Read South Giziga 2KI 13 Bible Online

2KI 13 - South Giziga bible

2KI 13

¹Zoˀas, mangal ngi Ahaziya, buy zuda, angi vi mizli ngir cuw nga makir ngi zumabuy naŋ na, Zoˀakas, mangal ngi Zehu, a cifi buy Israyel a Samari. A zum buyo vi kuruˀ nga tarnaˀa.

²Zoˀakasa gi di i gwat malambaˀa mihiri ngi Buymisemuŋ. A sipi di i gi mungra ngi Zeroboˀam, mangal ngi Nebat, mihizigiɗa Israyeley ɓa a gam mungra. Zoˀakasa kirih kirah le ti ra ta.

³Buymisemuŋ a slikiɗ himaˀ ar Israyeleye. A vula taŋ asi haŋ ngi Hazayel, buy Siri, hã a zikam, waɗ a vula taŋ asi haŋ ngi Ben-Hadat, mangal ngi Hazayele.

⁴Amma Zoˀakasa tumbulo Buymisemuŋ, joˀ Buymisemuŋ a cinaŋ di. Asi a pura maguzuvuraka Israyel na le, yo a pura bonoy, buy Siri maga taŋ di na le.

⁵Akẽh na, Israyeleye, Buymisemuŋ a vula taŋ mbur mucuk taŋ le tisi haŋ ngi Siriheye. Joˀ Israyeley a cifam zuy zuy muduba a hay taŋhayakaɓa dumbuŋ zleˀe.

⁶Amma, Israyeleye, mungra ngi Zeroboˀam miga, hã a hizigiɗa Israyeley ɓa a gaka na, taŋ kwana a pulaka gi naŋ ta. A hurdumom ngi gi naŋ na si. Ko kuli Asera miɗiyaka ti dum na kwana, naŋ da kaˀ a Samari na si.

⁷Taŋ mupulam mizli ngi vurumoy da Zoˀakasa na, mizli misi pilisey kukur zlum, mota ngi vurumoy kuruˀu, waɗ mizli misi saray durmuk kuruˀu. Asi buy Siri a ngizla mizli mekelemeye le. A guzuvura taŋ le guzuvar guzuvar kaɓa lagwada mahil asi sar.

⁸Ɓi mekelemey ati slra waɗ gwat madiɗahay, Zoˀakas miga taŋ gar na, i mutoho taŋ le angi ɗerewol mazilaka, Ɗerewol ngi ɓi ngi slra ngi buy Israyeley.

⁹Zoˀakas a mucu, ara dikaka a ciki dideˀ naŋhay a Samari. Mangal naŋ Zoˀas a zuɓa li naŋ

¹⁰Zoˀas, buy Zuda, angi vi mizli ngir makir nga tarnaˀ naŋ ngi zumabuy naŋ na, Zoˀas, mangal ngi Zoˀakas a cifi buy a Samari. A zum buyo vi kuruˀ ngaˀa tarnaˀa.

¹¹Zoˀasa, a gi di i gwat malambaˀ a mihiri ngi Buymisemuŋ. Mungra Zeroboˀam, mangal ngi Nebat miga, hã a hizigiɗa Israyeley ɓa gam aya na, Zoˀas a pula gi naŋ ta, a hurdum ngi gi naŋ na si.

¹²Ɓi ngi slra ngi Zoˀas mekelemeye, slra naŋ miga taŋ gar, gwat madiɗahay naŋ miga taŋ gar ati vurumoy naŋ miga ati Amasiya, buy Zuda gar na, i mutoho taŋ le angi ɗerewol mazilaka Ɗerewol ngi ɓi ngi slra ngi buy Israyeley.

¹³Zoˀas a mucu, a dikaka a ciki dideˀ naŋ, buy Israyeley a Samari. Zeroboˀam a zuɓa li naŋ.

¹⁴Elize a ki jiji le, i jiji masa kiɗaŋ. Zoˀas, buy Israyel aru ng'avaŋ, a guɓ guɓ ng'araŋ, a tuwuy a raŋ, a ɓi: «Baha ɗu! Baha ɗu! Ka puɗaw haɗa fineˀ mota ngi vurum ngi Israyeley, yo fineˀ mizli misi pilis ngi Israyeleye.»

¹⁵Akẽh na, Elize a ɓaŋ na: «Zuɓo lek ati luvutoy!» Zoˀas a zuɓo lek ati luvutoyo.

¹⁶A dirba nah na, Elize a ɓaŋ ma: «Nga leke!» Buy a nga leke. Elize tuwa, a pa haŋ naŋhaya sek ar haŋ ngi buyo.

¹⁷Joˀ a ɓaŋ: «Wuna fenetir misi kini ngir tisi pas ngi miprik na!» Zoˀas a wuna fenetire wun. Elize a ɓaŋ ɓa a laha luvuto! Joˀ buy tuwa, a laha luvuto paw. Elize a ɓi: «Hana i laha luvut ngi luuma bugawla muso baɗ ti vu Buymisemuŋ. I laha luvut ngi luuma bugawla ar mizli Sirihey. Ki sa kiɗa hirwuy Siri a Afek, hã kisa ngizlaŋ kap wãˀ.»

¹⁸A dirba nah ma na, Elize a ɓa Zoˀasa: «Hila luvutoyo !» Buy a hila taŋ. Elize a ɓaŋ: «Kiɗa hirwuy na.» Zoˀas a kiɗa hirwuy tuwa pasl pasl sar makir, waɗ a pula mbaka.

¹⁹Mijiviɗ ngi Bumbulvuŋ a ji mevel angaŋ, a ɓaŋ na: «Daka mikiɗa hirwuy na zleˀe pasl pasl sar zlum malla merkeɗ na, anja ani kisa kiɗa Siriheye, hã ki ngizla taŋ kap wãˀ takwa. Ani wurenna, kisa kiɗa Siriheye sar makir tewle si.»

²⁰Elize a mucu, a dikakaŋ. Angi ɗuva virzi ngi vi gar na, mufuyo vu Moˀapay, ngay taŋ taˀ taˀ, a coko kulaˀ le ng'ar hirwuy Israyele.

²¹Ngi pas numuŋ ada na, naɓa mizli ara dikam mbur zleˀe. Neˀna, mizli a puram mufuyvuhoy tuwa ngay taŋ taˀ purla. A pulaka vagay ngi mburo mbak ar zivi ngi Elize, joˀ taŋ a kilam. Vagay ngi mbur tuwa, aru duk avu tesl ngi Elize na, a mbul, waɗ a slikiɗ purtaˀ deŋ.

²²Angi hin ngi zumabuy ngi Zoˀakas gar na, Hazayel, buy Siri ara guzuvura Israyeleye.

²³Amma Buymisemuŋ a ga mezle da Israyeleye, a biga taŋ naŋ mawuɗ taŋ haɗa na le. A mbuɗo hiri ng'avu taŋ tisi naŋ mujumˀay zleˀe ati Abraham, Izak waɗ Zakop. A ngum ɓa a ngizla taŋ ta, yo a zliɗa taŋ kileŋ a mihiri naŋ ta, hã wurenna.

²⁴Hazayel, buy Siri a mucu, joˀ mangal naŋ Ben-Hadad a zuɓa li naŋ.

²⁵Walahayay ada zleˀe, Hazayel, cine ngi Zoˀas muzuma taŋ ti vurum avu Zoˀakas, cine ngi Zoˀas. Akẽh na, Zoˀas, mangal ngi Zoˀakas a tiɓa taŋ a muŋ avu Ben-Hadata. Zoˀas a kiɗa Ben-Hadata hã sar makir, a tiɓa walahay Israyel tayna a muŋ.