Read South Giziga 1KI 20 Bible Online

1KI 20 - South Giziga bible

1KI 20

¹Ben-Hadat, buy Siri, a kuso soje naŋhaya gar. Buyoy kukur makir nga cuw mujumoko ng'avaŋ, naŋ ti pilisey ati mota ngi vurumoyo ma. Aru, a ndaha hirnga ngi walahay Samari, a zlaŋ ngi kiɗa vu.

²Ben-Hadat a slin mizli ng'avu Akap, buy ngi Israyele,

³ɓa ara ɓakaŋ: «Ben-Hadat a ɓuw na: ‹Vuliy ɓiri bara ati ɓiri tapasl tapasl ɗikey na da ya. Yo ngwas ɗikey ati ziri ɗik mimezlehey na gar, vuliy taŋ da ya ma.›»

⁴Buy ngi Israyele, a slin ɓa ara mbiɗakaŋ di: «Haˀaw, buy ɗu kumani mezle, naŋ kaɓa ka miɓa vuna. Ya vuna ati gwat ya misi ti naŋ gar na, ndr'i ngi ɗikeye si.»

⁵Akẽh na, misliney a ram, a moko ng'avu buy Akapa a muŋ ma, a ɓakaŋ: «Ben-Hadat a ɓuw na: Yi slin mizli le ɓa a ɓukuw ɗaˀ le: Ɓiri bara, ɓiri tapasl tapaslati ngwasay waɗ ziri ɗikeye, kisa vuliy taŋ da ya so tuwaŋ.

⁶Cin, tipirik ar ler ka misenna na, i sa slina gawla ɗuwoyo ng'avu ka, ɓa ara cam a puraka hay ɗik ati ngi gawla ɗikeye. Gwat mupuɗaw puɗaway avu ka gar na, a sa hilaka taŋ, a sikiy taŋ da ya.»

⁷Ar nah na, buy ngi Israyele, a zila micawwa ngisi ruwuyoy gar, a ɓa taŋ: «Mbur hana a wuɗ a ga ndra malambaˀa. Puraka ɓi nah kuy kuy ɗi! Asi mike na, a slino ng'avi ya, a ɓiy ɓa i vulaŋ ngwas ɗuwoy ati ziri ɗuwoyo ɓiri bara ati ɓiri tapasl tapasl ɗuwoyo amma ko yi sli himaˀ neˀ le ta.»

⁸Mizli micawwahay ati Israyeley gar a ɓakaŋ: «Ki cinaŋ di ta, ko ki tiɓaŋ di ta!»

⁹Akap a mbiɗa da mislin ngi Ben-Hadataya: «A ra ɓaka, buy, kumani ɗu na: ‹Buy kumani ɗu mislino ngi cufuɗiy ya gawla naŋ sar mudumbuŋ na, yi sa ga nah ɓula, amma naŋ micifiɗiy hana na, y'anta ga ta.›» Joˀ misliney a mam, ara mbiɗaka ɓi nah da Ben-Hadata so.

¹⁰Ben-Hadat a slin ng'avu Akapa ma, ɓa ara ɓakaŋ: «Wurenna, yi sa ngizla hirwuy Samari gar. Ko murɓuk anta sa ndir a diga ngi tisla soje ɗuwoyo dirɓas haŋ ta. Da yi ga kanah ta na, anja kulihey a gikiy bonoy mukuy ta muwãˀ naŋ.»

¹¹Buy Israyel a mbiɗa taŋ di: «A ra ɓaka Ben-Hadata, ɓa a cine kicuwul ani: ‹Mbur majuw vu ng'ar vurum ti juw aruŋ na, anja a huhum vu kaɓa mbur mulum bugawla le si ta.›»

¹²Ben-Hadat micina ɓi misenna na, naɓa ara sam mbaazla zleˀe ati buy mekelemey ar guɗuku. Joˀ a ɓa gawla naŋhaya: «Juwam vu nga kiɗa vu.» Dar gawla naŋhay a juwam vu nga kiɗa vu ati walahay Samari.

¹³Amma, mijiviɗ ngi Buymisemuŋ a so luuma Akap, buy Israyele, a ɓaŋ: «Bumbulvuŋ a ɓuw na: ‹Kˀada ki pura zigiduw muˀurnok ˀurnok hana ya? I sa vuluw taŋ dana asi haŋ ɗiki, ɓa ki si na yi Bumbulvuŋ.›»

¹⁴Akap a ɓaŋ: «Ki sa vuliy taŋ asi haŋ ɗu vuna ti jiviɗ wanaka?» Mijiviɗ a mbiɗaŋ di: «Bumbulvuŋ a ɓuw: I sa vuluw taŋ ti haŋ sojehey, buy ngi hirwuy ka miwa taŋ mihilaka taŋ na.» Akap a maŋ mingiɓi ava ma: «Masa zla kiɗa vu i waka?» Mijiviɗ a mbiɗaŋ di: «I ka vuna.»

¹⁵Buy Akap a pura na, sojehey, buy ngi hirwuy naŋ miwa taŋ mihilaka taŋ tuwa, taŋ skat skat cuw ti kukur makir nga cuw. Waɗ ma na, a pura mizli Israyeleye gar na, zileye, taŋ durmuk tarnaˀa.

¹⁶Taŋ mubam nga kiɗa vu na, i ngi wuzla papasa, naɓa Ben-Hadat ati buyoy mizli ngir makir tuwa, a wam le ar guɗuko.

¹⁷Soje buy miwilihey mihilaka taŋ tuwa, a cohom dumbuŋ nga kiɗa vu. Ben-Hadat a slin mizli nga pura, da i gwat mi migi ka na. Mizli a ɓakaŋ: «I sojehey musoko ti Samari.»

¹⁸Ben-Hadat a ɓa mizli naŋhay tuwa na: «Da a soko ngi jam ngi vu na, jaka taŋ ti ji kaw kaw kine, yo da a soko ngi kiɗa vu kwana, jaka taŋ ti ji kaw kaw kine na si.»

¹⁹Gawla, buy miwilihey mihilaka taŋ tuwa, a bam tir walahaya. Soje Israyeleye, ara sipaka taŋ ti dirba.

²⁰Ko wa mulum mesene naŋ le gar na, ara kiɗaŋ. Mizli Sirihey a kilam mber mber, joˀ Israyeley a sipaka taŋ. Ben-Hadat buy Siri a laham ati mizli mekelemeye mbele pilisi.

²¹Naŋ kahana, buy Israyel mibi nga kiɗa vu: a ngizla misi piliseye kuɗup ati mota ngi vurum taŋhaya. A kiɗa soje Siriheye sunok sunok.

²²Akẽh na, mijiviɗ ngi Buymisemuŋ a so luuma buy Israyele, a ɓaŋ: «Cici gidaŋ gidaŋ, ko ki zluwun ta, amma wuluk ar gwat ka masa ga wurenna so, asi didirba na, buy Siri a sa so nga kiɗa vu ati ka.»

²³Buy Siri, gawla naŋhay a ɓakaŋ na: «Buymisemuŋ ngi Israyeleye naŋ a muwã, taŋ migidaŋ haɗa fineˀ ndra na, aseˀe. Amma kuɗukum taŋ ar li micay, ko mbri na, i sa funaka taŋ ti gidaŋ.

²⁴Wurenna so na, gwat ka masa ga anihĩ: Buy gar na, kiraha tir li ngi slra naŋ avra, ci buy miwi li ar li naŋ.

²⁵Ka ti haŋ ɗike, hil sojehey haɗa kaɓa mikiɗahay na, yo pilisey ati mota ngi vurum haɗa kaɓa misi zleˀe na ma, ɓa i ra kiɗaka taŋ ar li micay. Ko mbri na, i sa funaka taŋ ti gidaŋ.» Ben-Hadat a tiɓa mi ngi kuti taŋ na le, a ga gwat taŋ miɓakaŋ di na gar.

²⁶Didirba naŋ na, Ben-Hadat a slufa soje Siriheye, a ram ng'ar walahay Afek ɓa a kiɗam vu ati Israyeleye a diga.

²⁷Buy Akapa kwana, a slufa soje Israyeleye ya, a vula taŋ gwat ngi zumo, a ram nga ji hirnga ti soje ngi buy Siriheye ɓa ngi kiɗa vu. Soje Israyeleye, taŋ ti ngay taŋ taˀ taˀ cuw, kaɓa gezleŋ meciɗek ngi away. A pam, taŋ hiri tataˀ ati soje ngi Siriheye. Amma soje Siriheye, taŋ a nahaka hirwuyo le ɗǝŋ ɗǝŋ.

²⁸Mijiviɗ ngi Buymisemuŋ a so luuma buy Israyele ma. A ɓaŋ: «Bumbulvuŋ a ɓuw na: Sirihey a ɓam: Bumbulvuŋ, Buymisemuŋ ngi Israyeleye, naŋ a muwã, i Buymisemuŋ ngir li micay ta. Vurˀe, zigiduw muˀurnok ˀurnok nah na, i sa vuluw taŋ asi haŋ ɗiki, ɓa ki si na ya i Bumbulvuŋ.»

²⁹Soje Israyeley ati soje Siriheye, a pam t'ada, hiri tataˀ, hã hin tarnaˀ. Angi hin mitarnaˀ naŋ na, kiɗa vu a zli. Israyeley a kiɗaka Siriheye, hã a kiɗam asi soje misi saraya durmuk skat angi hin purla.

³⁰Mizli mindiramay durmuk kukur cuw nga tarnaˀ na, a kilam gar ara ɗumom ar walahay Afek. Mohol ngi walahay a mbizli ng'ar taŋ. Ben-Hadat mikil tuwa ya na, ara ɗum ar walahay, ar viŋ mukulkuc pal naŋ.

³¹Ben-Hadata, gawla naŋhay a ɓakaŋ: «I cinaka na, a ɓam: buy Israyeleye i buy mupura ircecehey. Wurenna, kukum zana ngi vagay avu vu, juwukum zeweɗ hir hir da hirngahaya, ɓa i bam, i ra jam hirnga ti buy Israyele. Asinta, a sa puluw ti siifa kwani.»

³²Dar a kam zana ngi vagayay, a juwam zeweɗ hir hir da hirngahaya, a ndilam a hay buy Israyele, a ɓakaŋ: «Gawla ɗik Ben-Hadat a tumbuluw, anja ɓa ki pulaŋ ti siifa takwa!» Akap a mbiɗa taŋ di: «Ben-Hadat vuna naŋ da ti siifa aruŋ jak kwa? Da kine na, i sukum ɗu takwa!»

³³Mislin ngi buy Ben-Hadataya, a puraka na, buy Akap a tiɓa taŋ le kuy. Joˀ taŋ tuwa, a wusam vu, a ciram ti seˀe, a ɓakaŋ: «Ben-Hadat i sukum ɗik gisiŋ.» Akẽh na, Akap a ɓa taŋ: «A ra ziloko di.» Ben-Hadat a bo tir li naŋ muɗum zleˀe tuwa ng'avu Akapa, joˀ Akap a ɓi, ɓa a zuɓakaŋ ar mota ngi pilis naŋ.

³⁴Ben-Hadat a ɓa Akapa na: «Walahayay, misi baha mitiɓa taŋ zleˀe avu bunuk na, yi muw taŋ a muŋ. Ka kwana, ndir hay ngi gi tererehey a Damasa, kaɓa baha mindir zleˀe a Samari na ya.» «Yo ya, i sa jum ˀay ati ka, ɓa i sa puluw ɓa ki ru.» Akap a jumom ˀay ati Ben-Hadata, dar a pulaŋ aru so.

³⁵Bumbulvuŋ a ɓi mbur purla a wuzla mijiviɗ naŋhaya ɓa a ɓa cil naŋ: «Ambuh, inga kiɗiy takwa.» Amma mbur tuwa, a ngum ngi kiɗaŋ ta.

³⁶Akẽh na, mijiviɗ ngi Buymisemuŋ tuwa, a ɓa mbur mungum kiɗ naŋ ta tuwa: «Ani ki ngum cine mi ngi Bumbulvuŋ ta, ka masa cuh, ki puliy na, mobor a sa kiɗuw.» Naŋ kanah, ti mbur tuwa macuh le na, mobor a ji di hirnga, a kiɗaŋ vagay.

³⁷Mijiviɗ tuwa, a ji hirnga ti mbur mekelem ma, a ɓaŋ: «Ambuh, inga kiɗiy takwa.» Dar mbur a kiɗaŋ, hã a gaŋ waˀa.

³⁸Ar nah na, mijiviɗ ngi Buymisemuŋ a mbiza hiri ti zana, ɓa a sinakaŋ ta, waɗ ara ɗum ɗum a ciki jiviɗ ngi buy Akap masa cuh ti nga na.

³⁹Ti buy tuwa mira cuh na, mijiviɗ ngi Buymisemuŋ a tilaŋ mi, a ɓaŋ: «Kumani, ya gawla ɗike, i ro zle ar li kiɗa vu. Amma mbur a bo kwaŋ ti wuzla vurumo, a so ti mbur, a ɓiy: ‹Jigina mbur misenna! Da a sumuɗ le na, kisa wurka hirnga naŋ ti siifa ɗiki, malla ta na, kisa piy suloy bara gabal makir.›

⁴⁰Amma, ya gawla ɗike, ti ya magi welele ti ka ti ka na, mbur mija tuwa, a sumuɗu.» Ar nah na, buy ngi Israyel a mbiɗaŋ di: «Na, ki sla kiita ngi hirnga ɗike le ti haŋ ɗik vuna si takwa.»

⁴¹Neˀ na, mbur tuwa, a turo zana, naŋ mumbuza hiri ti nah tuwa. Akẽh na, buy Israyel a si na le, i mbur ngisi mijiviɗ ngi Buymisemuŋhoy.

⁴²Dar mijiviɗ ngi Buymisemuŋ a ɓaŋ: «Bumbulvuŋ a ɓi na: ‹Ya, i vul mbur le ngi kiɗ vagay, amma ka, ki pula, a lihi. Vurˀe, kisa wurka hirnga naŋ ti siifa ɗiki. Sukwi ɗikey kwana, a sa wurkaka hirnga ngi sukwi ngi mizli naŋhaya, ti siifa taŋ ya.›»

⁴³Dar buy ngi Israyel a mi ngi hay naŋ a Samari ti lik, waɗ ti mevel.