Read South Giziga 1KI 22 Bible Online

1KI 22 - South Giziga bible

1KI 22

¹Hirwuy Siri ati Israyel a gam vi cuw manja vurum ar wala taŋ.

²Angi vi mimakir naŋ so na, Zozafat, buy Zuda, aru ng'avi Akap, buy Israyele.

³Buy Israyel a ɓa gawla naŋhaya: «Ramot, hirwuy Galaˀat i ngi ndra na, ki sinaka le takwa! Na i wulkam cuw cuw ngi tiɓi naŋ tisi haŋ ngi Siriheye vur mike?»

⁴Zozafat muso ng'avi Akap tuwa na, Akap a cufuɗa so: «Ɓa i gam vurum ngi tiɓa Ramot, hirwuy Galaˀat na, ki ngum kwa?» Zozafat a mbiɗaŋ di: «Ndra ati ka i misi purla, mizli ɗuwoy i mizli ɗikey, yo pilis ɗuwoy i pilis ɗikey.»

⁵Zozafat a ɓa Akap, buy Israyele ma: «Inga cufuɗa Bumbulvuŋ ɗagay sini.»

⁶Buy Israyele, a kuso mijiviɗeye, a gam gwat ngi mizli skat skat mufaɗa, a cufuɗa taŋ: «Ani zliv i ra gi vurum a Ramot, hirwuy Galaˀat na kwa malla i pula ɓi nah teˀ kwa mbrike?» Mijiviɗey a mbiɗakaŋ di: «Aru, Bumbulvuŋ a sa vula Ramot asi haŋ ɗike, buy.»

⁷Amma Zozafat a cufuɗa buy Akapa: «Mijiviɗ ngi Bumbulvuŋ mekelem anta aka takwa? Anja i cufuɗaka Bumbulvuŋ ava.»

⁸Akap, buy Israyel a mbiɗaŋ di: «Mbur mekelem ada aka, anja zliv i cufuɗaka Bumbulvuŋ ava gu, amma ya i wuɗ ɓi naŋ ta, asi naŋ anta ɓi ɓi mezle masa gi ar ya ta, amma sey ɓi malambaˀ tewle: i Mise, mangal ngi Imla.» Dar Zozafat a ɓa Akapa: «Kay, ka buyo anja ki ɓi kanah ta.»

⁹Buy Israyel a slin mbur migi slra naŋ purla nga zilo Mise, mangal ngi Imla tuwa kutum.

¹⁰Buy Israyel ati Zozafat buy Zuda, cuw taŋ a cifam le joˀ joˀ, mbur gar ar janga nga naŋ buyo zana ngi buyoy ɓaˀ ɓaˀ avu vu, taŋ a mizlingre ngi ci ng'ar walahay Samari. Naɓa mijiviɗeye gar ara tilam mi a mbuŋ taŋ akẽh ti ɓi Buymisemuŋ minjika taŋ di.

¹¹Sidekiya, mangal ngi Kenaana, a ɗiyi durum ngi ɓirihey le, a ɓi: «Bumbulvuŋ a ɓi na: ‹Ki sa zliga soje Siriheye ti durum hanayna, hã ki kiɗa mi taŋ.›»

¹²Dar mijiviɗ mekelemey gar a ɓam di i mi mupurla ani: «Aru nga gi vurum ati Ramoto hirwuy Galaˀata. Ki sa lum bugawla, Bumbulvuŋ a sa vuluw di asi haŋ ɗike, buy.»

¹³Mislin muru nga zila Mise tuwa, a ɓaŋ na: «Cina ɗi, mijiviɗeye gar taŋ, ani ˀay taŋ jom purla ngi njika ɓi ngi gwat mezle masa gi avu buyo. Anja mingiɓi ɗik a zlir kasl ati nga taŋ na ya! Ɓi di i ɓi mezle masa gi avu buyo!»

¹⁴Mise a mbiɗaŋ di: «Hadam ti Bumbulvuŋ, naŋ da ti siifa! I sa ɓaŋ sey i ɓi Bumbulvuŋ masa ɓiy di tewle.»

¹⁵Mise a ndilo avu buyo buy a cufuɗaŋ: «Mise, ani zliv i bam nga gi vurum a Ramot, hirwuy Galaˀat na kwa malla i pulaka ɓi nah teˀ kwa mbrike?» Mise a mbiɗaŋ di: «Aru, kisa lum bugawla, Bumbulvuŋ a sa vula walahaya asi haŋ ɗike, buy!»

¹⁶Amma buy a mbiɗaŋ di: «I sa hudumuw sar kite ɓa ki ɓiy kaslsla ti slimiɗ ngi Bumbulvuŋ ka?»

¹⁷Akẽh na, Mise a mbiɗaŋ di: «Yi pura Israyeleye, a zliɗam hirnga le nga muwãhay, kaɓa tumuŋhoy manja mijigin. Joˀ Bumbulvuŋ a ɓi: Mizli tayna, buy taŋ anta. Anja mbur gar a mi ngi hay naŋ zuy zuy!»

¹⁸Ar nah na, buy Israyel tuwa, a ɓa Zozafata: «Yi ɓuw le takwa! N'anta njik ɓi mezle vur ya ta kini, sey ɓi malambaˀa.»

¹⁹Mise a mbiɗaŋ di ma: «Haˀaw Cina mingiɓi ngi Bumbulvuŋ. Yi pura Bumbulvuŋ le ar janga naŋ ngi buyo. Yogawla naŋhaya, dedeŋ dedeŋ tir vay hazum waɗ tir vay gula naŋ a muŋ.

²⁰Bumbulvuŋ a ɓi: ‹Masa tikina Akap ɓa ara zla kiɗa vu ati Ramot hirwuy Galaˀata, yo ɓa a kiɗaka vagay a diga na i waka?› Mbur gar, a zil mi pal avu ngi cala.

²¹Dar ˀUf ara cici a mbuŋ Bumbulvuŋ, a ɓi: ‹Y'ani, i ra tikinaŋ.› Bumbulvuŋ a ɓaŋ: ‹Ki sa ra tikinaŋ ti jiviɗ wanaka?›

²²A mbiɗaŋ di: ‹I bi, i ru, i ca wuluk ngi slir a balam mijiviɗ naŋhaya gar.› Bumbulvuŋ a mbiɗaŋ di: ‹Hana i jiviɗ mezle ngi tikin naŋ, ara ga kanah so.›

²³Da Bumbulvuŋ a ca wuluk ngi slir le a balam mijiviɗ ɗikeye gar na, kite i naŋ vuna mislino mendere ng'ar ka takwa!»

²⁴Neˀ na, Sidekiya, mangal ngi Kenaana, a kiroho ng'avu Mise, a caŋ babarva paw, a ɓaŋ: «ˀUf ngi Bumbulvuŋ a bi ti dama tivi ya, ɓa ara ɓuw ɓi ka?»

²⁵Mise a mbiɗaŋ di: «Haˀaw ɓula! Tapas ka masa ru ti ɗum ar li mukulkuc wãˀ a viŋ na, kisa sla wala ngi ɓi hana.»

²⁶Akẽh na, buy a ɓa gawla naŋ: «Ja Mise na, aru di da Amoŋ, buy ngir walahay, waɗ da yarma Yoˀas.

²⁷Ki sa ɓa taŋ na: ‹Buy a ɓukum na: caka mbur misenna ng'ar dangay, vulakaŋ gwat ngi zumo neˀkini waɗ yam frew si, sey da ya mumo le jam tir vurumo far.›»

²⁸Mise a mbiɗaŋ di: «Da ki mo le jam jam na, naɓa mingiɓi mubo ti balam ɗu na, i mingiɓi ngi Bumbulvuŋ ta.» Waɗ a ɓi ma: «Kum mizli gar, cinaka kuy kuy.»

²⁹A dirba nah na, buy Israyel ati Zozafat, buy Zuda, a ram nga gi vurum a Ramot, hirwuy Galaˀata so.

³⁰Ti taŋ maram na, buy Israyel a ɓa Zozafata: «I mbiɗa zanahaya, ɓa a sinikiy ta, ɓa i ci nga wuzla vurumo, amma ka, ka zana ɗik ngi buyoyo ɓula.» Joˀ buy Israyel a mbiɗa zanahaya, ɓa a sinakaŋ ta, a ci nga wuzla vurumo.

³¹Dambalaka, buy Siri a ɓi le ɗaˀ le da buy ngi mota ngi vurum naŋhay mizli ngir makir nga cuw na, a ɓa taŋ zleˀe: «Ko ki kiɗam vu ati sojehey malla madiɗa ngi sojehey ta, amma sey ati buy Israyel tewle.»

³²Vurˀe, buy ngi mota ngi vurumoyo mupuraka Zozafata keɗ na, a zlaka a ɓam: «Ko mbri na, ngi diga na, i buy Israyel tuwa.» A mbiɗam hiri ng'ar naŋ, ɓa ara kiɗam vu. Joˀ Zozafat a hiziga widi ngi vurum kaˀ.

³³Buy ngi mota ngi vurumoy mupuraka i buy Israyel ta tuwa, a pulakaŋ, dar a mam.

³⁴Soje Siri a mula luvuto lambaˀ si na, luvuto, a so mula buyo tir mizlir ngi mbaray naŋ. Buy a ɓa mbur misi mota ngi vurum naŋ: «Mo nga dirba, bi ti ya ti wuzla vurumo, asi a gikiy waˀa le.»

³⁵Tapasa, kiɗa vu a bul vu culok wãˀ, hã a pulaka buyo ar mota ngi vurum naŋ, hiri pulaˀ ng'ar soje Siriheye. Ngi pastaˀ naŋ na, a mucu. Pumbus ngi waˀa naŋ tuwa, a ɓul a hur mota ngi vurumo.

³⁶Ngi pas madiɗ na, mizli a wudam ar li taŋ mipam sar ara tuwa, a ɓam: «Mbur gar a mi ng'ar walahay naŋ, mbur gar a mi ng'ar hirwuy naŋ.»

³⁷A dirba nah, a ram ti vagay ngi buyo nga Samari, a dikaka a diga.

³⁸Ti taŋ mira bunaka mota ngi vurum ngi Akap ar futuŋ ngi Samari na, kirihey a soko tirnaˀaka pumbus naŋ, yo ngwas sulomehey kwana a soko bunam a diga ya. A gi le kaɓa mingiɓi ngi Bumbulvuŋ miɓa tuwa.

³⁹Ɓi ngi slra ngi buy Akapa mindiramay, gwat naŋ miga gar, hay naŋ mindira geˀ geˀ wuya ti sliŋ ngi begene, waɗ walahayay naŋ midira taŋ gar na, i mutoho taŋ le angi ɗerewol mazilaka ‹Ɓi ngi buy Israyeley.›

⁴⁰A dirba Akap mumuc na, mangal naŋ Ahaziya a zuɓa li naŋ.

⁴¹Zozafat, mangal ngi Asa micifi buy madiɗa Zuda na, naɓa Akap a ɓul di i vi mumufaɗ naŋ angi buy naŋ Israyele.

⁴²Zozafat micifi buy madiɗa naɓa naŋ ti vi kukur makir nga zlum. A zum buy a Zeruzaleme, vi kukur cuw nga zlum. A zilaka mumuŋ Azuba, zuŋ ngi Sili.

⁴³Ar gwat gar na, a sipi di i sar ngi cine naŋ Asa, ko a ngizli neˀ le ta. A gi di i gwat macira hiri da Bumbulvuŋ.

⁴⁴Na gar ti nah kwana, li miɗingir ɗingirey ngi mikuli ngi gi mikuliheye, a susuymo taŋ avra ta. Mizli ara gam mikulihey yo ara wuram ˀurdihey ar taŋ aruŋ.

⁴⁵Zozafata, a cifam zuy zuy ati buy Israyele.

⁴⁶Ɓi ngi slra ngi Zozafat, gwat madiɗa naŋ miga taŋ, ati vurumoy gar na, i mutoho taŋ le ar ɗerewol mazilaka: ‹Ɓi ngi buy Zudahay.›

⁴⁷Zil ati ngwas sulomehey ar slimiɗ ngi kulihey ada zleˀe ti hin ngi cine naŋ Asa. Naŋ a ngizla taŋ leɗeɗ tisi ruwuyo.

⁴⁸Ti di nah na, buy anta angi hirwuy Edomo ta, sey i mijingaˀ ngi buy miwi li, buy mucufa.

⁴⁹Zozafat a ɓa mizli, a ɗiyam palalam madiɗahay a Esiyoŋ-Geber, ɓa nga sipo ɓiri tapasl tapasl ar hirwuy Ofir. Amma a ndil gu mata, asi palalamay a sa waham le a Esiyoŋ-Geber.

⁵⁰Akẽh na, Ahaziya, mangal ngi Akap a ɓa Zozafata: «Anja gawla ɗuwoy a ram ar palalamaya ati gawla ɗikeye.» Amma Zozafat a ngum ta.

⁵¹Zozafat mumuc na, a dikaka a ciki dideˀ naŋhay ar walahay ngi Davit. Mangal naŋ Zoram a zuɓa li naŋ.

⁵²Ahaziya, mangal ngi Akap micifi buy a Samari, hirwuy Israyel na, naɓa Zozafat a ɓul di i vi mukuruˀ nga tarnaˀ naŋ ha ngi buy a Zuda. Ahaziya a zum buyo vi cuw ar sukwi Israyele.

⁵³Ahaziya a gi di i gwat micira hiri ta da Bumbulvuŋ. A sipi di i gi gwat lambaˀ kaɓa cine ati mumuŋ, waɗ kaɓa Zeroboˀam, mangal ngi Nebat, mica Israyeley ɓa a gam mungra tuwa.

⁵⁴A huruk a mbuŋ Baˀal , a gaŋ mezegwel. Ahaziya a ga gwat ngi ji mevel da Bumbulvuŋ, Buymisemuŋ ngi Israyele kaɓa cine miga zleˀe na ya.