Read South Giziga 1KI 8 Bible Online

1KI 8 - South Giziga bible

1KI 8

¹Hirak ti nah so na, micawwa ngi Israyeley, madiɗa ngi wuzla sukwihey ati buy ngi hay Israyeleye, Salomoŋ a zila taŋ kos kos ng'avaŋ a Zeruzalem. A ɓa taŋ ɓa a jijiraka akoti ngi jumoˀay ngi Bumbulvuŋ, zle ar walahay ngi Davit, ada zilaka Siyoŋ ma, ɓa a ram di ng'ar hay ngi Bumbulvuŋ.

²Israyeley gar a kusom ng'avu buy Salomoŋ, angi kiya mitarnaˀ naŋ, kiya Etanim, ɓa a gam muguzlum.

³Mizli micawwa ngi Israyeley a soko, joˀ masayay a jijiraka akoti ngi jumoˀaya.

⁴Naŋ kine, masayay ati levihey, a jijiraka akoti ngi jumoˀay ngi Bumbulvuŋ ati guɗuk ngi zlir ati Bumbulvuŋ waɗ gwat muvulahay da Bumbulvuŋ misi anga gar.

⁵Buy Salomoŋ ati jum ngi Israyeley gar, naŋ mizilo taŋ ng'ava a kẽh na, a cicam dedeŋ dedeŋ a ciki akoti tuwa. Joˀ a gam mikuli ti slahay waɗ tumuŋhoy haɗa teˀe, ko mbur a slufa taŋ gu ta.

⁶Akẽh na, masayay a cam ti akoti ngi jumoˀaya ng'ar li naŋ, ar viŋ mipal ngi haya, a zilaka ‹li mipal wãˀ›, a si kirpasl ngi kerubeŋhey.

⁷Naŋ kine, kerubeŋhey tuwa, taŋ kirpasl binjar binjar a hirnga li mihĩˀĩ ngi akoti ngi jumoˀaya, ɓa a ɗumoko akoti ati ɓeɓele ngi jijir naŋhaya.

⁸Ɓeɓele tayna taŋ jek jek haɗa, mbak mi taŋhaya a puroko sesẽŋ angi li mipal misi angi viŋ mipal na. Amma anta puraka taŋ sesẽŋ avra ta ɓula. Hã dana kwana, t'ada aruŋ.

⁹Misi angi akoti i belelerey mucuw tewle, Moyis mipa taŋ zle a Horep, ti di Bumbulvuŋ mujum ˀay ati Israyeley ti taŋ muboko baɗ a Ezipte na.

¹⁰Hirak ti masayay mira bam le tir li mipal na, gazlavay a posar, a naha hay ngi Bumbulvuŋ.

¹¹Masayay anta gaka slra taŋ gu t'aruŋ, vur gazlavay nah tuwa, asi mike na, dudok ngi Bumbulvuŋ a naha Haya le.

¹²Dar Salomoŋ a til mi, a ɓi: «Bumbulvuŋ, ki juwa le a mevel ɗike, ɓa ki cifi ar luvuŋ.

¹³Amma ya, i ndiruw hay ngi buy le, hay misi zliv kisa cifi anga hã ngi sete.»

¹⁴Akẽh na, buy a mbuɗo hiri, a ɗuwula mi da jum ngi Israyeleye gar. Jum ngi mizli Israyeleye gar, t'ada dedeŋ dedeŋ hijirik.

¹⁵Dar a ɓi: «I ra ga sise da Bumbulvuŋ, Buymisemuŋ ngi Israyele! Gwat, naŋ miɓa ɓi nah zleˀe da baha Davit na, a ga le, a ɓi zleˀe na:

¹⁶‹Zle ti ya mubo ti mizli ɗuwoy Israyeley ti Ezipte na, a wuzla walahay ngir sukwi ngi Israyeley gar na, ɓa walahay hana a sa ndirikiy hay anga ngi zila slimiɗ ɗu na, ko yi wini ta. Amma yi wuna Davite le ɓa a tiri buy ngi Israyel mizli ɗuwoy na ɓula.›

¹⁷Dambalaka na, baha Davite, a juwa le a mevele ɓa a ndira hay da Bumbulvuŋ, Buymisemuŋ ngi Israyele, ɓa a zilaka slimiɗ naŋ anga.

¹⁸Amma Bumbulvuŋ a ɓa baha Davite na: Ki juwa le a mevele ɓa ki ndiriy hay ngi zila slimiɗ ɗu anga, naŋ kuy.

¹⁹Amma so na, masa ndiriy hay nah i ka ta ɓula, i mangal ɗik, masa bo ti kwacay ɗiki. Masa ndiriy hay ngi zila slimiɗ ɗu anga i naŋ.

²⁰Naŋ kine, joˀ Salomoŋ tuwa, a ɓi ma: Bumbulvuŋ a ga gwat naŋ miɓa na le asi i zuɓa li ngi baha Davite le, i cifi le buy ngi Israyeley, kaɓa Bumbulvuŋ miɓa. I ndira hay misenna ngi zila slimiɗ ngi Bumbulvuŋ, Buymisemuŋ ngi Israyeley.

²¹Akoti ngi jumoˀay ngi Bumbulvuŋ mujum ati dideˀ ndrahay ar naŋ muboko ti taŋ ti Ezipte na, i ɗiyaŋ li ngi ɗuv naŋ le.»

²²Ar nah na, Salomoŋ a slikiɗ deŋ a mbuŋ li gi mikuli, hiri taˀ ar jum ngi Israyeley, naŋ muzulo taŋ tuwa, a hila haŋhay hoc nga muŋ, ɓa a dir dibiɗi.

²³Joˀ a ɓi: «Bumbulvuŋ, Buymisemuŋ ngi Israyeley, Bumbulvuŋ misi kaɓa ka, ko ar birngiŋ a muŋ anta, ko a ruwuy aka anta ma. Gawla ɗikeye, da t'ada ram kuy kuti mevel purla a mbuŋ ɗike na, jumoˀay ɗik ati taŋ, K'anta ngila ɓi nah ta, yo ki ndir teŋteŋ avu taŋ.

²⁴Gwat ka miɓa ɓi nah zleˀe da baha, gawla ɗik Davit na, ki gaŋ di le. Haˀaw, ɓi ka miɓaŋ di na, ka vuna ti haŋ ɗike, ki ga le dana, ada pur.

²⁵Bumbulvuŋ, Buymisemuŋ ngi Israyel, wurenna so na, gwat ka miɓa ɓi nah da baha, gawla ɗik Davit na, gaŋ di ava ma, asi ki ɓaŋ zleˀe na: ‹Da dideˀ ɗikeye, ara ram kaslsla a mbuŋ ɗu, kaɓa ka vuna micifi kaslsla a mbuŋ ɗu zleˀe ya na, i sa cifi a mbuŋ ɗu ngi zumabuy ar Israyeleye i mbur a wuzla taŋ cummo.›

²⁶Naŋ kine so, Bumbulvuŋ ngi Israyel, ambuh takwa, gwat ka miɓa da gawla ɗik Davit, kisa gaŋ di na, ga wurenna muduba.

²⁷Ani na, Bumbulvuŋ vuna a cifi a ruwuyo gisiŋ sukwani? Birngiŋ, ko ti naŋ mihaɗa gar na kwana, a ndila ngi cifi ti naŋ ta na si. Sokkota Hay ya mindira hana jak kwa.

²⁸Haˀaw, Bumbulvuŋ, Buymisemuŋ ɗu, jik slimiɗ angi diradibiɗ ati tumbul ngi gawla ɗike! Widi ati diradibiɗ ngi gawla ɗik matil di mi dana ng'avi ka na, cine takwa!

²⁹Wuna hiri, pura hay misenna ndrehhe ti mezle takwa, asi mike na, i li ka miɓi: ‹I sa ndir anga› tuwa. Cina diradibiɗ, ya madiruw di ar li hana.

³⁰Ya maziluw, yo Israyel mizli ɗikey matumbulukuw hiri ta taˀ ng'ar li misenna na, ambuh, cine takwa! Bumbulvuŋ, cino diradibiɗ ndra zle a muŋ, ar li ka misi anga a diga na. Cina ndra di, yo pula mungra ndraˀahaya.

³¹Da ara mbiɗaka hirnga da mburo, asi a zluɓ ɓi le avu sukum naŋ, yo a cufuɗakaŋ ɓa a hudum, ɓa nis a diɗo a hirnga naŋ na, da mbur nah a so, a hudum le a mbuŋ li gi mikuli ɗik, angi Hay misenna na,

³²ka na, Bumbulvuŋ, cino di zle a muŋ, so ga kiita ngi gawla ɗikeye, ɓa mbur muzluɓa ɓi na, ki gaŋ kiita, yo ɓa mbur migi gwat ta na kwana, ki gi di i mbur mijeŋŋe.

³³Kaɓa ani, da Israyeleye, mesene taŋhay a kiɗaka taŋ le, asi taŋ micinukuw mi ta, da a soko le gukuw wereke, da ara hunumukuw, ara diram dibiɗ, yo ara tumbulukuw ar Hay misenna na,

³⁴ka na, Bumbulvuŋ, cino di zle a muŋ a diga, pula mungra ngi Israyel, mizli ɗikeye. Hirwuy ka muvula zleˀe da dideˀ taŋhay na, mataŋ di a muŋ.

³⁵Malla ta ma na, da muŋ a sa gici le, anta sa go vuŋ mata, asi Israyeley micinukuw mi ta, da a sa mbuɗoko hiri le ng'avu li misenna, ɓa a tumbulukuw, da ara hunumukuw, yo a hinam hirnga le a mbuŋ ɗik, a pulaka cine mi taŋ ta na le na,

³⁶ka na, Bumbulvuŋ, cino taŋ di zle a muŋ, pula taŋ mungra taŋhaya, asi mike na, i gawla ɗikey, yo i mizli ɗikey. Naŋ kine, biga taŋ di ɓa a sipaka jiviɗ ɗike kuy kuy, yo go vuŋ asi ruwuy ɗik, hirwuy ka muvula taŋ di ɓa a ndir da taŋ na.

³⁷Da may misa gi le asi ruwuyo malla da jiji mozorbono misa gi le, da gwat ngir guvahay ara muˀulom malla ara zãˀãm daˀ arleˀe, da yuk ati jaray a bo le hindiˀille, ara sawa, da Israyeleye, mesene taŋhay ara guzuvuraka taŋ, sesẽŋ angi walahay taŋ migidaŋhay, da mendere malla jiji doflo wanaka gar misa gi le,

³⁸amma da Israyeley, mizli ɗikeye mizilam marava le gisiŋ gisiŋ a mevel taŋ, ara tumbulukuw ti gi ambuh, da ara mbuɗoko hiri ng'avu hay misenna, ara hilam haŋ ng'avu ka, ɓa a tumbulukuw na,

³⁹ka na, cino di zle a muŋ, ar hay ɗik, ka micifi anga na, pula taŋ mungra taŋhaya, ga slra ɗike, yo gi ti mburo gar weˀe avu gwat ngi gi naŋ, asi ki si na mevele le. Naŋ kanah gisiŋ, mevel ngi mizli gar, misina taŋ i ka pal ɗiki.

⁴⁰Gakanah na, ɓa Israyeley a cunukuw mi ndrehhe angi hin gar, ka muvula taŋ di ɓa a cifam di ti siifa ar hirwuy misennaka muvula da dideˀ ndrahay.

⁴¹Naŋ kanah, slimiɗ ɗik mazil haɗa, ati gidaŋ ɗik waɗ hirbazla ɗik masik nga muŋ na, a sa ɓaka ɓi nah, yo mizli a sa cinaka. Ko mbur mulak, i mbur ngisi Israyeley, mizli ɗikey na ta, da a so le tir hirwuy mikileŋ, nga a diradibiɗ ar Hay ɗik hana na,

⁴²

⁴³Bumbulvuŋ, ka cino di zle a muŋ, ar hay ɗik, ka micifi anga na. Ga slra ɗike weˀe avu gwat gar, mbur mulak mucufuɗ le avu ka. Kanah na, naɓa mizli ngisi ruwuyoy gar a sa sinukuw, a sa zlaka a cikukuw hirnga kaɓa Israyeley, mizli ɗikey macikukuw di na ya, yo a sa sinaka, slimiɗ ɗik a zil le ar Hay misenna ya miɗiyuw di na.

⁴⁴Israyel, mizli ɗikeye, da ka mupula taŋ jiviɗ le nga gi vurum ati mesene taŋhay, da kaɓa a mbiɗam hiri le, ara diram dibiɗ ng'avu ka Bumbulvuŋ, hiri pulaˀ pulaˀ ngir tivi walahay ka muwunaˀ, yo ng'ar Hay ya mindira ngi zila slimiɗ ɗik nah na,

⁴⁵diradibiɗ taŋ ati tumbul taŋ matumbulukuw na, cino taŋ di zle a muŋ, yo so jina taŋ.

⁴⁶Ani mbur, ɓa a gi mungra ta na, anta ndiɗaˀ wãˀ. Da kaɓa Israyeley a sa ngilam ɓi le avu ka, yo da ka misa ji mevel le ar taŋ, ka misa vula taŋ le asi haŋ ngi mesene taŋhay, yo mesene taŋhay a sa jaka taŋ, a cohom taŋ le ng'ar beke ar hirwuy ngi mesene taŋhay kileŋ malla gweˀe na,

⁴⁷taŋ misi ar hirwuy mijaka taŋ ng'ara tuwa, da taŋ misa wulkam le, a zlaka a tumbulukuw, a ɓam: ‹Aw, i gam mungra le, i zluɓam ɓi le, i gam malambaˀ le›,

⁴⁸da a cufuɗam wereke le avu ka ti mevel purla waɗ ti membezleŋ ngi vu taŋ wãˀ, angi hirwuy ngi mesene taŋhay, taŋ mijahay anga tuwa, da ara diram dibiɗ, hiri pulaˀ pulaˀ ngir tivi hirwuy, ka muvula da dideˀ taŋhay, ngir tivi walahay ka muwunaˀ, yo ngir tivi Hay, ya mindira ngi zila slimiɗ ɗik ara tuwa na,

⁴⁹ka na, zle a muŋ, ar hay ka micifi anga na, cino taŋ diradibiɗ taŋ ati tumbul taŋ matumbulukuw na, yo so jina taŋ.

⁵⁰Mizli ɗikey migam mungra avu ka na, pula taŋ ɓi nah avra. Taŋ mislikiɗam ɓi avu ka na, pula ɓi nah avra, yo ga ɓa mesene taŋhay a puraka taŋ ircece.

⁵¹Asi mike na, taŋ i mizli ɗikey, i ngi ɗikey, zle ti ka mubo ti taŋ tir bonoy ngi Ezipte.

⁵²«Bumbulvuŋ Buymisemuŋ, wuna hiri takwa! Mizli ɗikey Israyeley ati ya vuna matumbulukuw na, cine ndra di, ar hin ndra mucufuɗukuw le gar.

⁵³Asi mike na, Bumbulvuŋ ɗu, ɓa i ndiram da ka, kaɓa ka miɓa ti balam mijiviɗ ɗik Moyis, gawla ɗiki, ti di ka mubo ti dideˀ ndrahay baɗ ti ruwuy Ezipte na, i ka muwuna ndra a wuzla sukwi ngisi ruwuy gar, takwa.»

⁵⁴Salomoŋ, ti naŋ madiradibiɗ, yo naŋ matumbulo Bumbulvuŋ na, naŋ dilak ti poporoko, haŋhay hoc nga muŋ. Naŋ mikiɗa mi naŋ na, a slikiɗ deŋ a mbuŋ li gi mikuli.

⁵⁵A cici deŋ, a ɗuwula mi da zigiduw ngi Israyele. A ɓi:

⁵⁶«Sise da Bumbulvuŋ muvula zuy da Israyel, mizli naŋhay, kaɓa naŋ miɓa ɗaˀ le zleˀe na. Ɓi mezlehey, naŋ miɓa taŋ, muboko ti balam Moyis gar na, ɓa mindir munja a gi slra na, anta.

⁵⁷Wurenna so na, i ra cufuɗa Bumbulvuŋ Buymisemuŋ ndra, ɓa a ndir ati ndra kaɓa naŋ mindir zleˀe ati dideˀ ndrahay na ya. Anja a pula ndra ta, yo anja a zliɗa ndra avra ta.

⁵⁸Anja a mbiɗa mevel ndraˀahaya nga ava, ɓa i ram kuy kuy ar jiviɗ naŋ, yo ɓimujuwa ati ɓimuɗuva naŋhay waɗ sirikey, naŋ muvula taŋ da dideˀ ndrahay na, ɓa i jaka taŋ a hirnga.

⁵⁹Bumbulvuŋ Buymisemuŋ ndra, tumbul ɗu, ya mutumbuloŋ na, anja a wulka keŋŋe a hirnga, duvuɗ ati papas gar, ɓa ar hin gar na, anja a kilo widi ngi gawla naŋ ati ngi Israyel, mizli naŋhaya, asi ndr'i mizli naŋhay.

⁶⁰Kanah na, ɓa mizli ngisi ruwuy gar a sinaka, Bumbulvuŋ, Buymisemuŋ pal i naŋ, ko mekelem, anta.

⁶¹Yo anja mevel kum a ndir wãˀ da Bumbulvuŋ Buymisemuŋ ndra ɓa ki ram kasl kasl kaɓa ɓimuɗuva naŋ mawuɗo, yo ɓa ki jaka ɓimujuwa naŋhay a hirnga, kaɓa kum magaka dana ani na.»

⁶²Buy ati Israyeley gar na, a gam mikuli da Bumbulvuŋ.

⁶³Salomoŋ a gi da Bumbulvuŋ i mikuli ngi ngiɓiˀay, ɓa ngi wuna mi ngi hay ngi Bumbulvuŋ. A kiɗ slahay durmuk kukur cuw nga cuw waɗ tumuŋ ati away durmuk skat ti kukur cuw. Buy ati Israyeley gar muwunaka mi ngi hay ngi Bumbulvuŋ na kahana so.

⁶⁴Tapasa, buy a tiri ti wuzla wazlaray ngi mbuŋ hay ngi Bumbulvuŋ pal. Asi mike na, li gi mikuli ngi ɓiri gaza migweˀ a mizlingre hay ngi Bumbulvuŋ na, i meciɗeke. Mikuli ngi zlum ti zlumoy ati mikuli ti gwat ngi migamay waɗ useˀ misi malay ngi gi mikuli ngi ngiɓiˀaya, ɓa a gaka mikuli hanayna gar anga na, a kic le.

⁶⁵Salomoŋ, jom ati Israyeley gar a gaka muguzlum ngi guɗukoy na, angi kiya mitarnaˀ naŋ. Zigiduw haɗi teˀe, a soko tir hirwuy gar, zle a Lebo-Hamat, hirwuy vay muŋ, hã cek cek ti mizaw Ezipte, vay ti ruwuy. A gaka muguzlumo a mbuŋ Bumbulvuŋ, Buymisemuŋ ndra, hin tarnaˀ, waɗ hin tarnaˀ ava ma, jom hin kuruˀ ngaˀ mufaɗa.

⁶⁶A dirba luuma mucuw naŋ na, Salomoŋ a waha mizli, ɓa a ram ngi hay taŋhay. Mizli a jaka haŋ da buy Salomoŋ, dar a mam ng'ar guɗuk taŋhaya ti mumul ati cine ndum a mevele, asi gi mezlehey gar, Bumbulvuŋ miga da Davit, gawla naŋ, waɗ da Israyel, mizli naŋhaya.