Read South Giziga 2KI 2 Bible Online

2KI 2 - South Giziga bible

2KI 2

¹Ti di Buymisemuŋ muzuɓa Eli nga muŋ ar misure na, naɓa Eli vuna ati Elize ara ram zleˀe nga Gilgal.

²Ti taŋ mira ram a jiviɗe na, Eli a ɓa Elize: «Ambuh takwa, ka cifi aka, vur Buymisemuŋ ara sliniy nga Betel.» Elize a mbiɗaŋ di: «Ti slimiɗ ngi Buymisemuŋ misi ti siifa, yo ti slimiɗ ɗik, ka hirnga ɗike, hadam, y'anta puluw ta!» Joˀ taŋ cuw taŋ a ram nga Betele.

³Zir ngi mijiviɗey misi a Betele, a boko, a ɓaka Elize na: «Buymisemuŋ a sa zuɓa buy ɗike nga muŋ dana na, ki si na le ya?» Elize a mbiɗa taŋ di: «Haˀaw, ya vuna i si na le ya, cifam teˀteˀe.»

⁴Eli tuwa, a ɓa Elize ma: «Elize, cifi aka, vur Buymisemuŋ ara sliniy nga Zeriko.» Elize a mbiɗaŋ di: «Ti slimiɗ ngi Buymisemuŋ, yo ti slimiɗ ɗik, ka hirnga ɗik na, hadam, y'anta puluw ta.» Joˀ taŋ cuw taŋ a ram nga Zeriko.

⁵Zir ngi mijiviɗey misi a Zeriko a kirohoko ng'avu Elize, a ɓakaŋ: «Buymisemuŋ a sa zuɓa buy ɗike nga muŋ dana na, ki si na le ya?» Elize a mbiɗa taŋ di: «Haˀaw, ya vuna i si na le ya, cifam teˀteˀe.»

⁶Eli a ɓa Elize: «Ambuh takwa, ka cifi aka, vur Buymisemuŋ ara sliniy nga mizaw Zurdeŋ.» Elize a mbiɗaŋ di: «Ti slimiɗ ngi Buymisemuŋ, yo ti slimiɗ ɗik, ka hirnga ɗik vuna, hadam, y'anta puluw ta.» Joˀ taŋ cuw taŋ a ram nga mizaw Zurdeŋ.

⁷Mizli kukur zlum a wuzla ziri ngi mijiviɗey a sipaka taŋ, waɗ ara cicam hirkim a mbuŋ mizaw Zurdeŋ, zar neˀ avu ti Eli ati Elize midedeŋ a mi mizaw Zurdeŋ.

⁸Akẽh na, Eli a cuko zana naŋ, a fuɗa faɗ faɗ, waɗ a kiɗa yama ti naŋ, yam a ngic a wuzla cuw. Taŋ tuwa cuw taŋ a cohom ti sar ngbaŋngbaŋ.

⁹Ti taŋ mira cohom na, Eli a ɓa Elize: «Dumbuŋ, ɓa hã Buymisemuŋ masa zuɓiy kileŋ baɗ avu ka na, cufuɗ gwat ka mawuɗ ɓa i guw di.» Elize a mbiɗaŋ di: «Anja i wuɗ i lum avu ka na, i ˀUf ngi ɗik ka mijiviɗ na.»

¹⁰Eli a ɓaŋ: «Kay, ki cufuɗ di i gwat mutuwaˀa. Da kisa puriy le tapas Buymisemuŋ masa zuɓiy nga muŋ na, naɓa gwat ka mucufuɗ na, a sa gi ti di nah so. Da kisa puriy ta na, naɓa gwat ka mucufuɗ na, anta sa gi ta.»

¹¹Eli ati Elize ara ram cuw taŋ bal ti kiɗa slir a jiviɗe, keɗ na, mota ngi vu njilim njilim, pilisey cuw maɗiɗakaŋ, a wuɗuka wala taŋ. Joˀ Eli a cuh nga muŋ ar misuwre.

¹²Elize mupura keɗ na, a zla a widi: «Baha! Baha! Ka mota ngi vurum ngi Israyel, yo ka mizli ngir naŋ ma.» A dirba nah na, naŋ anta pura mata. Naŋ mapura mata tuwa na, a ja zanakaw, a ngira cããt a wuzla cuw.

¹³Akẽh na, a zuɓa zana midiɗo tivi Eli tuwa, a mi nga mi mizaw Zurdeŋ.

¹⁴A zuɓa Zana midiɗo ti gagalaˀay Eli, a kiɗa yama ti naŋ, a ɓi: «Bumbulvuŋ Buymisemuŋ, ngi Eli na, naŋ a maka?» Dar Elize vuna a kiɗa yam tuwa ya. Yam a wunuk a wuzla, dar Elize a cuh njiraŋ njiraŋ.

¹⁵Zir ngi mijiviɗey misi a Zeriko, mupuroko Eli zar kileŋ tuwa, a ɓam: «ˀUf ngi Eli a cifi le ar Elize.» A soko nga ji di hirnga, a huruk hurukam a mbuŋ naŋ, hã a hurukom huruk a ruwuy.

¹⁶a ɓakaŋ: «Ka da ki pura kwa? Mizli gambarahay ada a wuzla ndra gawla ɗikeye kukur zlum. Pula ndra jiviɗ ɓa i ram nga sipo buy ɗik na takwa! Asinta, ˀUf ngi Buymisemuŋ a zuɓa le, ara hiziga le a hirnga muwãhay malla ar sozohoy kwani?» Elize a mbiɗa taŋ di: «Ko ki slinam mbur ta si.»

¹⁷Amma ara cufuɗakaŋ hirdam hirdam vurˀe, mbak Elize a ɓa taŋ: «Da kine na, slinaka taŋ so.» Dar a slinaka mizli mizli ngir zlumoy tuwa nga sipo Eli, hã hin makir, ko a lumaka ta.

¹⁸Ti taŋ mumoko ng'avu Elize muro a Zeriko aruŋ tuwa na, a ɓa taŋ: «Yi ɓukum le: ki ram ta kini takwa!»

¹⁹Mizli ngi Zerikohoy a ɓaka Elize na: «Kumani, pura ɗi, walahay ndra na, naŋ kuy ngi cifi anga, amma yam i malambaˀa, yo hirwuyo kwana i mumuca le.»

²⁰Elize a ɓa taŋ: «Inga sikiy ti taasa nawaya mipitikayya ti mandaŋ araŋ.» Dar mizli a sakaŋ di.

²¹Akẽh na, Elize aru ng'ar li yam mabawa tir miviɗiviɗi naŋ tuwa. A hiziga mandaŋ fuk ng'araŋ, a ɓi: «Buymisemuŋ a ɓi ani: ‹I ɗiya yam hana le, a tiri le ndum, anta kiɗ vu mata, yo anta muca li mata.›»

²²Naŋ kanah, hã dana kwana, yama naŋ da i mezle aruŋ. A gi le kaslsla kaɓa mingiɓi ngi Elize miɓa.

²³Elize a slikiɗ baɗ ti Zeriko, aru nga Betel. Ti naŋ ma ru a jiviɗe na, ziri mizilehey a boko, dar a singiram angaŋ, a ɓakaŋ: «Aru baɗ ti ka, mbur mukuleɗ hirnga! Aru baɗ ti ka, mbur mukuleɗ hirnga!»

²⁴Elize a mbuɗo hiri, a zizira taŋ ziziri ziziri, a nisa taŋ ti slimiɗ ngi Buymisemuŋ. Akẽh na, gwatay kaɓa mbaagumoy cuw a boko tisi widisey. Gwat misãmi tayna tuwa, a kiɗam asi ziri tayna kukur mufaɗ nga cuw.

²⁵Akẽh ma na, a slikiɗ baɗ ti kẽh, aru nga muwã Karmel, yo a dirba nah, a mi nga Samari.