Read South Giziga 2KI 11 Bible Online

2KI 11 - South Giziga bible

2KI 11

¹Atali, mumuŋ ngi buy Ahaziya mupura mangal naŋ a muc le na, a juwa a meval naŋ, ɓa a ngizla dideˀ ngi buyoyo kap wãˀ.

²Amma Yoseba, zuŋ ngi buy Zoram, i sukum mongoso ngi Ahaziya. Yoseba a zuɓa Zoˀas, mangal ngi Ahaziya ɗum ti ɗum ti wuzla sukum naŋhay, Atali mara kiɗaka taŋ na. A ra ɗumo taŋ ɗum ati ngwas migil naŋ angi viŋ mukulkuc ngi hin angi hay ngi Buymisemuŋ. Naŋ kahana taŋ muɗumokoŋ Zoˀas a mihiri ngi Atali. Vurˀe, Atali a luuma Zoˀasa ngi kiɗ vagaya ta.

³Zoˀasa, naŋ da ɗum ati ngwas migil naŋ angi hay ngi Bumbulvuŋ hã vi merkeɗe, amma Atali ara zum buy asi ruwuyo.

⁴Angi vi mitarnaˀ naŋ na, masay Yoyada, a mbuŋ Buymisemuŋ, a slin nga zilo madiɗa ngi soje Karihey skat skat ati soje mekelemey gar, a soko ng'ava ar hay ngi Buymisemuŋ. A jumomˀay ati taŋ, waɗ a hudum a mbuŋ taŋ ar hay ngi Buymisemuŋ. Joˀ a biga taŋ mangal ngi buy tuwa.

⁵Akẽh na, a vula taŋ mingiɓi, a ɓa taŋ na: «Gwat kum masa gam anihĩ: Mizli a wuzla kum masa gam slra tapas Sabat na, sojehey ngac mudumbuŋ a sa jiginam hay ngi buy.

⁶Mingac mucuw naŋ a sa jiginam mizlingre ngi Sur, yo mingac mimakir taŋ a sa jiginam mizlingre ngi dirba sojehey majiginaka buyo a sa mbiɗam di vu ar wala taŋ.

⁷Naŋ kine, ngay ngi sojehey mitaˀtaˀ cuw magam slra tapas Sabat ta na, i taŋ masa jiginaka hay ngi Bumbulvuŋ a ciki buyo.

⁸Ki sa gunoko hirnga ngi buyo gunno, mbur gar na, ti gwat ngi vurum naŋ kaw a haŋ kaw a haŋ. Da mbur ara wuɗ co ti gidaŋ ng'ar kum mugunno na, kisa kiɗaka vagay. Da buy ara ru nga maka gar na, naɓa kum ada sek aseˀe.»

⁹Madiɗa ngi sojehey skat skat tuwa, a gaka kaɓa masay Yoyada, muvula taŋ mingiɓi naŋ na. Mbur gar a hila soje naŋhaya, misi magam slra tapas sabat ati misi magam slra tapasa ta, a ram ng'avu masay Yoyada.

¹⁰Ziwitey ati mbaray ngi buy Davitey ada zleˀe angi hay ngi Bumbulvuŋ, dar masay a vula taŋ da madiɗa ngi sojehey skat skat tuwa.

¹¹Soje mijigina vuhoyo a cicam gunno hirnga naŋ, zle a ciki naŋ vay hazum, hã a ciki naŋ vay gula, a mbuŋ li gi mikuli, yo a mbuŋ Haya. Mbur gar ti gwat ngi vurum naŋ kaw a haŋ kaw a haŋ.

¹²Akẽh na, Yoyada a bo ti mangal ngi buyo. A tuwuɗaŋ loppol a hirnga waɗ a vulaŋ ɗerewol ngi sedewo ngi buyo. A cakaŋ buy ti paŋ mal a hirnga. Joˀ ar nah na, mizli akiɗam haŋ puro ˀpuroˀ, a wudam, a ɓam: «Bumbulvuŋ a vuluw siifa buy.»

¹³Atali micina ˀay ngi mizli gar makilam nga diga na, aru ng'avu mizli ar hay ngi Bumbulvuŋ tuwa.

¹⁴Atali a pura na, buy deŋ ar li miɗiya ti dum viriw a muŋ, kaɓa taŋ magaka ar sirik taŋ. Migi dunguroy ati mifi tulumoy a ciki buyo. Mizli ngi si ruwuy gar a roko mumulom, a fam tulum. Akẽh na, Atali a ngira zana naŋ ngi vu vuhoyo a widi: «Kay, hana i gidiɓi? Kay, hana i gidiɓi?»

¹⁵Dar masay, Yoyada a vula jiviɗ da madiɗa ngi sojehey skat mawa soje mijigina vuhoyo a ɓa taŋ: «Bam ti Atali ti wuzla kumo ng'avra. Da mbur misipa le na, a sa kiɗaka vagay ti maslalam!» Asi mike na, masay a ɓa le ɗaˀ le zleˀe ani: «Anja a kiɗaka ar hay ngi Bumbulvuŋ ta.»

¹⁶A jaka Atali, a ɗiɗaka ng'avu hay ngi buyo kini tir li ci ngi pilisey, dar a vaka haŋ naŋ kaf kaf daˀ ar nah akẽh.

¹⁷Yoyada a ga ɓa jumoˀay a gi ar wala ngi Buymisemuŋ ati buyo waɗ mizli Israyeleye, ɓa Israyeley a ndiram i sukwi ngi Buymisemuŋ. Yo ɓa jumoˀay a gi ar wala ngi buy ati sukwi Israyele ma.

¹⁸A dirba nah na, mizli ngir walahaya gar a ram ng'ar hay ngi Baˀal tuwa, a wahaka hay avra wãˀ. Li gi mikuli naŋhay ati dum taŋ miɗiyakaŋ naŋ vuna ti nah na, a wahaka taŋ meɗ meɗ avra, waɗ a kiɗaka Mataŋ, masay ngi Baˀal vuna daˀ a mbuŋ li gi mikulihey tuwa. masay Yoyada, a cici mizli ngi jigina hay ngi Bumbulvuŋ.

¹⁹A dirba nah ma na, Yoyada a kuso madiɗa ngi sojehey skat skata, Karihey ati soje mijigina vuhoyo mindirama waɗ mizli ngi si ruwuyo gar. A poko sar ti buyo tir hay ngi Bumbulvuŋ, a ram di ng'ar hay ngi buyoyo tir mizlingre ngi soje mijigina vuhoy.

²⁰Mizli ngi si ruwuyo gar a roko ti mumul, yo walahaya gar a cifi setette. Amma Atali, naŋ a kiɗaka le ti maslalam a hay buyo.