Read South Giziga 2KI 12 Bible Online

2KI 12 - South Giziga bible

2KI 12

¹Zoˀas micifi buy na, naɓa naŋ ti vi tarnaˀa.

²Zoˀas micifi buyo naɓa Zehu a ɓul di i vi mitarnaˀ naŋ ngi zumabuy naŋ. A zum buyo vi kukur mufaɗ a Zeruzalame. A zilaka mumuŋ naŋ Sibiya, zuŋ Berseba.

³Zoˀasa, angi hin ngi siifa naŋ gar na, a gi di i gwat mezle a mihiri ngi Buymisemuŋ. Asi mike na, masay Yoyada, a sirkaŋ le kuy kuy.

⁴Amma li miɗingir ɗingirey magam mikuli angi taŋ na, a susuymo taŋ avra ta ɓula. Sukwi Israyel ara gam mikulihey, yo ara wuram urdihey angi taŋ aruŋ na si.

⁵Zoˀas a ɓa masayaya na: «Dala mizli mavuloko di ng'ar hay ngi Bumbulvuŋ ngi gi slra: I dala mawurkam di mbur ar kiita, dala mizli mawurkam di hirnga ngi gwat taŋhay malla dala mbur mavula ngi mongoy gar na, ki tiɓakaŋ.

⁶Anja kum masayaya, ki tiɓaka da kum. Mbur gar na, a tiɓa avu mizli naŋ misina taŋ le. Na so na, gwat mihiryi le avu hay ngi Bumbulvuŋ, ko tir vay wanaka gar na, anja ki ɗiyaka ɓula.»

⁷Amma hã angi vi mizli ngir cuw ngi zumabuy ngi Zoˀasa kwana, ko masayay a ɗiyam gwat mihirya neˀ le avu hay ngi Bumbulvuŋ t'aruŋ na si.

⁸Dar buy Zoˀas a zila masay Yoyada, ati masay mekelemey gar ng'avaŋ, a ɓa taŋ na: «Gwat mihiryahay avu hay ngi Bumbulvuŋ na, ki ɗiyaka taŋ ta vur mike? Zle dana na, mizli kum misinaka taŋ le gar na, kum anta sa tiɓam dala avu taŋ mata, amma kisa vulaka ngi ɗiya gwat mihiryahay avu hay ngi Bumbulvuŋ na.»

⁹Masayay a tiɓaka le, ɓa t'anta tiɓam dala avu mizli mata, yo taŋ ˀnta ɗiyaka gwat mihiryahay avu hay ngi Bumbulvuŋ mata.

¹⁰masay Yoyada, a zuɓ akoti, a slin vigiɗ hirak ar gandaf naŋ na, waɗ a ɗuva taˀ a ciki li gi mikuli. Da kaɓa mizli ara cam ng'ar hay ngi Bumbulvuŋ na, akoti nah vuna naŋ tir hazum. Migi mikuli mijigina mizlingreheye, dala mizli ma soko di ng'ar hay ngi Bumbulvuŋ gar na, a paka ng'araŋ.

¹¹Da taŋ mupuraka le, dala a cikil le haɗa ar akoti tuwa na, mbur mutoho gwat ngi buy ati masay madiɗa, a ram a hilaka dala misi angi hay ngi Bumbulvuŋ, a slufakaŋ.

¹²Da taŋ muslufaka dala le na, a vulaka asi haŋ ngi buyɓi ngi slrahay misi angi hay ngi Buymisemuŋ. Yo taŋ kwana, a wurkam di mizli miɗiya gwatay ati mikiɗa hayay magam slra ar hay ngi Bumbulvuŋ.

¹³Yo ngi wurka mindira hayay ati mubusla ɗuguroy, ngi hiɗika mbalay ati ɗugur mislahay ti sli ngi ɗiya gwat mihiryahay le avu hay ngi Bumbulvuŋ, na zle si na, ngi wurka gwatay gar ngi ɗiya hiri ngi hay ngi Bumbulvuŋ.

¹⁴Amma dala musoko di ng'ar hay ngi Bumbulvuŋ na, ko a vuɗam di taasa ngi ɓiri bara ta, ko sliwiɗ ngi muca lampehey, ko taasa ngi kuca gwat, ko tulum, ko gazlanga ngi ɓiri tapasl tapasl malla ɓiri bara tekeɗe, a gam ko pal ar hay ngi Bumbulvuŋ ti dala nah ta.

¹⁵A vulaka dala nah gar a haŋ buyɓi ngi slrahay. Taŋ a gam di slra ngi ɗiya hiri ngi hay ngi Bumbulvuŋ.

¹⁶Mizli mupula dala asi haŋ taŋ ngi wurka migi slrahay na, i mizli miteŋteŋhey angi slra nah. Vurˀe, mizli anta cufuɗaka taŋ cufaɗ le vur dala naŋ ta si.

¹⁷Dala ngi mikuli ngi ɗiya ɓi ati ngi mikuli ngi puya mungra na, a paka nah sek le ar akoti ngir hay ngi Bumbulvuŋ ta si, asi nah i ngi masayay.

¹⁸Dar ar nah na, Hazayel, buy Siri ara zla kiɗa vu ati hirwuy Gat, a zuma le. Hazayel a juwa le ar wuluk naŋ nga zla kiɗa vu ati Zeruzalem ma.

¹⁹Neˀna, gwatay buy Zozafat, Zoram ati Ahaziya waɗ dideˀ naŋ, buy Zudahay muvulaka taŋ na, Zoˀas a hila taŋ cek jom ati gwatay naŋ vuna muvula taŋ, ɓiri tapasl tapasl misi angi hay ngi Bumbulvuŋ gar waɗ misi a hay buyo a slina gwat tayna gar da Hazayel, buy Siri, ɓa a pula ru nga kiɗa vu ati Zeruzaleme.

²⁰Ɓi ati slra mekelemey Zoˀas miga taŋ gar na, i mutoho taŋ le angi ɗerewol mazilaka Ɗerewol ngi ɓi ngi buy Zudahay.

²¹Gawla naŋhay a slikiɗam ɓi, a gam gidiɓi a hirnga naŋ. A kiɗaka Zoˀas a Bet- Millo, naɓa ara pi sar zleˀe nga Silla.

²²Mikiɗaka vagay vuna i ti Yosabat, mangal ngi Simeyet ati Yehozabat, mangal ngi Somer, mizli madiɗa ngi slra naŋhay tehhe a muŋ. A dikaka a ciki zivi ngi dideˀ naŋhay ar Walahay ngi Daviti. Mangal naŋ Amasiya a zuɓa li naŋ.