Read South Giziga 1KI 9 Bible Online

1KI 9 - South Giziga bible

1KI 9

¹Salomoŋ, hay ngi Bumbulvuŋ ati hay nga naŋ vuna waɗ gwat naŋ muwuɗ ngi ndir ngi ndir gar na, a kiɗa mi ngi ndir taŋ le.

²A dirba nah, Bumbulvuŋ a bigaŋ vu ngi sar mucuw naŋ, kaɓa naŋ mibigaŋ vu zleˀe a Gabaˀoŋ tuwa ma.

³Bumbulvuŋ a ɓaŋ: «Ka midir dibiɗ, yo ka mutumbuliy na, i cine le. Hay ka mindira hana na, i tiri di le pal, ɓa slimiɗ ɗu a zil anga, ngi caˀa. I sa ɗuva hiri ɗu ati mevel ɗu taˀ anga ndrehhe.

⁴Ka so na, da gi gwat ɗik a mbuŋ ɗu naŋ jeŋŋe, kaslsla, kaɓa bunuk Davit zleˀe, ɓi ya muɓuw di ɗaˀ le na gar na, da ki ra ga, ɓimujuwa ɗuwoy ati sirik ɗuwoy na gar, ki ra ja taŋ a hirnga na,

⁵naɓa i sa ga ɓa zumabuy ɗik a ndir ndrehhe da Israyeley, kaɓa ya miɓa ɗaˀ le da bunuk Davit zleˀe na, asi yi ɓaŋ le: ‹A dirba ɗike na, masa zum buy ar Israyeleye ndrehhe, i mbur ngi wuzla dideˀ ɗikey›.

⁶Amma, ka ati mizli ɗikey waɗ dideˀ kumoyo da ki mbiɗam duba le avu ya, yo ɓimujuwa ati ɓimuɗuva ɗuwoy, ya muɗuva taŋ a mbuŋ kum na, da kum anta jaka taŋ hirnga ta, da ki ra gam mezegwel da kulihey, yo ki ra huruk hurukam a mbuŋ taŋ na,

⁷naɓa kum Israyeleye, yi sa bi ti kum avra ti ngi hirwuy ya muvulukum di na. Yo Hay misenna, ya mitiri di pal ɓa yi ndir ara tuwa na, yi sa pula mbak zlõh avra. Dar mizli gar a sa singiram ar Israyeleye, a sa kiɗam ti taŋ mambaˀ.

⁸Tapas mizli masa cohom gweˀ tivi Hay migila misenna mitiri diŋ na, hã a sa zuma taŋ hirnga, dar a sa cufuɗaka mizli: «Bumbulvuŋ a ga gwat da hirwuy hana ati Hay misenna kahana vur mike?

⁹Joˀ mizli a sa mbiɗaka taŋ di: Israyeleye, a jumom le ng'avu kulihey, a huruk hurukam a mbuŋ taŋ, dar a gaka taŋ mezegweley. Bumbulvuŋ taŋ, Bumbulvuŋ mubo ti dideˀ taŋhay baɗ ti Ezipte na, a pulakaŋ le. Bumbulvuŋ mupulo bonoy hana gar ng'ar taŋ na, vurˀe.»

¹⁰Angi vi kukur cuw, Salomoŋ mindir di hayay mucuw: Hay ngi Bumbulvuŋ ati hay nga naŋ buyo na,

¹¹Dum ngi miter, ati dum ngi migidaŋ mimezle waɗ ɓiri tapasl tapasl gar na, muvula taŋ zleˀe da Salomoŋ haɗa kaɓa mevele muwuɗ na, i Hiram, buy ngi Tir. Vurˀe, buy Salomoŋ a vulaŋ walahay kukur cuw angi hirwuy Galile.

¹²Akẽh na, Hiram a bi tir walahay Tire, ɓa ara pura walahay Salomoŋ muvulaŋ taŋ tuwa, amma a hĩyã taŋ ta.

¹³Joˀ a ɓa Salomoŋ: «Sukum ɗu Salomoŋ, walahay ka muvuliy taŋ tayna vuna, i ngi pula gir ta!» Vureˀe, ko dana kwana, a zilaka li tayna, ‹hirwuy Kabul›, a mbiɗeˀvra ‹hirwuy ngi pula gir ta›.

¹⁴Hiram a slin le zleˀe ti ɓiri tapasl tapasl da Salomoŋ, ton makir ti reta ngbaŋ.

¹⁵Buy Salomoŋ a ɗiyi jiviɗ ngi slra mitak ˀ ay le da mizli, ɓa ngi ndira hay ngi Bumbulvuŋ, hay nga naŋ buyo li midika ti dik mazilaka Milo, mohol mugun Zeruzalem waɗ walahayay ngi ruwuy Hasor, ngi Megido ati ngi Gezer gar.

¹⁶Walahay Gezer na zleˀe, i buy madiɗa ngi Ezipte, buy ngi Ezipte muzuma ti di naŋ mibi vurum. A dirba naŋ mingizla mizli Kanaˀanay micifam zleˀe anga na, a wuraŋ, dar a vula da zuŋ naŋ ar deɗe ngi gwat ngi pi liwis. Zuŋ naŋ i ngwas ngi Salomoŋ.

¹⁷Salomoŋ a ndira walahay Gezere hiri naŋ a muŋ, yo a ndira hiri ngi walahayay ngi ruwuy Bet- Herom- ngi ruwuyo

¹⁸Baˀalat ati Tamar ngi wuzlaɓuh mikirɗak kirɗak misi a si hirwuy nah,

¹⁹waɗ walahayay, naŋ mawi vu ti gwat ngi zum naŋhay anga, walahayay, naŋ macica mota ngi vurum naŋhay anga, ati misi naŋ mahina pilis naŋhay anga gar. A ndira gwat naŋ mawuɗ gar ar walahay Zeruzaleme, a muwã Libaŋ waɗ angi hirwuy naŋ miwa miwa gar. Hanayna i slra mitakˀay le, buy Salomoŋ miɗiya jiviɗ ngi gi naŋ tuwa so.

²⁰Dambalaka na, mizli misi i Israyeley ta na, ada a si ruwuy aruŋ: i Amorihey, Hitihey, Persihey, Hivihey, waɗ Zebusihey.

²¹Zir taŋhay mindiram ar siifa a dirba taŋ na, asi Israyeley a ngizlaka taŋ gu ta. Salomoŋ a hil di i taŋ ɓa ngi gi slra mitakˀay le tayna tuwa, hã dana.

²²Salomoŋ a hila Israyeleye ngi gi slra mitakˀay le na ta. A a hila taŋ ng'ar vurum, a cifa taŋ i soje ngi vurum naŋhay, gawla naŋhay, buy ngi soje naŋhay, mijijira gwat ngi vurum naŋhay, yo buy ngi mota ngi vurum naŋhay waɗ ngi misi pilis naŋhay.

²³A wunam buy miwi lihey skat skat zlum ti kukur zlum, ɓa ngi wa mizli mihaɗa ar slra ngi Salomoŋ na.

²⁴Zuŋ ngi buy madiɗa ngi Ezipte mislikiɗo baɗ tir walahay ngi Davit ng'ar hay Salomoŋ mindiraŋ di tuwa na, a dirba nah, Salomoŋ a ɗiya li midika ti dik mazilaka Milo na.

²⁵Salomoŋ, vur vi gar na, a gi mikuli sar makir, mikuli mizlam zlam wãˀ ati mikuli ngi vula zuy. A ga ar li ngi gi mikuli, naŋ mindira da Bumbulvuŋ, waɗ a zlum urdi ar li ngi gi mikuli misi a mbuŋ Bumbulvuŋ. Hay ngi Bumbulvuŋ mizliram kasl ati slra naŋ na, kahana so.

²⁶Buy Salommoŋ a ɓi ɓa a ɗiyakaŋ palalam madidahay ngi yam a Esiyoŋ-Geber, gweˀ avu Elat, li cici ngi palalam a mubuliy lavaɗa, ar hirwuy Edom.

²⁷Hiram a slin gawla naŋhay, misi palalamay, misinaka mubuliye le kuy kuy, ɓa a ki saka gawla ngi Salomoŋhoyo.

²⁸Mizli misi palalam tayna a ndilam gar taŋ angi hirwuy Ofir. A ram ti ɓiri tapasl tapasl fineˀ ton kuruˀ nga cuw da buy Salomoŋ.