Read South Giziga 1KI 3 Bible Online

1KI 3 - South Giziga bible

1KI 3

¹Buy Salomoŋ a zuɓ zuŋ ngi buy madiɗa ngi Ezipte, dar buy Ezipte a tiri jomo naŋ. Salomoŋ aru ti ngwas naŋ ng'ar hay ngi Davit a Zeruzalem, ɓa a kutuko, hã a ndira hay nga naŋ ɗagay, waɗ hay ngi Bumbulvuŋ ati mohol, gun hirnga ngi zeruzaleme ɗagay.

²Ti di nah na, mizli a gaka mikuli angi li miɗingir ɗingirey aruŋ, asi a ndiraka hay da Bumbulvuŋ, ɓa ngi zila slimiɗ naŋ anga t'aruŋ.

³Salomoŋ a wuɗ Bumbulvuŋ, hã a ga gwata kasl kasl kaɓa cine naŋ Davit miɓaŋ di ɗaˀ le zleˀe na. Amma so na, naŋ vuna a gi mikuli ti ginewey, yo a zluma urdiheye angi li miɗingir ɗingirey vuna ya.

⁴Ngi pas mekelem ada na, buy aru nga Gabaˀoŋ, ɓa ara gi mikuli a diga. Asi mike na, i li hirnga wãˀ ngisi li miɗingir ɗingirey gar. Salomoŋ a gi mikulihey mizlam zlam ti ginewey durmuk a diga.

⁵Ti Salomoŋ misi a Gabaˀoŋ a diga na, Bumbulvuŋ a bigaŋ vu ngi duvuɗ ar musuwun, a ɓaŋ: «Ki wuɗ i vuluw mike? Cufuɗiy!»

⁶Salomoŋ a mbiɗaŋ di: «Bumbulvuŋ, ki ga mezle le haɗa da baha Davit, gawla ɗike, asi a cifi a mbuŋ ɗike, kaslsla, jeŋŋe waɗ ti mevel purla. Vurˀe, ɓa gi mezle ɗik a kiɗ ta na, ki vulaŋ mangal mizile, ɓa a sa zum buy ar li naŋ, kaɓa ndra mapuraka dana ani na.

⁷Haˀaw Bumbulvuŋ, Buymisemuŋ ɗu, wurenna ki cifiy ya gawla ɗike le, ɓa i zum buy ar li ngi baha Davite. Amma, ani yi zuŋ aruŋ, yo i si na a zumaka buy vuna kahana kahana ta ma.

⁸Na, ya gawla ɗike, y'ani a wuzla mizli ɗikey, ka muwuna taŋ hana. I mizli mihaɗi teˀe, ko mbur a slufa taŋ gu ta, asi taŋ mihaɗa tuwa.

⁹Ambuh! Bumbulvuŋ, vuliy lesl mezle da ya gawla ɗike, ɓa ngi zumabuy ar mizli ɗikey, yo ɓa ngi sla wala ngi mezle ati malambaˀa. Da kanah ta na, i wa mazum buy gu ar mizli ɗikey mupuɗaw hanayna ka?»

¹⁰Cufuɗ ngi Salomoŋ a cira hiri le da Bumbulvuŋ teˀe.

¹¹Buymisemuŋ a mbiɗa da buyo: «Ani, ki cufuɗ vur hirnga ɗike, ɓa i vuluw hutuŋ subur ta, ɓa i vuluw zlili malla ɓa mesene ɗikeye, i kiɗa taŋ vagay vagay ta ma. Amma ki cufuɗ di i lesl ngi sli wala ngi zumabuy ti jiviɗ naŋ kaslsla.

¹²Vurˀe, weˀ avu cufuɗ ɗik na, y'ani vuluw sinmijileŋ ati lesl ngi sli wala ngi ɓi, ko mbur mulum kanah dumbuŋ ar ka, malla masa lum a dirba ɗike, anta.

¹³Ki cufuɗ zlili ati dudok ta, amma i sa vuluw taŋ. Angi hin ngi siifa ɗik gar na, a wuzla buy madiɗahaya, ko masa gi kaɓa ka, anta.

¹⁴Naŋ kine, da ki ra sipa jiviɗ ɗu, yo ɓimujuwa ɗuwoy ati ɓimuɗuva ɗuwoyo, da kira ja taŋ a hirnga, kaɓa bunuk Davit na, yi sa juw hutuŋ subur.»

¹⁵Salomoŋ mupuɗuk na, a si na le kwaŋ i Bumbulvuŋ miɓaŋ ar musuwuno. A mi nga Zeruzalem, waɗ a cici deŋ a mbuŋ akoti ngi jumoˀay ati Bumbulvuŋ. A gi mikuli mizlam zlam wãˀ ati mikuli ngi ngiɓiˀay, waɗ a di ɗaf ngi muguzlum da gawla naŋhay gar.

¹⁶A dirba nah, ngwas sulomehey cuw a soko a mbuŋ buy Salomoŋ.

¹⁷Ngwas purla asi taŋ a ɓa buyo: «Ambuh takwa kumani ɗu, anja ki cine mingiɓi ɗu ani. Ndra ati ngwas hana, angi hay purla. I yi mangal mizile mur naŋ.

¹⁸Hin cuw a dirba nah na, ngwas hana tuwa kwana, a yi mangal mizile ya. I ndra cuw cuw ndra a haya, ko mbur mekelem anta.

¹⁹Na, ngi duvuɗ nga dana na, a buɗa mangal naŋ, mangal a mucu.

²⁰Ngi wuzla duvuɗo, ti ya beke ɗike mahinje na, a zuɓa mangal ɗu, a hina tup a mbuŋ naŋ, waɗ mangal naŋ mumuca tuwa, a ka a mbuŋ ɗu.

²¹Ngi miprik nga dana, ya mupuɗuk ɓa i vula ɗuwa da mangala na, keɗ na, i mumuca. Li muwun kuy kuyo, i zizira i zizira na, i mangal ɗu, ya miya na ta.»

²²Akẽh na, ngwas mekelem tuwa, a ɓi: «Kanah ta, misi ti siifa i mangal ɗu, mumuca, i mangal ɗiki.» Amma, ngwas mudumbuŋ, ara ɓi na si: «Kanah ta, misi ti siifa i mangal ɗu, mumuca i ɗiki.» Dar a tiram kahana a mbuŋ buyo.

²³Ar nah na, Salomoŋ a sla taŋ di: «Ani ar wala kumo, mbur mekelem a ɓi: ‹Mangal misi ti siifa inga ya, mumuca i ngi ɗiki!› Yo mbur numuŋ a ɓi: ‹Kanah ta, mangal mumuca i ngi ɗiki, misi ti siifa inga yaha.›»

²⁴Akẽh na, buy a ɓa gawla naŋhaya: «Yawwa! Sikiy ti maslalam!» Joˀ a sakaŋ di.

²⁵Dar buy tuwa, a ɓi: «Mangal misi ti siifa na, bukoko wurasl a wuzla cuw, vulaka pal da ngwas purla, pal numuŋ kwana, vulaka da ngwas numuŋ ya.»

²⁶Mumuŋ ngi mangal misi ti siifa tuwa, naŋ mawuɗa mangal naŋ haɗa na, a ɓa buyo: «Ambuh takwa kumani ɗu! Zuwen vulakaŋ mangala ti siifa naŋ, ki kiɗaka vagaya ta!» Amma, ngwas numuŋ na, a ɓi: «Wurslikaka mangala a wuzla cuwo, ɓa naŋ anta sa ndir da ya ta, da naŋ ta.»

²⁷Akẽh na, buy a ɓi: «Mangal misi ti siifa na, ki kiɗaka vagaya ta, vulaka da ngwas mudumbuŋ na, mumuŋ i naŋ.»

²⁸Buy Salomoŋ misla kiita hana, Israyeley gar micinaka ɓi nah na, a ɗuvaka hirnga da buyo, asi a puraka na, muvulaŋ sinmijileŋ ngi sli kiita mijeŋŋe na, i Buymisemuŋ.