Read South Giziga 1KI 18 Bible Online

1KI 18 - South Giziga bible

1KI 18

¹Angi vi mimakir naŋ ngi kwalaya, hin a cuh le cawwa, joˀ Bumbulvuŋ a ɓa Eli: «Aru, ara biga vu ɗik da buy Akapa, asi i wuɗ i sa go vuŋ a si ruwuyo muduba.»

²Eli a ru, ara biga vu naŋ da Akapa. Naɓa may a bul vu le culok asi ruwuy Samari.

³Akẽh na, buy Akap a zila Obadiya, madiɗa ngi gawla naŋhaya. Obadiya i mbur mazluwun haɗa ti Bumbulvuŋ.

⁴Ti di numuŋ ada na, maˀãy Zezabel ara ngizla mijiviɗ ngi Bumbulvuŋhoyo. Obadiya a hil mijiviɗey skat, ara ɗumo taŋ ar butumoy wal wal cuw, mizli kukur zlum kukur zlum, a vula taŋ gwat ngi zum ati yam.

⁵Akap tuwa, a ɓa Obadiya na: «Inga bulukum hirwuyo bal bal kwaɗay, purukum miviɗiviɗi ngi yamay ati hurjijiŋhey, zliv i sa lumam giziŋ ngi zum da pilis ati zungu-pilis ndraˀahaya kwa mbrike? Anja ɓa ginew ndrahay a ngizlam ta.»

⁶A wuɗkaka hirwuy taŋ masa bulaka tuwa. Akapa, a zuɓa jiviɗ, aru pal naŋ, yo Obadiya kwana, aru tir jiviɗ mekelem pala ya.

⁷Ti Obadiya maru a jiviɗe na, a ji hirnga gurjik ti Eli. Obadiya a sinaŋ le, a huruk huruk a mbuŋ Eli, a ɓaŋ: «Ani i ka kumani ɗu Eli na gisiŋ kwa?»

⁸Eli a mbiɗaŋ di: «I ya vuna si! A ra ɓa buy ɗik Akapa: Eli n'ani sawa a diga!»

⁹Obadiya a mbiɗaŋ di: «I guw mungra mi, ɓa ki vuliy ya gawla ɗik asi haŋ ngi Akapa, ɓa a kiɗiy vagayaka?

¹⁰Ya maɓuw ani na ti Bumbulvuŋ, Buymisemuŋ ɗik misi ti siifa na gisiŋ. Angi sukwi malla zumabuy ko amaka gar, ɓa buy ɗu Akap a slin nga supoko ka a diga ta na, anta. Da taŋ miɓakaŋ le: K'anta a diga ta› na, a ɓa sukwi ati zumabuy tayna, sey a hudumom hudum le a prukuw ta.

¹¹Ani wurenna so na, ki ɓiy ɓa i ra ɓa Akapa: «Eli n'ani sawa a diga!»

¹²Amma ya misa puluw ka le so na, ˀUf ngi Bumbulvuŋ a sa zuɓuw faw, i si na nga a maka ta. Ya, i sa slufa ɓi nah da Akapa so. Da a lumuw ka mata na, a sa kiɗiy ya vagay. Na ya gawla ɗike, yi zla zluwun ti Bumbulvuŋ zle ti zuŋ mayse.

¹³Zleˀe ada na, Zezabel ara kiɗa mijiviɗ ngi Bumbulvuŋhoyo. Yi ɗum mijiviɗeye le skat ar butumoy wal wal cuw, mizli kukur zlum kukur zlum. Yo yi vula taŋ gwat ngi zum le ati yama. Yi wa na, a slufukuw ɓi ngi gwat ya miga nah le takwa kumani?

¹⁴Ani wurenna so na, ki ɓiy ɓa i ra ɓa buy ɗu Akapa: «Eli n'ani sawa a diga kini kwa? Kay, a sa kiɗiy vagay!»

¹⁵Amma Eli a mbidaŋ di: «Bumbulvuŋ misi ti siifa, Buy ngi gidaŋ wãˀ, ya misi yi gawla naŋ na, hadam ti slimiɗ naŋ, i ra ru nga biga vu ɗu da Akapa, dana dana vuna si.»

¹⁶Akẽh na, Obadiya a mi nga ji hirnga ti Akapa, a slufaŋ ɓi nah. Akapa kwana, aru nga ji hirnga ti Eli.

¹⁷Akapa, naŋ mupura Eli tuwa keɗ na, a ɓaŋ: «Mapura jubuɗ da Israyeley na, i ka gisiŋ kwa?»

¹⁸Eli a mbiɗaŋ di: «Mapura jubuɗ da Israyeley i ya ta jaka, amma i kaha ati mizli ngi hay bunukoy. Asi mike na, ki pulaka ɓimuɗuva ngi Bumbulvuŋ le, joˀ ki sipam Baˀal.

¹⁹Amma wurenna na, slin ɓa Israyeley a kusoko gar nga ciki ɗu a muwã Karmel. Yo mijiviɗ ngi Baˀalay miskat skat mufaɗ ti kukur zlum waɗ mijiviɗ ngi kuli Aserahay miskat skat mufaɗ, mazumam ar sikiɗ purla ati maˀãy Zezabel na, ɓa a kusoko aya.»

²⁰Akap a slin ɓa a kusoko Israyeleye gar, waɗ mijiviɗey nga muwã Karmele so.

²¹Akẽh na, Eli a kirih nga mbuŋ Israyele gar, a ɓa taŋ: «Kum mambiɗam pulaˀ ti ka, pulaˀ ti ka na, kisa kiɗaka mi nah ɗerre ti vunaka? Da Bumbulvuŋ i Buymisemuŋ gisiŋ na, huruk hurukam a mbuŋ naŋ, yo da i Baˀal kwana, huruk hurukam a mbuŋ naŋ so!» Amma mizli Israyeleye, ko a mbiɗakaŋ mi pal ta.

²²Eli a ɓa taŋ ava ma: «Mijiviɗ ngi Bumbulvuŋ, mindir i ya pal ɗu, amma mijiviɗ ngi Baˀalaya taŋ skat skat mufaɗ ti kukur zlum.

²³Anja a soko ndra ti gusoŋhoy cuw: taŋ wunam gusoŋ purla da taŋ, a suwutakaŋ waɗ a paka useˀ naŋ angi dumo, manja a bulam vu aseˀe. Ya kwana, yi sa gi ti gusoŋ mekeleme kanah ya. I sa pa useˀ naŋ angi dumo, manja i bul vu bul le aseˀe ya.

²⁴A dirba nah, kisa tumbuloko kuli kumo, yo ya kwana, yi sa tumbulo Bumbulvuŋ ɗu ya. Buymisemuŋ migisiŋ na, a sa sin avu naŋ masa bula vu asi useˀ tuwa.» Mizli Israyeley gar a mbiɗakaŋ di: «I tiɓaka mingiɓi hana le.»

²⁵Ar nah na, Eli a ɓa mijiviɗ ngi Baˀalaya : «Wunam gusoŋ kumo, gaka slra nah dumbuŋ, asi kumo, kum haɗa. Yo tumbuloko kuli kumo, amma ki bulam vu asi useˀe ta ɓula.»

²⁶Taŋ a jaka gusoŋ muvulaka taŋ di tuwa, a gaka slra nah. A dirba nah, a zlaka tumbulo Baˀala , zle ngi miprik hã pas deŋ, t'ada ar li widi: «Baˀal , zila ndra mi, Baˀal , zila ndra mi!» Amma, ko ˀay macin anta, zila mi anta. Taŋˀda, ara ɓurgam ngbik ngbik ngbik a ciki li gi mikuli taŋ miɗiyaka tuwa.

²⁷Ngi wuzla papas na, Eli a zla a singir ar taŋ, a ɓa taŋ: «Wudam haɗa haɗa ayɗi. Naŋ i kuli tuwa na, a ro na, a gi le welele haɗa, a zuɓ mulak le, malla ta na, a ro jiviɗi. Bista na, a ro hinje, anja a puɗuku.»

²⁸Joˀ a wudam ti gidaŋ, yo kaɓa ar sirik taŋ na, a ciraka dumvu taŋ ti maslalam ati ziwitey, hã pumbus yororo.

²⁹Wuzla papas mucuh na, a ɓam kaɓa mijiviɗey hã a ndila pas ngi vula gwat da Buymisemuŋ. Amma, ko ˀay anta, zila mi anta, gwat mabiga slra naŋ vuna neˀ tekeɗe anta ma.

³⁰A dirba nah na, Eli a ɓa mizli Israyeley gar: «Kirohoko ng'avi ya aka.» Joˀ a kiraham gar ng'avaŋ. Li gi mikuli da Bumbulvuŋ i muwaha le zleˀe, dar a ndira hiri naŋ a muŋ.

³¹A hil ɗuguroy kuruˀ nga cuw, tiɗeˀe avu sukwi ngi ziri mizile ngi Zakopoyo. Sukwi tayna, Bumbulvuŋ a ɓa taŋ le zleˀe anihĩ: «A sa zulukuw Israyel.»

³²Eli a ndir li gi mikuli hĩˀĩ da Bumbulvuŋ ti ɗuguroy tuwa. A la ciki li gi mikuli tuwa gunno zlar, zliv a zuɓ yam litir kukur makir.

³³Akẽh na, a pi dumoy ng'ar li gi mikuli tuwa, a puwa gusoŋ paw paw, waɗ ɓaˀ ɓaˀ useˀ naŋ nga hirnga dumo.

³⁴Joˀ a ɓa mizli: «Nuwoko yam kukulum mufaɗ, paka ar useˀ ngi zlum ti zlum na ati dumo!» Mizli a pakaŋ. A ɓa taŋ ma: «Paka sar mucuw naŋ ma.» Joˀ mizli a pakaŋ. A ɓa taŋ ma: «Paka sar mimakir naŋ ma.» Joˀ mizli a pakaŋ.

³⁵Yam ara ɓul gun hirnga li gi mikuli, hã a naha li mila gun hirnga naŋ tuwa.

³⁶Hirak ti ler ngi vula gwat da Buymisemuŋ, mijiviɗ Eli a kirahawa, a ɓi: «Bumbulvuŋ, Buymisemuŋ ngi Abraham, ngi Izak ati Israyel, dana, ga ɓa mizli a sinaka Buymisemuŋ ngi Israyel i kaha, ya i gawla ɗiki, yo ya maga gwat hanayna gar na, tisi mingiɓi ɗiki.

³⁷Bumbulvuŋ, ziliy mi takwa, ambuh ziliy mi ɓa mizli Israyeley a sinaka, Buymisemuŋ migisiŋ i ka Bumbulvuŋ, yo maga ɓa a mbuɗoko mevel taŋ ng'avu ka na, i kaha.»

³⁸Ar nah na, Bumbulvuŋ a bulo vu, a zluma useˀ ngi zlum ti zlumo, dumo, ɗuguroyo hirwuyo waɗ a hila yam misi angi vigiɗ mugun hirnga li gi mikuli tuwa ŋsoht.

³⁹Mizli Israyeleye, taŋ mupuraka gwat migi kanah tuwa na, taŋ gar a hurukom a ruwuy a ruwuy, dar a zlaka widi: «Buymisemuŋ migisiŋ i Bumbulvuŋ! Buymisemuŋ migisiŋ i Bumbulvuŋ!»

⁴⁰Eli a ɓa Israyeleye: «Jaka mijiviɗ ngi Baˀalay na. Anja ko mbur pal a sumuɗ ta!» Joˀ a jaka taŋ cek. Eli a ɓi ɓa a pam taŋ sar ng'ar hurjijiŋ ngi Kisoŋ, dar a slaka ˀay taŋ a diga.

⁴¹A dirba nah, Eli a ɓa Akapa: «A ra zum, ara si gwat! Asi vuŋ ara tuwuy.»

⁴²Akapa, aru nga zum yo ng'asi gwata. Eli kwana, a jiɗ nga hirnga muwã Karmel. A huruk huruk a ruwuy, hirnga kulaˀ ar wala sar.

⁴³Joˀ a ɓa gawla naŋ: «Inga jiɗ, pur hiri kini tir vay mubuliy!» Gawla naŋ tuwa, a jiɗ, a pur hiri, a mawa, a ɓaŋ: «Gwat anta.» Eli a ɓaŋ ɓa a mi, a mi, hã is tarnaˀa!

⁴⁴Ngi sar mitarnaˀ naŋ na, gawla naŋ a ɓaŋ: «Gazlavay ada bo zleppe a mubuliye kaɓa tapaɗak haŋ ɓula.» Eli a ɓaŋ: «A ra ɓa Akapa ɓa a juwa pilise, a ru, vur vuŋ masa tikaŋ a jiviɗi.»

⁴⁵Ar nah si na, himiɗ maso ti gazlavay tuwa, muŋ ara lus ti gidaŋ, joˀ vuŋ madiɗa a gi. Akapa, a jiɗ ar mota ngi vurum naŋ, aru nga Zisreyele.

⁴⁶Gidaŋ ngi Bumbulvuŋ naŋ da ar Eli, a juwa kwacaya hirlak, a kil a mbuŋ Akapa, hã sesẽŋ a Zisreyele.