Read South Giziga 1KI 2 Bible Online

1KI 2 - South Giziga bible

1KI 2

¹Davite, ti naŋ mupura hin ngi muc naŋ, ara ndilawa na, a ɓa mi ngi kuti da mangal naŋ Salomoŋ.

²«Ani yi sa cuh le gweˀe, kaɓa gwat ngi ruwuy gar macuhu. Na so na, cici gidaŋ gidaŋ, gi solok ka zil!

³Bumbulvuŋ Buymisemuŋ ɗike, sipa jiviɗ naŋ. Ɓimujuwa naŋhay, ɓimuɗuva naŋhay, sirik naŋhay ati gwat naŋ mawuɗ cummo, kaɓa mutoho taŋ ar ɓimujuwa ngi Moyis gar na, sipa taŋ. Kanah na, naɓa gwat ka muwuɗ le, ɓa ki ga gar na, kisa ga gu.

⁴Bumbulvuŋ, gwat naŋ miɓiy di zleˀe na, a sa gaŋ, a ɓiy zleˀe: ‹Dideˀ ɗikeye, da ara wam vu ar gwat ngi gi taŋ, yo da gwat ngi gi taŋ a mbuŋ ɗu naŋ kaslsla, ti mevel purla, yo ti membezleŋ ngi vu taŋ wãˀ na, naɓa i mbur ngi wuzla taŋ masa cifi ar janga ɗu ngi zuma buyo ndrehhe ar Israyeleye.›

⁵Yo ma na, Zoˀap, mangal ngi ngwas mazilaka Seruya, gwat naŋ migiy di na, ki si na le takwa! Yo gwat naŋ miga da madiɗa ngi soje Israyeley cuw, gwat naŋ miga da Abner, mangal ngi Ner, waɗ da Amasa, mangal ngi Yeter na. A kiɗa taŋ vagay vagay, kite a pi di i pumbus ar hin mizli muroko zuy zuy.

⁶Naŋ kine, gi wer ava, amma, ki pulaŋ ti siifa, ɓa hã a bo ti hol tullo ta.

⁷Amma, ziri ngi Barzilay, mbur Galaˀat na, kisa ga taŋ mezle ɓula, asi ti di ya makil ti sukum ɗik Absalom zleˀe na, a soko, a gikiy mezle le. Vurˀe, kisa ga taŋ mezle ya, yo kisa zumam ɗafa ar sikiɗ purla.

⁸Waɗ ma na, Simey, mangal ngi Gera, mbur Benjameŋ ngir walahay Bahurim, migweˀ avu ka na, ti di ya makil nga Mahanayim na, a nisiy le nis mukuy ta naŋ wãˀ zleˀe. Amma, ti ya mamo na, ara ji ti ya hirnga a mizaw Zurdeŋ ɓa a tiɓiy. Na kwana, yi hudum le ti slimiɗ ngi Bumbulvuŋ, yi ɓaŋ: ‹Y'anta sa kiɗuw ti maslaama ta.›

⁹Amma, ki mbur misi sinmijileŋ, ɓa ki pulaŋ mbak kaɓa a gi gwat ta na, a gi ta. Ki sa si na gwat ka masa gaŋ di. Ko ti gi gal naŋ mihaɗa na gar kwana, kisa gi wer ava, ɓa ki kiɗa vagay na si.»

¹⁰Davit a mucu, a dikaka ar walahay naŋ, a Zeruzalem.

¹¹Davit a zum buy ar sukwi Israyele, vi kukur mufaɗa. A zum buy ngi vi tarnaˀ a Hebroŋ, waɗ vi kukur makir nga makir a Zeruzalem.

¹²Salomoŋ a cifi ar janga ngi Davit cine naŋ buyo. Zle ti nah sina, zumabuy ngi Salomoŋ, naŋ ti dudok haɗi teˀe.

¹³Ngi pas mekelem ada na, Adoniya, mangal ngi Davit ati Hagite, a so luuma Bat-Seba mumuŋ ngi Salomoŋ. Bat-Seba a ɓaŋ na: «Ki so ar jam aya?» Adoniya a mbiɗaŋ di: «Angi jam.»

¹⁴Waɗ a ɓaŋ ma na: «I wuɗ i ɓuw neˀkini.» Bat-Seba a ɓaŋ: «Ɓiy di so.»

¹⁵Adoniya a ɓaŋ: «Ki si na le, buyo zleˀe, anja inga ya, yo Israyeley gar a roko hiri tataˀ avu ya, ɓa macifi buy i ya zleˀe. Amma, ɓi nah a sa gi kanah mata, i sukum ɗu Salomoŋ misa cifi buyo. Naŋ migi kanah na, asi i wuɗ ngi Bumbulvuŋ.

¹⁶Wurenna, yi wuɗ ɓa i cufuɗ gwat purla avu ka si, anja ki sli himaˀ ta.» Bat-Seba a ɓaŋ: «Ka ɓa so.»

¹⁷Adoniya a ɓaŋ na: «Ambuh takwa! Cufuɗa buy Salomoŋ, ɓa a vuliy Abisak, zuŋ Sunem na, ɓa a tiri ngwas ɗu takwa! Asi naŋ anta sa sli humaˀ avu ka ta.»

¹⁸Bat-Seba a mbiɗaŋ di: «Kuy! I sa ra ɓa ɓi ɗike da buyo ti haŋ ɗu.»

¹⁹Joˀ Bat-Seba a ci ng'avu buyo, ɓa a ɓaŋ ɓi ngi Adoniya tuwa. Buy a slikiɗ tir li cifi naŋ ngi buyo, ara ji hirnga ti mumuŋ, a huruk a mbuŋ naŋ, waɗ a cifi ar li naŋ a muŋ. A ɓi ɓa a soko ti gwat cifi da mumuŋ tuwa ya, joˀ mumuŋ tuwa kwana, a cifi joˀ tir vay hazum ngi buyo.

²⁰Akẽh na, Bat-Seba tuwa, a ɓa buyo: «Ani i wuɗ i cufuɗuw neˀ takwa, anja ki sli himaˀ ta!» Buy a mbidaŋ di: «Ka cufuɗ gwat ka mawuɗo maha ɗu, y'anta sli himaˀ ta.»

²¹Bat-Seba a ɓaŋ: «Abisak, zuŋ Sunem na, zliv ki vula da sukum ɗik Adoniya, ɓa a tiri ngwas naŋ kwa?»

²²Salomoŋ a mbiɗa da mumuŋ: «Adoniya, ki cufuɗaŋ da naŋ i Abisak, zuŋ Sunem mbri mbri maka? Naŋ misi i sukum ɗu madiɗa na, zuwen cufuɗaŋ zumabuy jaka. Cufuɗa da naŋ waɗ da ti masay Abiyatar ati Zoˀap, mangal ngi Seruya!»

²³Akẽh na, Salomoŋ a hudum ti slimiɗ ngi Bumbulvuŋ, a ɓi: «Da Adoniya a wurka cufuɗ naŋ hana ti pumbus ngi hirnga naŋ ta na, anja Buymisemuŋ a kutiy ti bonoy mukuyta wãˀ.

²⁴Wurenna, kaɓa Bumbulvuŋ misi ti siifa gisiŋ, naŋ micifiy gidaŋ gidaŋ ar janga ngi buy cine ɗu Davit, yo naŋ miɓiy, buy inga ya, yo i ngi dideˀ ɗuwoy nga mbuŋ nga mbuŋ na, sey Adoniya a muc dana dana.»

²⁵Dar buy Salomoŋ a slina Benaya, mangal ngi Yoyada, a kiɗa Adoniya vagay.

²⁶A dirba nah kwana, buy a ɓa masay Abiyatara na: «Ki mbur mindila le ngi kiɗ vagay. Amma dana na, y'anta kiɗuw ta, asi mijijira akoti ngi Bumbulvuŋ Buymisemuŋ, a mbuŋ baha Davit na i kaha, yo bonoy naŋ misa gar na, ki saka bummoˀ. Ka cuh nga Anatot, angi hirwuy ɗiki.»

²⁷Naŋ kine, Salomoŋ a tika Abiyatara, ɓa a ga slra nga naŋ masay a mbuŋ Bumbulvuŋ mata. Hana a gi na, ɓa ɓi Bumbulvuŋ miɓa ar hay ngi Heli, masay madiɗa a Silo tuwa, a gi muduba.

²⁸Ti Zoˀap micina ɓi migi avu ti Adoniya ati Abiyatar na, a kil ng'ar guɗuk ngi Bumbulvuŋ, a ja haŋ kaw avu durum ngir li gi mikuli. Asi mike na, naŋ tisi Adoniya, naŋ anta tisi Absolom ta.

²⁹Mbur a so fa ɓi nah fẽt da Salomoŋ, a ɓaŋ: «Zoˀap a ɗum le ar guɗuk ngi Bumbulvuŋ, a ciki li gi mikuli.» Salomoŋ a slina Benaya, mangal ngi Yoyada, a ɓaŋ: «Aru, ara kiɗa vagay.»

³⁰Benaya a ci ng'ar guɗuk ngi Bumbulvuŋ, a ɓa Zoˀap tuwa: «Buy a ɓuw ɓa ki bi ng'avra.» Zoˀap, a mbiɗaŋ di: «Ĩˀ ĩ, yi bi ta! Sey i muc aka.» Benaya a mi ng'avu buyo, mingiɓi ngi Zoˀap mimbiɗaŋ di na, a slufa da buyo.

³¹Buy a ɓa Benaya: «Gakaɓa naŋ muɓuw vuna, kiɗa vagay daˀ arleˀe, a dirba nah, dikaŋ. Kanah na, pumbus ngi mizli, Zoˀap mikiɗa taŋ vagay vagay, manja a gam gwat na, kite ki cukiy le ati mizli ngi hay baha ti raˀa.

³²Naŋ kine, Abner, mangal ngi Ner, madiɗa ngi soje Israyeley waɗ Amasa, mangal ngi Yeter, madiɗa ngi soje ngi Zudahaya, i mizli mijeŋŋehey fineˀ naŋ. Naŋ mikiɗa taŋ vagay vagay ti maslalam, manja baha Davit a si nah na, anja Bumbulvuŋ a pa zayɓi ngi muc taŋ nga hirnga naŋ.

³³Anja pumbus taŋ a mbiɗi nga hirnga Zoˀap ati dideˀ naŋhaya, hã ngi sete! Amma Davit ati dideˀ naŋhay, hay naŋ ati zumabuy naŋ gar na, anja Bumbulvuŋ a ga, a ndiram ar cira hiri hã ngi sete.»

³⁴Dar Benaya a mi ng'avu Zoˀap tuwa, a kiɗa vagay, a dirba nah, ara dikaka a hay naŋ a wuzlaɓuh.

³⁵Buy a ca Benaya mangal ngi Yoyada, i madiɗa ngi sojehey ar li ngi Zoˀapa, yo a ca Sadok, i masay, ar li ngi Abiyatar.

³⁶Salomoŋ a slin ɓa a zilakaŋ Simey, a ɓaŋ: «Aru, ara ndir hay a Zeruzalem, cifi a diga, yo ki bi, ki ru ko nga maka ta.

³⁷Sina sin le, da ti mbuŋ, ki bi le, ki tuwuɗa zlazlar ngi Sedroŋ na le na, ki muc cummo, yo pumbus ɗik a mbiɗi nga hirnga ɗiki.»

³⁸Simey a mbiɗa da buyo: «Kuy kumani! Gwat ka miɓiy di da ya gawla ɗik na, i ra ga kanah.» Simey a cifi a Zeruzaleme, hã a zik haɗa.

³⁹Amma, vi makir a dirba nah na, gawlahay cuw a wuzla gawla ngi Simeyey a kilam ngi hay Akis, mangal ngi Maˀaka, buy ngi ruwuy Gat. Mizli a soko ɓaka ɓi nah da Simeye: «Gawla ɗikeye, t'ani a Gat.»

⁴⁰Akẽh na, Simey a slikiɗ, a juwa zungu naŋ, ara supo gawla naŋhay a hay Akis a Gata, a mo taŋ.

⁴¹Mizli a soko ɓaka da Salomoŋ, Simey aru le zleˀe nga Gata, ani a mo le nga Zeruzalem a muŋ.

⁴²Ar nah na so na, buy a slin, a zilakaŋ Simeye, a ɓaŋ na: «Yi ɓuw le ɗaˀ ɗaˀ le, yo yi hudum le ti slimiɗ ngi Bumbulvuŋ tuwa takwa? Yi ɓuw na: ‹Tapas ka misa bi le, ki ru le ko nga maka gar na, si na sin le, ki muc cummo kini takwa?› Ki mbiɗiy di: ‹Kuy! I cine le kini takwa?›

⁴³Hudum a mbuŋ Bumbulvuŋ na, ki ja ɓi nah a hirnga ta vur mike? Ɓi ya muɗuvuw di na, ki ngila ɓi nah vur mike?»

⁴⁴A dirba nah na, buy a ɓa Simeye: «Malambaˀ ka miga gar da baha Davit na, ka vuna, ki si na le a mevel ɗike takwa? Naŋ kanah ya, moˀore ɗik na, Bumbulvuŋ a mbiɗa nga hirnga ɗiki.

⁴⁵Amma Bumbulvuŋ a sa ɗuwuliy mi da ya Salomoŋ, yo a sa vula gidaŋ da zuma buyo ndrehhe a wazlaray Davite.»

⁴⁶Buy a vula jiviɗ da Benaya, mangal ngi Yoyada, a bi ti Simeye, ara kiɗa vagay. Zle ti nana, zumabuy a cici gidaŋ gidaŋ a haŋ Salomoŋ.