Read South Giziga 2KI 14 Bible Online

2KI 14 - South Giziga bible

2KI 14

¹Zoˀas, mangal ngi Zoˀakasa, angi vi mucuw naŋ ngi zumabuy naŋ a Israyel na, a caka Amasiya, mangal ngi Zoˀas, i buy Zuda.

²Amasiya micifi buy madiɗa na, naɓa naŋ ti vi kukur cuw nga zlum. A zum buy a Zeruzaleme vi kukur cuw nga ngoltir. Mumuŋ i zuŋ Zeruzalem, a zilaka Yoˀadaŋ.

³Amasiya a gi di i gwat mikaslsla a mihiri ngi Bumbulvuŋ. Na so na, antakaɓa ngi dideˀ naŋ Davit ta ɓula, amma gi gwat nga naŋ heˀ kaɓa cine.

⁴Gar ti nah na, li miɗingir ɗingirey magam mikulihey ar taŋ na, a susuymom avra ta ɓula. Sukwi Israyel ara gam mikulihey ar taŋ, yo ara wuram urdihey ar li miɗingir ɗingir tayna aruŋ na si

⁵Amasiya, a dirba naŋ mupura a cica zumabuy naŋ le gidaŋ gidaŋ muduba na, a kiɗa gawla naŋhay mikiɗaka buy Zoˀas, cine zleˀe na.

⁶Amma so na, a kiɗa ziri ngi mizli mikiɗa hirnga tayna ta ɓula. A gi le kaɓa mutohoko ɓi nah angi ɗerewol Ɓimujuwa ngi Moyis, Bumbulvuŋ a ɓi le anga zleˀe ani: anta kiɗaka miyi ziri asi mungra ngi ziri taŋhaya ta, yo miyi ziri kwana, anta kiɗaka taŋ asi mungra ngi ziri taŋhaya ta ya. Asi mbur gar na, a sa kiɗaka asi mungra nga naŋ nga naŋ.

⁷Mikiɗa Edomoy ar sozo ngi mandaŋ na i Amasiya vuna ma. A kiɗ sojehey durmuk kuruˀu, yo ar li kiɗa vu na, a zuma walahay Sela, a caŋ slimiɗ Yokteyel. Slimiɗ nah naŋ da dana kwaˀ aruŋ.

⁸Akẽh na, Amasiya a slin mizli ng'avu Zoˀas, mangal ngi Zoˀakas, dideˀ mukutur ti kutur ngi Zehu, buy Israyele, ɓa ara ɓakaŋ na: «Sawa ɓa i zliram kiɗa vu ati ka!»

⁹Zoˀas, buy Israyel a slin ɓa ara mbiɗakaŋ di ani: «Ngi pas numuŋ ada na, widis hadaw a slin ng'avu miter ngi Libaŋ, ɓa ara ɓakaŋ: Ɓa a vulaŋ zuŋ naŋ ngi ngwas da mangal naŋ! Amma gwat misãmi ngi ɓuh ngi Libaŋ a cuh, a kirpa widis hadaw asi sar.»

¹⁰Ki kiɗa Edomoyo le, ki tika taŋ ˀay le gwaɗ naŋ, ki ra jijih a mevel ɗike, naŋ kanah gisiŋ so. Vula dudok da hirnga ɗike, ka cifi a hay ɗiki? Na, ka mawuɗ ki zli vurum mukuyta wãˀ avu ka, ɓa Zudahaya jom ati ka, ki ngizlam kuɗup wãˀ na, vur mike?

¹¹Amma Amasiya a ngum cine mi ngi Zoˀas miɓaŋ di na ta. Vurˀe, Zoˀas, buy Israyele, a bam ati soje naŋhaya, ara zliram kiɗa vu ati Amasiya, buy Zuda, a Bet-Semes, hirwuy Zuda.

¹²Soje Israyeley a kiɗaka soje Zudahaya ngurof ngurof, hã mbur gar na, a ja kil ngi hay naŋ, a hay naŋ.

¹³Akẽh na, Zoˀas, buy Israyele, a ja Amasiya, buy Zuda, i dangay a Bet-Semese, Amasiya, mangal ngi Zoˀas, dideˀ mukutur ti kutur ngi Ahaziya. A dirba nah, Zoˀas a so nga Zeruzalem, a slin mifiliw firndiw avu mohol ngi walahay Zeruzaleme, gwat ngi metir skat skat cuw, zle avu mizlingre ngi Efrayim, sesẽŋ avu mizlingre ngi zlirɗi.

¹⁴Zoˀas a hila ɓiri tapasl tapaslay ati ɓiri barahay waɗ gwat mupuɗaw puɗaway misi angi hay ngi Bumbulvuŋ gar, yo gwat mupuɗaw puɗaway misi a hay buyo gar. Waɗ a hila mizli mijikahay ti jike, a mi nga Zeruzalem a muŋ.

¹⁵Zoˀasa, ɓi naŋ mekelemey mindirama, slra naŋ miga taŋ gar ati vurumoy naŋ miga ati Amasiya, buy Zuda gar na, i mutoho taŋ le angi ɗerewol mazilaka Ɗerewol ngi ɓi ngi slra ngi buy Israyeley.

¹⁶Zoˀas a mucu, a dikaka a Samari a ciki dideˀ naŋ, buy Israyeley. Mangal naŋ Zeroboˀam a zuɓa li naŋ.

¹⁷Amasiya, mangal ngi Zoˀas, buy Zuda, a dirba muc ngi Zoˀas, mangal ngi Zoˀakas na, a gi vi kuruˀ nga zlum ava ma.

¹⁸Ɓi ngi slra ngi Amasiya mekelemey mindiram na, i mutoho taŋ le angi ɗerewol mazilaka Ɗerewol ngi ɓi ngi slra ngi buy zudahay.

¹⁹Mizli a gam gidiɓi ar Amasiya a Zeruzaleme, a kil nga Lakis. Amma a slinam mizli, a sipakaŋ nga Lakise, a kiɗaka a diga vagay.

²⁰Akẽh na, a zuɓaka vagay naŋ ti pilisey, ara dikaka a Zeruzalem, a ciki zivi ngi dideˀ naŋhay.

²¹Mizli Zudahay gar a zuɓaka mangal naŋ Azariya, a cakaŋ buy ar li ngi cine naŋ Amasiya. Naɓa naŋ ti vi kuruˀ nga merkeɗe.

²²Mindira hiri ngi walahay Elat i naŋ, a vula da hirwuy Zuda a muŋ. Hana a gi na a dirba muc ngi cine naŋ.

²³Zeroboˀam, mangal ngi Zoˀas, buy Israyel micifi buy madiɗa a Samari na, naɓa Amasiya, mangal ngi Zoˀas, buy Zuda, a ɓul di i vi mukuruˀ nga zlum naŋ angi zuma buyo. Zeroboˀam a zum buy a Samari vi kukur mufaɗ ngaŋ purla.

²⁴Zeroboˀam a gi di i gwat malambaˀ a mihiri ngi Buymisemuŋ. Mungra ngi Zeroboˀam, mangal ngi Nebat miga, hã a hizigiɗa Israyeley ɓa a gaka na, ko Zeroboˀam a pula gi naŋ mbak le ta.

²⁵Micica hiri ngi maakway ngi ruwuy Israyel na i naŋ, zle avu Lebo-Hamat tir vay muŋ naŋ, sesẽŋ a mimubuliy mumuca tir vay ruwuy naŋ. A gi le kaslsla kaɓa Mingiɓi ngi Bumbulvuŋ Buymisemuŋ, ngi Israyel mubo zleˀe ti balam Zonas, gawla naŋ mijiviɗ, mangal ngi Amitay ngir walahay Gat.

²⁶Asi mike na, Buymisemuŋ a pura bonoy mutuwaˀ Israyel masa angi zumabuy naŋ na le. Ti di nah na, ko beke anta mata, diimu anta, mbur ɓa ma kilo widi ngi Israyel loŋ, anta mata si.

²⁷Buymisemuŋ a ɓi: i sa susuymo slimiɗ ngi Israyele tisi ruwuyo na, a ɓi ta. Vurˀe, a sa laha taŋ tisi Zeroboˀam, mangal ngi Zoˀas.

²⁸Zeroboˀama, ɓi naŋ mekelemey mindirama, slra naŋhay ati gwat madiɗahay naŋ miga taŋ gar, wirwir naŋ ngi gi vurumoy gar na, i mutoho taŋ le angi ɗerewol mazilaka Ɗerewol ngi ɓi ngi slra ngi buy Zudahay. Yo hirwuy Damas ati Hamat, hirwuy Zuda mawa taŋ zleˀe gar na, i mutoho ɓi taŋ le gar angi ɗerewol nah.

²⁹Zeroboˀam a mucu, a dikaka angi zivi ngi dideˀ naŋ, buy Israyeley a Samari. Mangal naŋ Zakari a zuɓa li naŋ.