Read South Giziga 1KI 7 Bible Online

1KI 7 - South Giziga bible

1KI 7

¹Salomoŋ vuna a ndir hay da naŋ ya. Ɓa hã naŋ misa tika slra naŋ wãˀ na, a gi di le vi kuruˀ nga makir.

²Hay naŋ mandira na, a zilaka Ɓuh ngi Libaŋ, jek naŋ metir kukur zlum, sliprik naŋ, metir kukur cuw nga zlum, waɗ gil naŋ, metir kuruˀ nga zlum. Taŋ mizilaka Ɓuh ngi Libaŋ na, asi a ndira angi ɓamtal ngi dum ngi miterey jobol cir cir mufaɗ, waɗ migilaɗ gilaɗ ngi jaha plafoŋ ar ɓamtal tayna vuna kwana i mbal ngi miter.

³Ti hirnga mbalay kukur mufaɗ nga zlum misi a hirnga ɓamtalay tuwa na, plafoŋ ngi ɓeɓele ngi miter cinjah cinjah jobol makir, jobol gar na, dum ɓeɓele kuruˀ nga zlum, kuruˀ nga zlum.

⁴Avu mivay ngi hay gar na, jobol ngi fenetirey cirre cirre makir, fenetir mizlira sliprik taŋhaya ti dum. Angi cinjih mimakir ngi fenetirey na, fenetir gar na, naŋ cakay dac cakay dac ati fenetir mekelem.

⁵Vigiɗ ngi fenetir tayna ati dum mizliraka mivay taŋhaya ti dum tuwa na, taŋ ti mivay mufaɗ mufaɗa. Fenetir gar na, naŋ cakay dac ati fenetir mekelem ngir cinjih mimakirey tuwa.

⁶Waɗ ma na, a ɗiyi guɗuk ti ɓamtalay: jek naŋ, metir kukur cuw nga zlum, sliprik naŋ kwana, metir kuruˀ nga zlum. A mizlingreŋ nah, a ɗiyi jawleeru misi viŋ mabo zuɗukko a mbuŋ nah.

⁷Aɗiyi jawleeru ngi cifi nga naŋ buyo a zilaka «Viŋ ngi gi kiita». A sirta zlar ti dum ngi miter, zle a ruwuy, sesẽŋ avu mbal ngi muŋhoy.

⁸Salomoŋ, mugum naŋ, naŋ angi li mekelem mbak wazlaraya, baˀ pal avu hay naŋ ngi gi kiita tuwa, amma a ndiraka taŋ i misi purla. Zuŋ ngi buy madiɗa ngi Ezipte, naŋ muzuɓa na, hay naŋ, naŋ mindiraŋ di na, i misi purla kaɓa hay nga naŋ nah vuna ya.

⁹Hay tayna gar na, a ɗiyaka taŋ ti ɗugur mezle, muwahay le weˀ weˀ, kuy kuy, yo miɗiyahay le sããt sããt ti vra ti huroˀo gar ti ɓiri ngi busla ɗuguroy. A gam slra ti ɗugur tayna, zle avu ɗuva virzi ngi hay, sesẽŋ avu kiɗa mi ngi dalam, yo zle avu dalam ngi haya waɗ ngi vra naŋ, sesẽŋ avu ngi mamay madiɗa.

¹⁰Ɓa ngi ɗuva virzi ngi hay nah na, a gam slra ti ɗugur mezle madiɗahay, sããta sããta, ɗugur ngi metir mufaɗ mufaɗ ati ngi zlum zlumoy.

¹¹Ɗugur mezle, miciɗahay le sããta sããta ati mbal ngi dum ngi miterey na, a ɗuvaka taŋ a hirnga virzi ngi hay muɗuva ti ɗuguroy tuwa.

¹²A gunoko wazlaray ngi hay madiɗa ti mohol ngi ɗugur mi, gun gun makir, waɗ ti dum ngi miter gun pal. Wazlaray ngi hay ngi Bumbulvuŋ ati jawleeru naŋ i miguno kanah vuna ma.

¹³Mbur ada, a hirwuy Tir, a zilaka Hiram. I mangal ngi ngwas wudiga mekelem ada, angi sukwi ngi Neftali, amma, cine naŋ i mbur Tir ɓula. Hiram a si na slra ngi gi ti ɓiri bara le, i mbur misi ti sin, yo naŋ ti lesl ati si na gi gwat ti ɓiri bara ko ka wanaka gar. Buy Salomoŋ a slin ɓa ara zilakaŋ ɗi, a so ngi hay buyo dar a ga slra naŋhaya so.

¹⁴

¹⁵Hirama a vuɗ ɓamtalay cuw ti ɓiri gazahay tuwa, jek taŋ metir ngoltir ngoltir, yo ɓa ngi guno hirnga ngi ɓiɓir taŋ, sey zeweɗ ngi metir merkeɗ merkeɗe.

¹⁶Aɗiyi mecepekey cuw ɓa a ɗuva taŋ a hirnga ɓamtalay tuwa, a pa taŋ ti pi ti ɓiri gaza. Mecepek gar na, gil naŋ metir cuw ti reta.

¹⁷Mecepek tayna, a ga taŋ wuya ti ɓiri gaza, njararakaɓa zuva waɗ slap slap kaɓa celelu, laŋ laŋ ka mufuyuku, da mecepek gar na, a gaŋ di tarnaˀ tarnaˀ.

¹⁸A hirnga ɓiri bara minjarara tuwa, a ɗiyi gwatay loŋ loŋ kaɓa yi ngi hunduruk, ɓa ngi ga wuya da mecepekeye. Mecepek gar na, hirnga nah gun gun cuw ti gwat miloŋ loŋ kaɓa yi ngi hunduruk tuwa.

¹⁹A hirnga ɓamtal misi ar jawleeru gar na, mecepek mekelem ada ma, a bam vu ati mufuyuk ngi matay mukusomkwal, gil ngi mecepek gar na metir cuw.

²⁰Amma a hirnga mecepekey vuna sina, li ada humbuɗokko. Li muhumbuɗok nah, naŋ ti hirnga gwat minjarara ati yi ngi hunduruk skat skat cuw, ming'aka taŋ gun gun hirnga mecepek gar.

²¹Hiram a nga ɓamtal mucuwoy tuwa, a mbuŋ jawleeru ngi hay ngi Bumbulvuŋ, mekeleme tir vay hazum, a zila nah Yakin. [2], yo numuŋ tir vay gula, a zila Boˀas. [3]

²²A hirnga ɓamtalaya wãˀ na, a ɗiyi gwat mubam vu ati mufuyuk ngi mukusomkwal tuwa ma. Naŋ kahana, slra mikiɗ mi.

²³Akẽh na, Hiram a gi kisa madiɗa, miligidaˀa, mipa ti pi ti ɓiri gaza, a zilaka Mubuliy. Boŋ naŋ metir zlum, gil naŋ metir cuw ti reta, yo kwacay naŋ gunno zlar na, metir kuruˀ nga zlum.

²⁴Gun si ˀay naŋ na, a gakaŋ wuya ti sukwi ngi tatiyak ada. Ar metir gar na, tatiyak kukur cuw, kukur cuw. Yi ngi tatiyakay tayna i mipa taŋ ti pi, jom arleˀe ati kisa.

²⁵Ki sa mazilaka Mubuliy tuwa, a ɗuvaka ar sla ngi ɓiri gazahay kuruˀnga cuw. Slahay a mbiɗaka hiri, sla makir, hiri pulaˀpulaˀ tir vay muŋ, makir tisi pas ngi pastaˀ, makir tir vay ruwuy waɗ makir tisi pas ngi mipriki, amma dumvu taŋ ngi dirbahaya, gar taŋ pulaˀpulaˀ ngir ti huroˀo, ng'asi kisa.

²⁶Ɓiɓir ngi mi ngi kisa, a gi saŋtimetir dangafaɗ. A ɗiyaka mivay nah kaɓa mi ngi sikiɗ ngi mufuyuk ngi matay mukusomkwal. Ki sa nah na, zliv a pi yam litir durmuk kukur dangafaɗ gu.

²⁷Akẽh ma na, Hiram a ɗiyi saret ngi ɓiri gazahay kuruˀu. Saret gar na, jek naŋ, metir cuw sliprik naŋ metir cuw waɗ gil naŋ kwana, metir pal ti reta.

²⁸Saret tayna, a ɗiyaka taŋ kahana: palalam ngi dumvu naŋ, i ɓiri gazahay sliprakka sliprakka, waɗ ɓeɓele ngi ɓiri gazahay, kilak kini kilak kini ar wala ngi ɓamtal ngi mivay naŋhaya.

²⁹Ar palalam ngi dumvu naŋhay mikilak kini kilak kini ti ɓeɓele ngi ɓiri gazahay tuwa na, a ga taŋ wuya ti foto ngi moboroy, gusoŋhoy ati kerubeŋhey, waɗ a ga ar ɓeɓele ngi muŋhoyo kana ma. Yo tisi is ngi moboroy ati gusoŋhoy tuwa waɗ ti hirnga taŋ na, a gi wuya ti sukwi ngi mufuyuk mijirɗa law law mapo kiyo kiyo.

³⁰Saret gar na, naŋ ti sar ngi ɓiri gazahay mufaɗ mufaɗ, yo avu sar mumufaɗay gar na, ganday ngi ɓiri gaza ada ngi ci ar wala taŋhaya. Ganday tayna i mipa taŋ ti pi zlar zlar avu dumvu ngi sarete, amma taŋ baˀ baˀ neˀ avu mufuyuk mijirɗahay tuwa.

³¹A hirnga saret gar na, a pulam mi ava ligidaˀa, migila nga muŋ gwat ngi reta metir, ɓa ngi ɗuva kisa anga. Mi naŋ na, zle a mivay naŋ, hã a mivay mekelem na, naŋ saŋtimetir kukur tarnaˀ nga zlum. A gaka wuya ti ɓiri gaza vuna, mislira ti slir. Palalam ngi dumvu ngi sarete, naŋ ti mivay mufaɗ ava, naŋ ligidaˀa ta.

³²Sar ngi saretey mumufaɗ na, taŋ tisi palalam ngi dumvu naŋ a mivay naŋhay, yo ganday ngi sar naŋhaya kwana, taŋ ar saraya, kulaˀ njoŋ, kulaˀ njoŋ tisi hur ngi saret tuwa. Sar ngi saret gar na, wuzla naŋ saŋtimetir kukur tarnaˀ nga zlum.

³³Saraya, taŋ misi purla kaɓa sar ngi mota ngi vurumoy: ganday naŋ ngi wuzla, sar naŋ mambiɗi tar tar a ruwuy, ɓiri memeɗe ngi jaha sar naŋ mambiɗi vuna ati ɓiri ngi hur kwacay naŋ gar na, i mipa taŋ ti pi ti ɓiri gaza.

³⁴Ganday mumufaɗay mukulaˀ kulaˀ a mivay ngi saret na gar na, i mipa taŋ ti pi zlar zlar avu dumvu ngi saret vuna si.

³⁵A hirnga saret gar na, a gakaŋ wuya ti loppol misi sliprik naŋ, saŋtimetir kukur cuw nga zlum gun gun hirnga ngi mi ngi sarete. Tir vay ngi muŋ ngi saret vuna, li ji haŋhay ava ati palalam ngi ɓiri gazahay mipa taŋ peˀpeˀ zlar avu dumvu naŋ vuna si.

³⁶Hiram a sli foto ngi kerubeŋhey ati moboroy waɗ mihaŋ ngi Babazlahay angi li micay kine avu li ji haŋhay waɗ avu palalam ngi saret tuwa, yo a gaŋ wuya ti mufuyuk mijirgiɗa ti jirgiɗ tuwa gun gun ma.

³⁷Naŋ kahana, Hiram miɗiya saretey mukuruˀ na. A pa taŋ ti pi ti ɓiri misi purla si, dumvu taŋ ati wi taŋ gar i misi purlahay.

³⁸Hiram tuwa a ɗiyi kisahay kuruˀ ava ma ti ɓiri gaza, ɓa a ɗuva taŋ a hirnga saret mukuruˀhoy na. Kisa gar na, gil naŋ metir cuw, yo a pi yam gwat ngi litir durmuk ti skat skat merkeɗe gu.

³⁹A pa saret misi ti kisahay tuwa, zlum tir vay hazum ngi hay ngi Bumbulvuŋ, waɗ muzlum mekelemeye kwana, a pa taŋ tir vay gula. Ki sa madiɗa mazilaka Mubuliy na, a ɗuva nah tir vay hazum ngi hay ngi Bumbulvuŋ, kini tir vay ruwuy ngisi pas- ngi- mipriki.

⁴⁰Hirama, a kiɗa mi ngi slra buy Salomoŋ muɗuvaŋ taŋ gar ngi gi ngi gi angi hay ngi Bumbulvuŋ na, ti naŋ miɗiya kisahay ati peley waɗ sikiɗ ngi kuca lihey na. Naɓa a ɗiyi gwatay le ani zleˀe si:

⁴¹ɓamtalay cuw, mecepekey miligidaˀ ligidaˀ cuw ngi tiɗi a hirnga ɓamtalay, gwat misi kaɓa zuvahay cuw, ɓa ngi sirta mecepekey miligidaˀ ligidaˀ cuw misi a hirnga ɓamtalay tuwa,

⁴²gwat misi kaɓa yi ngi hunduruk skat skat mufaɗ tingaˀ tingaˀ, gunno zlar gunno zlar cuw a hirnga zuva gar, tiɗeˀ tiɗeˀ a hirnga ɓamtalaya,

⁴³saretey kuruˀ waɗ kisahay kuruˀ taˀ taˀ a hirnga taŋ,

⁴⁴kisa madiɗa miligidaˀ mazilaka Mubuliy, waɗ slahay kuruˀ nga cuw, kisa nah vuna taˀ angi taŋ,

⁴⁵kisahay, peley waɗ sikiɗ ngi kuca lihey. Gwat tayna gar, Hiram a ɗiya taŋ angi hay ngi Bumbulvuŋ da buy Salomoŋ na. A ɗiya taŋ ti ɓiri gaza kuleɗ kuleɗe.

⁴⁶A paka gwat tayna gar ti pi ndar ndar a ruwuy, ar sozo ngi Zurdeŋ, ar wala ngi ruwuy Sukot ati Sartaŋ.

⁴⁷Akẽh na, Salomoŋ a ɓa mizli, a paka gwat tayna gar angi hay ngi Bumbulvuŋ. Taŋ haɗa teˀe, ɓa mbur a wuluk, ɓiri gaza mitiki angi slra hana vuna kilo kini na, ko anta.

⁴⁸Waɗ ma na, Salomoŋ a ɓa mizli, a ɗiyam gwatay hĩˀĩ ng'ar hay ngi Bumbulvuŋ. A ɗiyam di i li gi mikuli ngi ɓiri tapasl tapasl, tabul ngi ɓiri tapasl tapasl, ngi pi ɗaf ngi vul da Bumbulvuŋ,

⁴⁹gwat ngi ɗuva lampehey kuruˀu, muɗuva a mbuŋ li mihĩˀĩ ngi Bumbulvuŋ, zlum tir vay hazum waɗ zlum tir vay gula, taŋ cek ti ɓiri tapasl tapasl pal naŋ. Mufuyuk memeɗehey, lampehey waɗ megec memeɗe ngi gwat ngi ɗuva lampehey vuna cek ti ɓiri tapasl tapasl pal naŋ,

⁵⁰kisa madiɗa ngi mezegweley, sliwiɗey, sikiɗ ngi kuca lihey, kopoy, gojogoɗ ngi zluma urdihey, taŋ cek ti ɓiri tapasl tapasl pal naŋ, gwat ngi wuya avu palalam ngi miviŋhey ngi viŋ mazilaka ‹li mipal wãˀ›, waɗ ngi miviŋ ngi viŋ madiɗa na ma, taŋ cek ti ɓiri tapasl tapasl.

⁵¹Salomoŋ, ti naŋ mikiɗa mi ngi slra ngi ndira hay ngi Bumbulvuŋ wãˀ na, a ɓa mizli, a soko ti gwatay, cine naŋ Davit muvula taŋ da Bumbulvuŋ zleˀe na: i ɓiri bara, ɓiri tapasl tapasl, ati gwat mekelemey wal wal, waɗ a pa taŋ gar taŋ ar viŋ ngi zlili angi hay ngi Bumbulvuŋ.