Read South Giziga 1KI 19 Bible Online

1KI 19 - South Giziga bible

1KI 19

¹Gwat Eli miga gar, naŋ mikiɗa mijiviɗ ngi Baˀalay gar ti maslalam tuwa na, Akap a slufa ɓi nah gar da ngwas naŋ Zezabel.

²Dar Zezabel a slin mizli ng'avu Eli, ɓa ara ɓakaŋ ani: «Hã tiprik ti ler ka misenna, da yi gi ti siifa ɗike kaɓa ka migi ti ngi mijiviɗ ngi Baˀalay na ta na, anja kulihey a gikiy bonoy mukuy ta muwãˀ naŋ.»

³Eli mupura kanah na, a slikiɗ, a kil ɓa a laha hirnga naŋ. A ndil a Berseba, angi hirwuy Zuda, a pula gawla naŋ a diga.

⁴Naŋ vuna so na, aru nga wuzlaɓuh, hiipas ar li ru, waɗ ara cifi asi widis meciɗek adakaˀ pal naŋ. A pura zuwen naŋ mamucu, a ɓi: «Y'anta ɓusa bonoy hana gu mata! Bumbulvuŋ, wurenna, zuɓa siifa ɗu. Na zle ya puɗaw fineˀ dideˀ ɗuwoyo kwa?»

⁵A dirba nah, a hin tup, a hinje asi virzi ngi widis meciɗek mikaˀ pal naŋ tuwa. Neˀ ar nah na, modro ngi Buymisemuŋ a so wusaŋ, dar a ɓaŋ: «Slikiɗ ɓa ki zum.»

⁶A pur hiri keɗ avu li taha hirnga naŋ akẽh na, ɗaf mutuso ar ɗugur mijam vuhoy le culok, waɗ kukulum ti yam taˀ akẽh. Eli tuwa, a zum, a si, waɗ a hin tup a muŋ.

⁷Modro ngi Bumbulvuŋ tuwa, a mawa ma, a wusaŋ, a ɓaŋ: «Slikiɗ ɓa ki zum, asi jiviɗe, naŋ jek haɗa a mbuŋ ɗik aruŋ.»

⁸Eli a slikiɗ, a zum, a si. A dirba naŋ mulum gidaŋ ti ɗaf tuwa na, a ru, duvuɗ duvuɗ kukur mufaɗ, yo hiipas hiipas kukur mufaɗa, hã ara ndila Horep, muwã ngi Buymisemuŋ.

⁹Eli mindil a muwã Horep tuwa na, a ci ng'ar butum, a hin a diga. Bumbulvuŋ a ɓaŋ: «Ki gi mi aka ka Eli?»

¹⁰Eli a mbiɗaŋ di: «Bumbulvuŋ, Buymisemuŋ miwa gidaŋhay gar, wuɗ ya mawuɗow na, a ciy le a mevele haɗi kuyta wãˀ. Mizli Israyeley a ngilaka jumoˀay ɗik ati taŋ na le. A wahaka li gi mikuli ɗikeye le, yo a kiɗaka mijiviɗ ɗikeye le ti maslalam, sey mindir i ya pal ɗu. Yo wurenna vuna ma na, ara sipikiy ɓa a zizika hutuŋ ɗu ya.»

¹¹Bumbulvuŋ a ɓaŋ: «Bawa, cici deŋ a muwã aka, a mbuŋ ɗu, ya Bumbulvuŋ, vur yi wuɗ i sa cuhu.» Neˀ na, burkataŋ gambara mihimaˀ a gi a mbuŋ Bumbulvuŋ, hã a cira muwãhaya, yo a waha gidigil muwãhaya, Bumbulvuŋ naŋ anta ar burkataŋ na ta. A dirba burkataŋ na, hirwuy a wus, hirwuy muwus na, Bumbulvuŋ naŋ anta anga ta.

¹²A dirba hirwuy muwus na, i vu, amma Bumbulvuŋ naŋ anta angi vu ta. A dirba vu ma na, hurum ngi himiɗ mifiɗek fiɗeke.

¹³Ti Eli micina hurum ngi himiɗ mifiɗek fiɗek tuwa cin na, a sirta hiri sirit ti godo. A bo deŋ a mi butum tuwa. A cin ˀay ngi mbur maɓaŋ: «Ki gi mi aka ka Eli?»

¹⁴Eli a mbiɗaŋ di: «Bumbulvuŋ, Buymisemuŋ miwa gidaŋhay gar, wuɗ ya mawuɗow na, a ciy le a mevele haɗi kuyta wãˀ. Mizli Israyeley a ngilaka jumoˀay ɗik ati taŋ na le. A wahaka li gi mikuli ɗikeye le, yo a kiɗaka mijiviɗ ɗikeye le ti maslalam, sey mindir i ya pal ɗu. Yo wurenna vuna ma na, ara sipikiy ɓa a zizika hutuŋ ya.»

¹⁵Amma Bumbulvuŋ a ɓaŋ: «Zuɓa jiviɗ ɗike, aru kini ngir ti wuzlaɓuh mikirɗak kirɗak ngi Damas. Daka misa ndil le a diga na, kisa pa mal ngi vula slra da Hazayele, ɓa a cifi buy Siri.

¹⁶A dirba nah ma na, kisa ra pa mal ngi vula slra da Zehu, mangal ngi Nimsi, ɓa a cifi buy Israyel. Yo kisa pa da Elize, mangal ngi Safat, mbur Abel-Mehola, ɓa a cifi mijiviɗi ar li ɗike.

¹⁷Mizli masa laham avu kiɗ vagay vagay ti maslalam ngi Hazayel gar na, i Zehu masa kiɗa taŋ. Yo mizli masa laham avu kiɗ vagay vagay ti maslaam ngi Zehu gar na, i Elize masa kiɗa taŋ.

¹⁸Amma i sa pul mizli masa ndiram ti siifa a wuzla Israyeleye durmuk tarnaˀa. Mizli mihuruk hurukam a mbuŋ Baˀal ta, mijakaŋ kuɓuy kuɓuy ta gar.»

¹⁹Eli muru ti kẽh na, ara luuma Elize, mangal ngi Safat, ara huf ti slahay, naŋ ti kare kuruˀ nga cuw. Naŋ ar li hufakare mukuruˀ nga cuw naŋ. Eli a cuh ti ciki Elize tuwa, waɗ a hiziga godo naŋ kacap ng'ar Elize.

²⁰Elize a pula sla naŋhaya, a kil asi Eli tuwa, a ɓaŋ: «Inga puliy jiviɗ, ɓa i ra mbiɗa mi da baha ati maha, ɓa a dirba nah, i sa sipuw takwa.» Eli tuwa, a mbiɗaŋ di: «Mi, a ru, i guw gwat le kwa?»

²¹Elize, a dirba naŋ mupula Eli tuwa na, a mawa. A hila slahay mizlaɓ cuw ngi huvoy tuwa, dar a gi taŋ mikuli. Galalaŋ ngi si ˀay taŋ, a da useˀ vuna ti naŋ tehhe a muŋ. A vula da mizli naŋhay. A dirba nah, a slikiɗ, a sipa Eli, a tiri gawla naŋ.