Read South Giziga 2KI 20 Bible Online

2KI 20 - South Giziga bible

2KI 20

¹Angi hin tayna, Ezekiyas a ki jiji, hãka ngi muc di wãˀ. Mijiviɗ Ezayi, mangal ngi Amot a so lumaŋ, a ɓaŋ na: «Buymisemuŋ a ɓi ani: Ɗuva ɓi da mizli ngi hay ɗikeye, asi kisa mucu, k'anta sa slikiɗ tir jiji ɗik na ta!»

²Ar nah na, Ezekiyas a mbiɗi hirnga ng'avu mohol, dar a tumbulo Buymisemuŋ, a ɓaŋ:

³«Haˀaw Buymisemuŋ, ya micifi a mbuŋ ɗik na, ti jiviɗ naŋ kaslsla, ti mevel mezle, yo yi gi di i gwat mucuruw hiri. Ambuh, wulka keŋ takwa!» Dar Ezekiyas a tuwuy tuwuy mangalaw kol kol.

⁴Ezayi, naɓa a bi ti wazlaray ngi wuzla t'aruŋ sina, Buymisemuŋ a ɗuvaŋ mingiɓi ani, a ɓaŋ:

⁵«Mi ng'avu Ezekiyas, buy ngi mizli ɗuwoyo ɓaŋ na: Bumbulvuŋ Buymisemuŋ, ngi dunuk Davite, a ɓi: «Yi cine diradibiɗ ɗike le, yo yi pura tuwuy mangalaw ɗike le. Wurenna, yi sa mbuluw tir jiji ɗike, duwul ngi diga na, kisa ru gu ng'ar hay ngi Bumbulvuŋ.

⁶I sa muruɗuw hin ngi siifa ɗike nga mbuŋ ava vi kuruˀ nga zlum. I sa lihuw ka ati walahay misenna tisi haŋ ngi buy Asiri. Ya masa jigina walahay hana na, tisi ya Bumbulvuŋ vuna, yo tisi gawla ɗu Daviti.»

⁷Akẽh na, Ezayi a ɓi ɓa a wuɗoko ˀuruf miyaˀa, mija naŋ loŋ arleˀe. A zuɓaka, waɗ a sluruɓaka ngbaˀ ar li mihisla avu buyo joˀ Ezekiyas a mbulu.

⁸Dar Ezekiyas a ɓa Ezayi: «Ɓa Buymisemuŋ a sa mbuliy, yo duwul ngi diga, i sa ru gu ng'ar hay ngi Bumbulvuŋ na, i sa si na vuna avu mike?»

⁹Ezayi a mbiɗaŋ di: «Buymisemuŋ masa ga gwat naŋ miɓa na, kisa si na avu gwat anihĩ: Susuɗuk a muruɗ nga mbuŋ sar taˀtaˀ kuruˀu malla a mi nga dirba sar taˀtaˀ kuruˀ na, ki hiyĩ di i wanaka?»

¹⁰Ezekiyas a mbiɗaŋ di: «Ɓa susuɗuk a muruɗ nga mbuŋ sar taˀtaˀ kuruˀ na, i gwat mutuwaˀ ta, amma ɓa a mi nga dirba sar taˀtaˀ kuruˀna, i gwat mutuwaˀa.»

¹¹Dar mijiviɗ Ezayi a tumbulo Buymisemuŋ ɓa a mo ti susuɗuko nga dirba sar taˀtaˀ kuruˀu, joˀ susuɗuk a mo nga dirba sar taˀtaˀ kuruˀ ar li ɗuva sar mitaˀtaˀ ngi ci ng'ar hay ngi Akasa.

¹²Ti di nah na, buy madiɗa ngi Babiloŋ, mazilaka Merodak- Baldaŋ, mangal ngi Baladaŋ, a slin ti letirey ati gwatay ngataraŋ da Ezekiyasa, asi a cine na, Ezekiyas a gi gu ta le zleˀe.

¹³Ezekiyas a cin ndum haɗa ti so ngi mislineye, a biga taŋ li wi vu ti zlili naŋhay gar, ɓiri bara ati ɓiri tapasl tapasl, urdihey ati malay mazãˀãm ndum haɗa. A biga taŋ li wi vu ti gwat ngi vurum naŋhaya ati gwat ngi wi vu ti zlili naŋhay gar. Ɓa gwat a hay naŋ, yo angi zumabuy naŋ, manja Ezekiyas a biga taŋ di na, anta.

¹⁴Mijiviɗ Ezayi a so luuma buy Ezekiyasa, a ɓaŋ na: «Mizli tayna a ɓukuw mbrike? A soko vuna ti damaka?» Ezekiyas a mbiɗaŋ di: «A soko ti Babiloŋ, hirwuy mikileŋ»

¹⁵Ezayi a mbiɗaŋ di ma: «A puram mi a hay ɗike ka?» Ezekiyas a mbiɗaŋ di: «A puraka gwat misi a hay ɗuwoyo le ng'ar: zlili ɗu gar manja yi biga taŋ di ta na, anta»

¹⁶Ezayi a ɓa Ezekiyas na: «Cina mingiɓi ngi Buymisemuŋ:

¹⁷Hin ani a sa ndilawa, gwat misi a hay ɗik gar, yo gwat misi dideˀ ɗikey micikilaka taŋ gar na, a sa hilaka taŋ nga Babiloŋ. Buymisemuŋ a ɓi ko gwat masa ndir loŋ anta.

¹⁸Haɗi a wuzla dideˀ ɗikey ati muboko ti kwacay ɗikeye, a sa hilaka taŋ nga diga. A sa nguɗoko taŋ a hay buy madiɗa ngi Babiloŋ»

¹⁹Ezekiyas a mbiɗa da Ezayi: «Mingiɓi ngi Buymisemuŋ ka miɓa na, i ɓi mezle» Asi mike na, a ɓi a kwacay naŋ: «Angi siifa ɗu gar na, mizli a sa ndiram zuy zuy, a sa cifam setette takwa?»

²⁰Is ngi slra Ezekiyas miga, gwat madiɗahay, naŋ miga taŋ gar, waɗ slra mekeley, futuŋ naŋ mila ati zlazlar naŋ micira ngi so ti yam ng'ar walahay gar na, i mutoho taŋ le ar ɗerewol mazilaka Ɗerewol ngi slra ngi buy Zudahay.

²¹Ezekiyas a mucu. Dar mangal naŋ Manase a zum buy ar li naŋ.