Read South Giziga 1KI 17 Bible Online

1KI 17 - South Giziga bible

1KI 17

¹Eli, mbur ngir walahay Tiseba, angi hirwuy Galaˀata, a ɓa buy Akap na: «Ti slimiɗ ngi Bumbulvuŋ misi ti siifa, Bumbulvuŋ ngi Israyel, ya magaŋ slra naŋ na, ar vi ngi mbuŋhoy na, wulngar anta sa gi ta, yo vuŋ anta sa gi ta ma, sey da ya mucufuɗ le vurˀe far.

²A dirba nah na, Bumbulvuŋ a ɓa Eli:

³«Eli, cuh tika, ngi hirnga kini ngir tisi pas ngi mipriki, ara ɗum ar zlazlar ngi Kerit, misi tisi pas ngi miprik ngi mizaw Zurdeŋ na.

⁴Naŋ kanah, kisa si yama ar zlazlar a diga, yo yi ɓa magagak le ɓa a sa suw ti gwat ngi zumo.»

⁵Eli a ru, a ga kaɓa Bumbulvuŋ miɓaŋ di, ara ɗum ar zlazlar ngi Kerit misi tisi pas ngi miprik ngi mizaw Zurdeŋ.

⁶Magagakay a sakaŋ ti ɗaf ati useˀe ti miprik ati pastaˀ gar, joˀ Eli a si yama ar zlazlar ngi Kerite.

⁷Amma, nga mbuŋ neˀ a dirba nah na, yam ngir zlazlar tuwa, a hisiki, asi vuŋ anta gi asi ruwuyo mata.

⁸Dar Bumbulvuŋ a ɓa Eli:

⁹«Slikiɗ, aru ng'ar walahay Sarepta, gweˀ avu Sidoŋ, ɓa ki cifi a diga. Yi vula jiviɗ le da ngwas wudiga a diga, ɓa a sa vuluw gwat ngi zumo.»

¹⁰Eli a zuɓa jiviɗ, aru nga Sarepta. Naŋ mandil nga mizlingre ngi ci ng'ar walahay na, a lum ngwas wudiga, ara guɗum caciya. Eli a zila ngwas tuwa, a ɓaŋ: «Ambuh, inga ara wuɗiy yam ngi si neˀ takwa!»

¹¹Ngwas tuwa maru nga wuɗaŋ yama na, Eli a zila ma, a ɓaŋ: «Ambuh, inga siy ti ɗaf neˀ a haŋ matakwa!»

¹²Ngwas wudiga a mbiɗaŋ di: «Ti Bumbulvuŋ, Buymisemuŋ ɗik misi ti siifa na, ɓa gwat ya miwi di vu ani na, anta, sey hapa ngbal haŋ purla tewle ar magayaka, waɗ mal ɗuwuleˀ kini ar misirgaɗa. Ya muso ani guɗuma caciya na, ɓa yi ra da mindir is naŋ tayna da ya ati mangala, ɓa a dirba ndra muzumaka le, a kiɗ mi le na, sey i kutukom mucu»

¹³Eli a ɓaŋ: «Mi, ara ga kaɓa ka miɓa na, ki zluwun ta! Ka ra diy helelem mikefer keferey cuw da ya ɗagay si, ɓa ki siy taŋ. A dirba nah na, kisa da ngi kum ati mangal ɗike ya.

¹⁴Asi mike na, Bumbulvuŋ, Buymisemuŋ ngi Israyele, a ɓi na: ‹Magayak ngi hapa anta sa ndir njoŋ ta, yo misirgaɗ ngi mala, mal anta sa kic anga ta, hã tapas Bumbulvuŋ misa go vuŋ le asi ruwuyo.›»

¹⁵Ngwas tuwa, a ru, ara ga gwat ngi zumo kaɓa Eli miɓaŋ di. Naŋ ati mizli ngi hay naŋhaya, a zumam gwata, hã hin mbeˀe.

¹⁶Magayak ngi hapa anta ndir njoŋ ta, yo misirgaɗa, mala, mal anta kic ara ta. A gi le kaɓa mingiɓi ngi Bumbulvuŋ mubo ti balam mijiviɗ Eli tuwa.

¹⁷Zik neˀ a dirba nah na, ngwas wudiga mitiɓa Eli a hay naŋ tuwa, mangal naŋ a ki jiji. Jiji naŋ a tiri i jiji mutuwaˀa, hã mangal a mucu.

¹⁸Akẽh na, mumuŋ ngi mangal a ɓa mijiviɗ Eli tuwa: «Ka mijiviɗ ngi Buymisemuŋ, ki bigiy di kahana vur mike? Ki so a hay ɗu na, ɓa ki njikiy malambaˀ ɗuwoyo, yo ɓa ki kiɗiy mangala sukwa?»

¹⁹Eli a mbiɗaŋ di: «Inga vuliy mangal ɗik vuna!» Ngwas a ro ti mangala zleˀe kaw a haŋ. Eli a tiɓa mangala, a jiɗ di ng'ar viŋ mijirngasl a hirnga cala, naŋ mahin a ra, waɗ a hina mangala tup ar arngawo naŋ.

²⁰Akẽh na, Eli a tumbulo Bumbulvuŋ, a ɓaŋ: «Bumbulvuŋ, Buymisemuŋ ɗu, ani ngwas mitiɓiy a hay naŋ na, ki wuɗ ɓa ki gaŋ malambaˀ, ɓa hã ki ga ɓa mangal naŋ na, a muc gisiŋ kwa mbrike?»

²¹A dirba nah na, Eli a huruk is makir ar mangal tuwa, a tumbulo Bumbulvuŋ: «Bumbulvuŋ, Buymisemuŋ ɗu, mangal misenna, anja ki maŋ ti musuwuno muŋ takwa!»

²²Bumbulvuŋ a cine diradibiɗ ngi Eli tuwa le, mangala, musuwun a mo a muŋ, naŋ ti siifa.

²³Eli a zuɓa mangal, a pi di sar tir viŋ ngi muŋ tuwa ng'ar viŋ ngi ruwuy a muŋ, a vula da mumuŋ. Eli a ɓaŋ: «Mangal ɗike naŋ ani ti siifa.»

²⁴Ar nah kẽh na, ngwas tuwa, a ɓa Eli: «Haˀaw, wurenna, i si na le ki mijiviɗ ngi Buymisemuŋ, yo ka maɓi di na, i mingiɓi ngi Bumbulvuŋ gisiŋ.»