Read South Giziga 2KI 17 Bible Online

2KI 17 - South Giziga bible

2KI 17

¹Ahas, buy Zuda, angi vi mukuruˀ nga cuw naŋ ngi zumabuy naŋ na, Oze, mangal ngi Ela, a cakaŋ buy Israyel a Samari. A zum buyo vi ngoltir.

²Oze a gi di i gwat malambaˀ a mihiri ngi Buymisemuŋ, anta hãkaɓa ngi buy Israyel mudumbuŋhoy angi naŋ na ta ɓula.

³Samanasar, buy Asiri ara zli kiɗa vu ati Oze. Oze a ki hirnga a mbuŋ naŋ, dar a wurka buutu da naŋ.

⁴Akẽh na, buy Asiri a pura na, Oze a gi gidiɓi le angaŋ. Asi a pura na, Oze a slin mizli ng'avu Say, buy Ezipte, yo a wurkaŋ buutu kaɓa naŋ wurkaŋ di vur vi gar zleˀe na mata. Buy Asiri a ja Oze, a gica angi dangay.

⁵A dirba nah na, buy Asiri a bi vurum ng'asi ruwuy gar. A ndaha hirnga ngi Walahay Samari hã vi makir.

⁶Angi vi mungoltir naŋ ngi zumabuy ngi Oze na, buy Asiri a tiɓa hirwuy Samari le. A ja Israyeleye cek nga hirwuy Asiri. Buy Asiri ara pa taŋ a cifam a Hala, a Habor, a mizaw Gozaŋ waɗ ar walahay ngi ruwuy Medihey.

⁷Gwat hana a gi na, asi Israyeley migam mungra avu Bumbulvuŋ Buymisemuŋ, taŋ. Naŋ mubo ti taŋ ti ruwuy Ezipte, a moho taŋ tisi haŋ ngi buy madiɗa ngi Ezipte, buy Ezipte. Yo asi taŋ mihuruk hurukam a mbuŋ kulihey ma.

⁸Taŋ a sipam di i sirik ngi sukwi ngi mizli tayna, Buymisemuŋ muɓula taŋ a mbuŋ taŋ na. Yo waɗ a sipam ɓi ngi buy Israyeley muɗuvaka.

⁹Israyeley a gam da Bumbulvuŋ Buymisemuŋ, taŋ i gwat misi mizli magaka ta. Angi Walahay taŋhay gar na, a ɗiyam li miɗingir ɗingirey ngi gi mikulihey ar taŋ, ar hay ngi soje mijigina lihey, waɗ angi walahayay gar misi muguno hirnga taŋhaya le ti mohol.

¹⁰Ar li miɗingir ɗingirey, yo asi widis miɗiɗahay le tukuf tukuf gar na, a ngam ɗuguroy ati dum kulihey.

¹¹Ar li miɗingir ɗingirey gar na, a wuram urdihey kaɓa sukwi Buymisemuŋ muɓula taŋ nga ruwuy mulak, ɓa a pulaka taŋ li na ya. A gam gwat malambaˀhay, hã a ja mevel a Buymisemuŋ.

¹²A huruk hurukam a mbuŋ kulihey, dambalaka Buymisemuŋ a ɓa taŋ le ani vurˀe: «Ki ra gaka gwat misi kanah ta!»

¹³Buymisemuŋ a ɓa Israyeleye ati Zudahaya le ɗaˀ ɗaˀ le vurˀe. Ɓi nah a bo le ti balam mijiviɗ naŋhay, yo tivi mizli misi kleŋ naŋhay gar, a ɓa Israyeleye: «Pulaka jiviɗ malambaˀ kumoyo moko. Ɓi ya ɓi micica ati ɓi ya mujuwa taŋ gar, kaslsla kaɓa ya mutoho ɓi nah da dideˀ kumoy, yo ya muɓu kum di, ɓi nah mubo ti balam gawla mijiviɗ ɗuwoy na, jaka taŋ a hirnga.»

¹⁴Amma taŋ a ngumam cine nah ta. A tiram ti hirnga taŋ gidaŋ kaɓa dideˀ taŋhay mitiram ti hirnga taŋ gidaŋ, yo taŋ mungumam tiɓa Bumbulvuŋ Buymisemuŋ, taŋ ta na ya.

¹⁵Ɓimuɗuva naŋhay ati jumoˀay naŋ ati dideˀ taŋhay zleˀe waɗ mingiɓi naŋ mika taŋ di mumuyuŋ zay sla a slimiɗ na, a hizigaka le avra. A sipam gwat ngatarahay lambaˀ, joˀ taŋ vuna a tiram gwat ngatarahay lambaˀ. Taŋ a sipam di i ɓi ngi sukwi mugun hirnga taŋhay na, dambalaka Buymisemuŋ a tika taŋ le, anja a gam kaɓa taŋ na ta ngbaŋ.

¹⁶Ɓimujuwa ngi Bumbulvuŋ Buymisemuŋ, taŋ na, a hizigaka le ŋzloh avra. A gam ziri slahay cuw peˀpeˀ ti ɓiri ar vu. A ngam kuli dum kaˀa, yo a huruk hurukam a mbuŋ sukwi ngi gwat ngi muŋhoy, yo waɗ a mbuŋ Baˀal.

¹⁷A gam mikuli ti ziri taŋ mizilehey ati mongosohoyo. A sipam ɓi ngi cekenehey, a ram ti hiziga njoloy. A vulaka vu taŋ ngi gwat malambaˀhay a mihiri ngi Buymisemuŋ, hã a slikiɗakaŋ mevel.

¹⁸Akẽh na, Buymisemuŋ a zla zuɓa himaˀ fõh fõh ar Israyeleye. A kiraha taŋ kileŋ ti mihiri naŋ. Sey mindir i sukwi ngi Zuda tewle a mbuŋ naŋ.

¹⁹Zudahaya, Bumbulvuŋ Buymisemuŋ, taŋ, ɓi naŋ mujuwa na, taŋ vuna kwana, a jaka ɓi nah a hirnga ta ya. A sipam nga taŋ i ɓi ngi Israyeley ɓi micicaka jak.

²⁰Vurˀe, Buymisemuŋ a zliɗa Israyeleye gar avra. A tika taŋ ay ɓa a hinam hirnga, yo a vula taŋ a haŋ mivi vuhoy ɓa a ɓulaka taŋ kileŋ ti mihiri naŋ.

²¹Ti di Buymisemuŋ mibi ti sukwi Israyel ti ngi zumabuy ngi Davit na, taŋ a cam buy taŋ i Zeroboˀam, mangal ngi Nebat. Na Zeroboˀam vuna so na, a ngizli ti sukwi Israyele kileŋ avu Buymisemuŋ, yo a ci ti mizli ng'ar mungra madiɗa.

²²Mungra ngi Zeroboˀam miga taŋ gar na, Israyeley a sipam di i nah ya, ko a pulaka gi nah mbak le ta.

²³Mbak Buymisemuŋ a kiraha taŋ kileŋ ti mihiri naŋ. A gi le kaɓa naŋ miɓa ɓi nah zleˀe, mubo ti balam gawla mijiviɗ naŋhay gar. Ar kiɗa mi naŋ na, a jaka Israyeleye tisi ruwuy taŋ, a ram taŋ kileŋ nga ruwuy Asiri.

²⁴Buy Asiri a so ti mizli Babiloŋhoy, mizli Kutahay, Awahay ati mizli Hamatay waɗ Sefarvayimey. A vula taŋ li, a pam ar walahay Samariheye ar li ngi Israyeleye a pam, a cifam ar walahay ngi ruwuy Samariheye.

²⁵Mizli tayna a zlaka a cifam asi ruwuyo so. Vur taŋ i mizli mahuruk hurukam a mbuŋ Buymisemuŋ ta tuwa na, dar Buymisemuŋ a slino taŋ moboroy, ara kiɗaka taŋ.

²⁶Akẽh na, mizli ara ɓaka buy Asiri: Sukwi ngi mizli ka mujo taŋ, ka mucufa taŋ ar walahay ngi si ruwuy Samarihey tuwa na, a sinaka sipi jiviɗ ngi kuli ngi si hirwuy nah ta. Vurˀe, kuli nah a slino taŋ moboroy, ani ara ngizlaka mizli tayna, asi taŋ misinaka sipi jiviɗ naŋ ta tuwa.

²⁷Ar nah na, buy Asiri a vula mingiɓi da mizli, a ɓa t'ani: Masayay, kum mujoko taŋ ti diga ng'aka na, a ram ti mbur purla asi taŋ ng'avu taŋ a diga. Anja ɓa ara cifi a diga ɓa a dubuna taŋ jiviɗ ngi huruk huruk a mbuŋ kuli ngi si hirwuy nah vuna.

²⁸A wuzla masayay mijaka taŋ zleˀe nga diga tuwa na, mbur purla a so cifi a Betel. Dar a zla a dubuna taŋ jiviɗ ngi huruk huruk a mbuŋ Buymisemuŋ so.

²⁹Amma, mizli mulak tayna tuwa na, sukwi gar a ɗiyi kuli naŋ, kuli naŋ, a cicaka taŋ ar hayay misi ar li miɗingir ɗingirey, Samarihey mindiraka taŋ zleˀe na. Sukwi gar a ga kanah kanah ar walahay naŋ micifi le anga gar.

³⁰Mizli musoko ti Babiloŋ, a ɗiyam nga taŋ i kuli Sukot-Benot, ngi Kutahaya, nga taŋ i kuli Negat, yo ngi Hamataya, nga taŋ i kuli Asima.

³¹yo mizli ngi Avahaya, nga taŋ i kuli Nibaz ati Tartak. Mizli ngi Sefarvayimeye, hã a gam mikuli ti ziri taŋhay da kuli Adramelek waɗ da Arnamelek.

³²Bam ti nah gar na, taŋ gar taŋ ara huruk hurukam a mbuŋ Buymisemuŋ ma si. A wunam masayay a wuzla taŋ ɓa ngi gi mikuli da kuli taŋhay ar hay ngir li miɗingir ɗingireye.

³³Gar ti taŋ mahuruk hurukam a mbuŋ Buymisemuŋ na kwana, ara huruk hurukam a mbuŋ kuli taŋhayakaɓa sirik ngi sukwi ngi mizli, taŋ mujoko taŋ baɗ a diga na.

³⁴Hã dana kwana, a sipam di i sirik misi zleˀe. Taŋˀnta huruk hurukam a mbuŋ Buymisemuŋ ta. Ɓimujuwa ati sirik nga taŋ vuna, t'anta sipaka ta. Ko Ɓimuɗuva ati Mingiɓi Buymisemuŋ muvula da dideˀ ngi Zakopoy, Zakop, naŋ micaŋ slimiɗ Israyel vuna ma na, taŋ ˀnta jaka a hirnga ta.

³⁵Dambalaka Buymisemuŋ a jum ˀay le ati taŋ, a ɓa taŋ le ani ngbaŋ: «Ki ra huruk hurukam a mbuŋ kulihey ta, ko ki ra hurukom a mbuŋ taŋ ta. Ki ra gaka taŋ mezegwel ta, yo ko ki ra gaka taŋ mikuli ta.

³⁶Ya, Buymisemuŋ mubo ti kum ti Ezipte ti gidaŋ ɗu mihaɗa ati hirbazla ɗu migidaŋ na, sey ki zluwunam di i ya pal ɗu tewle. Ki sa huruk hurukam a mbuŋ ɗu, yo kisa gikiy mikuli da ya pal ɗu tewle.

³⁷Ɓimujuwahay ati sirikay, ɓimuɗuva ati ɓi ya muvulukum taŋ gar na, kisa jaka taŋ a hirnga, ɓa ki gam taŋ slra kuy kuy ar hin gar. Ki ra huruk hurukam a mbuŋ kulihey ta.

³⁸Jumoˀay, ya mujum ati kum na, ki ra puyukam hirnga naŋ ta. Ki ra zluwunam ti kulihey ta.

³⁹Ki sa zluwunama sey ti ya Bumbulvuŋ Buymisemuŋ, kum tewle. Masa luhukum ti haŋ mesene kumoy gar na i ya.»

⁴⁰Amma mizli tayna a ngumam cin nah ta. Taŋ a ram nga mbuŋ ti sipi sirik taŋ misi zleˀe jaka.

⁴¹Naŋ kine, sukwi tayna, ara huruk hurukam a mbuŋ Buymisemuŋ, yo ara huruk hurukam a mbuŋ kuli taŋhaya ma. A dirba taŋ kwana, ziri taŋhay ati dideˀ taŋhaya, a gam di i gwat mupurlaka nga taŋ vuna ya, hã a ndilo dana.