Read South Giziga 2KI 19 Bible Online

2KI 19 - South Giziga bible

2KI 19

¹Buy Ezekiyas micina mingiɓi tayna, kanah na, a ngira zana naŋ ngi vu vuhoyo a ki zana ngi vagay, aru ng'ar hay ngi Bumbulvuŋ.

²A dirba nah na, a slina mbur madiɗa ngi hay naŋ ati mutoho gwat naŋ waɗ mizli magala ngi si masayaya ng'avu mijiviɗ Ezayi, mangal ngi Amos. Taŋ gar taŋ ti zana ngi vagayay ɓaˀ ɓaˀ avu vu.

³A ra ɓaka Ezayi: «Ezekiyas a ɓi na: Hin dana i hin ngi ndurɓo hiri, hin ngi luuma kuti ti bonoy, yo i hin ngi pi mesem ma. Mangala, a ɗuvo hirnga le ngi bawa, amma mumuŋ, gidaŋ naŋ ɓa ngi niˀico di anta.

⁴Mbur mijijira gwat ngi vurum ngi buy Asiri, buy naŋ vuna a slino di, ɓa a za Bumbulvuŋ misi ti siifa. Asinta, Bumbulvuŋ Buymisemuŋ, ɗike, a cine mingiɓi naŋhay na le gar, yo a sa kutaŋ ti bonoy aseˀe kwani? Anjaka mijiviɗe, tumbulo Buymisemuŋ asi mizli mindiramay ar siifa neˀ na so.»

⁵Dar gawla ngi buy Ezekiyasaya, ara ndilam avu Ezayi so.

⁶Akẽh na, Ezayi kwana a ɓa taŋ na: «A ram, ara ɓaka buy kumo na, Buymisemuŋ a ɓi ani: ‹Mingiɓi ka micina, gawla ngi buy Asirihey mizikiy ti naŋ na, anja a guw zluwun ta.

⁷Buy Asiri a sa lum ɓi nawaya. I sa ga ɓa a wuluk a mi nga hirwuy naŋ. Yo i sa ga ɓa a kiɗaka vagay ti maslalam angi hirwuy naŋ tehhe a muŋ a diga.›»

⁸Mbur mijijira gwat ngi vurum ngi buy Asiri a cine na, buy naŋ, aru le baɗ ti Lakise nga Libna. Joˀ aru nga lumaŋ a diga so.

⁹Buy Asiri tuwa, a cine na, Tiraka, buy Etiyopi ara supo di ɓa a zlaŋ ngi kiɗa vu. Ar nah ma na, buy Asiri tuwa, a slin mizli ng'avu Ezekiyas, a ɓa mislineye:

¹⁰«Ezekiyas, buy Zuda, kisa ra ɓakaŋ ani: Bumbulvuŋ a ɓuw: ‹Zeruzalem anta sa so asi haŋ ɗu buy Asiri ta!› Bumbulvuŋ ɗik, ka mapulaŋ vu mbak haɗa fineˀ gidaŋ le nah na, anja a guw gilaw ngi ɓuw kahana ta.

¹¹Gwat, buy Asirihey gar migaka da hirwuyoy gar na, ki si na le takwa? A ngizlaka taŋ le, ko a pulam purla le ta. Ka ki wa na, kisa lih sukwani?

¹²Mizli ngi si ruwuy Gozaŋ ati ngi Haraŋ waɗ ngi Resefeye, dideˀ ɗuwoy a ngizlaka taŋ le, waɗ mizli ngi Telasaray, walahay hirnga ngi dideˀ ngi Edeneye. Kuli ngi sukwi ngi mizli ngi si ruwuy tayna vuna a lahaka taŋ le sukwani?

¹³Buy ngi Hamat, buy ngi Arpat, ngi Layir ati ngi sefarvayim, waɗ buy ngi Hena ati ngi Ava, taŋ ama ani ka?»

¹⁴Ezekiyas a tiɓa letir tuwa ti haŋ mislineye, a slufaŋ. A dirba nah, a jiɗ di ng'ar hay ngi Bumbulvuŋ. Ezekiyas a puska letire, a biga da Buymisemuŋ.

¹⁵Joˀ a dir dibiɗ ambuŋ Buymisemuŋ, a ɓaŋ: «Bumbulvuŋ Buymisemuŋ, ngi Israyel, ka muangi Kerubeŋhey. Angi zumabuy ar duniya gar na, Bumbulvuŋ i ka pal ɗik tewle. Asi miga muŋ ati hirwuy i kaha.

¹⁶Buymisemuŋ, jika slimiɗ, cin. Buymisemuŋ, wuna hiri ɓa ki pura. Cina mingiɓi ngi Senakerip mislino mbur ngi so zuw ka Bumbulvuŋ misi ti siifa na.

¹⁷Haˀaw Buymisemuŋ, i sinaka le, buy Asirihey a ngizlaka sukwi ngi mizli le angi hirwuy taŋhaya gisiŋ gwaɗ naŋ.

¹⁸A zlizliraka kuli taŋhaya le ti vu. Na zle, kuli tayna vuna i ka Bumbulvuŋ zleˀe ta si. I gwatay mizli miɗiyaka taŋ tiɗiyi ti haŋ, yo i dumoy ati ɗuguroy. Buy Asirihey mizlizliraka taŋ ti vu na vurˀe.

¹⁹Na wurenna so na, Bumbulvuŋ Buymisemuŋ, ndra, laha ndra tisi haŋ ngi buy Senakeripe takwa. Kanah na, mizli mazumam buy ar duniya gar na, a sa sinaka, ka Bumbulvuŋ Buymisemuŋ, i ka pal ɗiki.»

²⁰Ezayi a slin mizli ng'avu Ezekiyasa, ɓa ara ɓakaŋ: «Bumbulvuŋ Buymisemuŋ, ngi Israyel a ɓi ani: Haˀaw, ka midir dibiɗ vur ɓi ngi Senakerip, buy Asiri na, i cine le.

²¹Cina mingiɓi ɗu ya mira ɓa vur naŋ ani: Diyli ngi Siyoŋ ara hirsuw, ara singir ar ka, diili ngi Zeruzalem ara hir hirnga ti dirba ɗike.

²²Ka mizi na i waka? Ka miɓi ɓi malambaˀna ar waka? Ka miɓi ti buc, yo ka mupur nga ruwuy hiris le na i waka? I ya Bumbulvuŋ mipal kine ngi Israyel na takwa!

²³Ki ɓa mislin ɗikeye, a zikiy le, ya Buymisemuŋ, joˀ ki ɓi: «Mbele mota ngi vurum ɗuwoy na, yi jiɗ le nga hirnga muwã, hã nga wuzlaɓuh ngi Libaŋ misindik naŋ, ɓa ngi nguma dum mimezle ngi miter naŋhay, ati dum mimezle migila naŋhaya, yo i ndil sesẽŋ ar naŋ mikiɗ mi ndok wãˀ, sesẽŋ ar widis naŋ mingiriɗ wãˀ na.

²⁴Yi li vigiɗ ngi yamay le, yoyi si yam si ruwuy ngi sukwi ngi mizli mekelemeye le. Mihaŋ ngi mizaw Ezipteheye, yi hisika taŋ le ngbazlazlaŋ ngbazlazlaŋ wãˀ ti ya maɗuva sar ɗu taˀ taˀ na.

²⁵Zle misi nga dana ta, miga ɓa gwat tayna a gam na i yaha, yo angi hin mucohomoy zlezle, mukicuwa taŋ ɓa a gam i ya na, ki si na takwa? Wurenna, yi ra ga ɓa a gam muduba so. Walahay muguno hirnga taŋhaya le gun gun ti moholoyo a sa tiram zikitiŋ zikitiŋ ar li purla kaɓa ɗugur mukuso le arleˀe. Mucufuw hĩˀĩ ɓa ki tiri taŋ kaɓa nah ya na, ki si na takwa?

²⁶Mizli mucufa ngi raˀahaya, t'anta gidaŋ ta, ara zluwunam kirkir, yo a pam mesem le. Taŋ kaɓa giziŋ ngir guvahay, kaɓa giziŋ tukuzo muluɓuw luɓuw kine aruŋ, kaɓa kalaf magil a hirnga gbale. Taŋ kaɓa daw muˀus muba le kufuyoh, naɓa naŋ migi t'aruŋ.

²⁷Daka mira cifi, ka mira bi, yo da ka mira ci gar na, yi si na le. Yo waɗ da ka mira slikiɗ himaˀ fõh fõh ar ya gar.

²⁸Naŋ kanah, ki slikiɗ himaˀ le fõh fõh ng'ar ya, yo mi ɗik ngi huhumo vu na, a co le sesẽŋ a slimiɗ ɗu. Vurˀe, yi sa cuw dangwa avu hutuŋ, yo lejeŋ kulaˀ a mi ɗike. I sa mi ti ka ngi hay ɗik a muŋ tir jiviɗ ka muso zleˀe ti raˀa.

²⁹Ka so na, Ezekiyas, gwatay masa gam ngi buguw gwatay masa gama, t'ani:Tumbulumna, mizli a sa zumam di i daw, mengeleleŋ naŋ midiɗ a ruwuy zleˀe, mupuso ti pusu. Didirba kwana, i misi hiri naŋ masa puso ti pus pal naŋ. Angi vi mimakir naŋ na, kisa zligam, kisa gam sifi ngi gwataya, yo kisa hirvam gudubunhaya, joˀ kisa zumam yi taŋhaya.

³⁰Mizli milaham, mindiram ti siifa a wuzla sukwi ngi Zuda, a sa tiram kaɓa widis mapuso ti pus aruŋ, mira dira slaslalak naŋhaya hǝɗ hǝɗ nga ruwuy, yo nga muŋ kwana ara yi.»

³¹Asi na, mizli mindiram a wuzla mizli, a sa boko a Zeruzaleme, yo mizli milahama, a sa slikiɗam deŋ deŋ a Siyoŋ. Masa gakahana gar na i wuɗ ngi Buymisemuŋ matiɓi ka vu na.

³²Vurˀe, Buymisemuŋ a ɓi ani vur ɓi ngi buy Asiri: N'anta sa co ng'ar walahay hana ta, naŋ anta sa lih luvut ng'ara ta, naŋ anta sa ɗum ti mbaray naŋhaya ngi zlaŋ ngi kiɗa vu ta, yo naŋ anta sa zih muyuŋ zah zah nga ciki moholo ɓa ngi jiɗ ti ra ta.

³³Jiviɗ naŋ muso zleˀe ti ra na, a sa mi ti raˀa a muŋ, manja a sa co kulaˀ le ng'ar walahay hana, ma ɓi hana i ya Buymisemuŋ.

³⁴I sa jigina walahay hana, ɓa i lahaŋ. Asi ya Bumbulvuŋ, yo asi teŋteŋ ngi gawla ɗu Daviti.»

³⁵Dambalaka ngi duvuɗ nah vuna si na, modro ngi Buymisemuŋ a ci ng'ar li pi sar ngi soje Asiriheye, a kiɗ mizli vagay vagay durmuk skat ti kukur dangafaɗ nga zlum. Ngi miprike, mizli mindiramay a slikiɗam, keɗ na, vagay ngi mizli mumucahay tuwa soɗoɗ soɗoɗ.

³⁶Senakerip, buy Asiri a slikiɗ ti li pi sar ngi soje naŋhaya, aru nga Niniv, a cifi a diga.

³⁷Ngi pas numuŋ ada na, Senakerip ara dir dibiɗ ar hay ngi kuli naŋ Nisrok. Akẽh na, ziri naŋ mizilehey cuw a kiɗaka vagay ti maslalam, joˀ taŋ a kilam nga hirwuy Ararat. Joˀ Asarhadoŋ, mangal naŋ mekelem pal ma, a zuɓa li naŋ.