simer, buy ngi muwã nah vuna.

²⁵Omri a gi gwat malambaˀ avu Bumbulvuŋ, yo gi gwat naŋ i malambaˀ kuyta wãˀ fineˀ ngi mizli mudumbuŋhoyo gar.

²⁶A sipa sar ngi Zeroboˀam, mangal ngi Nebata le angi gwat ngi gi naŋhay gar. Zeroboˀam a gi mungra, a hizigiɗa Israyeley ɓa a gam mungra, hã a slikiɗaka mevel ngi Bumbulvuŋ, Buymisemuŋ ngi Israyele ti huruk huruk avu kuli taŋ malambaˀhay na.

²⁷Ɓi ngi Omri, slra naŋhay ati gwat mekelemey naŋ miga taŋ gar na, i mutuho taŋ le angi ɗerewol mazilaka ‹Ɓi ngi buy Israyeley.›

²⁸Omri, ti naŋ mumuc na, a dikaka a Samari. Mangal naŋ Akap a zuɓa li naŋ.

²⁹Akap, mangal ngi Omri mitiri buy a Israyel na, naɓa Asa, buy ngi Zuda, a ɓul di i vi mizli ngir makir nga dangafaɗ naŋ angi zumabuy naŋ. Akap, mangal ngi Omri a zum buy ar Israyeley a Samari vi kukur cuw nga cuw.

³⁰Amma Akap, mangal ngi Omri, a gi gwat malambaˀ avu Bumbulvuŋ, fineˀ mizli mudumbuŋhoy angi naŋ gar.

³¹Zeroboˀam, mangal ngi Nebata, Omri a sipi di i sar naŋ tewle ta, amma hã ara zuɓ ngwasa i Zezabel, zuŋ ngi Etbal, buy ngi Sidonihey, yo hã ara huruk huruk a mbuŋ Baˀal , ɓa a gaŋ mezegwel.

³²Akap a ndira hay da Baˀala a hay, naŋ mindira a Samari tuwa.

³³Kuli ngwas mazilaka Asera na, Akap a ɗiya deŋ naŋ ti dum. A ra gi gwat malambaˀhay wal wal ngi slikiɗa mevel ngi Bumbulvuŋ, Buymisemuŋ ngi Israyele, fineˀ buy Israyel mudumbuŋhoy angi naŋ gar.

³⁴Hirak ti hin naŋ nah na, mbur ada a Betel, a zilaka Hiyel, ara ndira hiri ngi walahay Zeriko. Amma ti di taŋ malaka li ɓa ngi ɗuva virzi ngi walahaya na, Abiram, mangal modogom ngi Akap a mucu. Yo ti di taŋ mang'aka miviŋ naŋhaya ma na, Serug, mangal naŋ mijingaˀ ngi madiɗa a muco ma. Hana gar na, a gi le kaslsla, kaɓa mingiɓi ngi Bumbulvuŋ mubo ti balam Zozuwe, mangal ngi Nun tuwa.