Read South Giziga 2KI 21 Bible Online

2KI 21 - South Giziga bible

2KI 21

¹Manase micifi buy madiɗa na, naɓa naŋ ti vi kuruˀ nga cuw. A zum buy a Zeruzaleme vi kukur zlum. A zilaka mumuŋ Hefsi-Ba.

²A gi gwat malambaˀ a mihiri ngi Bumbulvuŋ. A sipi gi gwat mukuyta wãˀ ngi sukwi ngi mizli, Bumbulvuŋ muɓula taŋ, ɓa a pulaka li da Israyeley na.

³Li miɗingir ɗingirey, cine naŋ Ezekiyas mususuyumo taŋ zleˀe avra na, naŋ a zla a ɗiya hiri taŋhay a muŋ ma. Aɗiyi kuli dumoy kaɓa Akap, buy Israyel miɗiya zleˀe na ya, a huruk huruk a mbuŋ gwat ngi muŋhoy.

⁴A ɗiyi li gi mikulihey da kulihey ar hay ngi Bumbulvuŋ. Buymisemuŋ a ɓaŋ vur hay naŋ nah ani: «I sa biga y'ada na angaŋ»

⁵Aɗiyi li gi mikulihey da gwat ngi muŋhoy gar a wazlaray mucuwoy ar hay ngi Bumbulvuŋ.

⁶A gi mikuli ti mangal naŋ zlam zlam ar vu. A gi slra ti ɓi ngi pura jubuɗoy, a gi cekenehey waɗ a hizik njoloy. A gi gwat malambaˀ ti gidaŋ a mihiri ngi Buymisemuŋ, hã a jaŋ mevel.

⁷Naŋ miɗiya kuli Asera deŋ tuwa na, a cica angi hay ngi Buymisemuŋ. Buymisemuŋ a ɓa Davit ati mangal naŋ Salomoŋ le ani vur Hay naŋ nah: «Hay misenna ati walahay Zeruzalem misenna, ya muwunaˀ a wuzla walahayay ngi si ruwuy ngi sukwi Israyeley kuruˀ nga cuw na, yi sa biga anga ndrehhe, yaˀ da.

⁸Ya ˀnta wuɗ liˀi ti Israyeleye kiŋkiŋ lambaˀ kileŋ avu hirwuy ya muvula da dideˀ taŋhay na mata. Na so na, ɓi ya mujuwa taŋ ati ɓimuɗuvahay, gawla ɗu Moyis muvula taŋ di gar na, sey da ara jaka taŋ a hirnga.»

⁹Amma Israyeley a cinam mi ta. Manase a pa taŋ mi, hã a gam malambaˀ fineˀ ngi sukwi ngi mizli, Buymisemuŋ mingizla taŋ a mbuŋ taŋ Israyeley na.

¹⁰Akẽh na, Buymisemuŋ a vula mingiɓi naŋ da gawla mijiviɗ naŋhay ɓa a ɓaka ani:

¹¹Manase, buy Zuda a ga gwat malambaˀ tayna le. A gi malambaˀ le fineˀ ngi Amorihey migaka zleˀe dumbuŋ ar naŋ na, hã a pa mi da zudahay ti kuli tayna ɓa a gam mungra.

¹²Bumbulvuŋ Buymisemuŋ, ngi Israyeley a ɓi ani vurˀe: «I sa so ti bonoy ar Zeruzalem waɗ ar Zuda, hã ko waka gar misa cine le na, slimiɗ anta sa wuɗ cin naŋ ta wãˀ.

¹³I sa ngizla Zeruzaleme ngirnin wãˀ kaɓa ya mingizla Samari ati hay ngi Akap ngirnin wãˀ na ya. I sa ngizla mizli ngir walahay Zeruzaleme ger ger kaɓa magiram helelem avu skiɗ, a dirba nah a sa tiɗaka tiɗeˀe.

¹⁴Mizli ɗuwoy mineˀ mindiram ar siifa na, yi sa pula taŋ mbaka: yi sa vula taŋ asi haŋ ngi mesene taŋhay, joˀ mesene taŋhay a sa tiɓaka gwat taŋhaya, yo a sa zumaka hirwuy taŋ gar.

¹⁵Asi mike na, zle ti dideˀ taŋhay muboko put ti Ezipte, hã a ndilo dana na, a gam di i gwat malambaˀ a mihiri ɗu, yo a pulaka gi gwat ngi slikiɗiy mevele mbak le ta si»

¹⁶Manase a kiɗ mizli migam gwat tahay le haɗa, hã pumbus taŋ a naha walahay Zeruzaleme gar. Mungra misi naŋ mihizigiɗa Israyeley ɓa a gam gwat malambaˀ a mihiri ngi Buymisemuŋ na, mbak nah le ɗagay.

¹⁷Manase, ɓi naŋ mekelemey mindiram, slra naŋ miga taŋ ati mungra naŋ miga gar na, a tohoko taŋ le ar ɗerewol mazilaka Ɗerewol ngi ɓi ngi slra ngi buy Zudahay.

¹⁸Manase a muc, ara luuma dideˀ naŋhay a ruwuy, a dikakaŋ ar jarne a hay naŋ. A zilaka jarne nah vuna ma na «Jarne ngi Uza.» Dar mangal naŋ Amoŋ a zum buy ar li naŋ.

¹⁹Amoŋ micifi buy madiɗa na, naɓa naŋ ti vi kukur cuw nga cuw. A zum buyo vi cuw a Zeruzaleme. A zilaka mumuŋ naŋ Mesulemet, zuŋ ngi Harus, mbur Yotba.

²⁰Amoŋ a gi di i gwat malambaˀ a mihiri ngi Buymisemuŋ kaɓa cine naŋ Manase.

²¹A sipi di i sar ngi cine naŋ heˀ. A gi mezegwel da kulihey kaɓa cine mihuruk huruk zleˀe a mbuŋ taŋ na ya.

²²Manase a pula Bumbulvuŋ Buymisemuŋ, ngi dideˀ naŋhaya mbaka, ko naŋ anta sipa jiviɗ ngi Buymisemuŋ ta.

²³Amoŋ, gawla naŋhay a gam gidiɓi ar naŋ buy, a kiɗaka vagay a hay naŋ vuna.

²⁴Amma mizli migam gidiɓi ar buy Amoŋ gar na, mizli ngi si ruwuyoy a kiɗaka taŋ gar vagay vagay, a cam buy ar li naŋ, i mangal naŋ Zoziyas.

²⁵Amoŋ, ɓi naŋ mekelemey mindiram ati slra naŋ miga taŋ gar na, i mutoho taŋ le ar ɗerewol mazilaka Ɗerewol ngi ɓi ngi slra ngi buy Zudahay.

²⁶A dikaka Amoŋ ar zivi naŋ, angi jarne ngi Uza. Dar mangal naŋ Zoziyas a zum buy ar li naŋ.