Read South Giziga 1KI 5 Bible Online

1KI 5 - South Giziga bible

1KI 5

¹Zuma buy mekelemey, zle a mizaw madiɗa, Efrat, a hirwuy ngi Filistihey waɗ sesẽŋ maakway ngi Ezipte na, Salomoŋ a wa taŋ le cek ceke. A wurkaka buutu da Salomoŋ, yo a gakaŋ slra ar hin ngi siifa naŋ wãˀ.

²Vur hin gar na, Salomoŋ, gwat ngi zum naŋ mawuɗ da naŋ vuna waɗ da mizli ngi hay naŋhay gar na, ani: hapa madadaw gar, ton ngoltir, waɗ hapa mukuɗ kuɗ, ton kuruˀ nga dangafaɗ.

³Sla muzlumburahay kuruˀu, sla muho gar, kukur cuw, tumuŋhoy skat, mbak muunihey, mangazaway, aw ɓuhoy ati urok madiɗa ngi ɓuhoyo le.

⁴Li vay si pas madiɗ vay ruwuy ngi mizaw Efrat, zle a Tifsa, hã a ndila Gaza na, Salomoŋ a wa buy ngi ruwuy tayna le gar na, a hinam hirnga a mbuŋ naŋ. A cifam zuy zuy ati hirwuy ngi ciki naŋhay gar.

⁵Mizli Zudahay ati Israyeleye, a cifam setette ar hin ngi zumabuy ngi Salomoŋ, mbur gar na, a ro zuy zuy ar guva ngi gudubun, yo ar guva ngi urufo naŋ, zle a Daŋ, hã a Ber-Seba.

⁶Salomoŋ, naŋ ti hayay durmuk kukur mufaɗa, da pilisey ati mota ngi vurumoy. Yo naŋ ti misi pilisey durmuk kuruˀ nga cuw.

⁷Buy miwi lihey mukuruˀ nga cuw, buy muwunaˀ taŋ tuwa, a vulaka gwat ngi zum da Salomoŋ waɗ da mizli naŋ mazilo taŋ ngi zuma gwat ati naŋ. Buy miwi li gar na, zayɓi ngi slra nah naŋ a hirnga naŋ, hã kiya pal wãˀ, yo sey a gi wer, ɓa gwat a kic neˀ le ta ɓula.

⁸Amma giziŋ waɗ murbuc da pilis ati sla ngi huvoy na, buy miwi lihey a vuloko di ng'ar li buy misi anga, kaslsla kaɓa naŋ muvula taŋ ɓi nah le.

⁹Salomoŋ, Buymisemuŋ a vulaŋ sinmijileŋ ati lesl le haɗi teˀe. Naŋ kine, sli wala ngi gwat, Salomoŋ mawuɗ haɗa gar na, taŋ haɗa fineˀ gidaŋ, haɗa kaɓa muyuŋ a mi mubuliy.

¹⁰Sinmijileŋ ngi Salomoŋ, a funa ngi mizli misi sinmijileŋ ngi mizli ngi ruwuy Arabiheye le gar, yo a funa sinmijileŋ ngi Ezipteheye le gar ma.

¹¹A funa mizli misi ti sinmijileŋheye le gar, fineˀ ngi Etaŋ, mbur Esrahi, ngi Heman, Kalkol ati Darda, ziri ngi Maholoy, vurˀe, slimiɗ naŋ a zil avu sukwi midigwi taŋhay gar.

¹²A ɓi mi ngi kicuwuloy le durmuk makir, yo a zli dimisey le durmuk ti zlum.

¹³A ɓi ɓi ngi sukwi ngi widisey le wal wal haɗa, zle avu miter ngi ruwuy Libaŋ, hã avu izop, magil a ciki moholoy. Yo a ɓi ɓi ngi gwat misãmihey le ma, ɓi ngi ɗiyuwoy, ngi gwatay maram ti kwacay waɗ ɓi ngi kilifey.

¹⁴Mizli a soko ti wuzla sukwi ngi mizli ngisi ruwuy gar, nga cine mingiɓi ngi sinmijileŋ ngi Salomoŋ, a soko ti vu buy ngisi ruwuyoy gar micinam, maɓaka ɓi ngi sinmijileŋ nah na.

¹⁵Hiram, buy ngi hirwuy Tire, i ngama ngi Davit zleˀe. Naŋ micina a caka Salomoŋ le, i buy ar li ngi cine naŋ Davite na, a slina gawla naŋhay ɓa ara jakaŋ haŋ.

¹⁶Salomoŋ kwana, a slin gawla naŋhay ng'avi Hirama, ɓa ara ɓakaŋ na:

¹⁷«Ki si na le, baha Davite, naŋ a lum haŋ ngi ndira hay da Bumbulvuŋ, Buymisemuŋ naŋ gu ta na, asi mesene naŋhay a gucokoŋ mi le ti vurumoy ti ka ti ka gar, amma ti nah gar na, Bumbulvuŋ a vulaŋ jiviɗ, a lum bugawla le ar taŋ.

¹⁸Amma, wurenna, Bumbulvuŋ, Buymisemuŋ ɗu, a vuliy muska vu le ti ka ti ka gar, mbak y'anta zluwun ti guco mi ngi mizli mazliram ti ya ta na mata, malla ko ngi mendere ta ma.

¹⁹I juwa le a mevel ɗu, ɓa i ndira hay da Bumbulvuŋ, Buymisemuŋ ɗu. Kaɓa Bumbulvuŋ miɓa ɗaˀ le baha ɗu Davit zleˀe. A ɓaŋ na: ‹Masa ndira hay ɓa ngi tumbul ɗu anga na, i mangal ɗik, ya masa wuna, ngi cifi ar janga ɗik ngi buy ar li ɗik na.›

²⁰Wurenna so na, ambuh takwa, ɓa ki ɓa mizli ɗikey munguma dumoyo ɓa ara ngumikiy miter a ruwuy Libaŋ. Gawla ɗuwoyo a sa gam slra bummoˀ ati gawla ɗikeye, yo yi sa wurka migir ngi gawla ɗikeye kaslsla kaɓa ka misa ɓiy di le gar, asi mike na, ki si na le, a hay ndra aka, ko mbur misina nguma dum kaɓa mizli Sidoŋhoy na anta.»

²¹Hiram tuwa, naŋ micina mingiɓi ngi Salomoŋ na cin si na, a mumul di haɗa teˀe, a ɓi: «Sise dana da Bumbulvuŋ muvula mangal misi sinmijileŋ da Davit, ɓa a zum buy ar mizli mihaɗa hanayna.»

²²A dirba nah na, Hiram a slin, ɓa ara mbiɗaka da Salomoŋ: «Ka mucufiɗiy na, i tiɓa le. I sa vuluw dum ngi miter ati ngi migidaŋ mimezle gar kaɓa ka mawuɗo.

²³Gawla ɗuwoyo a sa poko sar ti dumo ti muwã Libaŋ, a sa ram di sesẽŋ ar mubuliy, ya vuna, i sa ɓa taŋ a juwaka taŋ arleˀe, ɓa a paka taŋ capap capap ar yam maɓul, ɓa aru ti taŋ sesẽŋ ng'ar li ka masa bigiy di. Adiga kwana, a sa puskaka taŋ, ɓa gawla ɗikey a hilaka taŋ. Gwat ya mawuɗ ti vu ka so na, anja ɓa ki vuliy gwat ngi zum da mizli ngi hay ɗuwoyo ɓula.»

²⁴Dar Hiram a vula dum ngi miter ati ngi migidaŋ mimezle da Salomoŋ haɗa kaɓa naŋ muwuɗu.

²⁵Salomoŋ kwana, vi gar na, a vula gwat ngi zum da mizli ngi hay Hiramaya, alkamari, ton durmuk merkeɗe, yo mal mimezle ngi tutumbur, litir durmuk dangafaɗa.

²⁶Bumbulvuŋ a vula sinmijileŋ le da Salomoŋ kaɓa naŋ miɓaŋ di zleˀe tuwa. Naŋ kine, Salomoŋ a cifam ti ngiɓiˀay mezle ati Hirama, waɗ a jumom ˀay ar wala taŋ.

²⁷Buy Salomoŋ, a ɗiya jiviɗ ngi slra mitakˀay a wuzla Israyeley gar: i mizli durmuk kukur makir masa gaka slra nah.

²⁸Kiya gar na, a slin ti mizli durmuk kuruˀ nga muwã Libaŋ, a gam slra a diga kiya pal, a mbiɗam vu kanah, a dirba nah, a moko ngi hay, a gam kiya cuw, madiɗa ngi slra taŋ i Adoniram.

²⁹Salomoŋ, naŋ da ti mizli ngi jijira gwataya durmuk kukur tarnaˀ, waɗ ngi busla ɗuguroy a muwã Libaŋ mizli durmuk kukur dangafaɗ.

³⁰N'ada ti buy miwi li naŋhay, a wunam buy ngi slrahay durmuk makir ti skat skat makir ngi jigina mizli angi slra, taŋ a slufaka taŋ anga ta.

³¹N'ada ti buy miwi li naŋhay, a wunam di i ɗugur madiɗa madiɗahay, a hirkaka taŋ fetek fetek kuy kuy, hĩˀĩ ngi ɗuva virzi ngi hay ngi Buymisemuŋ.

³²Migi slra ngi Salomoŋhoy ati ngi Hiramay, waɗ mizli ngi ruwuy Bibloso, a zlaka ciɗa dumoyo ati busla ɗuguroy, ɓa ngi ndira hay ngi Buymisemuŋ.