Read South Giziga 2KI 15 Bible Online

2KI 15 - South Giziga bible

2KI 15

¹Azariya, mangal ngi Amasiya micifi buy madiɗa Zuda na, naɓa Zeroboˀam, buy Israyel a ɓul di i vi mukur cuw nga tarnaˀ naŋ angi zuma buyo.

²Naŋ micifi buy madiɗa na, naɓa naŋ ti vi kuruˀ nga merkeɗe. A zum buy a Zeruzaleme vi kukur zlum ngaŋ cuw. A zilaka mumuŋ Yekoliya, zuŋ Zeruzalem.

³Azariya a gi di i gwat mikaslsla a mihiri ngi Buymisemuŋ. A ga heˀ kaɓa ngi cine naŋ Amasiya.

⁴Na kwana, li miɗingir ɗingirey magam mikulihey angi taŋ na, a susuymom avra ta ɓula. Mizli a roko gam mikulihey, yo a roko wuram urdihey angi taŋ aruŋ na si.

⁵Buymisemuŋ a ga buyo a ngil kukula, hã avu hin ngi muc naŋ. A cifi angi hay naŋ baˀ avu mizli. Mangal naŋ Yotam, madiɗa ngi hay buyo a wa mizli ngi si ruwuyo.

⁶Is ngi slra ngi Oziyas ati gwat naŋ miga taŋ gar na, i mutoho taŋ le angi ɗerewol mazilaka Ɗerewol ngi buy Zudahay.

⁷Azariya a mucu, a dikaka a ciki dideˀ naŋhay angi Walahay ngi Daviti. Dar mangal naŋ Yotam a zum buy ar li naŋ.

⁸Zakari, mangal ngi Zeroboˀam, micifi buy madiɗa Israyel na, naɓa Azariya, buy Zuda a ɓul di i vi mizli ngir makir nga dangafaɗ naŋ angi zuma buyo. Zakari a zum buyo vi merkeɗe a Samari.

⁹Zakari a gi di i gwat malambaˀ a mihiri ngi Buymisemuŋ kaɓa dideˀ naŋhay zleˀe na ya. Mungra ngi Zeroboˀam miga zleˀe, hã a hizigiɗa Israyeley ɓa a gam aya na, Zakari a pula gi naŋ mbak le ta.

¹⁰Mbur ada, a zilaka Salom, mangal ngi Yabes, a gi gidiɓi ar Zakari. A kiɗa Zakari tuwa daˀ a mihiri ngi mizli gar, a mucu. Joˀ Salom vuna a zuɓa li naŋ.

¹¹Zakari, ɓi ngi slra naŋ mekelemey mindirama, i mutoho taŋ le gar angi ɗerewol mazilaka Ɗerewol ngi ɓi ngi slra ngi buy Israyeley.

¹²A gi le kaslsla kaɓa mingiɓi ngi Buymisemuŋ miɓa da Zehu zleˀe tuwa: «Dideˀ ɗikey a sa cifam i buyoy ar Israyeleye, hã avu dideˀ misin taŋ i waka.» Ɓi nah a gi le kanah gisiŋ.

¹³Salom, mangal ngi Yabese, a ci buyo naɓa Oziyas, buy Zuda, a ɓul di i vi mizli ngir ngoltir ngaŋ ngoltir naŋ angi zuma buyo. Salom a zum buyo kiya purla a Samari.

¹⁴Mbur ada, a zilaka Manehem, mangal ngi Gadi. A so baɗ a Tirsa nga Samari. A kiɗa buy Salom, mangal ngi Yabese vagay a Samari. Joˀ naŋ vuna a zuɓa li naŋ.

¹⁵Salomo, ɓi ngi slra naŋ mekelemey mindiram ati ɓi ngi gidiɓi naŋ miga gar na, i mutoho taŋ le angi ɗerewol mazilaka Ɗerewol ngi ɓi ngi slra ngi buy Israyeley.

¹⁶Akẽh na, Manahem a zla kiɗa vu ati walahay Tifsa, a ngizla mizli ngir walahay ati ngir li ngi cikeˀeheye gar, zle a Tirsa, sesẽŋ a Tifsa. Manahem mikiɗa taŋ na, asi mizli tayna a ngumam wunakaŋ mizlingre ngi walahaya ta. Joˀ a nduzo kwacay ngi ngwas misi ti huroyo cek cek.

¹⁷Azariya, buy Zuda, angi vi mizli ngir ngoltir ngaŋ ngoltir ngi zumabuy naŋ na, Manahem, mangal ngi Gadi, a ci buy Israyel a Samari. Manahem a zum buyo vi kuruˀu.

¹⁸Manahem a gi di i gwat malambaˀ a mihiri ngi Buymisemuŋ. Zeroboˀam, mangal ngi Nebat a gi mungra, hã a hizigiɗa Israyeley, ɓa a gam aya. Manaheme, angi hin ngi siifa naŋ gar na, ko a pula gi mungra nah mbak le ta ya.

¹⁹Buy Asiri mazilaka Pulo, ara zuma hirwuyo. Akẽh na, Manahem a vulaŋ ɓiri bara, tan kukur makir, ɓa Pul a zuɓaŋ haŋ, anja ɓa a cici gidaŋ gidaŋ ar zumabuy naŋ.

²⁰Manahem muluma dala nah na, a tiɓi di i buutu a hirnga mbur Israyel gar, a hirnga misi zlilihey gar, ɓa ngi vula da buy Asiri. Hirnga mbur gar na, suloy kukur zlum, kukur zlum. Akẽh na, buy Asiri a mi a muŋ. A cifi asi ruwuy Israyele mata.

²¹Manaheme, ɓi ngi slra naŋ mekelemey mindiram ati gwat naŋ miga taŋ gar na, i mutoho taŋ le angi ɗerewol mazilaka Ɗerewol ngi ɓi ngi slra ngi buy Israyeley.

²²Manahem a mucu, ara luuma dideˀ naŋhay ar vigiɗi. Dar mangal naŋ Pekahiya a zuɓa li naŋ.

²³Azariya, buy Zuda, angi vi mizli ngir zlum naŋ angi zumabuy naŋ na, Pekahiya, mangal ngi Manahem, a ci buy Israyel a Samari, a zum buyo vi cuw.

²⁴Pekahiya a gi di i gwat malambaˀ a mihiri ngi Buymisemuŋ. Mungra, Zeroboˀam, mangal ngi Nebat miga, hã a hizigiɗa Israyeley ɓa a gam aya na, Pekahiya a pula gi naŋ mbak le ta.

²⁵Gawla naŋ soje madiɗa majijiraŋ gwat ngi vurum naŋhaya, a gi gidiɓi araŋ. A kiɗa Pekahiya a hay naŋ buyo angi li mbur mandil ng'ara ti tuwaˀa haɗa, jom ti jini ngi Argop ati Ariye. Yo waɗ mizli Galaˀatay ada jom ava kukur zlum. Naŋ mikiɗa Pekahiya tuwa na, joˀ naŋ a zuɓa li naŋ.

²⁶Pekahiya, ɓi naŋ mekelemey mindiram ati gwat naŋ miga taŋ gar na, i mutoho taŋ le angi ɗerewol mazilaka Ɗerewol ngi ɓi ngi slra ngi buy Israyeley.

²⁷Azariya, buy Zuda, angi vi mizli ngir zlum nga cuw naŋ angi zuma buyo na, Peka, mangal ngi Remaliya a ci buy Israyel a Samari, a zum buyo vi kukur cuw.

²⁸Peka a gi di i gwat malambaˀ a mihiri ngi Buymisemuŋ. Mungra, Zeroboˀam, mangal ngi Nebat miga, hã a hizigiɗa Israyeley ɓa a gam aya na, naŋ a pula gi naŋ mbak le ta.

²⁹Ti hin ngi zumabuy ngi Peka, buy Israyele na, Teglat-Falasar, buy Asiri, a so zuma walahay Yoŋ, Abel-Bet-Maˀaka, Yanowa, Kedes ati Hasor, yo Galaˀat, Galile ati hirwuy Neftali gar. A jaka mizli ngi si ruwuy hanayna nga Asiri.

³⁰Oze, mangal ngi Ela, a gi gidiɓi ar Peka, mangal ngi Remaliya. Oze a kiɗa vagay, a zuɓa li naŋ. Ti di nah na, naɓa Yotam, mangal ngi Azariya a ɓul di i vi mizli ngir cuw naŋ angi zuma buyo.

³¹Peka, ɓi ngi slra naŋ mekelemey mindiram ati gwat naŋ miga taŋ gar na, i mutoho taŋ le angi ɗerewol mazilaka Ɗerewol ngi ɓi ngi slra ngi buy Israyeley.

³²Yotam, mangal ngi Azariya micifi buy madiɗa Zuda na, naɓa Peka, mangal ngi Remaliya a ɓul di i vi mucuw naŋ angi zuma buyo.

³³Yotam micifi buy madiɗa naɓa naŋ ti vi kukur cuw nga zlum. A zum buy a Zeruzaleme vi kuruˀ nga merkeɗe. A zilaka mumuŋ naŋ Yerusa, zuŋ ngi Sadok.

³⁴Yotam a gi gwat mikaslsla a mihiri ngi Buymisemuŋ, heˀ kaɓa cine naŋ Azariya.

³⁵Na kwana, li miɗingir ɗingirey magam mikuli ar taŋ na, a susuymom avra ta ɓula. Mizli ara gam mikulihey, yo ara wuram urdihey ar taŋ aruŋ na si. Mizlingre vay muŋ ngi hay ngi Bumbulvuŋ na, mindira i naŋ.

³⁶Is ngi ɓi ngi slra ngi Yotam ati gwat naŋ miga taŋ gar na, i mutoho taŋ le angi ɗerewol mazilaka Ɗerewol ngi buy Zudahay.

³⁷Ti di nah na, Buymisemuŋ a zla slina Resiŋ, buy Siri ati Peka, buy Israyel, mangal ngi Remaliya, ɓa ara zlaka kiɗa vu ati hirwuy Zuda.

³⁸Yotam a mucu, a dikaka ar zivi ngi dideˀ naŋhay ar Walahay ngi Davit, dideˀ naŋ. Mangal naŋ Ahas a zuɓa li naŋ.