Read South Giziga 2KI 18 Bible Online

2KI 18 - South Giziga bible

2KI 18

¹Oze, mangal ngi Ela, angi vi mimakir naŋ angi buyo na, Ezekiyas, mangal ngi Ahas, a cakaŋ i buy Zuda.

²Ezekiyas micifi buy madiɗa na, naɓa naŋ ti vi kukur cuw nga zlum. A zum buyo vi kukur cuw nga ngoltir a Zeruzaleme. A zilaka mumuŋ naŋ Abi, zuŋ ngi Zakari.

³Ezekiyas a gi di i gwat mikaslsla a mihiri ngi Bumbulvuŋ, heˀ kaɓa dideˀ naŋ Daviti.

⁴Li miɗingir ɗingirey magam mikulihey angi taŋ na, mususuyumo taŋ avra i naŋ. Yo a waha ɗugur kulihey ming'aka taŋ kaˀ kaˀa, a waha dum kuliheye waɗ kaw ngi ɓiri gaza Moyis miga zleˀe na, a waha meɗ meɗe. Asi mike na, hã ti di nah kwana, Israyeley ara wuram urdihey a mbuŋ naŋ aruŋ na si. Joˀ a zilaka kaw ngi ɓiri gaza nah Nehustaŋ.

⁵Ezekiyas a pula vu naŋ mbak da Bumbulvuŋ Buymisemuŋ, ngi Israyele. A dirba nah na, a wuzla buy Zudahaya, ko a lumam buy kaɓa naŋ na mata. Ko a wuzla buy mudumbuŋhoy ar naŋ na kwana, anta na si.

⁶Naŋ a ndir gumbaˀ avu Buymisemuŋ, manja a mbiɗaŋ duba. Ɓimujuwahay, Buymisemuŋ muvula taŋ da Moyis na, a ja taŋ le a hirnga.

⁷Buymisemuŋ naŋ da ati Ezekiyasa, gwat naŋ mira ga gar na, ara gi kasl kaslsla. Ezekiyas a sli himaˀ avu buy Asiri, a ngum hin hirnga a mbuŋ naŋ mata.

⁸Waɗ ma na, a kiɗa Filistiheye, hã sesẽŋ a Gaza ati hirwuy naŋhaya, yo a tiɓa hay ngi sojehey ati walahay mugun gun ti moholoyo.

⁹Angi vi mumufaɗ naŋ ngi zumabuy ngi Ezekiyas, yo vi mitarnaˀ naŋ ngi zumabuy ngi Oze, mangal ngi Ela, buy Israyele, Salmanasar, buy Siri, ara zla kiɗa vu ati hirwuy Samari, a ndaha hirnga naŋ ndah.

¹⁰Ar kiɗa mi ngi vi mimakir naŋ na, Asirihey a zuɓaka walahay Samari le. Naɓa ti di nah na, Ezekiyas a ɓul di i vi mimerkeɗ naŋ angi zumabuy naŋ, yo Oze kwana, a ɓul di i vi mungoltir naŋ angi zumabuy naŋ a Israyele.

¹¹Buy Asiri a jo Israyeleye nga Asiri, a cufa taŋ a Hala, a ayzaw Habor a Gozaŋ, yo waɗ ar walahay Medihey.

¹²Ɓi nah migi kanah na, asi Israyeley a cinaka mi ngi Bumbulvuŋ Buymisemuŋ, taŋ na ta, yo asi taŋ mingilaka ɓi naŋ mujum di ˀay ati taŋ na ma. Moyis, gawla ngi Buymisemuŋ, ɓi naŋ muvula taŋ di gar na, ko a cinaka ta, yo a gam di slra ta.

¹³Angi vi mukuruˀ nga mufaɗ ngi zumabuy ngi Ezekiyas na, Senakerip, buy Asiri, a slikiɗ nga kiɗa vu ati walahay mugunohoy le ti mohol misi asi ruwuy Zuda, a wuɗ ɓa a tiɓa taŋ.

¹⁴Ar nah na, Ezekiyas, buy Zuda a slin ɓa ara ɓaka buy Asiri a Lakis ani: «Yi gi malambaˀ le. Anja ki so zliy ngi kiɗa vu ta. Gwat ka misa ɗuviy ɓi nah le gar ɓa i ga si na, i sa ɓusa ɓi nah si.» Buy Asiri tuwa, a cufuɗ avu Ezekiyas, buy Zuda, ɓa a wurkaŋ, ɓiri bara, kilo skat makir, waɗ ɓiri tapasl tapasl kilo skat ngoltir.

¹⁵Ezekiyasa, dala misi angi hay ngi Bumbulvuŋ gar ati dala misi angi zlili ngi hay naŋ buy gar na, a hila slar slar wãˀ, a vulaŋ di.

¹⁶Ti di nah na, Ezekiyas a ngila miviŋ ngi hay ngi Bumbulvuŋ ati dum ngi miviŋheye. I naŋ buy vuna misirta taŋ sirit sirit ti ɓiri tapasl tapasl ngbaŋ, dar a vula taŋ gar da buy Asiri.

¹⁷Buy Asiri a slin baɗ a Lakise ng'avu buy Ezekiyas a Zeruzaleme, buy ngi soje naŋhay wãˀ, soje madiɗa mislakka ati soje naŋ majijiraŋ gwat ngi vurumoyo waɗ sojehey ngay taˀ wãˀ asi taŋ. A bam ara ndilam a Zeruzaleme. A jiɗam, a ndilam waɗ taŋ dedeŋ a ciki zlazlar vay ngi muŋ a jiviɗ maru kini ng'ar guva ngi mbur mubuna zanahay.

¹⁸A cufuɗam ɓa a zilaka taŋ buyo ɓa a ɓakaŋ. Akẽh na, Eliyakim, mangal ngi Hilkiya, madiɗa ngi wazlaray buy vuna, a bo tir walahaya nga ji hirnga ti taŋ, waɗ Sebna, mbur mutoho gwat ati Yowa, mangal ngi Asaf, mijiviɗ ngi buyo.

¹⁹Akẽh na, soje madiɗa mijijira gwat ngi vurum ngi buy Asiri a ɓa taŋ: «Ɓaka buy Ezekiyas na: Buy Madiɗa ngi Asiri a ɓaŋ ani: ‹Ka ki ɗuva wuluk ɗike ar mike.

²⁰Ki ɓi le ani: Ɓa ngi luuma kuti ati gidaŋ ngi gi vurum na, i mi ɗaˀ purla tew si? Ɓa ki slikiɗ ɓi avu yakanah vuna, ki ɗuva wuluk ɗike taˀ ar waka?

²¹Ani ki ɗuva wuluk ɗike le taˀ ar jini ngi Ezipte, misi kaɓa lavaɗ mingila le. Da mbur mihuruk huruka haŋ le anga gar na, a zligaŋ haŋ gor njoŋ. Buy madiɗa ngi Ezipte, buy Ezipte, naŋ kahana avu mizli gar muɗuvaka wuluk taŋ le taˀ angi naŋ.

²²Asinta, kisa ɓikiy: Ndr'i ɗuvaka wuluk ndra taˀ ar Bumbulvuŋ Buymisemuŋ, ndra kwani? Na, li miɗingir ɗingirey magam mikulihey ar taŋ ati li gi mikuliheye, ka Ezekiyas vuna mususuyumo taŋ avra na, vur Buymisemuŋ vuna takwa? Yo miɓa Zudahay ati Zeruzalemey: Ki sa huruk hurukam a mbuŋ li gi mikuli hana a Zeruzalem na, i ka vuna takwa?

²³Wurenna, zuwen ngiɓam ay ati buy Asiri, kumani ɗu, yo i sa vuluw pilisey durmuk cuw, da ki ndila le ngi luuma mizli ngi jiɗ ar taŋ kwana.

²⁴Madiɗa ngi sojehey purla ngi dirba wãˀ a wuzla gawla ngi kumani ɗuwoyo ki ndila ngi ɓul naŋ ta. Ka, ki vula vu ɗike taˀ da Ezipte, asi naŋ misi ti mota ngi vurumoy ati pilisey na takwa?

²⁵Na zle, ya muso nga gi vurum ti li hana ɓa i hirya na, i Buymisemuŋ muvuliy wuluk nah takwa? Mipiliy jiviɗ i Buymisemuŋ, ara gi vurum ati hirwuy nah ɓa ki hiryaŋ.›»

²⁶Dar ar nah na, Eliyakim, mangal ngi Hilkiya, Sebna ati Yowa, a cufuɗaka gawla mijijira gwat ngi vurum ngi buy Asiri tuwa: «Ambuh, inga ɓa ndra gawla ɗikeye ti mi aram takwa, asi i cinam di i nah. Ki ɓa ndra ti mi ngi mizli Yudehey majikoko slimiɗ tir mohol na ta, vur taŋ macinakaŋ.»

²⁷Soje mijijira gwat ngi vurum ngi buy Asiri a mbiɗa taŋ di: «Buy ɗu mislino ya ngi so ɓa ɓi hana, ki waka naŋ vur buy kum waɗ vur kum pal kum si kwa? Naŋ vur da mizli mujoˀ ar mohol hana vuna ya. Asi taŋ kwana a sa tiram kaɓa kum vuna ya, hã a sa zumam zay taŋ, yo a sa sam kwanay taŋ.»

²⁸A dirba nah ma na, mbur mijijira gwat ngi vurum ngi buy Asiri tuwa, a cici deŋ, dar a widi ti gidaŋ, a ɓi ti mi Yude: «Cinaka mingiɓi ngi Buy Madiɗa, buy Asiri?»

²⁹Buy a ɓi na: Anja buy Ezekiyas a gukum gilaw ta, asi a luhu kum tisi haŋ ɗu gu ta.

³⁰Ezekiyas ara ɓukum ɓa ki tiɓaka mingiɓi naŋ, ki pulaka vu kumo da Buymisemuŋ. A ɓukum: Buymisemuŋ a sa laha ndra gisiŋ gisiŋ. Walahay misenna anta sa ru asi haŋ ngi buy Asiri ta kini.

³¹Buy Asiri a ɓukum, anja ki cinaka mingiɓi ngi Ezekiyasa ta. Zuwen jam ngama ati ya, yo soko ng'avi ya jaka. Kanah na, naɓa ko wa gar ar wala kumo a sa lum zuma yi ngi widis ngi gudubun naŋ ati yi ngi ˀuruf naŋ gu, yo a sa si yam ngir vigiɗ ngi yam naŋ gu.

³²Hã da ya muso le hulukum ngi ru ti kum nga hirwuy misi kaɓa hirwuy kum, hirwuy ma gi alkamari, ma gi gudubun, hirwuy ngi zuma ɗaf ati ngi guva ngi gudubun, hirwuy ngi tutumbur muɗuco naŋ wureˀ aruŋ anta sa sli sleˀ le ta, waɗ hirwuy ngi mam. Kanah so na, naɓa kum anta sa micam ta. Ezekiyas ma ɓukum: Buymisemuŋ a sa luhu kum na, a gukum di i gilaw ti gi, ki tiɓaka mingiɓi naŋ ta.

³³Sukwi mekelemeye, kuli taŋhay a lahaka hirwuy taŋhaya le ɗaˀ gu tisi haŋ ngi buy Asiri kwa?

³⁴Kuli Hamat ati kuli Arpata, taŋ ama ani ka? Kuli ngi Sefarvayimey ati ngi Henahay waɗ kuli ngi Avahaya, taŋ ama ani ka? a lahaka Samari le tisi haŋ ɗu gu kwa?

³⁵I kuli wana purla a wuzla kuliheye milaha hirwuy naŋ tisi haŋ ɗu ka? Ɓa Buymisemuŋ a sa laha Zeruzaleme tisi haŋ ɗu na mbri mbrike?

³⁶Mizli a cifam teˀteˀ, ko a mbiɗakaŋ mi pal ta, asi buy a ɗuva taŋ ɓi le ani: «Kum anta sa mbiɗakaŋ mi ko pal ta!»

³⁷Akẽh na, mbur madiɗa ngi hay buy ati mbur mutoho gwat waɗ Yowa, mangal ngi Asaf, yo i mijiviɗ mikasl ngi vu buyo ma. Taŋ makir taŋ a moko ng'avu buyo zanahaya mingirahay le pulwar pulwar. Dar a slufakaŋ mingiɓi ngi mbur mijijira gwat ngi vurum ngi buy Asiri tuwa so.