Read South Giziga 1KI 21 Bible Online

1KI 21 - South Giziga bible

1KI 21

¹A dirba gwat tayna mucohom na, ɓihey mindiloko anihĩ: Nabot, i mbur Zisreyel. Naŋ ti guva ngi gudubun a Zisreyele. Guva vuna naŋ gweˀ avu hay ngi Akap, buy Samari.

²Ngi pas mekeleme, Akap a ɓa Naboto: «Inga vuliy guva ngi gudubun ɗik na, ɓa i gi di jarne ngi laray takwa! Asi naŋ gweˀ haɗa avu hay ɗu. Ɓa i sa vuluw guva ngi gudubun mimezle ar deɗe nah. Yo da a cǝruw hiri ta na, i sa wurkuw di ti ɓiri bara.»

³Amma, Nabot a mbiɗaŋ di: «Ɓa i zuɓa guva ngi dideˀ ɗuwoyo i vuluw di na, anja Bumbulvuŋ a tikiy.»

⁴Akap a mi nga hay naŋ ti lik, yo ti mevel, asi Nabot, mbur Zisreyel miɓaŋ: «Guva ngi dideˀ ɗuwoy mupulikiy di na, yi vuluw di ta.» A hin kuɓ ar arngawo naŋ, hiri pulaˀ ng'avu dalam, ko a ngum zuma gwat ta.

⁵Ngwas naŋ Zezabel a so luma, a ɓaŋ: «Ki lik, yo ki ngum zuma gwat ta vur mike?»

⁶Akap a mbiɗa da Zezabele: «Nabot, mbur Zisreyele, yi ɓaŋ: ‹Vuliy guva ngi gudubun ɗik na, ɓa i wurkuw ɓiri bara ar deɗe nah, malla da a cǝruw hiri ta na, i sa vuluw guva ngi gudubun mekelem ar deɗe nah› Naŋ a mbiɗiy di: ‹Y'anta vuluw guva ngi gudubun ɗu ta.›»

⁷Ngwas naŋ Zezabel tuwa, a ɓaŋ: «Mazum buy ar hirwuy Israyel wurenna i ka takwa? Slikiɗ, zum gwata, mumul a mevel ɗike. Masa vuluw guva ngi gudubun ngi Nabot, mbur Zisreyele, i yaha.»

⁸Zezabel a tuh letirey toh toh ti slimiɗ ngi Akapa, waɗ slimiɗ ngi Akapa taˀ taˀ ar taŋ. A slina taŋ da micawwa ati mizli madiɗa ngir walahay, Nabot misi anga tuwa.

⁹Mingiɓi naŋ mutoho angi letirey vuna ani: «Tilam mi ɓa mizli a gam dalyam. Da mizli a cifam le ar kus madiɗa na, cifaka Naboto a mbuŋ.

¹⁰Cifam mizli kesefey lambaˀ cuw, hiri pulaˀ pulaˀ ng'ar Naboto, ɓa a sa gam sedewo ar Nabot vuna, a sa ɓam: ‹Nabot, ki za Buymisemuŋ le, yo ki za buyo le ma.› A dirba nah na, kisa bam di ng'avra, kisa kuyupakaŋ ti ɗugur, a mucu.»

¹¹Mizli ngir walahay Zisreyel, micawwahay ati mizli madiɗa ngi buyoy misi ar walahaya, a gaka kaɓa mingiɓi ngi Zezabel mutoho taŋ di ar letirey, naŋ mislina taŋ di tuwa.

¹²A tilam mi ngi gi dalyama, waɗ ar kus madiɗa, a cifaka Naboto a mbuŋ.

¹³Mizli kesefey mucuw tuwa, a soko cifam, hiri pulaˀ pulaˀ ng'ar Naboto, a zlaka a kupakaŋ ɓi a mbuŋ mizli gar, a ɓakaŋ: «Nabot, ki za Buymisemuŋ le, yo ki za buyo le ma.» Neˀ si na, mizli a bam ti Nabot tuwa tir walahaya ng'avra, a kuyupakaŋ ti ɗugur, a mucu.

¹⁴A dirba nah na, mizli a slinam ng'avu Zezabele, a ɓakaŋ: «Nabot tuwa, i mukuyupa le, a muc le.»

¹⁵Zezabel micina, Naboto, i mukuyupa le, a muc le na, a ɓa Akapa: «Guva ngi gudubun ngi Nabot, naŋ mungum ngi vuluw di, ɓa ki wurkaŋ di ti ɓiri bara ta tuwa na, slikiɗ, zuma da ka so, asi Nabot vuna, naŋ anta ti siifa mata, a muc le.»

¹⁶Akapa, micina, Nabot a muc le na, a slikiɗ, aru ng'ar guva ngi gudubun a Zisreyele, ɓa a zuma da naŋ.

¹⁷A dirba nah, Bumbulvuŋ a ɓa mijiviɗ Eli, mbur Tisebe:

¹⁸«Slikiɗ, ara ji hirnga ti Akap, buy Israyele, a Samari. N'ada ar guva ngi gudubun ngi Naboto. A wuɗ ɓa a zuma da naŋ.

¹⁹Ki sa ɓaŋ na: ‹Bumbulvuŋ a ɓuw: Ki kiɗa mburo le, na ki wuɗ ki zuma guva naŋ da ka ma sukwa?› Ki sa ɓaŋ ma na: ‹Bumbulvuŋ a ɓuw: Li, kirihey mitirnaˀaka pumbus ngi Nabot na, kirihey a sa tirnaˀaka pumbus ɗik a diga ya.›»

²⁰Eli ara ɓa ɓi nah da Akapa, dar Akapa a ɓa Eli: «Ki lumiy le a muŋ so mesene ɗu!» Eli a mbiɗaŋ di: «Yi lumuw le a muŋ, asi ki vula vu ɗike le ngi gi gwat a mihiri ngi Bumbulvuŋ.

²¹Ani, Bumbulvuŋ a ɓuw: ‹I sa slino mendere ng'ar ka. I sa susuymuw avra. Mizli mizile ngi hay ɗikey, ka Akap gar na, i sa ngizla taŋ kuɗup avra, bekehey ati mizli dimuhoy ngisi hirwuy Israyel gar.

²²I sa gi ti hay ɗike kaɓa ya migi ti hay ngi Zeroboˀam, mangal ngi Nebat yo kaɓa ya migi ti hay ngi Basa, mangal ngi Ahiya zleˀe nana. Asi mike na, ki giy gwat ngi ji mevel le, yo ki hizigiɗa Israyeleye, a gam mungra le.›»

²³Bumbulvuŋ a ɓi vur Zezabele: ‹Kirihey a sa humbuɗaka Zezabele a ciki mohol a Zisreyele ya.›

²⁴Mbur ngahay Akap gar masa muc ar walahay na, i kirihey masa humbuɗakaŋ, yo mbur masa muc a duba gala gar na, i ɗiyuwoy masa ndakaŋ.»

²⁵Mbur muvula vu naŋ ngi gi gwat malambaˀ a mihiri ngi Bumbulvuŋ kaɓa Akap na, a lumam mbur kanah ɗaˀ ta. Asi Akapa, i ngwas naŋ Zezabel mipaŋ mi.

²⁶A gi gwat malambaˀ mukuy ta le wãˀ ti huruk huruk naŋ avu kulihey, kaɓa Amorihey, Bumbulvuŋ muɓula taŋ, ɓa a pulaka li da Israyeley na.

²⁷Ti Akap micina mingiɓi nah na, a ngira zana naŋhaya, a ki zana ngi vagay, a gi dalyam. Naŋ ada ti zana nah tuwa, a hinje di avu vu, yo aru zãyaˀ zãyaˀ.

²⁸Joˀ Bumbulvuŋ a ɓa mijiviɗ Eli, mbur Tisebe:

²⁹«Akap mihin hirnga le a mbuŋ ɗu na, ki si na le kwa? Angi hin ngi siifa naŋ na, y'anta sa slino mendere ar mizli ngi hay naŋhaya mata, asi naŋ mihin hirnga a mbuŋ ɗu na, sey i sa slino di angi hin ngi mangal naŋ masa zum buy.»