Read South Giziga 2KI 16 Bible Online

2KI 16 - South Giziga bible

2KI 16

¹Peka, mangal ngi Remaliya, angi vi mukuruˀ nga tarnaˀ naŋ ngi zumabuy naŋ na, Ahas, mangal ngi Yotam a ci buy Zuda.

²Ahas micifi buy madiɗa na, naɓa naŋ ti vi kukur cuw nga zlum. A zum buyo vi kuruˀ nga merkeɗ a Zeruzaleme. A gi gwat mikaslsla a mihiri Bumbulvuŋ, Buymisemuŋ naŋ, kaɓa dideˀ naŋ Davite.

³Amma naŋ a sipi di i gi gwat ngi buy Israyeley, hã a gi mikuli ti mangal naŋ, kaɓa malambaˀ mukuyta wãˀ ngi sukwi ngi mizli Bumbulvuŋ muɓula taŋ a mbuŋ Israyele na.

⁴A gi mikulihey, yo a zlum urdihey ar li miɗingir ɗingir ngi gi mikulihey, a muwãhay, waɗ asi widis mikipey.

⁵Akẽh na, Resiŋ, buy Siri ati Peka, mangal ngi Remaliya, buy Israyele, a bam nga gi vurum ti walahay Zeruzaleme. A ndahaka hirnga ngi Ahasa ndah, amma a pakaŋ hirnga gu ta.

⁶Ti di nah na, naɓa Resiŋ, buy Siri a tika ay le da walahay Elata i hirwuy Siri mawaŋ. A hila mizli Yudehey avra, a dirba nah na, mizli Edomoy a soko pam a Elata, a cifam anga, hã dana.

⁷Ahas a slin mizli ng'avu Tiglat-Falasar, buy Siri, ɓa a ɓakaŋ, Ahas a ɓuw na: «Ya i gawla ɗik, yo yi mangal ɗiki. Sawa ɓa ki lihiy avu buy Siri ati buy Israyel mizlikiy ngi kiɗa vu na takwa.»

⁸Akẽh na, Ahas a hila ɓiri bara ati ɓiri tapasl tapasl misi ar hay ngi Bumbulvuŋ, waɗ misi angi zlili ngi hay naŋ buyo a slin di ngatara da buy ngi Asiri.

⁹Buy Asiri a cine mi ngi Ahas mucufuɗaŋ tuwa le, a bi nga gi vurum ti hirwuy Damasa, a zuma le. A ja mizli ngi raˀahaya nga Kir, waɗ a kiɗa Resiŋ vagay.

¹⁰Buy Ahas tuwa, aru nga nga pura Tiglat-Falasar, buy Siri a Damasa. Naŋ mupura li gi mikuli ngir walahay Damas na, a slin ng'avu Uriya, ɓa a bigakaŋ taŋ miɗiyaka li gi mikuli nah ati tuh naŋ gar na, anja ɓa a ɗiya heˀ kanah ya.

¹¹masay Uriya, a ɗiya li gi mikuli heˀ kaɓa buy Ahas mislino mizli zle a Damas, mibigakaŋ di tuwa. Ɓa hã buy Ahas misa mawa tikeˀe ti Damas na, naɓa Uriya a kiɗa mi naŋ le zlezle si.

¹²Buy Ahas mindilo ndil ti Damasa si na, a pura li gi mikuli i miɗiya le deŋ. A kirih ng'avaŋ, waɗ a jiɗ ng'ara.

¹³A zluma mikuli naŋ ngi zlum ti zlumo, waɗ mikuli magaka ti hapa ati mbaazla, yo a kucaŋ pumbus ngi ginew naŋ migi di mikuli ngi vula zuyo.

¹⁴Amma li gi mikuli ngi ɓiri gaza misi a mbuŋ Buymisemuŋ na, a zuɓa nah avra ti mbuŋ Haya, asi ara tika li ar wala ngi li gi mikuli nawaya ati hay ngi Bumbulvuŋ, a ɗuva nah a ciki li gi mikuli, tir vay muŋ naŋ.

¹⁵A dirba nah na, buy Ahas a vula mingiɓi da masay Uriya, a ɓaŋ ani: «Zle dana na, mikuli ngi zlum ti zlum ti miprik ati mikuli ti hapa ati mbaazla magaka ti pastaˀ na, kisa ga taŋ ar li gi mikuli vay madiɗa na muduba. Yo mikuli ngi buy, mikuli ngi zlum ti zlum ati mikuli magaka ti hapa ati mbaazla, mizli ngi si ruwuy ma soko di gar na, kisa ga taŋ ar li gi mikuli madiɗa. Pumbus ngi gwat ngi mikuli ngi zlum ti zlumoy ati ngi mikuli wanahayka gar na, kisa pa taŋ angaŋ. Amma li gi mikuli ngi ɓiri gaza na, mbak ya vuna yi sa pura ɓi nah.»

¹⁶masay Uriya, gwat buy Ahas muɗuvaŋ ɓi nah gar na, a ga taŋ le.

¹⁷Buy Ahas a puska palalam ngi ɓiri gaza misi ar dumvu ngi saret ngir hay ngi Bumbulvuŋ. A hila kisahay misi angi sarete baɗ tir li taŋhay avra, waɗ a pam sar ti daroŋ madiɗa miligidaˀ mihirasl ar slahaya, a ɗuvaka taˀ ar ɗugur midirka a ruwuy.

¹⁸Angi kiɗa mi nah, buy Ahas a mbiɗa jiviɗ ngi cuh tapas Sabat mindiraka a hur hay ngi Bumbulvuŋ, waɗ mizlingre vay ngi vra ngi ci ngi hay naŋ buyo.

¹⁹Ahasa, is ngi slra naŋ ati gwat naŋ miga taŋ gar na, i mutoho taŋ le angi ɗerewol mazilaka Ɗerewol ngi buy Zudahay.

²⁰Ahas a muc, ara luuma dideˀ naŋhay a ruwuy, a dikaka a ciki dideˀ naŋhay angi Walahay ngi Daviti. Mangal naŋ Ezekiyas a zum buy ar li naŋ.